Ua tonohia mai outou paatoa na te raʻi mai
E mea taaê roa ta outou ohipa ei mau tuahine i roto i te ohipa a te Fatu. O outou te feia faaamu e te feia aupuru.
E toʻu mau tuahine here, ua puatapû roa toʻu aau i to outou taeraa mai. Ua oaoa roa tatou i te mea e ua tae mai te peresideni Hinckley e te peresideni Monson i rotopu ia tatou. Ua mauruuru roa tatou i te himene a te pŭpŭ himene. Ua pure hoʻi te tuahine Sainz ia tae mai te Varua o te Atua i rotopu ia tatou. E mea faahiahia te mau aʻoraa a te tuahine Bonnie Parkin, te tuahine Kathleen Hughes, e te tuahine Anne Pingree. Na matou te peresideni Hinckley e te peresideni Monson i faataa e i haamaitai i teie mau tuahine ei peresideniraa rahi no te Sotaiete Tauturu. Ta ratou parau poroʻi no te arataʻiraa ïa i teie pŭpŭ rahi o te mau tuahine i raro aʻe i te faatereraa a te autahuʻaraa. E mea hohonu roa te huru no te mau hamaitairaa i faahitihia i niʻa iho i teie mau tuahine. I to te peresideni Hinckley faataaraa i te tuahine Parkin, ua faaaraʼtu oia i te mau tuahine e : « ua faataa te peropheta Iosepha i te ohipa a te Sotaiete Tauturu ia aupuru i te feia veve e te navaʻi ore, e te oto, e ia haamaitai i te mau tuahine. »
Ta tatou parau tumu i teie pô : « E te Fatu, Inaha teie au ; o vau ta oe e tono. » E parau tumu hohonu teie e ua tano roa te reira a aʻo atu ai au ia outou e te mau tuahine, no te mea te faaite mai nei outou i to outou hinaaro ia haere i mua e ia tavini. Ua tonohia mai outou paatoa na te raʻi mai. O outou te nehenehe no te hohoʻa taata nei. E mea taaê roa ta outou ohipa ei mau tuahine i roto i te ohipa a te Fatu. O outou te feia faaamu e te feia aupuru, mai ta te peropheta Iosepha i parau, « tei î i te here e te hamani maitai1. »
Aita taʻu e parau tano no te faaite atu i toʻu faatura, toʻu mauruuru, e toʻu faahiahia ia outou e te mau tuahine. Ua haamaitaihia te mau tuahine atoa i roto i teie Ekalesia i te mau horoʻaraa no te maitai rahi no ô mai i te Atua ra. Ua faahaehaahia matou na roto i to outou faaroo, ta outou taviniraa, to outou haapaʻo maitai, e te here, e te hiʻoraa parau-tiʻa. Aita te Ekalesia e manuïa i roto i taʼna opuaraa ahiri e aita e mau tuahine haapaʻo maitai rahi e te parau-tiʻa no te haapuai i te Ekalesia. I roto i te mau matahiti i mairi i muri ua farii atoa te mau tuahine o te Ekalesia i te mau fifi mai ta outou e farii nei i teie mahana. E mea huru taaê to outou mau fifi i to to outou metua vahine e mama ruau, e e mau fifi taaê ihoa te reira.
Te mauruuru nei au no te fanaʻo rahi o te mau tuahine i roto i te Ekalesia, e te tupu rahi nei hoʻi te reira na roto i te ao nei. Te tiʻaturi nei matou e faahaere outou i te reira i mua na roto i te faaiteraa atu i to outou huru vahine mau. Aita to teie huru fanaʻo e otiʻa. I te faatiʻaraa te peropheta Iosepha i teie faanahonahoraa ua « horoʻa atu oia i te taviri no te faaoraraa i te mau vahine » , e « ua horoʻahia te reira no to te ao atoa nei2. » Na roto i te horoʻaraahia te reira taviri ia ratou i te matahiti 1842, ua tae rahi mai te ite i niʻa i te fenua nei e i te mau vahine i teie tau i to te tahi atu tau.
