Te mau hiʻoraa ia pee

Peresideni Thomas S. Monson

Tauturu matamua i roto i te Peresideniraa Matamua

Tatou atoa te ora nei i roto i teie ao i teie mahana te hiʻo tiʻa nei tatou i te feia i ora parau-tiʻa na – ei mau hiʻoraa ia pee.

Rave rahi matahiti i mairi ua faahiahia vau i te api tapoʻi o te hoê o ta tatou mau buka a te Ekalesia tei peinihia e Carl Bloch. Ua feruri teie taata peini na mua roa hou a topaʼi te rima o te Taata Peini, ma te faautaʼtu i te hohoʻa o Elisabeta, te vahine a Zekaria, i te fariiraa ia Maria, te metua vahine o Iesu. E fanau raua toopiti atoa ra i na tamaiti – semeio no te fanauraa.

Te tamaiti i fanauhia e Elisabeta o Ioane Bapetizo ïa. Mai ia Iesu, te tamaiti a Maria, oia atoa o Ioane – mea iti roa te mau papaʻiraa no raua i to raua apîraa. Hoê noa paratarafa tei papaʻihia no te faaite ia tatou i te mea o ta tatou i ite no niʻa i te oraraa o Ioane mai toʼna fanauraahia mai e tae roa mai i te taime o taʼna misioni i mua i te taata : « Tupu aʻera taua tamaiti ra, e itoito atura hoʻi i te aau, e tiʻa hoʻi i te mau vahi moʻemoʻe e tae roa aʻera i te mahana i faaite hua hia ai oia i to Iseraela¹. »

Mea poto roa te poroʻi a Ioane. Ua poro oia i te faaroo, te tatarahapa, te bapetizoraa na roto i te utuhiraa i raro i te pape e ia farii i te Varua Maitai na te hoê mana hau atu i te mana o taʼna e mau ra. « E ere au i te Mesia », taʼna ïa i parau atu i taʼna ra mau pĭpĭ, « i… tonohia mai ra vau na mua iaʼna². » « Te bapetizo nei â hoʻi au ia outou i te pape ; te haere mai nei ra te tahi e mana rahi toʼna i toʻu… : Naʼna e bapetizo ia outou i te Varua Maitai e te auahi³. »

E ua tupu te bapetizoraa o te Mesia na Ioane Bapetizo i rave. I muri aʻe ua faaite papu o Iesu : « I ta te vahine i fanau nei aitaʼtu ïa e peropheta rahi i itea ia Ioane Bapetizo nei⁴. »

Tatou atoa te ora nei i roto i teie ao i teie mahana te hiʻo tiʻa nei tatou i te feia i ora parau-tiʻa na – ei mau hiʻoraa ia pee. Ua horoʻa mai Ioane Bapetizo na tatou te tahi hiʻoraa no te haehaa mau, no te mea ua na reira oia i niʻa i te hoê o taʼna i pee – te Faaora o te taata nei.

Te iteraa i te feia o tei tiʻaturi i te Atua e o tei pee i Taʼna mau haapiiraa ua muhumuhu mai ïa i to tatou varua, « A faatupua na, ia ite mai e, o vau te Atua⁵. » E ua haapaʻo mau ratou i Taʼna mau faaueraa e ua tiʻaturi Iaʼna, ua haamaitaihia ratou. Ia pee anaʻe tatou i to ratou hiʻoraa, e haamaitai atoahia tatou i to tatou nei mahana e i to tatou nei taime. E riro mai te taata tataʻitahi ei hiʻoraa ia pee.

