O Le Mauaina o se Molimau o le Talalelei Toefuataiina a Iesu Keriso

Elder Robert D. Hales

O Le Korama a Aposetolo e Toasefululua

Ia mulimuli i le faataitaiga a Iosefa Samita ma le faatulagaga o le Toefuataiga. Ia liliu atu i tusitusiga paia. Tootuli i le tatalo. Ole atu i le faatuatua. Faalogo i le Agaga Paia

I le avea ai ma taitai o le Ekalesia, e masani lava ona fesiligia i matou, “E faapefea ona ou maua se molimau o le talalelei toefuataiina a Iesu Keriso?”

O le mauaina o se molimau ma le liuaina, e amata mai i le suesue ma tatalo, ona ola ai lea i le talalelei i le onosai ma le filiga, ma le valaauliaina ma faalagolago atu i le Agaga. O le soifuaga o Iosefa Samita ma le faatulagaga o le Toefuataiga, o ni faataitaiga sili ia ona lelei o lenei faasologa. Ao outou faafofoga i lau savali i mea na tutupu i le Toefuataiga, ia vaavaai i laasaga na faapea ona oo atu ai i le molimau: o le naunau e fia iloa le mea moni, mafaufau loloto i ai i o tatou loto, ona lagonaina lea ma mulimuli atu ma le usiusitai i musumusuga a le Agaga Paia.

Na soifua mai Iosefa Samita i le aso 23 o Tesema, 1805, i Sarona, Veremota. Na oo mai o ia i totonu o se aiga e tatalo ma suesue i le Tusi Paia. I lona talavou, na fiafia ai o ia i aoaoga faalelotu ma iloa ai se “fefinauaiga tele” e uiga i aoaoga a Keriso, i le “finau o le tagata fai lotu i le tagata fai lotu, o le tagata lotu foi i le tagata lotu.”¹

O lenei fenumiai e le o se mea tulaga ese i lenei alalafaga. Na amataina i seneturi ua mavae i le mea na taua o le Liliuese Tele. Na saunoa mai le Aposetolo o Paulo, o le aso o Keriso “e le oo mai, seia muai ona taunuu o le tetea ese.”²

O ni vaitaimi ina ua mavae le Toetu mai o Keriso, na fasiotia ai Lona Au Aposetolo, na faaseseina [e tagata] Ana aoaoga, ma na aveesea ai le perisitua mai le lalolagi. Ae o Paulo, o le na vaaia o tatou aso, sa ia valoia “o le a faapotopotoina [e le Atua] faatasi mea uma ia Keriso i le faaatoaga o tausaga.”³ O le a Ia toefuatai mai le Ekalesia moni a Keriso i luga o le fogaeleele.

I le tele o seneturi, na sauniuni ai le lalolagi mo lena toefuataiga. Na faaliliuina ma lolomiina ai le Tusi Paia. Na maua ai se laueleele fou [o le konitineta o Amerika]. O le naunau i se suiga na vave ona sosolo atu i le lalolagi Kerisiano, ma o se malo [Iunaite Setete o Amerika] na faavaeina i luga o mataupu o le saolotoga.

Na fanau mai Iosefa Samita i totonu o lena malo, ma o le 14 o ona tausaga, na oo ai o ia i “feteenaiga o manatu [tau lotu].” E masani ona fesili ai o ia ia te ia lava, “Afai foi ua sao se tasi o i latou [nei lotu], o le fea, ma pe faapefea foi ona ou iloa?”⁴

Na liliu atu Iosefa i le Tusi Paia mo ni tali. Sa ia faitau ai i le Tusi a Iakopo, “A e afai ua leai se poto i so outou, ina ole atu ia i le Atua, o le foai tele mai i tagata uma, ma le le toe tautaua; ona foaiina mai ai lea ia te ia.”⁵

I le mulimuli ai i le taitaiga a Iakopo, na alu atu ai Iosefa i se togavao lata ane i lona fale ma tatalo ai. Ao ia valaau atu i le Atua, “na oo mai … se malamalama faaniutu” e sili atu lona pupula i le la, ma na tutu mai ai ni “Tagata se toalua.” Ma “sa fetalai mai le tasi o i Laua ia te au, ma sa Ia tau lo’u igoa [Iosefa], ma fetalai mai ao tusi ane lona aao i le tasi—O Lou Atalii Pele lenei. Faalogo ia te Ia!”⁶

