Piihia ia tavini
No te faaamu i to tatou mau utuafare e no te tavini ma te faaroo i roto i te Ekalesia, ma te horo te taata i te oioi e au ore i toʼna ra puai, e titauhia ïa te paari, te feuriraa tano, te tautururaa no ô mai i te Atua ra – e te faatusiaraa.
Ia Orana te mau taeaʻe, e te mau tuahine. Te faatae atu nei au i te aroha o te mau melo e o te mau misionare no Marite Latino. E rave rahi o outou i ite e ua piihia o Elder Oaks e toʼna hoa e o vau nei o Elder Holland e toʻu hoa ia tavini i roto i te mau Area no te Ekalesia i te fenua Filipino e Chili. I roto i te mau paraparauraa e faaroohia, te uiui nei te mau taata eaha to te Ekalesia feruriraa i te mau mea e tupu nei. Noaʼtu te huru o to outou mau manaʻo, te tiʻaturi nei au e mea tiʻa iaʻu ia haapapu atu e aita matou e tere nei i te mau vahi atea mai na taata toopiti o na Faehau Too Maha Faahoro Puaa-horo-fenua o te Apokalupo. No te feia e imi nei i te « tapaʻo » a faariro i te reira ei tapaʻo no te hoê Ekalesia maere e te tupu rahi i roto i te ao nei, e ua purara toʼna mau melo e taʼna mau misionare tei roto i te mau reo e te mau fenua rarahi. E mea oaoa ia farerei e ia tavini i te Feia Mo’a o te Mau Mahana Hopea Nei i te mau vahi atoa, tei piri mai e tei atea atu, i Marite nei e aore râ, i te mau fenua atea, e te haamauruuru nei matou ia outou no ta outou mau pure e to outou hinaaro tauturu i te ohipa.
E ere teie huru taviniraa a te Tino Ahuru Ma Piti i te mea apî, oia mau, e mea ohie aʻe te huru no te taviniraa i teie tau i te matamua ra. Te mea maitai roaʼtu, tei pihai iho te Tuahine Holland iaʻu, e aita oia i vaiihohiaʼtu i te fare no te haapaʻo iaʼna iho e i ta maua mau tamarii. Aita atoa vau i titauhia ia rave i te ohipa i roto i toʻu mau tere no te aufau i toʻu tere i Santiago. Ua tae mai maua i te vahi i faataahia i roto i na hora rii te maoro na niʻa i te manureva, eiaha râ ia fano rave rahi hebedoma, e avaʻe atu na niʻa i te pahi nahonaho ore. Aita vau i tere na roto i te toʻetoʻe e te fiva, e te mau maʻi rahi, e hota rii toʻu e ua taere to maua tere hoê hora te maoro. Ua tiʻaturi hoʻi au e na roto i teie tautooraa e nehenehe ïa vau e farerei atu ia Petero e Paulo, ia Brigham e Wilford.
Mai ia outou atoa, ua faaroo pinepine au i toʻu apîraa i te mau aamu o te mau taeaʻe matamua o tei tere atu i te fenua Canada, Peretane, Scandinavia, Europa, te mau Motu no Patitifa, Mehiko, Asia e te vai atura. Aita i maoro aʻenei, ua taiʻo vau no niʻa i te misioni a Parley P. Pratt i te fenua Chili, i reira hoʻi i pohe ai e i hunahiaʼi ta raua aiû tamaroa i Valparaiso. Ua taiʻo atoa vau no niʻa ia Elder Melvin J. Ballard o tei piihia ia haamoʻa i te fenua Marite Apatoa tei iriti apîhia no te ohipa pororaa Evanelia. Te taviniraa o te patu i te hoê Ekalesia apî e te tupu hoʻi, e ere ïa i te mea titauhia, e ere atoa hoʻi i te mea horoʻa maerehia. I te tahi mau taime e mea rahi te mau taupupuraa e e mea moni hoʻi.
Aita matou e parau nei no te mau taeaʻe matamua tei haere atu e tavini, no te mau vahine atoa râ i paturu ia ratou e i te haapaʻoraa ia ratou iho e i ta ratou mau tamarii, i te faaeʻaraa i te fare no te aupuru e no te paruru i to ratou mau utuafare, e te tahi atoa tufaa o te ô vine a te Fatu o Taʼna i here.
