Ma te aau moʻa
I te mau taime atoa e faatoro tatou i te rima na roto i te here, te faaoromai, te maitai, te aau horoʻa, e faatura tatou i ta tatou mau fafauraa na roto i te parauraa e : « Inaha teie au, ; O vau ta oe e tono. »
Noaʼtu e, ua hau atu to tatou rahiraa i to te mau tuahine no te Sotaiete Tauturu no Navu, ua aifaito noa râ te varua o to tatou haaputuputuraa. Mai ia tatou nei, ua faateitei ratou, ua faaamu e ua faaurû ratou te tahi i te tahi ; ua pure ratou no te tahi e te tahi ; te mau mea atoa na ratou ra, ua pûpûhiaʼtu ïa no te basileia. Teie ta te peresideni Hinckley faahohoʻaraa ia tatou « e faarii rahi no te faaroo e no te ohipa maitai… , e tutau no te itoito e no te haapaʻo e no te ohipa oti1. » Aue ïa ohipa i te faahiahia e, noaʼtu e, tei roto tatou i teie Pû Amuiraa, e aore râ, tei roto i te hoê fare pure i Mexique, e aore râ, tei roto i te hoê amaa i Lituania, e mau tuahine anaʻe tatou no Ziona tei faauehia ia rave i te hoê ohipa rahi. E e rave amui tatou i te reira ohipa, ma te arataʻihia e te hoê peropheta na te Atua ! Te tiʻaturi nei au e, te ite mai nei outou i toʻu here ia outou, e tae noaʼtu i to toʻu na tauturu o tei riro ei haamaitairaa rahi noʻu.
Ia parau atu vau ia outou e, ua hitimahuta vau i to te peresideni Hinckley piiraa iaʻu ei peresideni rahi no te Sotaiete Tauturu, e faaauraa haʻihaʻi roa ïa te reira ! Te taa ra ia outou ? Tera râ, ma te reo ruru, pahono atura vau e, « Teia au, a to’no iaʻu. » I to te hoê hoa ati Iuda iteraa e, eaha te mea i titauhia iaʻu i roto i toʻu nei piiraa, hiʻo maira oia iaʻu mai te huru ra e, e maamaa toʻu e ui maira, « Bonnie, no te aha oe e na reiraʼi ? » (I te mau taime mai teie te huru, e ui pinepine au iaʻu iho i teie nei uiraa ! ) Tera râ, hoê noa iho tumu i na reira ai au : ua fafau vau i te Fatu, e ua ite au eaha te titauhia iaʻu. Ua ite atoa vau e, e rave amui tatou i te ohipa e toʻu hoʻi hinaaro ra to outou atoa ïa.
I roto i te mau tenetere e rave rahi, ua faaoti te mau vahine parau tiʻa ia amui atu i roto i te ohipa a te Mesia. E rave rahi outou aita i maoro aʻe nei te bapetizo-raa-hia ; e mea apî roa ta outou mau fafauraa i roto i to outou aau, e mea haehaa noa ra ta outou mau faatusiaraa. Ia feruri anaʻe au ia outou, e haamanaʻo vau ia Priscilla Stains no Wiltshire mai, i te fenua Peretane. Ahuru ma iva matahiti to Priscilla a tomo mai ai oia i roto i te Ekalesia i te matahiti 1843. Oia anaʻe. Ua titauhia iaʼna ia tapuni i te pô ia bapetizohia oia, no te mau hamani-ino-raa a te mau taata iaʼna, e te au ore o toʼna utuafare iaʼna. Teie taʼna i papaʻi : « Ua tiaʻi matou e tae roaʼtu i te tuʻiraa pô… haere anaʻe atura matou i te hoê anavai pape afa kirometera i te atea. Te pape … ua paari roa ïa, e ua patia te Elder i te hoê apoo i roto i te pape paari, navaʻi noa te aano no te bapetizoraa… Aita e taata ê atu i faaroo i taʻu fafauraa maori râ, te Atua anaʻe e Taʼna mau melahi, e te tahi mau taata rii tei amui mai ia matou i te tiʻa-noa-raa i te pae pape ; area râ, i roto i te hanahana rahi o taua tuʻiraa pô ra, mai te huru ra e, te natura taatoa tei faaroo mai, e mai te huru ra e, ua papaʻihia ta matou mau parau e te melahi i roto i te buka na Iehova2. »
Taʼna mau parau : « O te Atua anaʻe e taʼna mau melahi… tei faaroo i taʻu mau fafauraa » tei haaputapu i toʻu varua, mai ia Priscilla atoa, noaʼtu eaha te faito o to tatou matahiti, eaha te huru o to tatou ite i te Evanelia, eaha to tatou maororaa i roto i te Ekalesia, e mau vahine anaʻe tatou no te fafauraa. E parau faaroo pinepinehia teie i roto i te Ekalesia, eaha râ toʼna auraa mau ? Nahea te mau fafauraa ia faaite e, o vai tatou, e nahea tatou ia ora ?
