« E ao to tei faatupu i te parau hau ra »

Elder Russell M. Nelson

No te Pŭpŭ no te Tino Ahuru Ma Piti Aposetolo

Ua riro te hau ei titauraa matamua na tatou.

Te ohipa faahiahia roa aʻe i roto i te mau ohipa atoa i ravehia e to matou utuafare, o to matou ïa mau tere i te Fenua Moʻa ra. No matou nei, ua riro to matou mau ratereraa i taua tuhaa o te ao nei ei tauiraa i te huru o te oraraa. I teie râ tau, te riro nei te Fenua Moʻa ei vahi no te arepurepuraa, ei vahi hoʻi eita e tano i te feia e hinaaro nei e haere i reira no te farii i te maitai pae varua. Ia hiʻohiaʼtu, mai te mea ra e, ua î te ao taatoa nei i te mau ohipa iino aitâ i itehia aʻe nei. Te tapitapi nei te manaʻo o te feia e pure nei ia roaa ia ratou te hau, ma te aro i te enemi o te riʻariʻa.

Te Hau e te Mârô

Ua tohuhia i roto i te mau papaʻiraa moʻa te anotau ati ta tatou e ora nei. Ua ite-atea-hia to tatou nei anotau ei anotau no te « auahi, te vero, e te au auahi i te mau fenua êê ra ; … tamaʻi, e te parau no te tamaʻi, e te aueue fenua i te mau vahi e rave rahi … viivii rarahi i niʻa i te fenua ; … e te mau huru ino atoa¹. »

Te haapapu nei taua parau tohu ra i te hoê aamu i roto i te papaʻiraa moʻa no niʻa i te piti o te uʻi o te oraraa o te taata² i niʻa i te fenua nei : « E i taua mau mahana ra, ua rahi roa to Satane mana i rotopu i te taata, e arepurepu ihora to ratou mau aau ; e mai reira mai hoʻi te tupuraa te mau tamaʻi e te haamaniiraa toto ; e aro atura to te taata rima i toʼna iho ra taeaʻe, i te… titauraa i te mana³. » Mai te tau o Kaina raua o Abela⁴, Esau raua o Iakoba⁵, e o Iosepha tei hoohia i Aiphiti ra⁶, ua ama noa te auahi o te riri i roto i te mau utuafare.

No te riri i rotopu i te mau taeaʻe e te mau taata tupu, riro atura te mau oire moʻa ei mau oire no te oto. Ia feruri anaʻe au i te ati o taua mau vahi ra, e haamanaʻo vau i te hoê parabole tahito : « Te feia taiʻata ra e tupu te ino ia ratou i roto i te oire : na te feia paari râ e faahoʻi i taua ino ra⁷. »

Te Arataʻiraa a te Parau Haapiiraa

Na te papaʻiraa moʻa e haapapu mai i te tumu e te raau o te maʻi riri o te taata nei : « No te mea te taata tino nei, o te enemi ïa o te Atua, e e enemi oia mai te hiʻaraa o Adamu mai â, e e enemi hoʻi a muri e a muri noaʼtu ; area [maori râ] ia auraro oia i te parau a te Varua Maitai, e ia faaruʻe i te mau peu a te taata tino nei, e ia riro ei taata moʻa na roto i te taraehara a te Mesia ra te Fatu⁸. »

Hoê noa iho raveʻa e upootiʻa ai te Hau maori râ, ia faaorehia te aau mărô, e ia monohia te reira i te hinaaro ia ora i te hoê oraraa maitai aʻe. O te haereraa mai ia Iesu Mesia ra te « Arii no te Hau⁹» te raveʻa e vai ai te hau i niʻa i te fenua nei, e ia ite auhia mai te taata nei¹⁰. Ua fafau mai Oia ia tatou e : « E ao to tei faatupu i te parau hau ra : e parauhia hoʻi ratou i te tamarii na te Atua¹¹. »

Ua haapii Iesu i te taata nahea ia ora te tahi i pihai iho i te tahi. Ua faaite mai Oia i na faaueraa rahi e piti ra : a tahi, « Hinaaro oe i to Atua ia Iehova ma to aau atoa, e ma to varua atoa, e ma to manaʻo atoa¹²», e te piti ra, « e arohaʼtu oe i to taata-tupu mai to aroha ia oe iho na¹³. »

Na ô faahou maira Oia : « E arohaʼtu i to outou mau enemi, [e] faaoraʼtu i tei tuhi mai ia outou¹⁴. »