E mea au na tatou paatoa te aamu o Aberahama e o Isaaka i roto i te Bibilia Moʻa. Mea teimaha mau no Aberehama, i te faarooraa i te faaue a te Atua, ia afaʻi i taʼna tamaiti here o Isaaka i te fenua ra o Moria, e i reira e pûpû atu ai ei tusia ta auahi. Te ite ra anei outou i te teimaha i roto i toʼna aau a haaputu ai oia i te vahie no te auahi e te tereraa i te vahi i faataahia ? Oia mau ua tupu te mauiui i niʻa i toʼna tino e ua haamauiui i toʼna feruriraa a « taamu ai oia ia Isaaka … e a tuu atu ai i niʻa i te fata e vaira i niʻa i te vahie. E … a toro ai oia i toʼna rima, e rave ai i te tipi no te patia i taʼna tamaiti. » Aue ïa i te hanahana i te taeraa mai te parau iaʼna, e tei faatupu i te oaoa : « Eiaha to rima e rave noaʼtu i te tamaiti na, eiaha roa oia e hauti noahiaʼtu e oe, ua ite atura hoʻi au i teie nei, e e mătaʻu to oe i te Atua, o oe aore i pipiri i to tamaiti hoe roa ra, iaʻu⁶. »

Ua riro o Aberehama ei hoê hiʻoraa aueue ore no niʻa i te haapaʻoraa.

Mai te mea te manaʻo ra te tahi o tatou e mea teimaha te titauraa o te mau tamataraa eita ïa e maeʻa iaʼna, a faataiʻo iaʼna ia Ioba. Ia na reira anaʻe, e tae te manaʻo e, « Mai te mea ua nehenehe ta Ioba ia faaʻoromai e tae atu i te hopea, e nehenehe atoa taʻu. »

O Ioba te hoê « Taata parau-tiʻa e te paieti » te hoê taata tei « mătaʻu i te Atua, e te faaruʻeraa i te ino⁷. » Ua faaite oia i te faatura i roto i toʼna huru i te Atua ra, e i te taata faufaa rahi hoʻi. Ua farerei o Ioba i te hoê tamataraa rahi roa o te nehenehe e haamou i te hoê taata. Ua pau taʼna faufaa, ua faaruʻehia e toʼna mau hoa, ua roohia i te mauiui, ua faaruʻehia e toʼna iho utuafare, ua turaihia oia ia « faaino atu i te Atua, a pohe atu ai⁸. » Ua faaoʻromai oia i te tamataraa e ua parau mai roto roa mai i te papa o toʼna aau, « Inaha, tei te raʻi te ite iaʻu, e tei haapaʻo mai iaʻu ra tei niʻa ïa i te parahiraa⁹ « Ua ite hoʻi au, e te ora ra te faaora¹⁰. »

Ua riro o Ioba ei hiʻoraa no te faaʻoromai e aita e otiʻa. I teie nei mahana te hiʻo nei tatou i te feia o tei mauiui maoro mai te faaʻoromairaa a Ioba. Ua horoʻa mai oia i te hiʻoraa ia tatou no te pee.

E « taata hau i te parau-tiʻa e te piʻo ore i toʼna ra uʻi », o tei « haere i te Atua¹¹ », o te peropheta Noa ïa. Faatoroʻahia i te autahuʻaraa i toʼna apîraa ra, « ua riro oia ei taata poro i te parau-tiʻa e ua faaite i te Evanelia a Iesu Mesia, … te haapiiraa i te faaroo, te tatarahapa, te bapetizo, e te fariiraa i te Varua Maitai¹². » Ua faaara i te feia o te ore e faaroo i taʼna parau e tae mai te diluvi i niʻa ia ratou o tei ore e faaroo i toʼna reo, inaha aita ihoa ratou i haapaʻo i taʼna mau parau.

Ua faaroo o Noa i te faaue a te Atua ia hamani i te hoê pahi, i reira oia e toʼna utuafare e araihiaʼi i te haamouraa. Ua pee oia i te mau arataʻiraa a te Atua ua haaputu mai i roto i te pahi e piti aʻe no te mau huru animala atoa, ia faaora-atoa-hia i te pape o te diluvi.

O te parau ïa a te peresideni Spencer W. Kimball : « Aita hoʻi te tahi faaiteraa no te ua e te diluvi … Ua faarirohia te mau faaararaa [a Noa] ei parau maamaa… Aue ïa maamaa i hamani i te hoê pahi i niʻa i te fenua mărô e te tere noa ra te mahana mai tei matauhia ! Area râ, ua pau te taime… Ua tae mai te diluvi. Ua paremo te feia faaroo ore. Ua pee mai te faaroo i te semeio i te paturaa i te pahi¹³. »

E faaroo aueue ore to Noa i te mau faaueraa a te Atua. Ia riro anaʻe tatou mai iaʼna atoa ra. Ia haamanaʻo tatou i te paari o te Atua i te mau taime i ino ai te taata ; area râ, te haapiiraa rahi roa o ta tatou e nehenehe e apo mai i roto i te tahuti nei oia ïa ia parau anaʻe te Atua e faaroo tatou, e vai parau-tiʻa noa ïa tatou.

