Te paturu nei te Ekalesia i te faanahonahoraa ia tupu maite te maramarama.
I to Norman D. e o Luana Shumway, na taata faatere no te ohipa fariiraa a te Ekalesia i Salt Lake City, farereiraa i te hoê orometua keretetiano mai te pae tooa o te râ i ropu no te mau tuhaa fenua amui, ua parau oia ia raua e, aita oia i ite no te aha râ oia i haere mai ai i reira. Ua faaoti ihora te taeaʻe e te tuahine Shumway ia afaʻi iaʼna no te hoê tere mataʻitaʻi i te Pû Totauturu a te Feia Moʻa i te Mau Mahana Hopea Nei no te tauturu iaʼna ia ite i te huru no te Ekalesia.
« Ua hau te piti hora to maua haereraa na muri iaʼna, te mau parau taʼna i parau tamau noa, oia ïa : ‹mea rahi tera,› ‹e ohipa umere mau tera›, ‹mea maere mau. › Ua tamau noa oia i te parau : ‹E, mea rahi roa te mau mea o te nehenehe e haapii ia riro ei feia apee i te Mesia.› »
Te haere mai nei te mau huru taata atoa mai te mau Boudiste, tae noaʼtu i te faehau, tae noaʼtu i te mau tiʻa mana faatere hau, tau hanere mau taata faatere i roto i te imiraa faufaa, te poritita, e te mau faaroo e mataʻitaʻi i te mau pû faatere o te Ekalesia i Salt Lake City i te mau matahiti atoa. Mea farii-poupou-hia ratou e te feia faatere no te fariiraa a te Ekalesia e te haapii nei ratou i te aamu o te Ekalesia e te haapiiraa i te mau vahi e mataʻitaʻihia, mai te Temple Square, te Fare Tuatapaparaa, te Pû no te Totauturu, te Pû Parururaa i te Taata, te Fare Anavaharau a te Ekalesia, e te Pû Amuiraa.
« Te tiʻaturi nei tatou e nehenehe ta tatou e faaite i teie mau manihini e aha ta te Ekalesia e rave nei, e ere i te mea titauhia ia parau rahi atu ia ratou », te paarau ïa a te taeaʻe Shumway. Ua horoʻa te Peresideniraa Matamua ia Lowell e o Tamara Snow, i te mau arataʻiraa mai teie te huru i riro na hoʻi raua ei na taata faatere i te fariiraa a te Ekalesia : « Eiaha e paraparau rahi roa. Vaiiho na te hohoʻa ihoa o te Ekalesia e paraparau. »
Oia mau â te reira. I te Pû Totauturu, e ite te mau manihini i te mau mea ta te Ekalesia e tiʻaturi ra i roto i te faaohiparaa a haere ai ratou e mataʻitaʻi i te mau faanahoraa no te totauturu. « Ei melo no te Ekalesia, ua fafau tatou i te haapaʻo i te feia veve e te ravaʻi ore », ta Mel Gardner, te taata faatere no te fare toa a te epesikopo e vaira i te Pû Totauturu. « Tera râ, te mau mea atoa ta tatou e rave ua faanahohia ïa no te paturu i te faaravaʻiraa. E te mau taata o tei farii i te tauturu e nehenehe ïa ta ratou e tauturu ia vetahi ê na roto i te raveraa i te ohipa. »
E arataʻi te taeaʻe Gardner i te mau manihini na roto i te fare hooraa maa e aita e afata aufauraa moni, i reira hoʻi te feia ravaʻi ore e haere atu ai o ta to ratou mau epesikopo i faaue ia ratou ia haere atu e te reira hoʻi maa maitai roaaʻe tamoni ore. »
E maere te mau manihini i te rahiraa o te feia e tavini nei i roto i te fare toa mai te tamoni ore mai roto mai i te mau tĭtĭ, e i roto i te fare tunuraa faraoa, tapunuraa maa, te tanuraa raau, e te Fare Deseret Industries. Teie te hoê parau i fahitihia e te peropheta Iosepha Semita no te aha tera huru varua e itehia ai i roto i te Ekalesia : « Te hoê taata tei î i te here o te Atua, eita oia e tapea noa te haamaitairaa na toʼna noa utuafare, ia haamaitai atoa râ i to te ao nei, e te hinaaro ia haamaitai i te mau huru taata atoa » (History of the Church, 4:227).
« Tera ïa te huru » : te haamaitairaa e te taviniraa, a parau ai te taeaʻe Gardner i te hopearaa o te tere mataʻitaʻi, a titau manihinihia ai te mau manihini ia inu i te totora e ia amuamu i te tahi pata paari hamanihia e te Deseret Dairy.
