O Se Faavae Mautu
O a tatou molimau … e tatau ona fausia i luga o se faavae mautu, ia matuai mauaa i le talalelei a Iesu Keriso.
I ni nai tausaga ua mavae sa taia ai le vaega sa matou nonofo ai i se afa matautia. Sa amata i ni timuga mamafa, ona sosoo ai lea ma matagi malolosi mai sasae. Ina ua mavae le afa, sa fuafuaina mea na faaleagaina—sa motusia uaea eletise, sa faaleagaina meatotino, ma o le tele foi o laau matagofie sa ola ai ua lia’i i luga. I nai aso mulimuli ane sa ma talanoa ai ma sa’u uo sa tele ni laau o lona fanua na faaleagaina. O laau sa i le isi itu o lona fale sa tutu sasa’o ma maualuluga. Sa latou tatalia lelei le afa, ae o laau sa tutu i le mea na ou manatu o le vaega e aupito lelei o lona fanua, sa le mafai ona tatalia matagi malolosi. Na ia faasino mai ia te au faapea o laau na sao mai i le afa, o laau ia na toto i le eleele maopo lelei; o o latou aa e tatau ona matuai gogoto ifo i le eleele ina ia mafai ona maua mai ai le tausiga. O ana laau sa mafulifuli, sa toto i tafatafa o si tamai alia, i le mea sa mautinoa ua lava meaai e tausia ai. Sa papau lava o latou aa. E lei loloto lo latou taula e puipuia ai mai le afa.
O a tatou molimau e faapei foi o na laau, e tatau ona fausia i luga o se faavae mautu, ia matuai mauaa i le talalelei a Iesu Keriso, afai ae oo mai matagi ma timuga i o tatou olaga, aua e mautinoa lava o le a oo mai, a ua lava lo tatou malolosi e tatalia ai ia afa e agi mai ia i tatou. Sa fautuaina e Helamana ona atalii:
“O lenei, o’u atalii e, ia manatua, ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua. Pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te oulua lana uatoa uma lava ma ana afa, e le malo ai ia te oulua, e toso ifo ai oulua i le vanu o le puapuaga ma le auega e le gata, ona o le papa ua atiina ae ai oulua, o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou.”1
I totonu o le Tusi a Mamona, sa tuu atu ai e le perofeta o Iakopo le fesili lea i le la feiloaiga ma Serema o se tagata e le talitonu ia Keriso: “E te faafitia ea le Keriso e afio mai? Ona fai mai lea o ia: Ana i ai se Keriso, po ua ou le faafiti ia te ia, a ua ou iloa e leai se Keriso, na le i ai foi i aso ua te’a, e le i ai foi i aso o lumanai.
“Na ou fai atu foi ia te ia: Po ua e talitonu ea i tusi paia? Ona fai mai lea o ia, Ioe.
“Na ou fai atu ia te ia: Ua le malamalama ai ia te oe, aua o loo molimau ai faamaoni ia Keriso. Faauta, ou te fai atu ia te oe, ua leai se tasi o le au perofeta na tusitusi, pe vavalo, sei iloga ua latou tautala e uiga i lenei Keriso.