Te hoê hiʻoraa maitai roa no te auvahineraa o Ruta ïa. Tei ite i te oto rahi o te aau o toʼna metua hoê vahine o Naomi, o tei mauiui na roto i te poheraa o taʼna na tamaiti maitai roa – penei aʻe ua ite i te peʻapeʻa e te moʻemoʻe tei haapeʻapeʻa roa i te varua o Naomi, ua faatiʻa râ o Ruta i teie parau no niʻa i te parau-tiʻa : « Eiaha oe e parau onoono mai iaʻu e faaruʻe ia oe, e ia hoʻi au i toʻu nei peeraaʼtu ia oe ; te vahi ta oe e haere ra, e haere atoa ïa vau, e te vahi ta oe e parahi ra, e parahi atoa ïa vau, to oe ra nunaa, o toʻu atoa ïa nunaa ; e to oe ra Atua, o toʻu atoa ïa¹⁴. » Na te mau ohipa a Ruta i faaite i te haavare ore o taʼna ra mau parau.

Na roto i te haapaʻo aueue ore a Ruta ia Naomi, ua faaipoipo oia ia Boaza, mea na reira hoʻi te vahine ratere o te ati Moabi i faafariuhiaʼi e ua riro mai ei metua tupuna vahine no Davida e, ua riro mai ei tupuna atoa no te Faaora o Iesu Mesia.

E hiʻo vau i teie nei i te hoê peropheta rahi o te Buka a Moromona : o Nephi, te tamaiti a Lehi e o Saria. E taata faaroo e te haapaʻo i te Atua, te itoito e te puai. I te horoʻa-raa-hia te hoê ohipa fifi iaʼna no te haere e tii i te mau papaa parau ia Labana ra, aita oia i mutamuta, ua parau ra oia, « E haere atu vau, e rave hoʻi i te mau mea ta te Fatu i faaue maira, ua ite hoʻi au e, e ore te Fatu e tuu mai i te hoê faaue i te mau tamarii a te taata, maori râ, e faaineine oia i te hoê raveʻa no ratou, e tiaʻi ia ratou i te rave i te mea taʼna i faaue mai ia ratou ra¹⁵. » Penei aʻe paha e riro te parau no te itoito i te itehia ei aʻo no tatou e tei roto i te irava himene i muri nei [ « The Iron Rod » ] :

Na Nephi, te Hiʻo o te tau matamua ra,
Ua tae mai te hoê orama mai te Atua ra …
A mau papu i te auri, te tapu auri ;
‘Mea puai, e te maramarama, e te parau mau ;
Te tapu auri o te parau ïa a te Atua ;
‘O te arataʻi papu ia tatou.16

Ua faaite o Nephi i te faaotiraa aueue ore.

Te vai atura te tahi o te mau hiʻoraa na tatou ia pee maoti râ, to Iosepha Semita, te peropheta matamua no teie tau tuuraa Evanelia. I te ahuru ma maharaa o toʼna matahiti, ua haere atu teie tamaiti itoito i roto i te uru raau, o tei parauhia i muri mai e vahi moʻa, e ua farii oia i te pahonoraa i taʼna ra pure.

E ua tupu te mau hamani inoraa ia Iosepha i muri mai a faaite ai oia i niʻa i te tahi pae te parau no te orama hanahana o taʼna i farii i roto i tera uru raau. Noaʼtu, e ua haamaamaahia oia e ua faainohia, ua tiʻa papu oia. E ua parau oia : « Ua ite au i te hoê orama ; ua ite au i te reira, e ua ite au e ua ite te Atua i te reira, e eita taʻu e nehenehe e faaino i te reira, eita atoa vau e tamata i te na reira¹⁷. »

Ua faaruru oia i te patoiraa te tahi i muri i te tahi fatata i te mau vahi atoa area râ, ua arataʻi tamauhia oia e te rima o te Fatu, ua faanahonaho o Iosepha i Te Ekalesia a Iesu Mesia i te Feia Moʻa i te Mau Mahana Hopea Nei. Ua faaite oia i te itoito i roto i te mau ohipa atoa taʼna i rave.