Te mau fafauraa, e aore râ, te mau parau tapu i rotopu ia tatou e to tatou Metua i te Ao ra, e mea faufaa rahi ïa te reira no to tatou haereʻa mure ore. E paʻepaʻe tamau maite Oia ia tatou, ia riro tatou mai Iaʼna ra te huru na roto i te tuuraa ia tatou i roto i Taʼna ohipa. I te taime o te bapetizoraa ua fafau tatou ia here Iaʼna ma to tatou aau atoa, e ia here i to tatou mau tuahine e to tatou mau taeaʻe mai a tatou iho nei. I roto i te hiero ua fafau â tatou ia haapaʻo, ia pipiri ore, ia faaroo, ia tura, ia aroha. Ua fafau tatou ia faatusia e ia haamoʻa i ta tatou mau taoʻa atoa. Ia ohipa na roto i te mana o te autahuʻaraa, to tatou haapaʻoraa i ta tatou mau fafauraa, e noaa ïa ta tatou mau haamaitairaa o te faaî roa i ta tatou mau faarii. Eaha te pinepineraa o ta outou i manaʻo e ere ta outou mau fafauraa no teie noa oraraa tahuti nei, e faatuati râ te reira ia outou i to te Moʻa roa ? Te raveraa i te fafauraa, e tapaʻo ïa no te hoê aau tae mau ; te haapaʻoraa i te mau fafauraa, e tapaʻo ïa no te hoê aau faaroo.
E au e, e mea ohie roa i niʻa i te api parau, e ere anei ? Na te ohipa râ e faaite mai e, o vai mau râ tatou. No reira, i te mau taime atoa e faatoro tatou i te rima na roto i te here, te faaoromaʻi, te maitai, te aau horoʻa, te faatura ra ïa tatou i ta tatou mau fafauraa na roto i te parauraa e, « Inaha teie au, o vau ta oe e tono. » Ua matau tatou i te parau marû noa i teie mau parau i to tatou Metua i te Ao ra, ma te maniania ore.
I nahea te mau fafauraa a te tahi taata ê atu i te haamaitairaa i to outou oraraa, i te hopoiraa mai i te hau i roto ia outou, i te faaamuraa i to outou varua ? I te tau a riro ai maua o taʻu tane ei misionare i Peretane, ua ite maua e rave rahi mau misionare tamaroa e tamahine tei haamaitaihia te oraraa na roto i te mau fafauraa a te mau vahine haapaʻo maitai. E mauruuru rahi toʻu i te mau metua vahine, te mau tuahine, te mau paino vahine, te mau orometua haapii, mai ia outou e rave rahi, inaha, no to ratou faaturaraa i ta ratou mau fafauraa, ua tae te mau haamaitairaa i niia vetahi ê, na roto i te huru o to ratou haapiiraa i taua mau misionare ra no ananahi.
Eita te mau fafauraa e turaʻi noa ia tatou ia faaruʻe i to tatou mau faaearaa au maitai, e ia itehia ia tatou te mau maitai apî, e arataʻi atoa râ te reira ia vetahi ê ia na reira atoa. Ua parau Iesu e : « O ta outou hoʻi i hiʻo mai iaʻu i te raveraa, o ta outou ïa e rave3. » Ua riro Toʼna haapaʻoraa i Taʼna mau fafauraa ei faaitoitoraa ia tatou ia haapaʻo atoa i ta tatou.