Na talanoa le Atua le Tama ma Lona Alo o Iesu Keriso ma Iosefa. Sa Laua taliina lana fesili. Sa Laua aoaoina o ia e faapea o le Ekalesia moni a Keriso na aveesea mai le lalolagi. Na iloa ai e Iosefa o nei tagata o le Aiga Atua o ni tagata eseese ma tino mavaevae, La te silafia o ia i lona igoa, ma sa naunau lava i Laua e tali mai i ana tatalo. Na faaavanoaina le lagi, ua faamutaina le piliota o taimi na leai ai se talalelei i luga o le fogaeleele, ma ua amata ona susulu atu le malamalama o le talalelei.

E pei o Iosefa, o le toatele o i tatou o loo tatou tau sailia lava le malamalama o le upu moni. E pei lava ona sa sauniuni le lalolagi mo le Toefuataiga, o i tatou taitoatasi foi ua saunia e mauaina le malamalama o le talalelei i totonu o o tatou lava olaga. O nisi taimi o lena sauniuniga e oo mai e ala i se suiga o o tatou tulaga—e ala i le feiloai atu i se uo fou, malaga atu i isi alalafaga fou, o se suiga o galuega, o le fanau mai o se tamaitiiti, o le maliu o se tasi e pele, ma’i, faalavelave, ae faapea foi puapuaga.

I nei taimi o suiga, tatou te saili ai ni tali i fesili aupito taua o le olaga: O ai i tatou? O fea na tatou o mai ai? Aisea ua tatou i ai iinei i le lalolagi? Ma o fea o le a tatou o i ai pe a mavae le oti? E lei fanau mai Iosefa ma lenei malamalama, ma e faapena foi i tatou. E tatau ona tatou sailia.

E pei o Iosefa, e tatau ona tatou suesue i tusitusiga paia ma tatalo. O le uiga o lenei mea i le toatele, o le lafoaiina o lagona o le masalosalo ma le le agavaa, ae ia lotomaulalo, ma aoao e faaaoga le faatuatua.

I le tolu o tausaga talu ona mavae lana Uluai Faaaliga, na lagona ai e Iosefa le lotomaualalo. E masani ona ia faapea mai, “Ou te lagona … le faanoanoa ona o ou vaivaiga ma ou sese.”⁷ Ae peitai, e lei aveesea ai lona faatuatua pe faagalo ai foi le mana o le tatalo.

O le aso 21 o Setema, 1823, i le 17 o ona tausaga, sa ia tootuli ai ma aioi atu “mo le faamagaloina o [ana] agasala uma ma mea sese, ma [ia tuuina mai] foi se faaaliga … ia ona iloa ai [lona] tulaga i luma o le Atua.”⁸ Ao ia tatalo, na toe oo mai foi se malamalama, ma sa faateleina “seia oo lava ina sili atu le malamalama o le potu nai lo le aoauli.”⁹ I totonu o lena malamalama sa tu ai se tagata na ofu i se ofu talaloa e “matua sinasina.”¹⁰ Sa ia tau le igoa o Iosefa ma faailoa mai o ia lava o Moronae. Sa ia faapea mai “o loo i ai se galuega o loo finagalo le Atua mo [Iosefa] e faia,”¹¹ ma tau atu ia te ia e uiga i se faamaumauga anamua na tusia i luga o papatusi auro, ma ina ua faaliliuina, ua avea ai o le Tusi a Mamona. O loo aofia i le tusi se faamaumauga o le atoatoaga o le talalelei, e pei ona sa aoaoina ai tuaa o Moronae e Iesu Keriso. Ma sa faatonuina Iosefa ina ia aumaia na faamaumauga, sa natia i tala ane o le fale o lona aiga i se mauga lata ane ua igoa nei o Kumora.