I te pae hopea o toʼna oraraa, a afaʻihia ai oia e toʼna ra taeaʻe o Hyrum i te fare tapeʻaraa no Carthage, ua ite oia e tupu mau â te haapoheraa i niʻa iaʼna, e ua titiro oia i toʼna iteraa papu i toʼna ra toto.

A farerei ai tatou i te mau tamataraa o te oraraa, ia vai mai te huru itoito o ta te Peropheta Iosepha Semita i faaite.

Te tiʻa nei â i mua ia tatou i teie nei mahana te hoê peropheta na te Atua, oia to tatou peresideni here o Gordon B. Hinckley. E peresideni oia i niʻa i te taatoaraa o te Ekalesia, i niʻa i te taiʻoraa numera e i te mau vahi atoa, i roto i to tatou aamu. Ua tere oia na te mau fenua atoa e ua farerei i te mau faatere o te mau fenua e i te mau melo o te ao nei. Ua tae toʼna here i roto i te mau otiʻa atoa o te mau reo e te ihotumu o te ao nei.

Na roto i te orama tohu, ua haamau oia i te Tufaa no te Haapiiraa Tamau, no te tauturu i te mau melo navaʻi ore i roto i te mau fenua e rave rahi o te ao nei ia horoʻa i te raveʻa haapiiraa i te feia apî tamaroa e te feia apî tamahine no te titau i te toroʻa ohipa. Ua turama teie faanahoraa faaurûhia i te feia atoa i vai noa na i roto i te veve e i teie nei e nehenehe atura ratou e hiʻo atu i te hoê ananahi au aʻe.

Ua ohipa tuutuu ore te peresideni Hinckley no te faatupu i te mau haamaitairaa moʻa i niʻa i te mau melo o te Ekalesia na te ao nei na roto i te paturaa i te mau hiero ia nehenehe te taatoaraa ia haere atu i reira. E paari toʼna no te faateitei i te feia atoa, noaʼtu to ratou mau fifi, noaʼtu eaha ta ratou faaroo. E hiʻoraa oia no te manuïa, e te faatura nei tatou iaʼna ei peropheta, ei hiʻo, e ei heheu parau.

E riro te mau peu maitai a teie mau taata e teie mau vahine o taʻu i faahiti iho nei ei faufaa rahi roa no te paturu ia tatou ia û tatou i te mau fifi e te mau tamataraa e vai nei i mua ia tatou. Te hinaaro nei au e faatiʻa atu i te ohipa i tupu i niʻa i te utuafare o Jerome Kenneth Pollard no Oakland, Califonia.

I te avaʻe no me i mairi, a tere ai o Elder Taavili Joseph Samuel Pollard i te piha ohipa a te misioni i te faaotiraa o taʼna misioni i Zimbawe, ua û atu te pereoo uira taʼna e faahoro ra i niʻa i te hoê tumu raau. E nehenehe ta te hoê taata i ratere mai na reira e faaora i te hoa o Elder Pollard, area o Elder Pollard ua moʻe te hiroʻa, e ua mau oia i roto i te pereoo uira o tei ura roa. Ua pohe o Elder Pollard. Ua pohe hoʻi toʼna metua vahine a vaʻu matahiti i mairi aʻe nei, no reira ua toe noa mai te metua tane no te haapaʻo i te utuafare. Te tavini ra te tahi tamaiti i roto i te Misioni no te Fenua Initia Tooʻa o te râ.

