Ia Lagonaina O Tatou Leo

Elder M. Russell Ballard

O Le Korama a Aposetolo e Toasefululua

Ia tatou tautatala atu ma uunaia ni ala o faasalalauga sili ona faagaeetia, musuia, ma taliaina.

O le tautoulu o le tausaga o le taimi lena e faasalalau mai ai e televise a latou uluai polokalama ma faailoa mai ai a latou polokalama fou. Na ta’u mai e sa’u uo ia te au faapea e 37 polokalama fou a le TV na tatalaina i le tautoulu lenei. A o ia faitau i se nusipepa e iloilo ai nei polokalama, na ia iloaina ai e laiti lava ni nai polokalama e manao e matamata i ai lana fanau. O le tele lava o ata malie, tala faatino, ma polokalama a tagata e faatauva, o loo aofia ai i totonu le ola le mama, faatupu vevesi, ma le ulagiaina o tu ma aga e faatauaina faapea tu ma aga faaleaiga. O tausaga taitasi uma lava e foliga mai e faateteleina ai le leaga o nei polokalama fou, ma ua suia le vaaiga i mea o le a taliaina e tagata lautele. O mea e sau mai Hollywood, mai le Initoneti, ma le tele o musika i aso nei ua gaosia ai se mailei lea e mafai ona maileia ai a tatou fanau ma tuu atu ai i tatou uma i se tulaga matautia.

Ua i ai i taitai o le Ekalesia le tiutetauave e saunoa atu ai i mataupu tau le ola mama ma fautuaina ai tagata taitoatasi ma aiga. O le aiga o le iunite faavae lea o le lalolagi; o le iunite faavae o le faavavau. O lea, afai e taufaamatau mai nei malosiaga i le aiga, ua tatau i taitai o le Ekalesia ona tali atu.

O le aiga o loo i le totonugalemu o le fuafuaga a le Tama Faalelagi aua o i tatou uma lava o se vaega o Lona aiga ma e mafua mai ona o le olaga faaletino o lo tatou avanoa lea e foafoaina ai ni o tatou lava aiga ma tauaveina ia matafaioi o le avea ma ni matua. O totonu o o tatou aiga lea tatou te aoaoina ai le alofa le faatuaoia, lea e mafai ona oo mai ia i tatou ma tatou taulalata atu ai i le alofa o le Atua. O totonu o aiga lea e aoaoina ai tulaga e faatauaina ma fausia ai uiga. O le “tama” ma le “tina” o ni valaauga e le mafai ona faamaloloina mai ai i tatou, ma e leai se isi tausimea e sili atu lona taua nai lo le tiutetauave ua ia i tatou mo fanau agaga a le Atua e oo mai i totonu o o tatou aiga.

Faatasi ai ma lea manatu o le taua naua o aiga ma taufaamata’u o loo feagai ma aiga i aso nei, e le o se mea e maofa ai le faaaogaina e le Au Peresitene Sili ma le Korama a Aposetolo e Toasefululua o upu malolosi i totonu o le Folafolaga i le Lalolagi i Aiga: “Matou te lapatai atu o tagata taitoatasi … o e ua faatalale i le faataunuuina o tiutetauave faaleaiga, o le a i ai se aso tou te tutu atu ai e tali atu i luma o le Atua. E le gata i lea, matou te lapata’i atu foi, o le faamalepeina o le aiga o le a aumai ai i tagata taitoatasi, alalafaga, ma malo, faafanoga ia na uluai tau mai e perofeta anamua ma aso nei.”¹ O se tasi o perofeta faapea, o Malaki, lea na apoapoai atu i matua ina ia liliu atu o latou loto i a latou fanau ma fanau i o latou matua ina nei taia le lalolagi i le fetuu (tagai Malaki 4:6).

O nei lapataiga, mai anamua e pei ona i ai i le Feagaiga Tuai ma le taimi nei e pei ona i ai i le folafolaga i le aiga, ou te fia faaopoopo atu foi i ai lou leo lapatai, e patino lava lea i ala o faasalalauga i aso nei ma aafiaga leaga malolosi e mafai ona oo i aiga ma le olaga faaleaiga.