Te vaira i roto i te Pû Totauturu a te feia moʻa i te mau mahana hopea nei i te faanahonahoraa totauturu a te Ekalesia na te ao nei. Te faaite ra o Elder Jerry Brown, te hoê misionare tamau : « E mau pĭpĭ tatou na te Mesia, e i roto i te mau mea atoa ta tatou e rave, te tamata nei tatou e rave i te hiʻoraa o te mau mea o Ta ʼna i haapii », a arataʻi ai oia i te mau manihini na roto i te mau piha vairaa ahu, tiaa, raau rapaau maʻi e te mau materia no te haapiiraa o tei ineine no te hapono atu. Te tahi mau taime e farerei atu te mau manihini i te mau taata e faaineine i te mau taata i roto i te Pû Totauturu, tei roto te haapiiraa no te ohipa e te reo.
« Mea au mau ia ite atu ia hapono anaʻehia te ahu, te raveʻa no te raau rapaauraa maʻi, e te tahi atu mau materia i te hepetoma tataʻitahi na te mau fenua o te ao nei e titauhia ia tauturu », te parau ïa a William D. Reynolds, te taata faatere no te Pû Totauturu. « E mea mahanahana atoa ia ite atu i te oaoa i roto i te mau mata o te feia faaineine a haapii ai ratou i te parau no te faaravaʻiraa e te aravihiraa no te ohipa. »
I Temple Square, tei reira te mau tuahine misionare te horoʻaraa i te mau parau poroʻi no te Evanelia. E nehenehe ta te mau manihini o te Ekalesia e farii i te hoê tere mataʻitaʻi na te mau tuahine misionare o tei ite i to ratou iho reo, mea pinepine te tere mataʻitaʻi taaê i te tupu. Te haamanaʻo ra te Tuahine Shumway i te hoê taime i to te hoê manihini aniraa e aha te manaʻo o te mau initia no te fenua Marite iho no niʻa i te Buka a Moromona. Pahono atura te tuahine misionare : « E, no roto mai au i te ati Blackfoot e te ati Shoshone. » E i muri iho ua faaite atu oia i toʼna here no te Buka a Moromona.
I to te hoê pŭpŭ tuʻaro no Monaco mai taeraa mai no te Tuʻaro o te tau toʻetoʻe i Salt Lake City i te matahiti 2002, te vaira ta ratou hoê uiraa : te hoê tere mataʻitaʻi i te Pû Tuatapaparaa Utuafare. I reira, ua haapii mai te mau manihini e nehenehe « te mau utuafare ia vai amui noa e amuri noaʼtu. » Ua haamaramarama o Elaine Hasleton, te faatere no te mau ohipa farereiraa i te taata e : «Te tiʻaturi nei tatou e nehenehe tatou ia amui atu e to tatou mau utuafare e amuri noaʼtu, e ia riro e te hoê tuhaa no te reira maoti râ te imiraa ia ratou. »
Mea pinepine atoa te mau manihini i te haamata i te maere no te ohipa tuatapaparaa utuafare a ite ai ratou i te mau taata e rave rahi o te imi ra i to ratou tuatapaparaa no na uʻi e maha. I roto i te hoê tere mataʻitaʻi, ua faaiteitehiaʼtu, i te hoê manihini no te pae hitiʻa o te râ no Europa i te buka utuafare tae noaʼtu te mau buka papaʻi no te mau pahi e te tereraa o toʼna mau tuatapaparaa e tei tamahanahana i toʼna ra aau. Te haamanaʻo ra te tuahine Shumway e : « Piti hora e te afa i muri aʻe, ua parau atu matou iaʼna e mea titauhia ia haere i mua, e ua parau maira oia, ‹A haere atu outou, e faaea mai au.› »
Mea rahi te mau manihini e haere noa mai, e hoʻi ratou mai te mau manaʻo putapû i roto ia ratou. Te hoʻi nei te mau manihini io ratou ma te parau e : ‹Ua haere mai au ma te ite ore i te parau no te Eakalesia, e i ô nei toʻu iteraa i te fariiraa mahanahana, te auhoaraa, te here, e te haapaʻoraa maitai› », te parau ïa a te taeaʻe Snow. E, te na ô faahou ra te taeaʻe Shumway e, « o te reira ta matou e tamata nei i te rave na mua roa : te faatupuraa i te maramarama i rotopu i te ao nei e te Ekalesia. »