I te taeraa mai te parau apî i te metua tane e ua pohe o Elder Pollard, teie taata haehaa roa – ua pohe hoʻi te vahine – niuniu atura i te tamaiti e tavini ra i roto i te Misioni no Initia Tooʻa o te râ no te faaite iaʼna e ua pohe toʼna taeaʻe. Eita e ore i roto i tera taime a paraparau ai raua na roto i te niuniu, ua mauiui te Taeaʻe Pollard e taʼna tamaiti, e ua himene raua i te himene, « E Tamarii au na te Atua¹⁸. » Ua faaoti atura te metua tane i te hoê pure i te Metua Here i te Ao ra no te haamuruuru Iaʼna no Taʼna mau haamaitairaa e ma te ani atu i Taʼna tamahanahanaraa hanahana, hou raua a faaea ai i te paraparau.

Ua faatiʻa te Taeaʻe Pollard i muri aʻe e ua ite oia e vai toʼna utuafare i te vai maiteraa, no te mea e iteraa papu to ratou i te Evanelia e i te Faanahoraa no te Ora.

E toʻu mau taeaʻe e te tuahine here, i roto i teie tuuraa tau no te îraa o te mau tau, a ora ai tatou i roto i te tahuti nei e a farerei ai tatou i te mau tamataraa e te mau titauraa no amuri aʻe, ia haamanaʻo noa tatou i teie mau hiʻoraa no te pee atu o taʻu i faaite iho nei ia tatou i teie nei poʻipoʻi. Ia vai noa tatou i roto i te haehaa faito ore mai to Ioane Bapetizo, te faaroo aueue ore o Aberahama, te faaʻoromai rahi o Ioba, te faaroo aueue ore o Noa, te parau-tiʻa o Ruta, te faaotiraa aueue ore a Nephi, te itoito faito ore o te Peropheta Iosepha Semita, e te tuutuu ore o te peresideni Hinckley. Ia riro te reira ei pâ no tatou i roto i to tatou oraraa.

Ia arataʻi noahia tatou na te Hiʻoraa Matamehai roa, oia te tamaiti a Maria, te Faaora ia Iesu Mesia, tei pûpû i toʼna ora ei hiʻoraa papu na tatou ia pee.

Fanauhia i roto i te fare animala, tuuhia i roto i te fatene maa, ua haere mai Oia mai te raʻi mai no te ora i niʻa i te fenua nei mai te hoê taata tahuti e no te haamau i te Basileia o te Atua. I roto i te taime o Taʼna misioni i te f enua nei, ua haapii Oia i te mau taata i te ture teitei. Ua faatiʻa faahou i te hanahana o Taʼna Evanelia i te feruriraa o te ao nei. Ua haamaitai oia i te feia maʻi ; ua faahaere Oia i te hapepa, ua ite te matapô, ua faaroo te tariʻa turi. Ua tae roa i te faatiʻa mai i tei pohe ra.

E aha te feruriraa no niʻa i Taʼna parau no te aroha, Taʼna mau parau paari, Taʼna mau haapiiraa no te oraraa ? E mea iti roa te feia maitai tei mauruuru Iaʼna. Ua horoi ratou i Toʼna ra avae. Ua haapii i Taʼna ra parau. Ua pee i Toʼna hiʻoraa.

E te vaira te feia o tei huna Iaʼna. I to Pilato aniraa, « E aha hoʻi au ia Iesu i tei parauhia, o te Mesia nei ? ¹⁹ », pii atura ratou, « Faasatauro atu iaʼna²⁰. » Ua faaooʻo ratou Iaʼna. Ua horoʻa i te vinita Iaʼna ia inu. Ua faaino Iaʼna. Ua papaʻi i taʼna upoo i te aeho. Ua tutuha i te huare i niʻa Iaʼna. Ua faasatauro Iaʼna.

Na roto i te mau uʻi atoa o te tau, aita te poroʻi a te Mesia i taui. Ia Petero e o Anederea i te hiti o te Miti o Galilea ua parau Oia, « A pee mai Iaʻu²¹. » Ia Philipi i tahito ra ua tae te piiraa, « A pee mai Iaʻu²². » I te ati Levi o tei parahi i te fare aufauraa taoʻa ua tae te parau, « A pee mai Iaʻu²³. » E ia outou e iaʻu iho nei, ahiri paʻi tatou e faaroo nei, e tae mai taua parau ra ia tatou e, « A pee mai Iaʻu. »

O taʻu ïa pure i teie mahana ia na reira tatou. Na roto i te iʻoa moʻa o Iesu Mesia, Amene.