Talu ai ona o le ofoofogia o lona lautele, o ala o faasalalauga i aso nei o loo aumaia ai ni manatu se tele ma le maamaai. O le itu faafeagai mai ona aafiaga faatafuna ma le faatosina, o loo tuuina mai ai foi i ala o faasalalauga ia mea e lelei ma aoga. O loo tuuina mai i televise ia alaata o talafaasolopito, o alaata o suesuega, o alaata o aoaoga. E mafai lava e se tasi ona mauaina ia tifaga ma ata malie o le TV ma tala lea e faafiafiaina ai ma faagaeetia ai ma o loo sa’o lelei ai le faaalia o taunuuga o le sao ma le sese. O le Initoneti e mafai ona avea ma se meafaigaluega aoga tele o faamatalaga ma fesootaiga, ma o loo tele foi se aofaiga o musika lelei i le lalolagi. Ae o lo tatou luitau sili o loo i ai o le filifili lea ma le atamai ia mea tatou te faalogo ma matamata i ai.

E pei ona saunoa le Perofeta o Liae, talu ai ona o Keriso ma Lana togiola, ua tatou “saoloto ai e faavavau, o loo iloa le lelei ai le leaga,” o le mafai lea ona tatou faia faaiuga mo i tatou lava nai lo le tau faatonuina, “ua saoloto foi e filifili le saolotoga ma le ola faavavau … pe filifili le faatoilaloina ma le oti” (2 Nifae 2:26–27).

O filifiliga tatou te faia i ala o faasalalauga e mafai ona avea ma faatusa o filifiliga tatou te faia i le olaga. Afai tatou te filifilia le mea e lauiloa i lena taimi, o mea e faamalieina ai, o mea e taugofie ma feilafi i polokalama a le TV po o tifaga tatou te matamata ai, e mafai ona tatou taunuu atu i le filifilia o mea lava ia e tasi i olaga o loo tatou ola ai.

Afai tatou te le faia ni filifiliga lelei, e mafai e ala o faasalalauga ona faamalepeina o tatou aiga ma tosoese mai ai a tatou fanau mai le ala vaapiapi o le talalelei. O le faafoligaina o tifaga ma televise e pei e moni, ua faaalia ai ia vaaiga ma amioga lea e faaumatia ai le aiga ma avea ma mea fiafia, o ni sitaili, o ni fiafiaga, ma o ni mea e masani ai. O osofaiga e masani ona matautia a ala o faasalalauga e faasaga i le aiga e le tuusaoina mai pe tuu mai luma po o ni uiga le mama faalauaitele. O le tiapolo atamai e faitogafiti tele i le tulaga lena, i le iloaina lea o le toatele lava o tagata e talitonu i le aiga ma tulaga e faatauaina. Ae ua faatogafiti ma faimamago ona fai ana osofaiga—ma ua le faaalia mai ai foi ia mataupu o le sao ma le sese. O le ola le mama ma le uunaia o feusuaiga ua i soo se mea ma ua mafua ai ona talitonu nisi faapea, talu ai ona o loo faia e tagata uma, o se mea foi la ua tatau ai. O lenei aafiaga leaga e le o taataa solo i le auala; ua oo sao mai lava i totonu o o tatou fale, i le totonugalemu o o tatou aiga.

Ina ia malolosi ma fiafia, e moomia e aiga ona faafaileleina ia upumoni o loo taua mai i le mataupu faavae e 13 o le faatuatua—i se talitonuga i le “faamaoni, amiotonu, nofo mama, agalelei, amio mama, ma le faia o mea lelei i tagata uma.” O le mea e faafetai ai, o loo toatele foi nisi alii ma tamaitai o loo i ai ni manatu faapea i aganuu ma talitonuga uma o e o loo saili ia “mea mama, matagofie, logoleleia, ma tauleleia.”