I roto i te mau matahiti e rave rahi, ua haere noa teie pŭpŭ tuahine i mua i raro aʻe i te faaûrûraa, aita râ te ohipa tumu no te Sotaiete Tauturu i taui. Te faaite papu ra te peropheta Iosepha e : « e ere ta outou ohipa no te aupuru noa i te feia veve, no te faaora atoa râ i te mau varua3. »
Te tiʻaturi nei matou e, e teie te mau opuaraa rahi e maha a teie sotaiete :
Hoê, ua faatiʻahia te reira e te Atua no te mau tuahine.
Piti, e vahi te reira no te haapiiraa.
Toru, e faanahonahoraa te reira no te tavini ia vetahi ê. Te tumu parau, oia ïa : « E ore roa te aroha e mou. »
Maha, e vahi te reira no te mau vahine ia faaoaoa e ia faatupu i te faahoaraa mure ore4.
Te oaoa nei au no te mea ua tiʻa ia outou e te mau tuahine apî ia fanaʻo no te haere atu i te Sotaiete Tauturu i te 18 raa o te matahiti. E farii outou i te maitai rahi i roto i teie faanahonahoraa. E haamaitaihia to outou oraraa a rave mau ai outou i te ohipa taviniraa e te aupururaa. Ua faatumuhia te mau haapiiraa a te Sotaiete Tauturu i niʻa i te mau haapiiraa tumu e na te reira e tauturu ia outou ia haapii mai i te Evanelia e ia faarahi i to outou huru pae varua. Ua tano te mau haapiiraa na te mau taata atoa, eiaha na te mau vahine faaipoipo anaʻe e te mau metua vahine anaʻe. E mea tiʻa i te mau tuahine atoa, e te mau tuahine apî atoa ia « haamanaʻohia e ia faaamuhia … i te parau maitai a te Atua5. » Te vai ra te hapiiraa no te haapuai e no te tauturu ia outou i te pae varua e no te paruru ia outou i te mau tamataraa no te oraraa nei.
Teie ta te hoê vahine apî matau maitai iaʻu i parau mai : « 18 toʻu matahiti e o vau te tuahine apî roa i roto i ta matou Sotaiete Tauturu. E mea au roa naʻu ia haere i te Sotaiete Tauturu na muri iho i toʻu mama e toʻu mama ruau no te mea, ua riro raua ei hoa mau noʻu. E mea au roa naʻu ia faaroo atu i toʻu mama ia aparau i toʼna mau hoa ; na te reira e haamâtau iaʻu i te tahi atu mau tuahine mai iaʼna te paari. E rave rahi tuahine o te haere mai e aroha iaʻu ma te ani mai e, tei hea roa vau i te raveraa i te ohipa. Ua faariro ratou iaʻu ei mea faufaa rahi. Ua mâtau vau i te mau mama ruau e te mau vahine paari roaʼtu i roto i te paroita, e na roto i te haamâtauraa ia ratou ua haamaitaihia toʻu oraraa. E mea au atoa naʻu te haapiiraa a te mau vahine paari. No te mau oire ĕê mai ratou e na to ratou huru oraraa i tauturu mai iaʻu i roto i te mau tamataraa no te oraraa nei. E mea faahiahia roa te mau aamu ta ratou e faatiʻa mai no niʻa i to ratou oraraa, e ua taauturu te reira iaʻu i niʻa i te haapiiraa. Ua ite au i teie nei e, ua tano te Sotaiete Tauturu no te mau tuahine atoa, noaʼtu te huru o to ratou matahiti6. »
Noaʼtu to outou huru e te mau tuahine, e nehenehe ia outou ia tauturu rahi. Te manaʻo nei paha te tahi pae o outou e mea iti to outou aravihi no te haamaitai i te oraraa o vetahi ê. Aita te reira manaʻo i tano. Eita na roto i te ohipa ta outou e rave i mua i te huiraatira, na roto râ i to outou huru parau-tiʻa, e te mau ohipa no te here e te hamani maitai o ta outou e rave ra no te hoê noa aʻe taata, ma te hinaaro mau.
Ua faaitehia to te Fatu hinaaro rahi i roto i te mau papaʻiraa moʻa ia tauturu i te mau vahine ivi. Ua au atoa te reira no te mau metua vahine otahi. Ua rahi to ratou mau fifi. E mea titauhia ia ratou ia horoʻa i te maa e te ahu e te tahi atu mau mea no to ratou utuafare. Ua titau-atoa-hia ratou ia aupuru i ta ratou mau tamarii ma te here rahi.
