Elder Spencer V. Jones
No te Hitu Ahuru

Haere ana’e tatou pauroa i mua. Ia maere te epesikopo. Haere ana’e i mua no te faaite i to tatou mau iteraa papu. » O tera te tamataraa a Spencer V. Jones i toʼna apiraa i rave i toʼna mau hoa diakono. E taime rahi mau te reira noʼna i roto i te paturaa i toʼna iteraa papu. « A horoʻa ai au i toʻu iteraa papu, i te pae hopea – inaha i matau noa na vau i te ata i te tahi mau taata ia faaite i to ratou iteraa papu e taʻi ratou e aita hoʻi au i papu e aha te tumu – taeraa i taua taime ra taʻi ihora vau », to Elder Jones tera haamanaʻoraa. « Aita roa e mo’ehia iaʻu i taua taime ra no te mea ua paraparau mai te varua i te varua, e ua tupu te tahi mea taaê. »

Ua paturuhia o Elder Jones, ei hoê melo no te pŭpŭ piti o te Hitu Ahuru, fanauhia oia i Safford, Arizona, i na metua o Virgil e o Nellie Baker Jones i te 17 no setepa 1945. Ua paari oia mai te hoê tamaiti na te hoê taata faaapu i roto i te hoê mataienaa no Virden, New Mexico tei reira te nohoraa no te hoê pŭpŭ iti Feia Moʻa i te Mau Mahana Hopea Nei, e te vahi farereiraa no ratou tei te fare pureraa ïa. « E pii noa matou fatata i te taata atoa ei tonton e ei tati, noaʼtu e aita e auraa fetii, e e haapaʻo maitai râ te taata te tahi i te tahi, mai te au ra e, e fetii ihoa. »

I muri ae i te taviniraa i roto i te Misioni Argentina Apato’erau, ua haere o Elder Jones i te Fare Haapiiraa Teitei no Brigham Young, i reira ua roaa mai taʼna parau tu’ite no te ihi ite no te animara. Ua farerei oia ia Joyce Elizabeth Mathews i roto i te hoê pŭpŭ ori no Arizona tei ori i Brigham Young. Ua faaipoipohia raua i te 3 no tiunu 1968, e i muri ae i taʼna haapiiraa, ua faanuu raua i Gallup, New Mexico. Ua ohipa o Elder Jones i roto i te mau ohipa e rave rau, tae noaʼtu i te hoê fare hooraa tauihaa e i roto i te hoê taiete puaatoro. E toru ta raua na tamarii e e vaʻu mootua.

Ua faaite o Elder Jones e ua riro te mau piiraa paatoa ei haamaitairaa e tei faaineine iaʼna no te tavini â i roto i te basileia o te Fatu. Ua roaa mai iaʼna te haapiiraa mai roto mai i te piiraa tataitahi, i roto anei i te tiʻaraa ei peresideni no te Feia Apî Tamaroa, ei tauturu epesikopo anei, ei epesikopo, ei orometua haapii no te haapiiraa evanelia, ei peresideni misioni, e ei papaʻi parau faatere no te area, e aore ra ei hitu ahuru mana area. « ua riro te piiraa tataitahi ei taahiraa e ei haapiiraa », te parau ïa a Elder Jones. « E tupu outou mai te au i te taahiraa tataitahi o ta outou e rave. »