O le aso na sosoo ai, na maua ai e Iosefa ia papatusi, ae peitai, e lei oo i le taimi e aveina ae ai ia papatusi. Na faatonuina e Moronae ia Iosefa ina ia la feiloai iina, i lea lava aso e tasi i tausaga e fa na sosoo ai.¹²

Sa usitai Iosefa. O tausaga uma lava e alu atu ai o ia i le mauga e tuuina mai ai ia te ia e Moronae ia “faatonuga”¹³ e faatatau i le Toefuataiga o le Ekalesia a Keriso. E pei lava foi o le soifuaga o le Faaola ao tamaitiiti e pei ona faamatalaina i totonu o le Feagaiga Tuai, na “tupu ai le poto ma le tino” o Iosefa ¹⁴ ma “ua malosi lona loto.”¹⁵

Ma e faapena foi i tatou. O nisi tagata fou faatoa papatisoina, e faalotovaivaia lava e uiga i lo latou poto ma le malosi i totonu o le talalelei—e uiga i mea latou te le silafiaina. Ua galo ia i latou le taumafaiga usiusitai, ma le aoaoina i le talalelei, ma le matua faaleagaga lea na avea ma vaega o uluai aafiaga o Iosefa. O i latou foi ua leva ona avea ma tagata o le Ekalesia, e tatau foi ona latou manatua, e manaomia le maua soo o faatonuga ma aoaoga faaleagaga, pe afai tatou te mananao e malolosi o tatou loto.

I le mavae ai o tausaga e fa o le usiusitai faifaipea, na faapea loa ona maua e Iosefa ia papatusi i le aso 22 o Setema, 1827, ina ua 21 ona tausaga. Sa ia mauaina foi se meafaigaluega anamua mo le faaliliuina o papatusi, na taua o le Urima ma le Tumema. Na amataina e Iosefa le galuega o le faaliliu ia Tesema o lena lava tausaga, e faaaoga ai nei faaliliu upu paia, faatasi ai ma le Agaga Paia.¹⁶ Mulimuli ane, na taunuu atu ai se alii faiaoga e igoa ia Oliva Kaotui, ma galue ai loa e fai ma ana tusiupu.¹⁷

O le 23 o tausaga o Iosefa, ao ia faaliliuina ia papatusi, na la tau ai ma Oliva i se fuaitau e uiga i le papatisoina mo le faamagaloina o agasala. E pei o ni tagata sailiili fou, sa la naunau e fia iloa atili. Na iloa e Iosefa le mea e tatau ona fai.

O le aso 15 o Me, 1829, na o atu ai nei alii e toalua i le togavao e fesili atu i le Alii. Ao la tatalo, na oo mai Ioane le Papatiso i se “ao malamalama tele.”¹⁸ O ia lea sa na papatisoina le Faaola i lenei olaga. Sa ia umia ki o le perisitua e manaomia mo le faataunuuina o lena sauniga e ala i le pule a le Atua.

Ao tootutuli ia Iosefa ma Oliva i luma o Ioane, sa ia tuu ona lima i luga o o laua ulu ma tuuina atu le Perisitua Arona i o laua luga.¹⁹ Mai lava i lena taimi, na umia ai e Iosefa ma Oliva le pule e papatiso ma tuuina atu ai le perisitua i isi.

O le aso, o i latou uma o e fia silafia pe tatau ona latou papatiso ua valaauliaina ina ia latou mulimuli i le faataitaiga a Iosefa ma Oliva ia tatalo. Ma o i latou uma o e ua saunia ma agavaa mo le papatisoina, e mafai ona latou mauaina mai se tasi o i ai le pule na tuufaasoloina mai ma e lei motusia mai i aao o Ioane le Papatiso i lenei tisipenisione.

I le faaiuga o Me po o le amataga o Iuni o le 1829, na tuuina mai ai le Mekisateko, po o le Perisitua maualuga ia Iosefa ma Oliva e Aposetolo o Peteru, Iakopo, ma Ioane.

Na faamaeaina ai foi le faaliliuga o le Tusi a Mamona ia Iuni lava lea, ma e le itiiti ifo ma se tausaga mulimuli ane, na lolomiina ai loa le tusi, i le aso 26 o Mati, 1830.

