Elder D. Rex Gerratt
No te Hitu Ahuru

Ua paturuhia o Elder D. Rex Gerratti te 5 no Atopa 2002 ei hoê melo no te pŭpŭ piti o te Hitu Ahuru. « Aita aenei au i piihia i roto i te hoê piiraa o taʻu i manaʻo e tano iaʻu, area ra ua ite au e te taata ta te Fatu e pii, e faaineine ïa e tauturu te Fatu iaʼna », te parau ïa a Elder Gerratt, e taata no roto mai i te ohipa faaapu no Idaho. « Mai te mau piiraa atoa o taʻu i farii i roto i toʻu oraraa, ua ani noa na vau i te Metua Here i te Ao ra ia tauturu mai iaʻu ia riro ei tavini maitai i roto i Toʼna rima. »

Ua fanauhia o Elder Gerratt i Heyburn, Idaho, i te 9 no Eperera 1936 i na metua o Donald Wayne e o Anne Bailey Gerratt. Ua paari oia i pihaiiho mai te tuhaa no Burley, e na taata faaapu toʼna metua tane e toʼna taeaʻe. Ua faaipoipo oia i toʼna hoa taʼna i matau i te haapiiraa ra, o Marjorie Crane, i roto i te Hiero no Idaho Falls i te matahiti 1955. E 9 to raua mau tamarii e 35 mootua.

« Te haamanaʻo nei au e rave rahi mau po’ipo’i ia parahi au e ta maua mau tamarii i muri i te taupee e ta matou uri iti, te oomoraa i to matou mau tiaa no te haere e faatê i te û puaatoro », te parau ïa a Elder Gerratt. « Manaʻonaʻo noa na maua te tuahine Gerratt i ta maua mau tamarii, tera e tiʻaturi rahi to maua ia ratou no te mea ua ite paatoa ratou i te rave i te ohipa puai e te vaira to ratou mau iteraa papu no te evanelia. »

Na taʼna ohipa puai e toʼna mau taata e haaati ra iaʼna i faatupu i te hanahana o Elder Gerratt i roto i te maitiraahia oia ei hoê melo aravihi [Hall of Fame] no taua ohipa ra no Idaho e no toʼna haapaʻo maiteraa i te raveraa i te ohipa ma te faatura i te natura.

Toʼna mau piiraa i roto i te Ekalesia e mana area hitu ahuru, e peresideni misioni, e tiʻa retioni,e peresideni tĭtĭ, papaʻi parau tĭtĭ, epesikopo, papaʻi parau paroita, e e orometua hahaere. Ua tauturu teie mau piiraa iaʼna ma te haapii iaʼna i te maru e te haehaa.

« I to matou iteraa i te rahiraa o te mau haamaitairaa o ta matou i farii mai ô mai i to matou Metua Here i te Ao ra e ua arataʻi mauhia matou e Taʼna peropheta ora, « te parau ïa a Elder Gerratt, » titauhia matou ia haamauruuru e ia rave mai to matou puai atoa i te vahi atoa e anihia ai matou e rave i roto i Taʼna Ekalesia. »