“E le gata foi i lea … ; ua faaalia mai foi ia te au i le mana o le Agaga Paia.”2
Sa ta’ua e Iakopo ni punavai se tolu o le upumoni—o tusitusiga paia, o perofeta, ma le Agaga Paia—lea o loo molimau e uiga ia Keriso. O le a latou fesoasoani ia i tatou e “atiina ae i luga o le papa o lo tatou Togiola, o Keriso ia, o le Alo o le Atua.”3
1. O Tusitusiga Paia
O le Faaola lava Ia, na fetalai mai, “Suesue i tusi … o tusi ia o loo molimau ia te au.”4 Ina ua faatonuina e le Alii ia Liae e ave lona aiga ma sosola i le vao, sa Ia silafia latou te manaomia se faavae malosi e fausia ai le nuu fou. Ona o le taua tele o tusitusiga paia, ma ina ia mafai ona maua ia faamaumauga, o lea na faatonuina ai e le Agaga ia Nifae e fasioti ia Lapana, ma faapea atu, “E lelei ona fano le tagata e toatasi, ae leaga ona tauau ina toaitiiti ma fano le nuu i le le faatuatua.”5
Pe tusa foi o le taimi lava lea e tasi i le talafaasolopito, na taitaiese mai ai foi e le Alii se isi vaega o tagata mai Ierusalema e agai atu i le nuu folafolaina. Ina ua mavae le tele o augatupulaga, ona maua ai lea e le Tupu o Mosaea o tagata na tupuga mai ai, ma sa ta’ua i latou o le nuu o Saraemila. Sa leaga lo latou tulaga faaleagaga. I le Ominae tatou te faitau ai e faapea, “Na faaleagaina foi la latou gagana; na le aumaia e i latou ni tusi; na latou faafitia Le na faia i latou.”6 A leai ni tusitusiga paia, e le gata ina fano malo, ae o le a tuuitiitia foi le talitonu o aiga ma tagata taitoatasi. O le suesueina o tusitusiga paia i aso taitasi e fesoasoani ai ia i tatou ina ia taulaina lo tatou faatuatua ia Keriso. Latou te molimau moni mai lava ia te Ia.
2. O Perofeta
I ni nai tausaga ua mavae sa tofia ai au e toe faatulaga se au peresitene o se siteki. I le sauniga o le konafesi i le Aso Sa, sa faamatala ai e le faletua o le peresitene fou o le siteki le tala lenei. Sa ia taua faapea sa ola ae o ia i se aiga Kerisiano lelei. Sa faapotopoto e ona matua lo latou aiga i aso uma lava e faitau le Tusi Paia. Ina ua latou faitau e uiga i perofeta anamua, sa ia fesili atu i ona matua pe aisea ua leai ai ni perofeta i le lalolagi i aso nei. La te le i maua se tali e faamalieina ai o ia, e le i maua foi e ona faiaoga po o ona taitai faalelotu.
I se tasi aso, a o aoga i se iunivesite, sa ia vaaia ai ni alii talavou se toalua e ofu papae ma fai o laua fusiua. Sa mafai ona ia faitauina le igoa “Iesu Keriso” i a la’ua pine o o la igoa. Sa ia talanoa atu ia te i la’ua ma fesilisili pe o la’ua o ni faifeau. “Ioe, o ma’ua o ni faifeau! O i ma’ua o faifeautalai mo Le Ekalesia a Iesu Keriso o le Au Paia o Aso e Gata Ai.”
“E mafai la ona fai atu la’u fesili?” o lana tala lea. “Pe alofa le Alii i tagata i aso nei e pei foi ona Ia alofa i tagata anamua?”
“Ioe, e alofa o Ia!” o le la tali lea.
“Ae aisea la e leai ai ni o tatou perofeta i le fogaeleele i aso nei?”
Faamata e mafai ona outou manatu i le sagisagi fiafia o faifeautalai talavou e toalua ina ua fai atu i ai se fesili faapena? Sa la tali atu, “E i ai. E i ai o matou perofeta i le fogaeleele i le taimi nei. Pe mafai ona ma faamatalaina atu ia te oe?”
E tutusa lava la tatou savali i le lalolagi: “O loo i ai o tatou perofeta i le fogaeleele i le taimi nei.” O le aoauli nei lava, o le a sii ae ai o tatou lima e lagolagoina ia Peresitene Gordon B. Hinckley, o ona fesoasoani, ma le Korama a le Toasefululua o ni perofeta, tagata vaai, ma tali faaaliga. O ni molimau faapitoa i latou i le suafa o Iesu Keriso. I le pepa tusitusia ua ta’ua “O Le Keriso Soifua—O Le Molimau a Aposetolo,” o loo latou ta’ua ai: “Matou te molimau atu, i le avea ai ma Ana Aposetolo ua faauuina—o Iesu o le Keriso Soifua, o le Alo tino ola pea o le Atua… . O Ia o le malamalama, o le ola, ma le faamoemoega o le lalolagi. O Lona auala o le ala lea e tau atu i le fiafia i lenei olaga ma le ola e faavavau i le lalolagi a sau.”7 Uso e ma tuafafine, afai ua lava le alofa o le Atua ua mafua ai ona auina mai perofeta ia i tatou, ona tatau lea ona lava foi lo tatou alolofa ia te Ia e mulimuli ai ia te i latou. O le mulimuli i perofeta o le a fesoasoani e puipuia ai i tatou mai afa o le olaga ma taitai atu ai i tatou ia Keriso.