Ua farii iho nei au i te hoê rata no ô mai i te tamaiti a te hoê tuahine e vai nei i roto i te fifi mai teie te huru, e teie te hoê tufaa no taʼna rata : « Ua manuïa toʻu mama i roto i taʼna mau hopoiʻa no te tauturu i to matou utuafare i te apîraa. Te reira taʼna i hinaaro, area râ e 28 matahiti i mairi aʻenei, te vai ra e maha tamarii, 5 matahiti e tae atu i te 14, e no reira ua titauhia oia, ei metua vahine otahi, ia rave i te ohipa i rapae i te utuafare no te tauturu ia matou. Ua ite matou e mea fifi te reira, ua faaitoito noa râ oia i te aupururaa ia matou i roto i te Evanelia e i te imiraa i te ravea pae moni no te tauturu ia matou. I teie nei, e metua tane au, e ua haamaitaihia vau i te mea te faaea nei taʻu vahine i te fare no te haapaʻo i te mau tamarii, e te ite nei au i teie nei i te hopoiʻa rahi i ravehia e toʻu Mama no te haapaʻo ia matou i taua taime ra. E mea fifi mau, e ahiri pai ua tiʻa iaʻu i taua taime ra ia hamâmâ i taʼna hopoiʻa. Aita roa e tiʻa iaʻu ia faahoona i taʼna faatusiaraa no te haapiiraa iaʻu nahea ia rave i te ohipa e ia ora. E parau mau roa te faaiteraa mana a te mau Hui Mana Faatere Rahi no niʻa i te utuafare no te mea te ite nei au i te reira i roto i toʻu iho utuafare7. »
E rave rahi mau tuahine haapaʻo maitai e te parau-tiʻa aita â i faaipoipohia, ua riro râ ratou ei mau melo no teie ohipa moʻa. Te vai nei ta teie mau tuahine faahiahia ohipa rahi ei mau melahi no te hamani maitai i te mau metua, te mau tuahine, te mau taeaʻe, te mau tamarii, e i te tahi atu mau melo no te utuafare e te mau hoa. I roto i te Ekalesia te vai nei e rave rahi mau ohipa no te here e te aupururaa. No te rahi o to ratou taime vata, te tavini rahi roa nei teie mau tuahine otahi.
Te vai nei te tuahine Margaret Anderson no Centerville, Utaha, o tei riro ei hiʻoraa maitai no te hoê tuahine otahi o tei tavini ia vetahi ê. E rave rahi matahiti, ua aupuru maite oia i toʼna metua vahine ruau roa, i te tuahine o toʼna mama, e i toʼna iho tuahine huma. Ua tauturu oia e rave rahi mau tamarii haapiiraa a haapii tamarii ai oia. I teie nei ua faataimehia oia, te horoʻa nei oia i toʼna taime i te mau hebedoma atoa no te tauturu i te mau tamarii rii ia taiʻo. Ua riro taʼna ohipa taviniraa ei haamaitairaa rahi i te mau melo o te paroita. Te na ŏ ra te hoê tamahine apî : « I toʻu apîraa, e hamani o Margaret i te hoê faraoa monamona no toʻu mahana fanauraa i te mau matahiti atoa. E faaʻunaʻuna oia i te reira i te mau ohipa taʻu i rave i te matahiti na mua atu, mai te oriraa e te hautiraa tuʻe popo. » Ua hamani oia i te pute moni iri puaa na te mau misionare atoa i tavini i roto i te paroita. E tauturu rahi oia i te pae Evanelia i roto i te Sotaiete Tauturu. Ua tauturu rahi oia i toʼna mau taata tupu e mau hoa na roto i te afaʻiraa ia ratou i tera vahi e tera vahi e i te hiero. E tuahine farii taata roa o Margaret. E mea ite oia i te hamani i te monamona e i te peni i te hohoʻa no te horoʻa na vetahi ê. Ua haamaitai oia i te oraraa o te mau taata e rave rahi.
