Eaha ïa taʻu ?
Te amoraa i to satauro e te peeraa i te Faaora, o te upootiʻaraa ïa i niʻa i te huru pipiri ; e fafauraa te reira no te tavini ia vetahi ê.
Te pure haehaa nei au ia parahi noa mai â taua varua ra tei fariihia e te feia i aʻo atu ia outou i teie poʻipoʻi.
E rave rahi matahiti i mairi aʻenei, ua rave amui au i te ohipa i pihai iho i te tahi na taata paari aʻe iaʻu e te aravihi hoʻi i te ohipa. E rave rahi matahiti matou i te hoaraa, e ua riro hoʻi ei maitai no te tauturu te tahi e te tahi. I te hoê mahana, ua ani mai hoê o matou i ta matou tauturu no te hoê ohipa . Ia oti toʼna tatararaa i taua ohipa ra, na o atura te tahi hoa « Eaha ïa taʻu ? Ua pahono teʻoteʻo atu toʼna hoa iaʼna, ua ite atu vau i te hohoʻa mauiui i niʻa i te taata tei ani mai i ta matou tauturu. Aita to raua auhoaraa i afaro faahou i muri mai. Aita to matou hoaraa au-taviniraa i manuïa no te mea ua haapoiri toʼna aau faarahi i te mau horoʻaraa, te mau taleni e te mau aravihi taʼna i farii. Oia mau, ua riro teie nei uiraa, « Eaha ïa taʻu ? » ei anatemaraa no te ao nei i teie tau.
I roto i toʻu oraraa i te pae raveraa ohipa, ua tauturu vau i te huaai a te tahi na taata ia fatu i ta raua mau faufaa. E ere te faufaa i te mea rahi roa, e hotu râ te reira no te ohipa teiaha e te tusia i ravehia e rave rahi matahiti. E mau tamarii maitai roa ta teie na taata, tei mătaʻu i te Atua e o tei haapiihia ia ora i te mau parau tumu faaora a te Faaora. Area râ, i te taime opereraa i te faufaa, ua tupu te mârôraa i rotopu ia ratou. Noaʼtu e ere i te faufaa rahi, ua ô mai te mau manaʻo nounou e te ino tei faatupu i te amahamaha i rotopu i te mau melo o te utuafare i ore roa i rapaauhia e ua vai tamau noa te reira i roto i te uʻi no muri mai. Aue hoʻi te ino i tupu i niʻa i te huaai a teie na taata maitai, inaha ua mou te tahoêraa e te here i rotopu i ta raua mau tamarii. Ua ite au e na roto i te aroha noa iaʼna iho e te nounou e roaa mai ai te inoino e te mârôraa ; e faatupu râ te faatusiaraa e te horoʻaraa i te hau e te oaoa.
I roto i te apooraa rahi i te ao ra, a vauvauhia mai ai te Opuaraa no te Ora no te mau tamarii a te Atua, ua pahono Iesu, « Inaha teie au, o vau ta oe e tono1 », 1 e Tau Metua, ia raa to oe iʻoa, e no oe te hanahana e a muri noaʼtu2. » No reira oia i riro ai ei Faaora no tatou. Area te opuaraa a Satane, tei faarirohia ei « tamaiti no te poʻipoʻi3 », ua parau oia e e haere mai oia no te « faaora i te mau taata atoa, ia ore roa te hoê varua ia moʻehia4. » Horoʻa maira Satane e piti titauraa : a tahi, te patoʻiraa i te tiʻamâraa ; a piti, noʼna ia te tura. Mai te mea ra ïa e, eaha ïa taʻu. No reira oia i riro mai ai ei metua no te mau haavare e te aroha iaʼna iho.
