Ua Tatalaina e le Ekalesia ni Tuatusi Faavaomalo i le Initoneti po o se Uepi Saite mo Atunuu Taitasi

I se taumafaiga faifai pea ia maua ai le talalelei e tagata uma e ala i ni auala eseese, o lea ua faalauteleina ai e le Ekalesia lana Initoneti ina ia tautuaina ai atunuu taitasi ma gagana. Ua amata nei ona galulue eria e foa ni Uepi Saite patino, e tautua ai e avea ma Initoneti aloaia a le Ekalesia i atunuu patino.

“Ua faamanuiaina i tatou i le tele o auala fou faatekinolosi, e faasalalau atu ai le savali o le talalelei e ala i satelite, o a tatou lava … Uepi saite, televise, leitio, faapea foi tusiga i a tatou mekasini,” o le saunoaga lea a Elder L. Tom Perry o le Korama a Aposetolo e Toasefululua. “O nei mea uma ua faaopoopo ia tatou polokalama e molimoli atu ai, lea foi ua faateleina ai le tulaga e mafai ai ona tatou mauaina savali o loo auina mai” (“Ia Outou Gauai Atu i Ana Upu Uma,” Liahona, Iulai 2000, 29–30).

O loo iloiloina nei e Au Peresitene o Eria tulaga manaomia o le Ekalesia i o latou eria, ina ia fuafuaina ai pe o le a le tulaga e tatau ona i ai le Initoneti. E oo mai i le taimi na tusia ai lenei tala, e valu atunuu ua tatalaina ai lea tuatusi faavaomalo, faatasi ai ma le 26 o isi atunuu o loo galueaiina nei. O atunuu ua maea e aofia ai Oseteria, Tile, Tenimaka, Finelani, Siamani, Nouei, Suetena, ma Suitiselani.

O tuatusi faavaomalo mo atunuu i le initoneti, e tele faamoemoega e tautua ai e le gata i tagata o le Au Paia o Aso e Gata Ai, ae faapea foi i latou e fia aoao atili e uiga i le Ekalesia. Mo se faataitaiga, i le tuatusi o Suetena, e mafai e tagata latou te faaaogaina ona faasino atu a latou uo i faifeautalai; o le tuatusi o Oseteria, e mafai e i latou ua atamamai faapitoa i faasalalauga ona maua faamatalaga e faatatau i le Ekalesia i lo latou lotoifale; i le tuatusi o Nouei, e mafai e tagata e faaaogaina ona maua talafou e uiga i le eria; ma i le tuatusi o Tile, e mafai e tagata o le au paia ona faitau i savali mai le Au Peresitene o le Eria ma isi taitai o le Ekalesia i lo latou lotoifale.

“O le faamoemoega lava ia faamalolosia tagata o le Ekalesia i mea aano musuia,” o le saunoaga lea a Elder Oscar Chavez, o se Fitugafulu Pule Eria i Tile. “O se avanoa maoae le auai i nei taimi faatasi ai ma nei ituaiga o fesootaiga, aemaise lava i o tatou valaauga ma tofiga, ina ia faataunuuina ai le galuega a le Alii.”

O sootaga i tuatusi o atunuu taitasi, e mafai ona maua i le www.lds.org. Oomi le “Country Sites” i le tulimanu pito i luga i le itu taumatau o le itulau autu mo se lisi o le taimi nei.