Elaine Schwartz Dalton
Tauturu piti, Peresideniraa Rahi o te Feia Apî Tamahine
Aita i maoro noa iho i muri a’e i to Elaine S. Dalton ôraa no te piti o te matahiti i roto i te Fare Haapiiraa Teitei no Brigham Young, i pohe ai toʼna metua tane ma te manaʻo-ore-hia. E taime tamataraa rahi te reira noʼna i roto i toʼna oraraa, e ua pure tamau oia ia maramarama oia no te aha toʼna metua tane i rave oioihia ai mai roto atu i toʼna utuafare o tei hinaaro rahi roa iaʼna.
Aita te pahonoraa i tae oioi mai i taʼna mau pure e tae noaʼtu i te tau mahanahana, a tere ai oia na Europa ma na roto i te pŭpŭ ori no BYU. I te mahana oroʻa no te metua tane, a haere ai te pŭpŭ i te pureraa oroʻa, hoê o te mau aʻoraa no niʻa i te Maseli 3:5-6 : « E tiʻaturi ia Iehova ma to aau atoa ra; eiaha ra e tiʻaturi i to oe ihora haapaʻo. Eiaha e haamoe iaʼna i to oe atoa ra mau haereʻa; e naʼna e faaite ia oe i to oe ra mau haereʻa. »
« Ua ite au i reira e taua papaʻiraa moʻa o te pahonoraa ïa i taʻu pure », taʼna ïa parauraa i teie nei. « Aita vau i ite no te aha toʻu metua tane i pohe ai, tera râ ua ite au mea titauhia vau ia tiʻaturi i te Fatu. E na tera papaʻiraa moʻa i arataʻi iaʻu mai te reira mai taime i toʻu oraraa. I roto i te mau mea atoa o te tupu mai o taʻu i ore i ite, ua ite râ vau mai te mea e tiʻaturi au i te Fatu, e arataʻi mai Oia i toʻu haere’a. »
I roto i toʼna piiraa apî ei tauturu piti no te peresideniraa rahi no te Feia Apî Tamahine, te tiʻaturi nei te tuahine Dalton e nehenehe taʼna e faaitoito i te feia apî tamahine ia faatupu i taua tiʻaturiraa i roto i te Metua Here i te Ao ra e ia titau i te arataʻiraa a te Varua Maitai.
Ua fanauhia te tuahine Dalton i Ogden,Utaha I te 1 no Novema 1946 i na metua o Melvin Leo e o Emma Martin Schwartz. Ua faaipoipo oia ia Stephen E. Dalton i te 13 no setepa 1968 i roto i te Hiero no Salt Lake City. E ono to raua mau tamarii e te parahi nei raua i Salt Lake City.
Ua roaa te parau tu’ite a te tuahine Dalton no niʻa i te reo peretane mai roto mai i te Fare Haapiiraa Teitei no Brigham Young. Ua tavini oia ei melo i roto i te faanahonahoraa rahi o te Feia Apî Tamahine, e ei Peresideni Feia Apî Tamahine no te tĭtĭ, e ei tauturu no te pŭpŭ roti, e ei orometua haapii na te Sotaiete Tauturu.
« Mea faahiahia mau â te feia apî tamahine o teie nei mahana, mea puai roa ratou i te pae varua », taʼna ïa parau. « E titauraa taaê to ratou no te parautiʻa i roto i te ao o ta tatou e ora nei i teie nei. Ei mau melo no te Ekalesia, e nehenehe ta ratou e tiʻa atu e ia arataʻi ia vetahi ê o te imi ra i te mau hiʻoraa parautiʻa. »