Ua fafau pinepine mai te mau peropheta o te Fatu e aita roa te hoê haamaitairaa e tapea-ê-hia i te mau tuahine otahi parau-tiʻa o te Ekalesia, mai te mea e, e ere na ratou te hape i ore ai ratou i faaipoipohia e i taatihia i te hoê melo tiʻamâ no te autahuʻaraa. E farii ihoa ratou i te haamaitairaa mure ore i roto i te ao a muri atu. « Ia tupu te oto i roto ia outou no te oraraa utuafare i niʻa i te fenua nei, e haamanaʻo ua ite to tatou Metua i te Ao i te huru no to outou oto, e te vai ra te mahana e haamaitai oia ia outou i te hamaitairaa rahi atu i ta outou i manaʻo8. »
I muri iho i te haamoʻaraahia te hiero nehenehe roa i Navu, ua hoʻi mai matou na niʻa i te manureva na muri iho i te tuahine Parkin, te tuahine Hughes, te tuahine Pingree, e ta ratou tane. Ua ani atu vau i te mau tuahine e ua haere anei ratou i te faretoa ‹red brick› i Navu, i te vahi i faatiʻa ai te peropheta Iosepha i te Sotaiete Tauturu i te 17 no mati, 1842, e 20 anaʻe iho melo. Ua pahono mai te tuahine Parkin e ua na reira ratou.
A paraparau ai au ia ratou, ua ite ihora vau e farii te mau tuahine i te mau vahi atoa o te ao nei i te mau haamaitairaa o ta te Fatu i faataa no te mau vahine. Te na ŏ ra te peropheta Iosepha Semita : « Te horoʻa atu nei au i te taviri ia outou na roto i te iʻoa o te Atua… e e tae mai te ite e te aravihi i raro nei mai teie atu taime9. » E tae mai teie ite e te aravihi i te mau vahine parau-tiʻa atoa o te Ekalesia, noaʼtu te huru o to ratou fenua, noaʼtu e mea apî ratou i roto i te Ekalesia e aore râ no roto mai ratou i te mau melo matamua e 20 i Navu i te matahiti 1842 ra. E niniihia mai teie mau haamaitairaa i niʻa iho i te mau tuahine o tei rave maite i te ohipa a te mau melahi.
Ua faaroo iho nei au ia Elder Dieter Uchtdorf i te faahitiraa i teie mau parau : « Aita toʻu mau fetii i haere mai na Navu mai. Aita taʻu e tiʻa ia faahaere i toʻu tuatapaparaa ia tae i niʻa i te feia omua. Area râ mai te tahi atu mau melo o te Ekalesia, e tiʻa iaʻu ia taati atu i toʻu aau i niʻa i te Feia Moʻa no Navu e to ratou tere i Ziona. Na toʻu tiʻaturiraa e toʻu faaroo i taati atu iaʻu ia Ziona o tei ‹mâ te aau› e ia haafatata atu i te feia omua no te 19 o te tenetere. O ratou ïa toʻu mau tupuna pae varua, e to te mau melo atoa o te Ekalesia noaʼtu te huru o to ratou nunaa, te reo, e te peu. Ua faatupu ratou i te hoê vahi no te hau i te pae tooa o te râ e te hoê niu pae varua no te paturaa i te basileia na roto i te mau nunaa atoa o te ao nei. »
Teie te hoê parau ia outou i teie nei e te mau tuahine i faaipoipohia. Na outou e faariro nei i to matou mau utuafare ei haapuraa no te hau e te oaoa i roto i teie ao fifi rahi. Ua riro te tane parau- tiʻa ei melo no te autahuʻaraa, e o taua autahuʻaraa ra te mana faatere i roto i te utuafare. E ere râ oia iho i te autahuʻaraa ; e melo noa oia no te autahuʻaraa10. Te farii nei taʼna vahine i te mau haamaitairaa no te autahuʻaraa mai iaʼna atoa. Aita oia i faateiteihia i niʻa aʻe i taʼna vahine. Teie ta te peresideni Gordon B. Hinckley i parau i roto i te amuiraa rahi na te autahuʻaraa i te avaʻe eperera i mairi aʻenei : « I roto i te faaipoiporaa aita te tahi i hau atu i te tahi. Aita te vahine e haere na mua i te tane ; aita atoa te tane e haere na mua i te vahine. E haere apipiti raua te tahi i pihai iho i te tahi ei tamaiti e ei tamahine na te Atua i roto i to raua tere mure ore. »