Te amoraa i to satauro e te peeraa i te Faaora, o te upootiʻaraa ïa i niʻa i te huru pipiri ; e fafauraa te reira no te tavini ia vetahi ê. Te here iaʼna iho o te hoê ïa o te mau huru o te taata nei, tei tiʻa roa ia haavîhia e ia faaorehia. Te haamauiui nei tatou i to tatou varua na roto i te raveraa mai eiaha râ i te horoʻa. I te rahiraa o te taime, te parau matamua ta te mau tamarii e ite, o te parau ïa, naʻu. Ia haapiihia ratou i te oaoa no te opereraa. E parau mau, o te mau metua te orometua maitai aʻe no te faaoreraa i te aroha iaʼna iho. Te pohe nei te mau metua vahine i te fanauraa i te tamarii. Te tutava nei te mau metua ia roaa te nohoraa, te maa, te ahu, te parururaa, e i te haapiiraa i ta ratou mau tamarii.
Ua haapii mai au e, i roto i te parau no te aroha iaʼna iho, e rahi aʻe te parau no to tatou huru no te mau taoʻa i noaa ia tatou, i te parau no te iteraa e, eaha te rahiraa o ta tatou faufaa. Teie ta te rohipehe o Wordsworth i parau, « Ua î tatou i te huru o te ao nei ; i te paariraa e i te apîraa, / te titau rahi nei i te moni e te haamauʻa nei i te reira, te haamauʻa nei hoʻi i to tatou nei mana5. » E riro te hoê taata veve ei taata nonou area te taata ona râ6, e riro ïa ei taata pûpû taoʻa, tera râ, e fifi te taata titau i te imiraa i te hau i roto i teie oraraa.
Ua parau te Taeaʻe William R. Bradford e : « I te mau mea atoa o te faaurû nei i te taata ia maiti i te hape, o te aroha ïa iaʼna iho te mea puai aʻe. I te vahi e itehia te aroha iaʼna iho, aita ïa te Varua o te Fatu i reira. Aita te mau taleni i operehia, aita te mau hinaaro o te feia veve i haapaʻohia, aita te feia paruparu i tauturuhia, aita te feia tauʻa ore i haapiihia, e aita tei moʻe i faaorahia7. »
Ua aparau iho nei au i te hoê o te mau taata maitai roa o taʻu i matau. Ua ani au iaʼna ia faaite mai i toʼna mau huru ia horoʻa faarahi anaʻe oia na vetahi ê. Ua parau mai oia no niʻa i te oaoa e te mauruuru o te aau no te opereraa na te feia haʻihaʻi. Te faaite ra oia e – aore taʼna e faufaa – na te Fatu te mau mea atoa – e mau taata haapaʻo noa tatou i Taʼna e horoʻa mai na tatou. Mai ta te Fatu i parau i te Peropheta Iosepha Semita, « Naʻu teie mau mea atoa, e o outou taʻu mau tavini8. »
I te tahi mau taime e moʻe ohiehia ia tatou e « na te Fatu te ao nei, e te îraa i niʻa i te fenua nei9. » Ua faaara mai te Faaora ia tatou, mai tei papaʻihia i roto i te Buka a Luka, « E ara ia outou i te nounou taoʻa : rahi noa iho hoʻi ta te taata nei taoʻa e ere hoʻi tei taua taoʻa naʼna ra toʼna ora.
« Ua parau atura oia i teie nei parabole, na o atura, E fenua maa hotu to te hoê taata taoʻa rahi :
« Ua na ô ihora oia i te feruri i roto iaʼna iho, Eaha ra vau, aita hoʻi aʻu e vairaa e o ai taʻu maa ?
« Ua na ô ihora, E na o vau, e vavahi au i taʻu mau fare vairaa maa nei, e faatiaʻi ei fare rahi, ei reira pue ai taʻu taoʻa e taʻu maa.
« A parau ai au i taʻu varua e, E taʻu varua, e taoʻa rahi ta oe ua puʻe i te vairaa no te mau matahiti a muri nei e rave rahi, e faaea maite, e amu, e inu, e ia rearea maite.
« Ua parau maira ra te Atua iaʼna, E tera ra maamaa e ! Ei teie nei a ruʻi e tiihia mai ai to oe varua, na vaiihora tena na mau taoʻa i haaputuhia e oe na ?
