O Leoleo Mamoe o Isaraelu

Peresitene Gordon B. Hinckley

Ou te faafetai i le Alii mo epikopo lelei i lenei Ekalesia… . Ia maua i o outou loto lena filemu lea e na o le Atua e sau ai ia i latou o e auauna atu ia te Ia.

Uso e, o le a ou faia i le po nei se mea ou te le masani ai. O le a ou toe avatua ni mea taua o se lauga, sa ou tuuina atu i le 15 tausaga talu ai i se tatou sauniga aoao a le au Perisitua. O le a ou tautala e uiga i epikopo, ma ou tautala atu foi i epikopo o le Ekalesia, o lena tino matagofie o alii lea a tuu i lona faauigaga moni, o leoleo mamoe lava o Isaraelu.

O i latou uma lava o loo auai i lenei konafesi, ua i ai se matafaioi e tali atu ai i se epikopo po o se peresitene o le paranesi. E maoae avega o loo latou tauaveina, ma ou te valaau atu i tagata uma o le Ekalesia ina ia faia mea uma na te mafaia, ina ia sii ese mai ai le avega o loo gapatia ai o tatou epikopo ma peresitene o paranesi.

E tatau ona tatou tatalo mo i latou. Latou te manaomia le fesoasoani a o latou tauaveina a latou avega mamafa. E mafai ona tele atu lo tatou lagolago ae itiiti lo tatou faalagolago i ai. E mafai ona tatou fesoasoani ia te i latou i mea uma tatou te mafai. E mafai ona tatou faafetai atu ia te i latou mo mea uma latou te faia mo i tatou. Ua tatou faavaivaia ma faalelavava i latou i sina taimi puupuu, i avega ua tatou lafo atu ia te i latou.

E silia ma le 18,000 epikopo i le Ekalesia. O i latou uma taitoatasi sa valaauina i le agaga o valoaga ma faaaliga, ma ua faamanuia i tofiga ma ua faauuina foi i latou i le faaee atu o lima. Ua tofu umia e i latou taitoatasi ia ki o le taitaiga o lana uarota. O i latou uma taitoatasi o se faitaulaga sili, o le faitaulaga sili pulefaamalumalu o lana uarota. E tofu tauaveina e i latou uma taitoatasi ia tiutetauave maoae o le tausi mea. O epikopo taitasi e tu o se tama o lana uarota.

E le tuuina atu i se epikopo ni tupe mo lana galuega. E leai foi se epikopo o se uarota e totogi e le Ekalesia lana galuega o le avea ma epikopo.

O tulaga e agavaa ai se tagata e fai ma epikopo i le taimi nei, e tutusa lava foi ma ona po o Paulo, lea na tusi atu ia Timoteo:

“E tatau i le epikopo ona le mata’uleagaina, o lē faiava i le fafine e toatasi, o lē mataala, o lē faautauta, o lē amiolelei, o lē alofa i tagata ese, o le na te mafaia ona aoao atu;

“E le inu i se uaina, e le se fasi tagata [o lona uiga, e le se tagata saua pe lima tētē], … e le se fai finauga, e le matapeapea foi;

“O le pule lelei i lona lava aiga, o lo o ua usiusitai mai ia te ia o lana fanau ma le fifilemu lava;

“(Aua afai e le iloa e se tasi ona pule i lona lava aiga, pe faapefea ona tausia e ia le ekalesia a le Atua?)

“E le se faatoa lotu, ne’i faafefeteina lona loto, ona pau lea o ia i le faasala a le tiapolo” (1 Timoteo 3:2–6).

Na toe faapea mai foi Paulo i lana tusi ia Tito, “e le tatau i se epikopo ona mata’uleagaina, aua o ia le auauna e tausi i mea a le Atua;

“O le taofi mau i le upu moni, faapei ona aoaoina o ia, ina ia mafaia e ia ona apoapoai atu i le mataupu e ola ai, ma aoai atu i e finau mai” (Tito 1:7, 9).

Ua talafeagai lelei lava na upu e faamatala ai se epikopo i ona po nei i le Ekalesia a Iesu Keriso o le Au Paia o Aso e Gata Ai.