3. O le Agaga Paia
Ina ua faapotopoto Keriso ma Ana Aposetolo i le afeafe aupitoaluga a o lumanai Lona faasatauroga, sa fetalai atu o Ia: “Afai tou te alolofa mai ia te au, ia outou tausi mai i a’u poloaiga. Ou te fai atu foi i le Tama, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau.”8
Pe a faaee mai lima i luga o o tatou ulu pe a maea le papatisoga, ona faamauina lea o i tatou o tagata o Lana Ekalesia ona tuuina mai ai lea o le meaalofa o le Agaga Paia. Afai tatou te ola amiotonu ma tumau i le agavaa, ua folafola mai mo i tatou Lona mafuta mai pea e le aunoa; o le a Ia taialaina o tatou olaga, aoao mai ia i tatou upumoni, ma molimau mai ia i tatou o Iesu o le Keriso. Ona o i tatou o tagata o le feagaiga o le Ekalesia a le Alii, o lea ua tatou folafola atu ai e auauna ia te Ia ma tausi Ana poloaiga “ina ia liligi atili ai e ia lona Agaga i luga ia te i [tatou].”9
I Aferika i Sisifo, lea o loo ma auauna atu ai nei, matou te lagonaina lava le matuai liligi ifo o le Agaga i luga o le Au Paia faamaoni. O le 1989 na taia ai Ghana e se afa—e le o se afa o matagi po o timuga, ae o se afa o sauaga, taufaaleaga ma le le femalamalamaa’i. O se taimi faigata tele; e fou atu foi le Ekalesia iina. Sa faatonuina o tatou faifeautalai uma e le o ni tagatanuu o Aferika e tuua le atunuu. Sa taloka o tatou falelotu ma leoleo ina ia aua nei faaaogaina e tagata o le Ekalesia. Sa le mafai ona faapotopoto faatasi le au paia, o lea sa tapuai ai aiga i o latou fale. Sa pueina faapagota nisi o le au paia ma faafalepuipui. O le taimi lea sa ta’ua o le “tapu.” Sa tau leai se fesootaiga po o se fesoasoaniga mo tagata o le Ekalesia mai fafo atu o le Ekalesia, ae lei tuua ai na o i latou e faafeagai ma lenei afa. Sa i ai a latou tusitusiga paia ma afioga tulei mai perofeta; sa latou tuu atu lo latou faatuatuaga i le Alii ma sa Ia liligi ifo Lona Agaga i o latou luga. Sa fai mai se tasi tagata o le Ekalesia: “Sa ia te i matou le Agaga o le Alii; sa mafai ona matou lagonaina o Ia o loo taialaina ma faatonutonuina i matou. Sa matou felata’i ma sa matou faalatalata atu foi i le Faaola.”
E 18 masina o anapopogi ma tatalo le Au Paia ia oo mai le aso e muta ai lenei tapu. O le masina o Novema i le 1990, sa aveesea ai lenei tapu. Ua mou atu le matamataita o le afa, ae ua tulai mai ai se faaletonu tele. Sa i ai i latou ua pauu ese atu. Sa papau le mea sa i ai o latou aa ma sa vaivai o latou faavae. O le faavae o le Ekalesia i Ghana i le taimi nei, ua fausia i luga o le faatuatua o i latou sa tatalia le afa. Sa matua mauaa i le talalelei a Iesu Keriso.
Uso e ma tuafafine, o tusitusiga paia, o perofeta, ma le Agaga Paia ua latou taufai molimau mai ia Keriso. O le a latou fesoasoani ia i tatou e fausia i luga “o se faavae mau, o se faavae foi lea afai e ati ae tagata i ona luga, e le mafai lava ona pauu i latou.”10 Ou te molimau atu ai i nei mea ma lo’u lotomaualalo, i le suafa o Iesu Keriso, amene.