« O te huru ïa o te taata i haaputu i te taoʻa naʼna iho, e aita i rahi taʼna taoʻa i te Atua ra10. »
Tau matahiti i mairi, ua faatiʻa te Taeaʻe Elray L. Christiansen no niʻa i te hoê o toʼna mau fetii atea no te fenua Scandinavie tei faafariuhia i roto i te Ekalesia. E taata moni teie, ua hoo oia i toʼna mau fenua e taʼna mau faufaa i te fenuaTanemateta no te haere mai oia e toʼna utuafare i Utaha. I te haamataraa, e mea itoito oia i roto i te Ekalesia e ua maitai i te pae faufaa. No toʼna râ riroraa i roto i taʼna mau faufaa i moʻehiaʻi iaʼna te tumu oia i haere mai ai i Amerika. Ua farerei te episekopo iaʼna ma te tiʻaoro ia hoʻi faahou mai i roto i te Ekalesia. Ua mairi te mau matahiti e ua haere te tahi o toʼna mau taeaʻe e farerei iaʼna e ua parau atu iaʼna : « E Lars, ua haamaitai te Atua i to oe faaearaa i te fenua Tanemata. Ua haamaitai-atoa-hia oe i to oe haereraa mai i o nei… I teie nei, te paari nei oe, e mea tiʻa paha ia horoʻa oe i te tahi o to oe taime na te Ekalesia. Inaha hoʻi, eita oe e hopoi i teie mau mea na muri ia oe. »
Ua hitimahuta oia i teie parau, ua pahono mai oia : « E Vell, eita vau e haere11. » Area râ, haere mauʻtura ihoa oia ! Oia atoa tatou paatoa !
E mea ohie i te tahi mau taata ia riro i roto i ta ratou mau faufaa e i te haamoʻe i te mea mure ore. I to Aberahama haereraa i Aiphiti, ua haere taʼna tamaiti fetii o Lota iaʼna i Betela. Te vaira ta raua toopiti mau nânâ, utuafare e te fare ie, « Ore aʻera raua e o i te fenua ia tahoê te parahiraa ; i te rahi hoʻi a raua taoʻa, aitaʼtura e tiʻa ia apiti atoa to raua parahiraa12. » I muri mai i te tahi mau peʻapeʻa tei tupu i rotopu i te mau tiaʻi puaa a Aberahama e o Lota, ua parau atura Aberahama ia Lota, « Teie taʻu parau ia oe, eiaha roa ta taua ei mârôraa, e ta toʻu nei mau taata tiaʻi puaa, e te mau taata tiaʻi puaa no oe ra ; hoê hoʻi o taua fetii. »
« … A faataaʼtu na oe, e hinaaro oe i te pae aui, e tiʻa iaʻu ia haere i te pae atau, e ia hinaaro oe i te pae atau ra, e tiʻa iaʻu ia haere i te pae aui13. »
Ua ite o Lota « eaha ïa taʼna » a hiʻo atu ai oia i te fenua hotu rahi o te maa no Ioridana e ua faaoti aʻera oia i te rave mai i te fenua piri atu i te vahi ra no Sodoma.14 Ua mauruuru o Aberahama i te taʻitaʻi i taʼna nânâ i te fenua medebara ra no Kanaana, e ua rahi roa mai taʼna mau faufaa i reira.
Ua itehia o Aberahama ei patereareha rahi no te mau taata i parauhia ra a te Fatu. Te mau parau matamua ta tatou i ite no niʻa i te aufauraa tufaa ahuru, o te taime ïa a aufau ai o Aberahama i taʼna mau faufaa atoa ia Melehizedeka ra.15 Ua tiʻaturi oia e haamaitaihia oia e te Fatu o tei faaite iaʼna te mau maramarama o te ao tahuti nei, te maiti-raa-hia te Faaora, e te hamaniraahia te ao nei.16 Ua ite-atoa-hia o Aberahama no toʼna hinaaro i te pûpû i taʼna tamaiti ia Isaaka ei tusia. Ua riro teie hiʻoraa rahi no te faaroo ei tapaʻo rahi no te tusia tei ore â i itehiaʻe nei i roto i te aamu, i to te Faaora horoʻaraa mai i Toʼna ora no tatou paatoa ei taraehara no ta tatou mau hara.