O le sefululua o aso mulimuli ane ai talu ina uma ona lolomi le Tusi a Mamona, i le aso 6 o Aperila, na faatulaga aloaia ai loa le Ekalesia i le fale o Pita Uitimera, le matua, i Fayette, Niu Ioka. E pei ona valoia e Paulo, ua toe faatuina i luga o le fogaeleele le Ekalesia anamua a Keriso.²⁰

Ae peitai, e lei maea ai galuega o le Toefuataiga. E pei o aso anamua, na faatonuina ai tagata o le Ekalesia ina ia fausia se malumalu, lea sa faapaiaina i Katelani, Ohio, i le aso 27 o Mati, 1836. E tasi le vaiaso na sosoo ai, i le aso 3 o Aperila, na faia ai se fonotaga iina. I le mavae ai o se tatalo faamaoni ma le faaaloalo, na vaai ai Iosefa ma Oliva i le Alii o Iesu Keriso o tu atu i o laua luma. O Ia lea o le na fetalai mai, “E fai lua o alope, e fai foi mea e momoe ai manu felelei, a o le Atalii o le tagata, e leai se mea e moe ai o ia,”²¹ ua afio mai i Lona maota paia. Na faaali mai foi ia Mose, Elaia, ma Elia iina ma tuuina mai ki o le malo, ma sauniga laveai, ia Iosefa.²²

Uso ma tuafafine, ua tatou iloa le faasologa? Soo se mea autu lava na tupu o le Toefuataiga—o le Uluai Faaaliga, o le oo mai o Moronae ma le oo mai o le Tusi a Mamona, o le toefuataiina mai o le perisitua, ma le faaali mai o Iesu Keriso i le mavae ai o le faapaiaga o Lona malumalu—na amataina uma lava i le tatalo.

Talu mai lena taimi, ua 116 malumalu ua faapaiaina. Na ou auai atu i se vaega o nei sauniga paia. Na fofogaina ai tatalo o faapaiaga. Na matuai faatumulia foi i le faatasi mai o le Agaga Paia. O nei taimi, ma le tele lava o isi taimi, na ou lagonaina ai le molimau le faafitia a le Agaga o le Atua, e pei o se afi i totonu o lou loto, e faapea e moni le talalelei toefuataiina.

Na faapefea ona ou iloa nei mea? Ua tuuina mai e Nifae se tala manino ma le mamana o le auala, lea e aofia ai le manao, talitonu ma le i ai o le faatuatua, mafaufau loloto, ona mulimuli ai lea i le Agaga. Sei o tatou faalogologo a o faamatala mai e Nifae: “Aua ua oo ina ua uma ona ou fia iloa mea na vaaia e lou tama [i se faaaliga i le laau o le ola], ma ua ou talitonu e mafai le Atua ona faailoa mai ai ia te au, ina o nofonofo foi au ma ua mafaufau i lou loto, sa aveeseina au i le Agaga o le Atua, ioe … ua [fetalai] mai le Agaga ia te au.”²³

O le taimi lava tatou te maua ai se molimau o le Agaga, e faamalosia a tatou molimau e ala i le suesue, tatalo, ma ola ai i le talalelei. O a tatou molimau tuputupu ae e aumaia ai le faateleina o lo tatou faatuatua ia Iesu Keriso ma Lana fuafuaga mo lo tatou fiafia. E faaosofia i tatou ia salamo ma usitai i poloaiga, lea e taitaiina atu ai ma se suiga tele i le loto i lo tatou liuaina. Ma o lo tatou liuaina e aumaia ai le faamagaloga paia, faamaloloina, fiafia, ma le manao e faailoa atu a tatou molimau i isi.

Ia, atonu o le a outou mafaufau ane, pe faapefea ona amatalia e se tasi lenei laasaga? Sei ou fautuaina atu ia talia le valaau na tuuina mai e Moronae i totonu o le Tusi a Mamona. “Pe a maua e outou nei mea, ou te apoapoai atu ia te outou ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia. O le mana foi o le Agaga Paia tou te iloa ai le tonu i mea uma lava.”²⁴ Mo nisi, o lenei mea e vave lava ona tupu. Ae o isi, e faasolosolo malie mai lava i le gasologa o tausaga.