Ua haapii mai Oia i te Ture Auro : « E te mau mea atoa ta outou i hinaaro ia vetahi ê ra, e na reira atoaʼtu outou ia ratou¹⁵. » Fatata i roto i te mau faaroo rarahi atoa, te itehia nei teie ture. Na reira atoa te tahi atu mau faaroo, mai ia Confucius, e o Aristote, ua haapii atoa ratou i te reira ture¹⁶. Inaha, aita hoʻi te Evanelia i hamata i te taime a fanauhiaʼi te Aiu i Betelehema. E mea mure ore râ te reira. Ua porohia te reira i te haamataraa ra ia Adamu raua o Eva. Ua vai maite te tahi mau tuhaa rii o te Evanelia i roto i tera nunaa e tera nunaa. Tae roaʼtu i roto i te parau no te mau Atua no te mau tau matamua, ua vai atoa i roto i te reira te tahi mau tuhaa o te parau mau no roto mai i te mau tau tuuraa matamua ra.

Noaʼtu te vahi e noaʼtu te huru o te faahitiraa, tei roto i te Ture Auro te ture morare o te Basileia o te Atua. Te opani nei te reira i te hoê taata ia haru i te tiʻaraa o te tahi. Ua ruuruuhia te mau nunaa, te mau taatiraa e te mau taata. Ma te aroha e te faaoromai, te mono nei te reira i te parau ra e, « e mata ra e mata ïa, e niho ra, e niho ïa¹⁷» Mai te mea e, e tamau noa tatou i te faaohipa i taua ture tahito ra, i te pae hopea, aita to tatou e mata faahou e aita hoʻi e niho faahou¹⁸.

E mea maramarama ohie roa te parau e, e na reira atu ia vetahi ê i ta outou e hinaaro ia na reira- atoa-hia mai outou. Te faaite mau ra te reira i te natura mau o te mau tamaiti e te mau tamahine tataʻitahi a te Atua¹⁹. Te titau nei te mau papaʻiraa i te mau metua ia haapii i ta ratou mau tamarii eiaha « ia tamaʻi e ia mărô hoʻi te tahi i te tahi, e ia tavini atu i te diabolo, te fatu o te hara.» « E haapii râ tatou ia ratou ia aroha te tahi i te tahi, e ia tauturu te tahi i te tahi²⁰. »

Ua haapii mai Iesu i te faufaa o te faahauraa e te faatitiʻaifaroraa i te peʻapeʻa i rotopu i te taata. Te na ŏ ra Oia e :

« O te taata i riri noa i toʼna taeaʻe … e au atoa iaʼna te haavaraa …

« E teie nei ia hopoi oe i ta oe taoʻa horoʻa noa i te fata ra, e ua manaʻo ihora oe i reira, e e hara ta to taeaʻe ia oe na ;

« E vaiiho atu i to taoʻa i mua i te fata ra, e mata na i te haere e faaite i to taeaʻe, a haere a hopoi ai i ta oe taoʻa²¹. »

Ua haapii mai te Fatu Orometua ia tatou « e hapa ta outou ia vetahi ê ra, a faaore atu : ia faaore atoa mai to outou Metua i te ao ra i ta outou hapa.

« Ia ore râ outou ia faaore i te hapa, e ore atoa to outou Metua i te ao ra e faaore mai i ta outou hapa²². »

Ua faaite mai Iesu e, e tae mai te mahana no te haavaraa. E hope paatoa te taata i te faaite atu i te parau no to ratou oraraa e to ratou huru i niʻa ia vetahi ê ra²³.

Te Mau Titauraa Sotiare

E haere apipiti noa na faaueraa toopiti, oia te here i te Atua e i te taata tupu. E ore e tiʻa ia tatou ia here mau i te Atua ma te here ore i to tatou taata tupu. E ore hoʻi e tiʻa ia tatou ia here mau i to tatou taata tupu ma te here ore i te Atua. E taeaʻe mau te taata nei, no te mea, e metua mau te Atua no tatou. Ua î te mau papaʻiraa moʻa i te aamu no niʻa i te peʻapeʻa e te tamaʻi. Te faahapa uʻana nei te mau papaʻiraa moʻa i te mau tamaʻi hamani ino, area te parau no te titauraa i te taata ia paruru i to ratou mau utuafare e to ratou tiʻamâraa, te turu ra ïa te mau papaʻiraa moʻa i te reira²⁴. No te mea hoʻi e, « te tiʻaturi nei tatou e, e mea tiʻa ïa ia auraro i te mau arii, te mau peresideni, te mau faatere hau, e te mau haava, e ia haapaʻo, ia faatura, e ia paturu i te mau ture²⁵», e piihia ïa te mau melo o teie Ekalesia ia rave i te tau faehau i roto i tera nunaa e tera nunaa. « Te faaroo nei matou e ua faatiʻahia te mau hau fenua e te Atua ei maitai no te taata nei ; e e faautua oia i te taata nei no ta ratou mau ohipa i roto i taua mau hau fenua ra, i te haamauraa i te mau ture e i te faatereraa i te reira, no te maitai e te vai-hau-noa-raa o te amuiraa taata nei²⁶. »