E paruru te mau fafauraa ia tatou i te mau mamae faufaa ore. Teie te hoê hiʻoraa, mai te mea e e pee tatou i te arataʻiraa a te Peropheta, te haapaʻo ra ïa tatou i te hoê fafauraa. Ua aʻo mai oia ia tatou eiaha e tarahu, e haaputu i te maa, e ia ora tiʻamâ ia tatou iho. Mai te mea e ora tatou na roto i ta tatou iho mau raveʻa, e haamaitaihia tatou na roto i te haapaʻoraa. E haapii te reira ia tatou i te parau no te mauruuru, no te tarani, no te pipiri ore ; e horoʻa mai te reira i te hau ia tatou, i roto i te fifi o te pae moni, e i te paruru ia tatou i te nounou i te mau mea o te pae tino. Ia faaî tamau noa tatou i ta tatou lamepa, aita ïa to te mau fifi manaʻo-ore-hia e mana no te tapeʻa ia tatou ia parau ma te faaroo e, « Inaha teie au, o vau ta oe e tono. »
E riro te faaapîraa i te fafauraa ei faaitoitoraa e ei faaoraora-faahou-raa i te varua. I te mau Sabati atoa, ia amu tatou i te oroʻa moʻa, eaha te mea e tupu i roto i to tatou aau ia faaroo anaʻe tatou i teie mau parau, « ia haamanaʻo tamau noa ratou Iaʼna4 » ? Ua rahi atu anei to tatou maitai i roto i te hebedoma i muri mai, na roto i te haapapu-faahou-raa tatou i te mea tei hau atu i te faufaa ? Oia mau, te farerei nei tatou i te mau mea teimaha ; oia ïa, e ere i te ohipa ohie te parau no te tauiraa. Tera râ, ua feruri anei outou e, e mea nahea to tatou mau tuahine i ora ai i roto i to ratou tiahi-raa-hia i rapae ia Navu, e rave rahi hoʻi tei haere avae noa ? I te taime ua paruparu to ratou mau avae, na ta ratou ïa mau fafauraa i amo ia ratou ! Eahaʼtu te mea e nehenehe e horoʻa i te puai varua e te puai tino tuutuu ore ?
E paruru atoa te mau fafauraa ia tatou « ia ore tatou ia aueue noa i te mataʻi ra, i tera parau, i tera parau, i te raveʻa a te taata nei, e te paari i te mau peu atoa o te haavare ra5. » Te mau vahine no te fafauraa, a tiʻa ma te aueue ore ia parau-anaʻe-hia te ino e maitai, e te maitai e ino. I roto anei i te piha a te pŭpŭ autahuʻaraa, i te ohipa anei, e aore râ, te mataʻitaʻi ra te mau « taata aravihi » i roto i te afata teata, a haamanaʻo i ta tatou mau fafauraa, eita ïa tatou e ruri-ê-hia.
E nehenehe te mau fafauraa e paruru ia tatou i te pae varua, e paruru atoa i te feia ta tatou i here, e ia faaineine hoʻi ia tatou i te pae varua, na roto i te tuuraa i te mau mea faufaa na mua roa. Ia parau tatou i te parau o te utuafare, eita e nehenehe ia tatou ia tauʻa ore, e te mata ê. E moʻe ê te tau oaoa o te tamariiraa ; e mea iti roa tei roaa ia ratou taua mau mahana oaoaraa tei iteahia e au a ora ai au i roto i te oraraa faaapu. Ua parau te peresideni Hinckley : « To tatou mau fifi, fatata to tatou paatoa, e tupu te reira i rapae i te utuafare. Mai te mea e… e titauhia te tauiraa … e mea tiʻa ïa ia haamata i te utuafare. Ei reira e haapiihiaʻi te parau mau, e faatupuhiaʻi te paieti, e ueuehiaʻi te haapaʻo, e e faaamuhiaʻi hoʻi te here6. »
E te mau tuahine, e hinaaro te Fatu i te mau vahine o te haapii i te tamarii ia rave i te ohipa e ia haapii, e ia tavini e ia tiʻaturi. Ta tatou iho anei tamarii, e aore râ, ta vetahi ê, e tiʻa tatou i niʻa ma te parau e : « Inaha teie au, o vau ta oe e tono no te haapaʻo i ta outou mau tamarii rii, ia tuu ia ratou i mua roa, ia arataʻi ia ratou, e ia paruru ia ratou i te ino, ia here ia ratou iho. »
I te tahi taime, ua titauhia ia tatou ia haapaʻo i ta tatou mau fafauraa, noaʼtu e, te ite ra tatou e, aita e tumu mau no te reira. Ua faaroo vau i te hoê tuahine taa noa i te faatiʻaraa i te ohipa i tupu i niʻa iaʼna no niʻa i « te tiʻaturi-hope-roa-raa i te Fatu. » Aita toʼna oraraa i riro mai taʼna i manaʻo. Te haroʻaroʻa ra paha te tahi, aita anei ? Te mau mea e itehia i roto i taua area taime ra, o te tauiuiraa ïa te ohipa, te mau fifi apî no te pae moni, e te faatianiraa o te mau haapiiraa hohonu a te taata. Faaroo mai na râ outou i te ohipa taʼna i rave. Na roto i toʼna oraraa i pihai iho i te tahi atu mau tuahine i roto i taʼna paroita, ite aʻera oia e, te imi atoa ra ratou i te hau ta te Evanelia e horoʻa mai. Titau ihora oia i te hoê haamaitairaa autahuʻaraa. Ua rave maitai oia i taʼna ohipa i roto i toʼna piiraa. Ua tuatapapa maite oia e ua tamata puai atu i te pûpû i toʼna here, toʼna maururu, e toʼna tiʻaturi ia Iesu. Ua pure oia. Te parau ra oia e : « Ua taparu vau ma te taʻi i mua i te Fatu, ma te parau atu Iaʼna e, e rave au i te mau mea atoa Taʼna e ani mai iaʻu. » Ua rave oia i teie mau mea atoa, noaʼtu te mau fifi i farereihia e aʼna. Ua ite anei outou eaha te ohipa i tupu ? Aita, aita toʼna hoa mure ore i tiʻa mai i mua i toʼna uputa fare. Ua tomo mai râ te hau i roto i toʼna aau, e ua maitai aʻe toʼna oraraa.