Ou te fia tautala tuusao atu i le faitau afe o epikopo o e ua faatasi mai i lenei po. Sei ou faapea atu muamua, ou te alofa ia te outou i lo outou amiosa’o ma lo outou agalelei. E tatau lava ona avea outou ma alii o le amiosa’o. E tatau ona avea outou ma faataitaiga i faapotopotoga ua outou pulefaamalumalu ai. E tatau ona outou tutu i mea maualuluga, ina ia mafai ona outou sii ae i luga isi ua vaivai. E tatau ona outou faamaoni atoatoa aua o outou o loo taulimaina tupe a le Alii, o sefuluai a tagata, o taulaga e maua mai i a latou anapogi, ma fesoasoani o loo tuuina mai i nai mea iti ua latou maua. E maeu le faatuatuaina o outou ua avea ai o tausitupe a le Alii!

O lo outou agalelei e tatau ona avea ma se tagavai i ou tagata. E tatau ona lē alualua ou faamoemoega. E taumafai le tiapolo e faasese ia te oe, aua ua ia iloa afai na te faaumatia oe, e mafai foi ona ia faaumatia se uarota atoa. E tatau ona e faautauta lelei i au fegalegaleaiga ina ne’i i ai se tasi na te faauiga sese au amioga faapea ua le mama. E le tatau ona e gauai atu i le tofotofoga e te faitau i tusi leaga ma matamata i ata mataga, e oo lava i totonu o lou lava fale e le tatau ona maimoaina ai ata tifaga faasatani. O lou malosi i lou ola mama e tatau ona i ai i se tulaga e le masiligia, aua afai e valaauina oe e faamasinoina isi tagata ua le ola mama, e mafai ona e faia lea mea e aunoa ma le fefe pe maasiasi.

E le mafai ona e faaaogaina lou tofi epikopo e faalautele ai lau pisinisi, ina nei i ai ni faafitauli i mea tau tupe e aliali mai ona molia lea o oe e i latou o e na faatauanau mai ma e faatosinaina mai.

E le mafai ona e suia ou tulaga agavaa i le avea ai ma se faamasino o Isaraelu. O se tiutetauave mamafa ma le faigata le tulai atu e avea ma faamasino o le nuu. E tatau ona avea oe ma faamasino i nisi o tulaga agavaa i le avea ai ma uso o le Ekalesia, agavaa e ulu atu i le maota o le Alii, agavaa mo le papatisoga, agavaa e maua le perisitua, agavaa e aoao atu ma galulue o ni taitai i faalapotopotoga a le Ekalesia. E tatau ona avea oe ma faamasino mo le agavaa e maua ai le fesoasoani mai taulaga anapogi ma le faleoloa o le Alii i taimi o puapuaga. E le tatau ona i ai se tasi o loo e pulefaamalumalu ai e fia ‘ai pe le lavalava, pe leai se fale e nofo ai e tusa lava pe le talosaga mai i latou mo se fesoasoani. E tatau lava ona e silafia se mea e uiga i tulaga o le lafu mamoe o loo e pulefaamalumalu ai.

E tatau ona avea oe ma o latou fautua, o lo latou faamafanafana, o lo latou taula ma le malosiaga i taimi o faanoanoaga ma puapuaga. E tatau ona faamalosia oe i lena malosiaga e sau mai le Alii. E tatau ona tatala lou faitotoa ina ia e lagona a latou tagi ma ia malosi lou tua e tauaveina a latou avega, ia matala lou loto e silafia ai o latou manaoga, ia lava foi le lautele o lou malosi faaleatua ina ia aofia ai o e amioleaga ma e faitio. E tatau ona avea oe ma alii o le onosai, ia e naunau e faalogo ma taumafai ia e malamalama. E na o oe lava e mafai e isi ona liliu atu i ai. E tatau ona e tali atu pe afai ua misi uma lava isi punavai. Faataga mai au ou te faitauina atu ni nai laina o se tusi sa auina atu i se epikopo.

“Lau Susuga Epikopo:

“Ua lata nei i le lua tausaga talu mai le taimi na ou alu atu ai ia te oe mo se fesoasoani. I le taimi lena, na ou saunia ai e pule i lo’u ola. Ua leai se tasi ou te tapa i ai mo se fesoasoani—leai se tupe, leai se galuega, leai ni uo. Ua toe faoa lo’u fale ma ua leai se mea ou te nofo ai. O lo’u faamoemoega mulimuli lava o le Ekalesia.