I roto i te Piti o te Tamaʻi o te Ao nei, a titauhia ai te mau melo o te Ekalesia ia haere e aro, ua faaite papu te Peresideniraa Matamua e : « E hopoiʻa na te faatereraa hau i te faatere i toʼna mau taata e aore râ, i toʼna huiraatira, i roto i te parau no to ratou oraraa politita, e no te faatereraa i te mau ture i te pae politita i roto i te fenua iho e i rapae hoʻi i te fenua… Area ta te Ekalesia ra, e ere ïa i te reira, e faaitoito râ oia i toʼna mau melo … ia faatura i to ratou fenua²⁷. »

E Nehenehe e Faatupu i te Hau

No te rahi o te aroraa i niʻa i te fenua nei, e rave rahi tei feruri e, aita te hau e tae mai. Aita vau e farii i te reira manaʻo. E nehenehe e faatupu i te hau. E nehenehe tatou e haapii ia here i to tatou taata tupu i te ao atoa nei. Noaʼtu e, e Ati Iuda ratou, e Arabia, e aore râ, e Keretetiano, e Indou, e haamori Bouda anei, e te vai atura, e nehenehe ta tatou e ora amui ma te haafaahiahia e ma te faatura te tahi i te tahi, ma te faaruʻe ore i to tatou mau tiʻaturiraa faaroo. Te mau mea e fanaʻo- amui-hia nei e tatou paatoa, ua hau atu ïa i te maitai i to tatou mau taaêraa. Ua riro te hau ei titauraa matamua na tatou. Ua tiʻaturi te mau peropheta o te Faufaa Tahito e, e nehenehe e faatupu i te hau, e na reira atoa anaʻe tatou. Te parau ra te papaʻi Salamo e : « O te Atua to matou haapuraa e to matou etaeta, e tauturu fatata ia roohia e te ati ra²⁸. » « Ua faaore oia i te tamaʻi e tae roa aʻenei i te hopea fenua²⁹. »

O te Metua Aberahama anaʻe tei parauhia e, « e taua no te Atua³⁰. » Ua riro te hau ei hoê o te mau titauraa matamua na Aberahama. Ua hinaaro oia ia riro ei « tamaiti arii no te hau³¹. » Ua riro toʼna huru ei tautururaa no tatou i roto i ta tatou titauraa i te hau. Taʼna na tamaiti, o Isemaela e o Isaaka, noaʼtu e, e metua vahine taaʻe to te tahi e to te tahi, ua tiʻa ia raua ia tuu i to raua mau taaêraa i te hiti no te rohi amui i roto i te ohipa hoê. Ia pohe to raua metua tane, ua rave apipiti raua i te ohipa no te huna i te tino faateiteihia o to raua metua tane³². E mea tiʻa i to raua mau huaai ia pee atoa i taua huru ra.

E puai haamanahia e te raʻi to te huaai o Aberahama. Ua parau te Fatu e, e riro mai o Isemaela ei nunaa rahi³³, e na te huaai o Aberahama, oia hoʻi, o Isaaka e haere mai ia Iakoba, e haamaitai i te mau nunaa atoa o te fenua nei³⁴.

No reira, e tiʻaraa faufaa to te mau huaai o Aberahama : ua fafauhia ia ratou e, aita to ratou e hopearaa, ia riro mai ratou ei feia faatupu i te hau. Na roto i te maitiraa a tei Teitei ra, e nehenehe ta ratou e arataʻi i to ratou puai i niʻa i te parau no te hau.

E titauhia te faaoromai rahi e te tauʻaraa parau papu i roto i te parau no te faatitiʻaifaroraa i te mau fifi i te pae politita. E rahi atu te maitai o te reira raveʻa mai te mea e, e ravehia te reira na roto i te pure.