Ua mafai ona tatou maua lenei faaaliga faaleagaga aua o le Agaga Paia “o se peresona o Agaga,” o le e mafai ona “mau i totonu ia i tatou.”²⁵ O Lana misiona o le molimau mai i le Tama ma le Alo, faaali mai lo laua finagalo ia i tatou i “mea uma e tatau ona [tatou] faia.”²⁶ E mafai e tagata i soo se mea lava ona lagonaina aafiaga a le Agaga Paia mai lea taimi i lea taimi i o latou olaga. Ae ua na o i latou lava ua papatisoina ma faamauina e mafai ona maua le meaalofa a le Agaga Paia, e ala i le faaee atu o lima o se tasi ua i ai le pule, lea e mafai ai ona maua i taimi uma lava Lana mafutaga.

O le faatumauina o lena mafutaga e manaomia ai se taumafaiga faamaoni i le vaega a tagata o le Ekalesia. Afai tatou te le usiusitai i tulafono, aoaoga, ma sauniga o le talalelei, o le a aluese mai le Agaga Paia. O le a le mafai ona mafuta ma i tatou pe afai o ita o tatou loto, fefinauai ma o tatou soa, pe o le le fiafia i se ua filifilia e le Alii. E aluese mai o Ia i soo se taimi lava tatou te tetee ai, ola le mama, faia o laei po o amioga le tauagafau, pe le mama po o le le migao i mafaufauga po o le tino, e paie i le faataunuuina o tofiga ma tiute o le perisitua, po o le solia o isi agasala. Aua, “e le afio le Agaga o le Atua i malumalu e le paia.”²⁷

O le mea lea, e tatau ai lava ona tatou salamo pea, ma fetagofi atu i le faamanatuga, ia agavaa mo se pepa faataga o le malumalu, ma auauna atu i le Alii ma o tatou “loto, mafaufau, manatu ma le malosi” atoa.²⁸

Faatasi ai ma le mafuta mai o le Agaga Paia ia i tatou, tatou te lagonaina ai le alofa mo le Atua ma Ana fanau uma. O lenei alofa e aveesea ai le popole ma faatumulia ai i tatou i le manao e folafola atu le talalelei. E leai se isi meaalofa e sili atu e mafai ona tatou tuuina atu i isi nai lo le faailoa atu o la tatou molimau ia i latou. E leai se fiafia e sili atu e mafai ona tatou maua nai lo le aumaia tau lava o se agaga se toatasi ia Keriso.²⁹ Ma e leai se auala e sili atu e faamalosia ai a tatou lava molimau nai lo le faasoa atu o la tatou molimau e uiga ia te ia faatasi i le lalolagi. A tatou faia ia mea, o le a faamalolosia o tatou aiga. O le a faatumulia o tatou uarota, siteki ma alalafaga i le filemu ma le alofa, ma, mulimuli ane, o le a saunia ai le lalolagi mo le Afio Mai Faalua o lo tatou Alii ma le Faaola o Iesu Keriso.

Ua ou iloa e moni le talalelei toefuataiina a Iesu Keriso. Ua ou iloa O Le Ekalesia a Iesu Keriso o le Au Paia o Aso e Gata Ai, o Lana Ekalesia lea i luga o le fogaeleele i le taimi nei. Ua ou iloa o Iosefa Samita o le Perofeta a le Atua, ma o Gordon B. Hinckley ua suitulaga ia te ia, o le Perofeta ma le Peresitene o le Ekalesia i aso nei.

Ou te apoapoai atu ia te outou, ou te tatalo mo outou—afai tou te lei silafia nei mea mo outou lava, ia mulimuli i le faataitaiga a Iosefa Samita ma le faatulagaga o le Toefuataiga. Ia liliu atu i tusitusiga paia. Tootuli i le tatalo. Ole atu i le faatuatua. Faalogo i le Agaga Paia. Ia outou iloa e silafia o outou igoa ma manaoga e lo tatou Tama Faalelagi, e pei lava o Iosefa. Ia ola i le talalelei, i le onosai ma le filiga. Ma i le suafa o Iesu Keriso, ou te folafola atu ai, “Pe afai tou … te aioi mai ia te au [Tama Faalelagi] i le filiga i le tausiga o au [Alii] poloaiga, o talitonu tou te maua lava, e moni e faailoaina ia mea ia te outou.”³⁰

O loo soifua Iesu Keriso. O Lana galuega lenei. Ou te tuuina atu la’u molimau faapitoa i nei mea, i le suafa o Iesu Keriso, amene.