“E pei ona e silafia na ou tuua le Ekalesia i le sefulufitu tausaga o lo’u olaga, ma sa ou solia foi tulafono uma ma poloaiga i a’u sailiga mo le fiafia ma le manuia. Sa ou le i maua le fiafia, ae na faatumuina lo’u olaga i le malaia, lototiga, ma le lotovaivai. Sa leai se faamoemoe po o se lumanai mo au. Sa ou tagi atu foi i le Atua ia faaoo mai le oti ia te au, ina ia aveesea ai au mai o’u puapuaga. E foliga mai sa ia le manao foi ia te au. Sa ou lagona foi ua ia tuulafoaiina au.

“O iina sa ou tapa atu ai ia te oe ma le Ekalesia… .

“Sa e faafofoga mai ma le loto malamalama, na e fautua mai, na e faatonu mai, na e fesoasoani mai.

“Sa amata ona ou tuputupu ae ma faateleina le poto ma le malamalama i le talalelei. Sa ou iloa e tatau ona ou faia ni suiga faavae i lo’u olaga ma o se mea faigata lava, peitai, i totonu o lo’u loto sa i ai le malosi e mafai ai ona faia.

“Sa ou aoao ai afai ou te ola i le talalelei ma salamo, ou te le toe fefe lava. Sa faatumulia lo’u loto i le filemu. O le ao pogisa o le lototiga ma le lotovaivai ua matafi ese. Ona o le Togisala, ua faamagaloina ai o’u vaivaiga ma agasala e ala ia Iesu Keriso ma Lona alofa mo au.

Ua Ia faamanuia ma faamalosi ia te au. Ua Ia tatalaina auala mo au, ua ia tuuina mai ia te au le taitaiga, ma puipuia au mai mea tiga. Ua ou iloa ai a o ou faatoilaloina toatuga taitasi, na amata ona toe olaola la’u pisinisi, ua mafai ona toe faamanuiaina lo’u aiga, ma ua ou maua ai le lagona fiafia ua ou ausia se mea.

“Epikopo, na e tuuina mai ia te au le malamalama ma le fesoasoani i nei tausaga e lua ua mavae. Semanu e le mafai ona ou aulia mai lenei tulaga pe ana le seanoa lou alofa ma lou onosai. Faafetai tele e tusa ma lou tulaga i le avea o oe o se auauna a le Alii e fesoasoani mai ia te au, o lona atalii femoumouai.”

Epikopo, tou te tutu i le olo o ni leoleo i le uarota o loo outou pulefaamalumalu ai. E toatele faiaoga i uarota taitasi. Ae e tatau ona avea oe ma faiaoga sili ia i latou uma. E tatau ona e mautinoa e leai se aoaoga sese e monomono atu ia i latou. E tatau ona e mautinoa ua latou tuputupu ae i le faatuatua ma molimau, i le amiosa’o ma le amiotonu ma le agaga fiafia e auauna atu. E tatau ona e mautinoa ua faamalosia lo latou alolofa i le Alii ma ia faaalia lea tulaga i le alofa tele o le tasi i le isi.

E tatau ona avea oe ma le e ta’uta’u atu i ai o latou sese, ia faailoa atu i ai a latou mea lilo, ia e teulotoina le faatuatuaga ua latou tuuina atu ia te oe. O loo ia te oe le avanoa o fesootaiga e tatau ona puipuia ma e le tatau ona faailoa atu i isi. E ono i ai ni tofotofoga ina ia e faamatalaina atu nei mea. E le tatau ona e faamatuu atu i na faaosoosoga.

Sei vagana lava ua faatonuina patino e le tulafono i ni mataupu tau sauaina, ae o mea e ta’u atu ia te oe e le faalauaiteleina, e tatau lava ona teu malu ia te oe. E i ai se laina telefoni puipuia a le Ekalesia e tatau ona e valaau i ai e faatatau i mataupu tau sauaina, atonu o le a faaoo atu i lau susuga.

O oe lava ia e te pulefaamalumalu i le Perisitua Arona i le uarota. O oe o lo latou taitai, o lo latou faiaoga, o lo latou faataitaiga e tusa lava pe e te manao i ai i lena tulaga pe leai. O oe o le faitaulaga sili pulefaamalumalu, o le tama o le aiga faaleuarota, e avea oe ma vaifofo i eseesega e tulai mai, o le laveai foi o e ua tausalaina.

E te pulefaamalumalu i fonotaga faalelotu e aoao atu ai aoaoga faavae o le ekalesia. O oe e te vaaia le tulaga faaleagaga o na fonotaga faalelotu ma le tuuina atu o le faamanatuga i le au paia, ina ia faamanatu atu ai i tagata uma feagaiga paia ma tiutetauave ua tuuina atu ia te i latou o e ua aveina i o latou luga le suafa o le Alii.

