Elder James M. Dunn
No te Hitu Ahuru

Mai to te mau taata e rave rahi, ua patu vau i toʻu iteraa papu i te mau mahana atoa, te hoê taahiraa i muri i te tahi », te hiʻoraa ïa a Elder James M. Dunn, tei piihia aenei i roto i te pŭpŭ piti o te Hitu Ahuru. « Ua tuu mai te pae varua i roto mai toʻu apiraa mai e ua paari mai te reira na roto i te tau e te taviniraa e te raveraa i te mea i haahia iaʻu no te parautiʻa ra. »

Fanauhia oia i te 16 no eperera 1940 i Pocatello, Idaho, i na metua o Billy E. e o Melba Meyers Dunn, ua paari o Elder Dunn e toʼna mau tuaana toopae i Salt Lake City, Utaha, « ma te farii i te mau faanahoraa e te mau haamaitairaa o ta te hoê tamarii Feia Moʻa i te Mau Mahana Hopea Nei e nehenehe e farii. »

I muri ae i toʼna taviniraa i te hoê misioni i Uruguay, ua faaipoipo o Elder Dunn ia Sandra (Penny) Barker i roto i te hiero no Salt Lake City i te 7 no Atete 1963. Ua here rahi e ua faatura rahi oia ia Penny mai te taime raua a ohipa amui ai e a haere ai i te fare haapiiraa tuarua. I te mau matahiti matamua o to raua faaipoiporaa, ua tavini o Elder Dunn ei hoê ofitie i roto i te Nuu Faehau no Utaha, e ua haere oia i te Fare Haapiiraa Teitei no Brigham Young no te haapii i te Latino Marite, e ua roaa taʼna parau tu’ite no te ture no roto mai i te Fare Haapiiraa Teitei no Utaha.

I roto i toʼna tiʻaraa paruru ture, ua haapii mai o Elder Dunn e aita e hoo faufaa ae maoti ra te taviniraa i te Ekalesia noaʼtu â ïa i te rahiraa moni i roaa iaʼna i roto i te toroʻa paruru,mea hau ae toʼna mau piiraa mai te melo apooraa teitei, e epesikopo, e peresideni tĭtĭ, e peresideni misioni, e mana area hitu ahuru.

E metua tane oia no na tamahine e tooono, ua parau o Elder Dunn, « E oraraa taaê toʻu; te vaira te hoê tu’atiraa taaê mau i rotopu i te mau tamahine e te papa. » Ua puai atu â tera tu’atiraa i to toʼna utuafare taviniraa na muri iho iaʼna i te fenua Colombia, a tavini ai oia ei peresideni misioni. Ua hoʻi oia e taʼna vahine e te mau tamarii i to ratou utuafare e pauroa ino ratou i te ite i te reo paniora e ua haapuaihia ratou i te pae varua.

I toʼna fariiraa i toʼna piiraa apî, ua parau o Elder Dunn e : « E maere ihoa te hoê no te aha teie mau mea e tupu ai, e aha ïa te huru no te oraraa i te mau matahiti i muri nei. Area râ mai te mau piiraa i mairi aenei ua ite au e te taviniraa o te hoê ïa haamaitairaa rahi roa. Na roto i te mau matahiti, ua riro te Ekalesia ei pû no te mau mea maitai atoa i roto i toʻu utuafare e i roto i toʻu oraraa. »