Tau matahiti i mairi aʻe nei, « Ua rave te hoê tamaiti Korea i taʼna moni hebedoma no te hoo i te mau veʻa. I muri iho, ua hoo faahou atu oia e toʼna mau hoa i taua mau veʻa ra i niʻa i te mau puromu no te oire no Seoul, i Korea ei imiraa moni no te tauturu i te tapeʻaraa mai i te hoê tamarii haere haapiiraa i roto i te fare haapiiraa. E horoʻa atoa oia i te hoê tufaa o taʼna maa na teie nei tamaiti i te mau mahana atoa ia ore hoʻi oia e poiʻa. No te aha oia i na reira ai ? No te mea ua taiʻo nâ oia i te aamu no te Taata Maitai no Samaria17 e aita oia i hinaaro ia haroʻaroʻa noa ia ite ra e, eaha mau te huru ia rave mai ta te Taata Maitai no Samaria… Auaʻe i muri iho noa mai i te mau titorotororaa a toʼna metua tane no niʻa i taʼna mau ohiparaa18 » toʼna parauraaʼtu e : « E Papa, i te mau taime o taʻu e tauturu i toʻu hoa, e au ra e te riro ra vau mai te Taata Maitai o Samaria. Taa e noaʼtu i te reira, te hinaaro nei au e tauturu i toʻu mau hoa haapiiraa ravaʻi ore. E ere i te ohipa rahi. Ua taiʻo vau i te aamu i roto i taʻu buka haapiiraa Evanelia, e ua tiʻa maitai teie ohipa taʻu i rave19. » Aita te tamaiti i ui : « Eaha ïa taʻu », hou oia a rave ai i te reira. Ua rave râ oia i teie ohipa ma te feruri ore i te maitai noʼna iho.
I te 11 no setepa 2001, ua faauhia na fare maehaa teitei o World Trade Center i New York i na manureva e te mau taata iino o te tumu ïa raua i topa ai. E rave rahi tauatini taata tei pohe. No teie ati i tupu, hanere rahiraa aamu tei parauhia no niʻa i te itoito, e te hiʻo-ore-raa iaʼna iho. Hoê aamu mauiui e te itoito tei papaʻihia i roto i te veʻa Washington Post no niʻa i te hoê tapaʻo pae faatuhaahia no te nuu faaehau, o Cyril « Rick » Rescorla toʼna iʻoa, e i te reira taime e mono peresideni no te taiete paruru na Morgan Stanley Dean Witter.
E taata aravihi roa o Rick i vai ai oia ei raatira no te ohipa aro i roto i te aua faehau. Tei roto oia i toʼna piha ohipa i « te uraa mai te manureva matamua i te fare teitei i te Apatoerau i te hora 8:48 i te poʻipoʻi… Ua pahono oia i te niuniu rû o te 71raa o te tahua i te faaiteraa mai e, e auahi tei tupu i roto i te World Trade Center Matamua, e ua faaue oioi oia ia iritihia na 2.700 feia rave ohipa i rapae i te Piti o te Fare Teitei », e tae noaʼtu 1.000 feia o te Pae o te Fare Teitei. Ma te faaohipa i taʼna pû no te faaara e te tauturu i taua feia ra ia pou i raro i te mau tahua 44 e tae atu i te 72 o te tahua, ma te tauturu i te mau taata ia pou i raro. Hoê hoa tei ite ia Rick i te tautururaa i te feia o te tahua 10 tei pii iaʼna « E Rick, a haapaʻo maitai, a faaora atoa ia oe iho. »
Pahono maira oia : « Ia papu iaʻu e ua pau te mau taata atoa i rapae. »
« E ere oia i te maamaa. Ua haapaʻo oia i te ora o toʼna mau hoa hou toʼna. » Niuniu atura oia i te piha toro‘a no te faaite e, ua hoʻi faahou oia i niʻa no te imi i te mau feia taere.