E tatau ona e tu atu o se uo malosi i fafine ua oti a latou tane ma fanau ua matuaoti, o se uo i e ua vaivai ma puapuagatia, ma e ua sauaina ma tuulafoaia.

E tatau ona manino le leo o lau pu ma ia lagona lelei. E te tu o le taitaiau o le au a le Alii i lau uarota, e taitaiina i latou ia manumalo i le taua ma le agasala, o le fiasili foi, ma le liliuese.

Ou te iloa e i ai taimi e faigata ai le galuega. E le mafai ona lava le taimi e fai ai mea uma. E anoanoai le mau tagata e telefoni mai, ma e fai soo foi. E i ai foi isi mea a oe e fia fai. E moni lena mea. E le tatau ona e faoa le taimi ma le malosi e patino i lou fale faigaluega. E le tatau foi ona e faoa le taimi e patino i lou aiga. Peitai, e toatele outou ua outou silafia, pe a outou saili atu mo le taitaiga faalelagi, e faamanuiaina outou i le poto e sili atu i lo outou lava ma le malosi ma le atamai ma le tulaga gafatia tou te le’i silafia o loo ia te outou. E mafai ona fuafua lelei o outou taimi ina ia outou le faatalale i o outou fale faigaluega, o outou aiga, po o a outou lafu mamoe.

Ia faamanuia atu le Atua i epikopo O Le Ekalesia a Iesu Keriso o le Au Paia o Aso e Gata Ai. Atonu e mafai ona oo ia te outou le faameo ona o le mamafa o outou tofiga. Ae ua outou silafia foi le olioli e maua mai i la outou galuega. Po o le a lava le mamafa o le avega o i ai, ae ua outou iloa foi o se galuega sili ona suamalie, ma tele ona taui, o le mea e aupito sili ona taua ua outou faia i fafo atu o lou lava aiga.

Ou te faafetai i le Alii ona o outou. Ou te faafetai i le Alii mo epikopo lelei i lenei Ekalesia i le lalolagi atoa. Ou te tatalo mo outou, le 18,000 o outou. Ou te aioi atu ia te outou ia outou faamalolosi. Ou te aioi atu ia te outou ia faamaoni. Ou te aioi atu ia te outou ia tutumau i o outou olaga ma sini ua outou fuafuaina mo isi. E ui ina ua loa o outou soifua ma ua augavaivai, ae ia suamalie la outou malologa ma ia maua i o outou loto lena filemu lea e na o le Atua e sau ai ia i latou o e auauna atu ia te Ia.

Ou te molimau atu i le malosi ma le lelei o epikopo o lenei Ekalesia. Ou te faamalo atu i fesoasoani o loo fesoasoani ia te i latou ma i latou uma lava o loo galulue i lalo o a latou taitaiga ona o lo latou tali atu i tofiga latou te faia.

Matou te le o faamoemoe tou te faia mea e le oo i ai lo outou mafai. Matou te fai atu ia outou faia le mea sili tou te mafaia. Ia faamatuu atu i isi ia vaega o le galuega e mafai ona e tuu atu i ai. Ona tuu lea e faitalia le Alii.

E i ai se aso o le a faamalolo ai outou. O le a avea lena taimi ma se taimi faanoanoa mo outou. Peitai, o le a i ai le mafanafana a o faafetai atu le au paia ia te outou. Ma o le a latou le faagaloina lava outou. O le a latou manatua outou ma talanoa fiafia i le tele o tausaga i le lumanai, aua e ui i tofiga uma, ae o outou lava e aupito latalata atu ia te i latou. Ua valaauina outou, ua faauuina, ma faamanuiaina i le tofiga o ni leoleo mamoe o le lafu. Ua uma ona faaee atu meaalofa e iloatino ai, o le faamasinoga, ma le alofa ina ia faamanuiaina ai o latou olaga. I le faagasologa o le faataunuuina, o le a e faamanuiaina lou lava olaga.

Ou te molimau atu i le paia o le natura o lo outou valaauga ma le auala matagofie ua outou faataunuuina ai. Tau ina ia faamanuiaina outou, o o outou fesoasoani, o o outou faletua, ma a outou fanau a o outou auauna atu i fanau a le Alii, ou te tatalo atu ai ma le lotomaualalo, i le suafa o Iesu Keriso, amene.