Tatou tataʻitahi ei taata maitai aʻe
I roto i te oraraa nei te vai ra te tahi mau tufaa o te tiʻa ia faahaerehia i mua. Noaʼtu te huru o ta tatou mau ohipa, e tiʻa ia tatou ia haamaitai aʻe i to tatou huru, e ia na reira tatou e haamaitaihia te oraraa o vetahi ê atu.
Teie te hoê amuiraa faahiahia roa, e te mau taeaʻe e te mau tuahine. Ia hoʻi atu tatou i to tatou mau utuafare e i ta tatou mau ohipa, e mea tiʻa roa ia tatou tataʻitahi ia riro ei feia maitai aʻe i teie nei na mua aʻe i te haamataraa o te amuiraa.
E mea maitai roa te mau aʻoraa atoa. Ua faaûrû-maitai-hia te mau pure. E mea nehenehe roa hoʻi te mau himene.
Area râ te mea faahiahia roaʼtu, o te huru ïa o te mau mea i tupu i roto ia tatou na roto i te haereraa mai i te amuiraa. Ua faatupu vau iho i te hoê opuaraa papu i roto iaʻu iho ia riro ei taata maitai aʻe i teie nei i te matamua ra. Te hinaaro nei au ia faarahi atu â i toʻu here i te mau taata i roto i te ahoaho. Te hinaaro nei au ia tauturu rahi atu â i te feia navaʻi ore. Te hinaaro nei au ia vai tiʻamâ noa no te farii i to outou tiʻaturiraa. Te hinaaro nei au ia riro ei tane faaipoipo maitai aʻe, ei metua tane maitai aʻe, e ei papa ruau maitai aʻe. Te hinaaro nei au ia riro ei taata-tupu maitai aʻe e ei hoa maitai aʻe. Te hinaaro nei au ia riro ei melo maitai aʻe ma te faarahi i toʻu ite no niʻa i teie Evanelia hanahana rahi.
Te faaitoito atu nei au ia outou atoa o te faaroo mai nei iaʻu ia faaohipa i te huru Atua e vai nei i roto ia outou. Ua ite mau anei tatou i te auraa no te reira, oia hoʻi, ia riro ei tamarii na te Atua, e ia farii i te huru Atua i roto ia tatou ?
Te tiʻaturi nei au ma toʻu aau atoa, e ua riro te mau melo no te Ekalesia ei mau taata maitai. Mai te mea e haapaʻo tatou i te mau parau tumu no te Evanelia e riro ihoa tatou ei feia maitai, no te mea e vai te aroha e te hamani maitai i roto ia tatou, e te faaoromaʻi, e te hinaaro ia tauturu i te feia i roto i te ati. E tiʻa ia tatou ia haavî i to tatou huru Atua e ia huna i te reira ia ore ia itehia i roto i to tatou oraraa, e aore râ e tiʻa ia tatou ia faaiteite i te reira e ia vaiiho i te reira ia itehia na roto i te mau ohipa ta tatou e rave.
I roto i te oraraa nei te vai ra te tahi mau tufaa o te tiʻa ia faahaerehia i mua. Noaʼtu te huru o ta tatou mau ohipa, e tiʻa ia tatou ia haamaitai aʻe i to tatou huru, e ia na reira tatou e haamaitaihia te oraraa o vetahi ê atu.
Eita i te mea titauhia ia faaite haere e melo tatou. Eita atoa i te mea tiʻa ia tatou ia faateʻoteʻo no te reira, e aore râ ia manaʻo e mea maitai aʻe tatou. Aita te reira i tano i te Varua o te Mesia o ta tatou e hinaaro nei ia pee atu. E itehia taua Varua ra i roto i to tatou aau e varua atoa, na roto i te hau e te teʻoteʻo ore o to tatou oraraa.
Ua ite tatou paatoa i te tahi mau taata o ta tatou i hinaaro ia riro mai te reira te huru, no te mea te rave ra ratou i te tahi mau peu o te faaite ra i te nehenehe o te Evanelia na roto i te huru o to ratou oraraa.
E nehenehe ia tatou ia haamărû iho i to tatou reo iriâ. E nehenehe ia tatou ia faahoʻi i te maitai no te ino. E nehenehe ia tatou ia ataata noaʼtu e mea ohie aʻe ia riri. E nehenehe ia tatou ia faahau iho i to tatou huru e eiaha e tauʻa atu i te mau faainoraa.
Ia riro tatou ei feia oaoa. Te opuaraa a te Fau o te opuaraa ïa no te oaoa. E mâmâ hoʻi te hopoiʻa, e iti hoʻi te hepohepo, e e iti hoʻi te oto mai te mea e faatupu tatou i te varua no te oaoa.
A faaitoito atu â tatou i te amoraa i ta tatou hopoiʻa ei mau metua. Ua riro te utuafare ei niu no te nunaa taata. Ua riro te utuafare ei faanahonahoraa tumu no te Ekalesia. Te hinaaro nei matou ia maitai aʻe te oraraa o to tatou mau taata, ei mau tane faaipoipo e ei mau vahine faaipoipo, e ei mau metua e ei mau tamarii.
E tupu rahi te faahaparaa mai te mea te vai ra te riri e te reo iriâ. E mea rahi roa te mau tamataraa i te mau mahana atoa. E hoʻi mai te mau tane i te fare na ta ratou ohipa mai ma te paruparu e te riri ohie noa. E rave rahi hoʻi mau vahine e rave nei i te ohipa. Te ite nei hoʻi ratou i te mau fifi rahi atu i te faufaa no te moni ta ratou e farii ra na roto i te raveraa i te ohipa. Ua faarue-noa-hia te mau tamarii ia faaoaoa ia ratou iho, e eita hoʻi te pae rahi no te reira i te mea maitai.
E toʻu mau taeaʻe e mau tuahine, a haapaʻo tatou i ta tatou hopoiʻa ei mau metua e a faariro i taua hopoiʻa ra ei mea faufaa roa, no te mea tei roto i te reira te faufaa rahi no te oraraa nei.
Ia ore tatou e manuïa i roto i to tatou utuafare, ua faufaa ore to tatou oraraa. Ua faufaa ore te oraraa o te hoê taata mai te mea aita oia i manuïa i roto i toʼna utuafare. Te ani atu nei au ia outou e te mau tane, ia hiʻopoa maitai i to outou iho huru ei mau tane faaipoipo, ei mau metua tane, e ei upoo faatere utuafare. A pure no te arataʻiraa e no te tautururaa, e i muri iho, a pee i te reo iti haʻihaʻi o te Varua no te arataʻi ia outou i roto i teie hopoiʻa rahi, no te mea e mea mure ore te mau utuʻa no ta outou faatereraa i roto i te utuafare.
Ia haamaitai mai te Atua ia outou e te mau hoa here. Ia vai te varua no te hau e te here i roto ia outou i te mau vahi atoa. Ia vai te hau i roto i to outou oraraa. Ia tuturi outou i raro i mua i te Atua Mana-Hope no te haamauruuru iaʼna no Taʼna mau haamaitairaa rahi. Ia tiʻa mai outou i niʻa ma te haere i mua ei mau tamarii tamaroa e ei mau tamahine na te Atua no te faatupu i Taʼna mau opuaraa moʻa, te taaata i taʼna iho ravea, o taʻu ïa pure haehaa a vaiiho atu ai au i toʻu here e taʻu haamaitairaa i niʻa iho ia outou, na roto i te iʻoa o Iesu Mesia, amene.