Ua tohu o Isaia i te parau no te tiʻaturiraa no to tatou nei anotau. I roto i te parau no te haaputuputuraa o Iseraela e te parau no te faahoʻi-faahouraa mai o te Ekalesia na roto i te Peropheta Iosepha Semita, ua papaʻi o Isaia e :

« E ia tae i taua mahana ra, … ei reira Iehova e faatoro faahou ai i taʼna rima, e faaora i te toeʻa o toʼna taata, …

« E naʼna e hopoi i te tahi tapaʻo no te mau fenua i niʻa ra, e naʼna e haaputu mai i to Iseraela i faaruʻehia ra, e amui mai hoʻi i to Iuda i haapurarahia ra, mai na hopea mai o te fenua e maha atoa ra³⁵. »

E tupu mau teie mau parau tohu no te tiʻaturiraa mai te mea e, e haapaʻo te feia faatere e te mau taata atoa i te mau haapiiraa a Iesu Mesia. Ei reira to tatou nei tau e riro ai ei tau no te hau e no te tupuraa aitâ i iteahia aʻe nei. Ei reira te mau peu etene e moʻe ê ai. Ei reira te tamaʻi e toʼna mau ino atoa e riro ai ei mau mea manaʻonaʻo-ore-faahou-hia. E riro te mau tautooraa a te nunaa ei mau tautooraa tauturu te tahi i te tahi. Ei reira e roaa ai i te feia faatupu i te parau hau te ite ia faatitiʻaifaro i te peʻapeʻa, ia tauturu i te feia riirii, e ia faatupu i te tiʻaturi i roto i te feia tei mătaʻu. Ei reira te uʻi apî e arue ai i taua feia ra, e na to tatou Atua Mure Ore e faahanahana ia ratou.

Te tiʻaturiraa a to te ao nei, o te Arii ïa no te Hau – Tei Hamani ia tatou, to tatou Faaora, o Iehova, to tatou Haava. Ua horoʻa mai Oia i te ora maitai no tatou, te ora auhune, te ora mure ore. E roaa te oraraa hau e te oraraa taoʻa rahi atoa i te feia e haapaʻo i Taʼna mau ture³⁶ e tei pee i Toʼna haereʻa e tae atu ai i te hau ra. Te faaara atu nei au i te reira i to te ao atoa nei.

Te mau Melo no te Ekalesia

E tena na, e te mau melo o te Ekalesia a Iesu Mesia i te Feia Moʻa i te Mau Mahana Hopea Nei, eaha ta te Fatu e titau nei ia tatou ? Ei Ekalesia, titauhia ia tatou ia « faaore atu i te tamaʻi e a poro i te parau hau³⁷. » Ei taata, titauhia ia tatou ia « titau i te parau hau³⁸. » Ia riro tatou ei feia faatupu i te parau hau i roto i to tatou iho oraraa. E tiʻa ia tatou ia ora tatou i te oraraa hau, i roto anei i te faaipoiporaa, te utuafare, e te mau taata tupu. E ora tatou i te Ture Auro. Tei ia tatou nei te mau papaʻiraa no te huaai o Iuda tei amuihia i teie nei i te mau papaʻiraa o te huaai o Epheraima³⁹. E faaohipa tatou i te reira e ia faaʻaano i to tatou here e tae roaʼtu i niʻa i te taatoaraa o te fetii taata nei. E horoʻa tatou i te here o te raʻi e i te mau haapiiraa heheuhia no niʻa i te haapaʻoraa faaroo i faahoʻihia mai, i to tatou mau taata tupu ra e i to tatou mau hoa ra. E tavini tatou ia ratou ia au i to tatou ite e i te taime au. E haapaʻo maite tatou i ta tatou mau ture e e paruru hoʻi i te parau tiʻa. E tamau noa tatou i te haaputuputu ia Ieseraela tei haapurarahia mai ô mai i na poro e maha o te fenua nei, e ia horoʻa i te mau oroʻa e te mau fafauraa o te taati i te mau utuafare e a muri noaʼtu. Titauhia ia tatou ia hopoi i teie mau haamaitairaa i te mau taata i roto i te mau nunaa atoa.

Ia na reira tatou, e haamaitai mai to tatou Fatu ia tatou. Ua horoʻa mai Oia i teie fafauraa : « Eiaha e mătaʻu ; tei pihai-atoa-iho vau ia oe ; eiaha e taiâ, o vau hoʻi to Atua : E faaʻetaʻeta vau ia oe ; e tauturu vau ia oe ; oia ïa, e mau vau ia oe i taʻu rima atau parau-tiʻa ra⁴⁰. »

Tei ia tatou nei Taʼna ohipa hanahana. E hopoiʻa na tatou te hanahana mure ore o te mau taata atoa. E ia parau tatou i te parau hau ra, e parauhia ïa tatou e tamarii na te Atua. Te faaite papu nei au i te reira na roto i te iʻoa o Iesu Mesia ra, amene.