E te mau tuahine, e haapaʻo tatou i ta tatou mau fafauraa ia faaite tatou i te paari o te oraraa no te faaitoito ia vetahi ê, ia haere tatou i ta tatou mau hahaere ma te aroha mau, ia tauturu tatou i te hoê tuahine apî paari ia ite e, e haamaitaihia tatou i roto i te Sotaiete Tauturu na roto iaʼna. E nehenehe ta tatou e rave i te reira !
I to Priscilla, te tamahine Peretane tei faafariuhia i te matahiti 1843, tereraa mai na niʻa i te moana Ataranetita, ua faahoahia oia e te hoê vahine hoê â huru matahiti e to toʼna mama. Ua tupu atoa i roto i teie tuahine paari te ahu o te auahi o te mau fafauraa o taʼna i rave. I te taime a pou mai ai raua i niʻa i te uahu i Navu, tei pihai iho ïa oia ia Priscilla. Ma te itoito e te tiʻaturi, ua amui atu raua i te feia moʻa o te Atua7.
E roaa te paieti pae varua ia tatou no te haapaʻo i ta tatou mau fafauraa, na roto i te taiʻo-tamau- raa i te mau papaʻiraa moʻa, te pureraa, te taviniraa, e te pûpûraa i te tusia. Na teie mau taahiraa ohie roa e faaamu i to tatou varua e tiʻa ai ia tatou ia parau e, « A tono iaʻu no no te tauturu i te hoê tuahine e taʼna aiu fanau apî ; o vau ta oe e tono no te turu i te hoê piahi e aro nei ; o vau ta oe e tono no te here i te hoê melo ore. O vau ta oe e tono i te vahi ta oe e hinaaro iaʻu, i te taime e hinaaro oe iaʻu. »
Ua pii te Fatu ia tatou ia rave i te mau mea atoa ta tatou e rave « ma te aau tiʻa8. » Ua riro te aau tiʻa ei hotu no te haapaʻoraa i te fafauraa. E mea au naʻu te mau parau o teie himene e i te huru no te manaʻo ta te reira e faatupu i roto iaʻu :
E te Fatu here,
Tei niʻa te raʻi,
A faarahi mai
toʻu maitai ;
I toʻu aroha
ia vetahi ê,
Ia pee noaʼtu
Au nei ia oe9.
Na te moʻa e muhumuhu i te mau parau e, « Inaha teie au, o vau ta oe e tono » I to Priscilla Stains faaotiraa i taʼna fafaufaa o te tuʻiraa pô, i roto i te pape paari, ua opua oia e haere i roto i te hoê oraraa apî, ua fatata te ahu i te paari, noaʼtu râ, ua mahanahana te aau i te oaoa : « Aita e otoheraa faahou, » taʼna ïa i parau. « Ua faaoti … au ia roaa iaʻu te rê no te ora mure ore, ma te tiʻaturi i te Atua10. »
E te peresideni Hinckley, te fafau nei au ia oe, e tae noaʼtu i te mau tuahine atoa no te Sotaiete Tauturu e, e vai hoê noa matou ei mau vahine no te fafauraa e e faaroo hoʻi i to oe reo. I roto i te mau reo e rave rahi, ia faaroo i te mau parau a te tuahine tataʻitahi o te Sotaiete Tauturu a parau ai matou e, « Inaha teie au, o vau ta oe e tono »
Ia riro ta tatou iho mau fafauraa i te taaamu ia tatou i to tatou Metua here i te Ao ra, ei arataʻi ia tatou, ei paruru ia tatou, ei haamoʻaraa ia tatou, e ei faatiʻaraa ia tatou ia na reira atoa no Taʼna mau tamarii paatoa, o taʻu ïa pure na roto i te iʻoa o Iesu Mesia ra, amene.