Te na ŏ ra oia i muri iho : « Ua ite au e ia tiʻa atu tatou i mua i te haavaraa a te Atua, aita e faahitihia te parau no te rahiraa o ta tatou faufaa i roto i teie oraraa, e te rahiraa atoa o te mau tapaʻo faahanahanaraa ta tatou i farii. E faahitihia râ te parau no to tatou autaatiraa. Ua ite atoa vau e o ratou o tei haere na roto i te here e te faatura e te mauruuru i to ratou mau hoa faaipoipo e ta ratou mau tamarii o te farii i teie mau parau no ô mai i te haava mure ore ra, ‹Maitai roa, e toʻu tavini haapaʻo maitai : … a tomo mai i roto i te oaoa o to oe Fatu11.› »
Ua riro te mau vahine o tei paturu i ta ratou mau tane i roto i te episekoporaa, te peresideniraa tĭtĭ, e te tahi atu mau piiraa no te autahuʻaraa ei haamaitairaa rahi i te Ekalesia. Te tavini maitai nei ratou i muri mai i te paruru ma te ite-ore-hia, ma te paturu i te utuafare a tavini ai ta ratou mau tane i te mau melo. A faaroo matai i taʻu parau, « ma te ite-ore-hia. » Ua faaroo vau mea au na te tahi mau vahine i te hoê tane puai e te paraparau ore, e tapaʻo te reira e, te faaroo nei ratou !
Ua ite au i te tautururaa rahi a te hoê hoa faaipoipo paturu. Mai to maua faaipoiporaahia, ua paturu maite toʻu hoa o Ruth iaʻu e ua faaitoito iaʻu i roto i toʻu mau piiraa e rave rahi fatata e 60 matahiti i teie nei. Aita taʻu e nehenehe ia tavini ahiri e aita taʼna patururaa. Ua mauruuru roa vau iaʼna e ua here roa vau iaʼna.
Te ora noa nei te vahine a toʻu hoa misionare o tei pohe, o te tuahine Effie Dean Bowman Rich toʼna iʻoa, e te rave itoito nei oia i te ohipa no te tauturu i toʼna utuafare e na taiete ohipa e piti. E metua vahine e e mama ruau oia e e utuafare rahi toʼna. Ua fifi oia i te tahi mau taime i mairi aʻenei, e te na ŏ ra oia : « E mea titauhia te hoê vahine ! » Oia hoʻi, te hinaaro nei oia i te hoê tautururaa rahi mai te na reirahia nei e te hoê vahine parau-tiʻa e te aupuru.
E te mau tuahine, noaʼtu to outou huru, e mea titauhia te hinu i roto i ta outou mau lamepa. Oia hoʻi ia vai ineine noa. Ua ite tatou i te parabole no te mau paretenia e hoê ahuru o tei anihia ia haere mai i te oroʻa faaipoiporaa. E mea aravihi e te ineine e toopae, e hinu ta ratou i roto i ta ratou lamepa no te farerei atu i te Tane Faaipoipo, e e toopae ê atu aita ïa. Ua haere atu hoê ahuru e ta ratou mau lamepa, e pae aita ta ratou hinu i navaʻi e ua pau te reira. E mea titauhia te maramarama no ta tatou mau lamepa no te haere na roto i te poiri. Ua hinaaro tatou ia farerei atu i te Tane Faaipoipo.
I te tahi mau matahiti i mairi aʻenei ua haapapu mai te peresideni Spencer W. Kimball i te fifi no te ineine ore. Te na ŏ ra oia : « Ua haapiihia teie mau paretenia maamaa e pae. Ua faaarahia ratou i te taatoaraa o to ratou oraraa. » I te ao, hoê â huru to te mau paretenia aravihi e te mea maamaa, area râ « i te taime poiri roa, ua tae maira te tane faaipoipo ma te ore e faaara. » Ua horo atura e toopae paretenia maamaa no te imi i te hinu, i to ratou hoʻiraa mai i te vahi tamaaraa, ua tamauhia te opani. Ua taere roa.
