Ua aʻo mai ratou ia tatou

E parau faaite na te mau tamarii no te Ekalesia mai roto mai i te 172raa o te amuiraa rahi i te 5-6 no atopa 2002.

Peresideni Gordon B. Hinckley : Ia feruri i te maere o te reira.

E Ekalesia a Iesu Mesia teie i faahoʻi-faahou-hia mai. O tatou te hoê nunaa feia moʻa i te Mau mahana hopea nei. Te faaite papu nei tatou e, ua matara te mau raʻi, e ua tatarahia te mau paruai, e ua paraparau mai te Atua, e ua faaite mai o Iesu Mesia Iaʼna, i muri mai i reira ua horoʻa mai i te mana hanahana.

O Iesu Mesia te ofaʻi tihi no teie ohipa, e tei patuhia i niʻa i te hoê « niu o te… mau aposetolo e te mau peropheta » (Ephesia 2:20).

Peresideni Thomas S. Monson, tauturu hoê i roto i te Peresideniraa Matamua : Na roto i te mau uʻi o te mau tau, hoêâ te poroʻi mai ia Iesu mai e tae roa mai i teie nei. Ia Petero e ia Anederea i te pae tahatai no te miti nehenehe no Galilea, ua parau Oia ia ratou : « Apee mai Iaʻu. » Ia Philipi no te tau tahito, ua pii atoa oia : « Apee mai Iaʻu. » … E ia outou e iaʻu iho nei, mai te mea e faaroo tatou, e tae atoa mai taua titauraa ia tatou : « Apee mai Iaʻu. »

Peresideni James E. Faust, tauturu piti i roto i te Peresideniraa Matamua : Te tiʻaturi nei au e riro paatoa tatou mai te « Te Matini Iti tei Tiʻa. » E ere i te mea rahi roa, e faaohipa-noa-hia te reira no te tauiraa i te pereoo, e o tei ore i tae aʻenei i niʻa i te mouʻa, tera râ ua hinaaro ia tae i reira. E ua tuʻatihia taua matini naʻinaʻi niʻa i te pereoo auauahi, tei huti iaʼna i niʻa i te mouʻa, e ua tere i raro mai i te mouʻa, ma te parauraa e : « Ia manaʻo vau e tiʻa iaʻu. » E titauhia tatou tataʻitahi ia paiuma i niʻa i te mau mouʻa o ta tatou i ore â i paiuma i mutaa ihora.

Elder David B. Haight no te Pŭpŭ no te Tino Ahuru Ma Piti Aposetolo : Te ora nei te Atua. O Oia to tatou Metua. Te faaite papu nei au ia outou e o Iesu te Mesia, te Tamaiti a te Atua ora, e te peropheta Iosepha Semita o te peropheta ïa no te Faahoi-Faahou-raa mai. O te peresideni Hinckley to tatou faatere faaûrûhia i niʻa i teie Ekalesia i roto i te ao nei i teie mahana nei. Ia haamaitaihia toʼna aau no te mau mea atoa taʼna e rave nei… a arataʻi ai oia i teie ohipa i mua.

Elder Neal A. Maxwell no te Pŭpŭ no te Tino Ahuru Ma Piti Aposetolo : Te mau taeaʻe e te mau tuahine, noaʼtu â te ora nei tatou i roto i te hoê tau fifi, e nehenehe ta tatou e tiʻa i te mau vahi moʻa e ma te faanuu orehia (a hiʻo i te PH&PF 45:32; 87:8). Noaʼtu te ora nei tatou i roto i te hoê taime peʻapeʻa, e nehenehe tatou ia vai noa i roto i tera vahi hau o te ore e itehia (a hiʻo i te Philipi 4:7). E tamau noa te mau mea manaʻonaʻohia, tera râ, mai ia Nephi, e nehenehe tatou e ite e te here nei te Atua ia tatou…

… Oia ïa eita tatou e ite paatoa i te auraa no te mau mea atoa i teie nei. Area râ, e nehenehe tatou e ite, i teie nei, e ua ite te Atua ia tatou e te here nei Oia ia tatou tataʻitahi !

Elder Robert D. Hales no te Pŭpŭ no te Tino Ahuru Ma Piti Aposetolo : E haapuai te faarooraa no te aufau i te tuhaa ahuru i to tatou faaroo, e na taua faaroo ra e paturu ia tatou na roto i te mau tamataraa, te mau hepoheporaa, e te mau otoraa i roto i to tatou oraraa.

Elder Dieter F. Uchtdorf no te peresideniraa o te Hitu Ahuru : Aita toʻu mau tupuna i rotopu i te mau feia omua no te 19raa o te tenetere. Noaʼtu râ, mai te mahana matamua o toʻu riroraa mai ei melo no te Ekalesia, ua ite au i te hoê auraa fatata roa i tera mau melo matamua o tei tere na roto i te medebara. O ratou toʻu mau tupuna varua, oia atoa no tatou paatoa te mau melo no te Ekalesia, ma te hio oreraa i te tiʻaraa taata, te reo, e aore râ te ihotumu. Aita ratou i haamau noa i te hoê vahi no te hau i te pae tooa o te râ, ua haamau atoa râ ratou i te hoê niu varua no te paturaa i te basileia o te Atua i roto i te mau fenua atoa o te ao nei.

Elder Robert K. Dellenbach no te Hitu Ahuru : Te ani mai nei te Fatu ia tatou ia faataa i te hoê Sabati i te avaʻe hoê no te haapae e piti tamaaraa. Te anihia nei tatou ia horoʻa i te moni no taua na tamaaraa ra i te Ekalesia ia nehenehe hoʻi ia tauturu i te feia i roto i te fifi.