Te mataʻitaʻi ra taʼna vahine i te hohoʻa o te manureva o United Airlines i te uraa i niʻa i te fare raveraa ohipa a Rick. « I muri aʻe, ua taʻi mai te niuniu. O Rick ïa.
« Parau maira : ‹Eiaha oe e taʻi, te arataʻi nei râ vau i toʻu mau taata i rapae i teie nei.›
« Ua taʻi noa taʼna vahine.
« ‹Mai te mea noaʼtu e e roohia vau i te ati, te hinaaro nei au ia ite oe e ua î roa toʻu oraraa i te oaoa ia oe.›
« Ua pohe te niuniu. » Aita o Rick i matara mai i rapae.
« E ono anaʻe taata i rotopu i taua 2.700 o te Taiete a Morgan Stanley tei pohe i roto i te fare teitei o te pae apatoa ra i te 11 no setepa, e semeio mau ïa tei tupu. Auaa hoʻi te itoito rahi o Rescorla i ora ai teie feia. Naʼna iho i faanaho i te faaoraraa o teie feia. Ua arataʻi oia i toʼna mau hoa ohipa i rapae. E i muri iho, ua hoʻi faahou atu oia i roto i te umu no te imi i te feia taere. O oia te taata hopea tei matara mai i rapae i te fare teitei i te pae apatoa i muri mai i te tupita-raa-hia te World Trade Center i te matahiti 1993, e aita e taata i manaʻo e roaa teie ati ahiri aita teie manureva i faauhia i niʻa iaʼna na mua roa. »
I rotopu i te ino rahi e te taparahiraa i tupu i te 11 no setepa 2001, aita o Rick i tauʻa aʻe eaha ïa taʼna ; area râ, ua tauʻa râ oia ia vetahi ê e te fifi e tupu ra. O Rick Rescorla te « taata mau i te vahi mau i te taime mau. » Rick, « 62 matahiti i te paari tei pûpû i toʼna ora no vetahi20. » Ua parau te Fatu iho, « Ia horoʻa te taata i toʼna iho ora no toʼna ra mau taua, aita roa e taata aroha ê atu i te reira21. »
Aita paha tatou i faaite i to tatou tauʻa ore ia au i teie ohipa i tupu, area râ, ma te itoito e riro tatou ei taata mau i te vahi mau i te taime mau no te pûpûraa i te hoê tauturu. E tupu te mau ohipa i te mau mahana atoa ia tiʻa ia tatou ia faaoti ma te itoito i te mau tautururaa no vetahi ê. Aita e otiʻa to taua mau ohipa ra, e tupu râ na roto i te hoê parau haehaa, te tautururaa, e aore râ, te hoê mata ataata.
Ua faahaamanaʻo te Faaora ia tatou, « O tei tapeʻa i toʼna ora, e ere ïa oia i te ora : area te tuu noa i toʻ na ora noʻu nei, e ora ïa toʼna22. » Hoê o te mau faahaparaa o te oraraa o te hoê taata o te parau-raa ïa e, « eaha ïa taʻu » e huru te reira no te titauraa i te moni, te faufaa, e te fenua, tera râ, i te hopea e moʻe te faaotiraa e te oaoa o tei iteahia e taua taata ra tei opere i taʼna mau taleni e te mau taoʻa ma te horoʻa maitai na vetahi.
Te hinaaro nei au i te faaite papu ia outou e te taviniraa rahi o ta tatou e rave tei roto ïa i te taviniraa a te Fatu. I roto i te mau imiraa e rave rahi o toʻu nei oraraa aita atu e mea faufaa atu i te reira maoti râ, te pahonoraa i te mau piiraa no te tavini i roto i te Ekalesia. E mea taaê te tahi i te tahi. E ua hopoi mai i te haamaitairaa taaê te tahi i te tahi. E tae mai te faaotiraa rahi aʻe o te oraraa nei na roto noa i te horoʻaraa i te taviniraa ia vetahi ê, eiaha râ, i te manaʻo noa raa e « eaha ïa taʻu. » E te faaite papu nei au i te reira na roto i te iʻoa o Iesu Mesia, amene.