Ua haamaramarama te peresideni Kimball e, « ua ani atu te mau paretenia maamaa i te tahi atu pae ia horoʻa mai i te tahi hinu na ratou, aita râ e tiʻa ia opere atu i te faaineineraa pae varua i taua iho taime ra. Ua tomo atu te mau paretenia aravihi. Ua hinaaro ratou i te taatoaraa no ta ratou hinu ; aita e tiʻa ia horoʻa i te tahi na te mau paretenia maamaa. »
Te faahiti faahou ra oia : « I roto i [teie] parabole, e hoohia te hinu i te matete. I roto i to tatou oraraa, e fariihia te mau topata no te hinu o te faaineineraa na roto i te oraraa parau-tiʻa. Na roto i te haereraa i te pureraa oroʻa e topata mai te hinu i roto i ta tatou mau lamepa, te topata i muri iho i te topata i roto i te mau matahiti e rave rahi. Na roto atoa i te haapaeraa maa, te pure utuafare, te hahaeraa utuafare, te haapaeraa i te mau hinaaro tano ore o te tino, te haapiiraa i te Evanelia e te mau papaʻira moʻa – e te haapaʻo maitai e niinii mai i te topata i roto i ta tatou farii. Na te mau ohipa maitai, te aufauraa i te mau ô e te mau tufaa ahuru, te feruriraa mâ e te ohipa mâ, te faaipoiporaa i roto i te fafauraa mure ore ; e ninii atoa mai i te hinu o ta tatou e hinaaro i te maororaa pô no te tuu i roto i ta tatou mau lamepa12. »
E te mau tuahine, e mea faufaa rahi ia vai noa te hinu i roto i ta outou mau lamepa ia tiʻa ia outou ia parau atu i te Fatu : « Inaha teie au ; o vau ta oe e tono », e ua ineine ihoa outou ia tonohia. Ua tonohia mai tatou mai te raʻi mai, te mau ohipa ta tatou e tiʻa ia rave tei te huru ia o to tatou hinaaro e te aravihi.
Te vai nei toʻu iteraa papu, 59 matahiti i roto i te oraraa utuafare, e na roto i to toʻu hoa haereraa i te Sotaiete Tauturu ua tae mai te huru pae varua e te hau i roto i to maua utuafare. Ua haamaitai te Sotaiete Tauturu i toʼna oraraa e i te oraraa o te mau melo no to maua utuafare. Na roto i te haereraa i te Sotaiete Tauturu, e tuu te reira i te hinu i roto i ta outou mau lamepa. Na te reira hoʻi e haapuai ia outou e e tamărû i te mau vero no te oraraa tahuti nei.
I muri iho i to te peresideni Hinckley faatoroʻaraahia e te faataaraahia ei peresideni no te Ekalesia, ua ani mai te hoê taata papaʻi veʻa i te peresideni ia paraparau mai no niʻa i te mau fifi e fariihia nei e te mau metua vahine o te rave nei i te ohipa moni e o te faaafaro nei i te mau ohipa no to ratou iho utuafare. Ua pahono atu te peresideni Hinckley : « A haapaʻo maitai, e a haamanaʻo, te mea faufaa rahi roa i roto i te ao nei, o te mau tamarii ïa o ta outou i hopoi mai i roto i te ao nei, e tei niʻa iho ia outou te hopoiʻa no te reira13. » Te faahiti faahou atu nei au i te reira i teie pô. A haapaʻo maitai no te tauturu ia matou ia haere i mua e ia rave maitai atu â i te ohipa. A faaohipa i ta outou mau taleni pae varua no te haamaitai. A tauturu ia matou ia turaʻi ê atu i te mau mea ino no te ao nei i roto i to matou oraraa, to matou utuafare, e i roto i te Ekalesia.
Ia tupu te fafauraa a Nephi no te haamaitai ia outou, « E ua faaahuhia ratou i te parau-tiʻa e te mana o te Atua i roto i te hanahana rahi14. » Te faaite atu nei au i toʻu iteraa papu no te mau haamaitairaa i tae mai i roto i toʻu oraraa na roto i te here o toʻu hoa faaipoipo o Ruth, toʻu metua vahine, toʻu na mama ruau, ta maua mau tamahine, e mau mootua tamahine, e e rave rahi mau vahine parau-tiʻa. Te na reira nei au na roto i te iʻoa o Iesu Mesia. Amene.