I te mahana no te revaraa piti o taʼna tane i te fenua Peretane, e mea paruparu roa o Vilate Kimball. Ua ruru roa i te fiva rahi, aita e nehenehe iaʼna ia rave i te hoê noaʼtu mea maoti râ, i te aroha rima noaʼtu i taʼna tane a haere mai ai oia e aroha iaʼna ma te taʻi. E maha hebedoma noa to ta raua tamaiti iti o David i taua taime ra, e te tahi atu tamaiti, o Heber Parley e maha ïa matahiti, e naʼna e tari nei i te pape na toʼna utuafare maʻi. I muri noa mai i te revaraaʼtu taʼna tane, ua paruparu roa o Vilate e e mea tauturuhia oia ia hoʻi atu i niʻa i toʼna roʻi.
Mary Ann Young e taʼna mau tamarii hoê â faito maʻi i to Brigham faarueraa mai no taua atoa ra misioni, e mea fifi atoa ratou i te pae moni. Teie te hoê mea oto rahi tei faatiʻahia no niʻa i te vahine a Brigham i toʼna haereraa i te tahi pae o te Anavai Mississippi i te hoê tau toʻetoʻe roa, e ere toʼna ahu i te mea meʻumeʻu e ua ruru noa i te toʻetoʻe, ma te puʻohu maite i taʼna aiû tamahine i roto iaʼna a haere ai raua i te fare vairaa tufaa ahuru i Navu no te ani i te tahi umara putete. I muri mai, ua hoʻi atu oia ma te fiva, e taʼna aiû na niʻa i te anavai riʻariʻa, e aita roa oia i papaʻi atu i teie mau fifi i taʼna tane1.
E mea varavara tatou i te farii i te mau ati mai teie te huru tera râ, te faatusia nei e rave rahi mau misionare e mau melo no te rave i te ohipa a te Fatu. A tae noa mai ai te mau haamaitairaa e a tupu rahi noaʼi te Ekalesia, te tiʻaturi nei tatou e eita roaʼtu te taviniraa e riro ei mea fifi mai tei tupu i niʻa i teie mau melo matamua area râ, ia au i te himene a te mau misionare o teie tau mai Oslo tae atu i Osorno e mai Seattle e tae atu i Cebu, o tei na ô mai e : ua maitihia « ia tavini Iaʼna2. » No te faaamu i to tatou mau utuafare e no te tavini ma te faaroo i roto i te Ekalesia, ma te horo te taata i te oioi e au ore i toʼna ra puai3, e titauhia ïa te paari, te feuriraa tano, te tautururaa no ô mai i te Atua ra e te faatusiaraa. Mai ia Adamu e tae mai i teie nei, ua itehia te faaroo mau i te Fatu ia Iesu Mesia na roto i te faatusiaraa, e e tufaa iti roa hoʻi te reira ia faaauhia i Taʼna faatusiaraa faahiahia4. Ma te mata rotahi i te taraehara a Iesu Mesia, ua haapii te Peropheta Iosepha Semita, mai te mea aita e fafauraa no te faatusiaraa i roto i te hoê ekalesia aita atoa ïa to te reira e mana no te hopoi mai i te fafauraa no te ora mure ore5.
Te hinaaro nei au i te faatiʻa atu i te hoê hiʻoraa o teie nei tau i te tamataraa e te mau haamaitairaa e roaa ia tatou o tei « piihia ia tavini ». Ua parau atu te hoê tuahine maitai roa i toʼna hoa : « Te hinaaro nei au e faatiʻa ia oe no niʻa i te taime au i faaeaʼi i te amuamu i te taime e te faatusiaraa a taʻu tane ei episekopo. E mea maere mau, ua tupu te hoê ‹ohipa rû› i te hoê melo o te paroita i te taime mau maua e haere ai no te hoê ohipa taaê.
« I te hoê mahana ua faaite au i toʻu inoino rahi e ua farii oia e mea tiʻa ia maua ia faaafaro, taaê noaʼtu te mau pô Monire, e faataa maua hoê faahou â pô no maua noa. No reira, ua tae mai ‹taua pô› matamua ra e ua fatata roa maua i te tomo i roto i te pereoo i taʻi mai ai te niuniu.
«‹E tamataraa teie› , ataataʼtura vau iaʼna. Te taʻi noa ra te niuniu. ‹A haamanaʻo i ta taua faaauraa. Te haamanaʻo ra oe e haere taua. A haamanaʻo mai iaʻu. A vaiiho i te niuniu ia taʻi noa na.› I te pae hopea aita vau i ataata faahou.
« Mai te mea ra e ua mau taʻu tane i roto i te herepata i ropu iaʻu e te niuniu e taʻi ra. Ua ite au e tei iaʻu nei toʼna aau e ua ite au e hinaaro rahi toʼna ia tupu ihoa ta maua opuraa i taua pô ra. Area râ, ua fifi roa oia i te taʻiraa mai te niuniu.
« ‹E mea tano paha iaʻu ia pahono›, parau maira oia ma te oto. ‹E ere paha i te mea fifi roa.›
Na ô atu ra vau ma te taʼi : « ‹Mai te mea e na reira oe, e ino roa ta taua opuaraa. Ua ite paʻi au.›
« Uumu maira oia i toʻu rima ma te parau e : ‹E hoʻi oioi mai au,› e horo vitiviti atura no te pahono i te niuniu.
« Aita taʻu tane i hoʻi oioi mai i roto i te pereoo, taa ihora vau e e fifi. Pou atura, tomo atura i roto i te fare e haere atura e taʻoto. Ia poʻipoʻi aʻe, ua tatarahapa maira oia iaʻu ma te reo mărû, e ua farii au e o te hopearaa ïa.
« I toʻu manaʻo. E ua haapeʻapeʻa noa te mau mea i tupu iaʻu i te mau hebedoma i muri mai. Aita vau e faahapa ra i taʻu tane, area râ, ua vai noa râ toʻu au ore. Te vai apî noa ra taua mau mea i roto iaʻu i farerei ai au i te hoê vahine no taʻu paroita. Ui maira e nehenehe anei oia e tauʻa parau iaʻu. Faatiʻa maira oia i toʼna faahinaaroraa i te tahi atu taata tei hopoi mai i te oaoa i roto i toʼna oraraa teimaha, ua noho oia i te hoê tane rave ohipa tamau e haere atoa ra i te haapiiraa tuatoru. E mea pirihaʻo roa to raua fare. E mau tamarii naʻinaʻi faaohipa rahi, maniania e te rohirohi. Teie taʼna i parau : ‹Ua faahemahia vau ia haere atu na muri i taua taata ra. I toʻu hiʻoraa i toʻu oraraa, te vai ra te mea maitai atu â noʻu. Na toʻu feruriraa i faatupu i te manaʻo ia faaruʻe i taʻu tane, i taʻu mau tamarii, e i taʻu mau fafauraa no te hiero e i taʻu Ekalesia, e ia imi i te oaoa i pihai iho i te hoê taata ê.›
« Na ô maira oia : ‹Ua oti taʻu opuaraa ; e ua tae i te taime au e tapuni ai. Inaha, i roto i te hoê feruriraa hopea ia rave i te maitai, ua parau mai toʻu aau ia taniuniu i ta oe tane, toʻu ïa episekopo. Ua parau vau e, « toʻu aau » area râ, ua ite au e, e reo te reira no te raʻi mai. Aita te reira i au i toʻu hinaaro, noaʼtu râ, ua taniuniu vau. Ua taʻi noa te niuniu. E na o ihora vau, « Mai te mea e aita te episekopo e pahono mai, e tapaʻo te reira e faaoti ïa vau i te mea taʻu i opua. » Ua taʻi noa te niuniu e ua fatata roa vau i te tuu i raro a haere atu ai i roto i te haamouraa, inaha, faaroo ihora vau i te reo o ta oe tane. Ua tomo te reira i roto i toʻu tino mai te uira ra te huru. Haamata ihora vau i te taʻi ma te parau e, « Episekopo, o oe mau â teie ? E fifi toʻu. Te hinaaro nei au i te tauturu. » E ua tae mai ta oe tane no te tauturu e ua ora vau i teie mahana no toʼna pahonoraa i te niuniu.
« ‹Ua fariu vau i muri e manaʻo ihora vau e ua rohirohi au e e mea maamaa e e mea ino roa vau. Tera râ, ua here au i taʻu tane e taʻu mau tamarii ma toʻu aau atoa. E tamataraa teie no to maua utuafare. Ua ite au te vaira to vera ma. Tera râ, te huru maitai maira te oraraa. Te vaira ihoa te raveʻa.› I reira parau maira oia : ‹Aita vau i matau ia oe tera râ, te hinaaro nei au ia haamauruuru ia oe no te tururaa i ta oe tane i roto i toʼna piiraa. Ua ite au i te faufaa no ta orua taviniraa no orua e ta orua mau tamarii, tera râ, mai te mea i roto i te hoê mahana fifi te vai ra te hoê taata tei pûpû i toʼna taime, ia ite mai oe e mauruuru mure ore toʻu i te feia o te faatusia nei mai ta oe i rave no te faaora i te feia mai iaʻu nei.› »
E te mau taeaʻe e te mau tuahine, ia maramarama mai outou te aʻo nei au ma te puai na roto i te mana, e te tiʻaturi i te mau ohipa o ta te mau episekopo e te tahi atu feia faatere e rave nei. Ua ite au e rave rahi mau titauraa o te faatea nei i te mau metua, te mau metua vahine ihoa ra i rapae i te utuafare i reira hoʻi te mau tamarii e faaamuhiaʼi i rotopu i te mau fifi e o ratou hoʻi te farii nei i teie mau fifi paari o te sotaiete. E no toʻu tiʻaturi i te faufaa rahi o te mau taata faaipoipo e te mau tamarii, i horoʻaʼi au i te taime i te hoê tane e metua tane hoʻi, no toʻu ite e, e iva taime i niʻa i te ahuru te parau nei te mau vahine i ta ratou mau tane eiaha e pahono i te niuniu. Tera râ, te mauruuru nei au i te mea i roto i te fifi o teie nei tuahine apî, ua pee teie episekopo i te faaurûraa a te Varua e ua pahono oia i toʼna « piiraa » – e piiraa mau ihoa – ia « haere e tavini. »
Te faaite papu nei au e, te utuafare e te faaipoiporaa, e mau mea faahiahia ïa no to tatou oraraa. Te faaite papu nei au i te hinaaro ia paruru e ia faaora ia ratou a imi ai tatou i te taime e te mau raveʻa no te tavini i roto i te Ekalesia. I te mau taime taʻu i manaʻo e tupu te mau fifi, i te mau taime e hinaarohia ai te faaurûraa a te varua i ta tatou pahonoraa, te haamauruuru nei au i te mau vahine tataʻitahi o tei tiaʻi maoro noa i to ratou hoa faaipoipo e tae noaʼtu e ua toʻetoʻe te maa, e i te mau tane faaipoipo tataʻitahi, o tei tunu i taʼna iho maa e no te mea o oia iho te tutu maa e toʻetoʻe oioi noa ïa te maa, e i te mau tamarii o tei peʻapeʻa i te mea ua faatiʻaihia toʼna tere i te puhaparaa e aore râ, i te tiaʻiraa i te hoê metua ia haere mai e mataʻitaʻi i te tuʻeraa popo, (auaa eita te reira e tupu pinepine ! ) Te haamauruuru nei au i te mau peresideni misioni e ta ratou mau vahine, ta ratou mau tamarii, i te mau misionare tane e te vahine o tei piihia ia tavini no te hoê tau, tei mairi i te mau mahana fanauraa e te mau bapetizoraa, e te mau faaipoiporaa e te mau hunaraa maʻi, te mau faaoaoaraa utuafare no te mea ua pahono ratou i te « piiraa ia haere e tavini. » Te haamauruuru nei au i te taatoaraa o te mau melo o te Ekalesia i roto i to ratou mau fifi e o te rave itoito nei i te ohipa no te paturaa i te basileia o te Atua i niʻa i te fenua nei.
Te faaite papu nei au i te tusia e te taviniraa a te Fatu o Iesu Mesia, o tei horoʻa i te mau mea atoa na tatou e na roto i te varua o te horoʻaraa ua parau mai « a pee mai iaʻu6. » « Mai te mea te vaira te taata e hinaaro i te tavini iaʻu », teie Taʼna i parau « O te taata i hinaaro ei tavini noʻu ra, a pee mai ïa iaʻu e te vahi taʻu e parahi ra, ei reira atoa ïa taʻu tavini : e ia tavini mai te taata iaʻu ra, na toʻu Metua ïa e faahanahana mai iaʼna7. » Na te reira taviniraa e faaite mai i te mau opuaraa maitai aʻe e tano ia rave e nahea ia riro ei pĭpĭ mai Taʼna i hinaaro ia tatou ia riro. Te haamauruuru nei au Iaʼna no Taʼna arataʻiraa hanahana i te tautururaa ia tatou ia faatupu i teie mau opuaraa e te tautururaa ia tatou ia imi i te eʻa. Te haamauruuru nei au Iaʼna no « te amoraa i to tatou paruparu e to tatou oto8 » e ua pii Oia ia tatou ia rave i taua mau mea ra no te tahi e te tahi. Na roto i te iʻoa o Iesu Mesia, amene.