Ae o loo tatou ola i “taimi matautia” lea na faatatau i ai le Aposetolo o Paulo ina ua lapataiina o tatou aso lea e “avea ai tagata ma e alolofa ia i latou lava, o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga, o e le lotoaiga, … o e faatuaupua … o e le alolofa i tagata amio lelei, … o e soona fai, o e ua faafefeteina, o e ua tele le manao i mea faafiafia a e leai se manao i le Atua” (2 Timoteo 3:1–4).

O alii ma tamaitai faatuputupu leaga, e faamoemoe i le maua o le tupe ma le malosi nai lo le lelei, “e faaoso ai le nuu ” i “uiga eseese … o le amioleaga” (tagai Alema 11:20), ma taofia ai aoga lelei o ala o faasalalauga e mafai ona faaaogaina ai.

O le uiga mama fou lea o loo laugaina mai le pulelaa o ala o faasalalauga e leai lava se mea e ese ai ma le ola le mama tuai. E osofaia ai talitonuga faalelotu. E faavaivaia ai le aiga. E liliu ai uiga lelei e avea ma uiga leaga, ae o uiga leaga e avea ma uiga lelei. E fasia ai lagona ma osofaia ai e le aunoa le agaga i savali ma ata e le mama, e le matagofie, e le logoleleia, e le tauleleia.

Ua oo mai le taimi e ao ai i tagata o le Ekalesia ona moomia ona tautatala atu ma auai faatasi ma le toatele o isi tagata manatunatu i le tetee atu i aafiaga leaga, faatafuna, ma le le faamaoni ua lilofia ai le lalolagi.

E tusa ai ma se faamatalaga a le Kaiser Family Foundation, o le pasene o polokalama a le televise e faaalia i taimi e sili ona toatele ai tagata e matamata i ai o loo aofia ai tulaga faafeusuai ua oso i luga mai le 67 pasene i le 1998 i le 75 pasene i le 2000.² O ala o faasalalauga o loo aofia ai nei ituaiga tulaga e anoanoai ona aafiaga leaga. E siitia ai uiga paaa e faasaga i tamaitai, o e e masani ona faaalia mai o ni vaega autu ia o le sauaina ae le o ni afafine faapelepele o le Atua o e e taua i Lana fuafuaga e faavavau. O uiga taua ma le leva o le taofia o le tagata mai sootaga vavalalata faauo a o lei faaipoipo faapea ma le faamaoni aiai i le va o le tane ma le ava pe a mavae le faaipoipoga ua le faatauaina ma ua ulagiaina. Ua fenumiai i le fanau laiti ma le autalavou ma taitaiseseina e amioga le mama latou te vaai o faatinoina e tagata ua lauiloa i le lalolagi o e latou te moomoo i ai ma mananao e faataitai i ai. O le fenumiai i amioga mama e mafua mai i ala o faasalalauga, ua lafoaiina ai uiga taua ma mausali.

Ua tatou vaai i le saoasaoa faateleina o ponokalafi faaeletoronika, e aofia ai le fai ma mausa ia feusuaiga e fai i luga o le Initoneti. O isi ua matuai fiafia lava i ai e matamata i ponokalafi i le Initoneti ma auai i talatalanoaga matautia lea ua latou teenaina ai a latou feagaiga o le faaipoipoga ma matafaioi faaleaiga ma ua masani ona oo atu ai foi a latou galuega i se tulaga pagatia. E toatele ua solia le tulafono. O isi tagata e i ai lea uiga ua atinaeina se uiga faapalepale i a latou amioga ua suia, ae ua taliaina soo se faigata ina ia faamalieina ai o latou tuinanau le mama. Ua faamalepeina faaipoipoga ma ua faaleagaina ia sootaga, a o faapea ona faaleagaina uma e le mausa leaga ia mea uma e moni, ma faavavau le taua.

E tusa ai ma le tala a se tasi o tagata e maitauina suiga i le lalolagi: “O le televise … ua suitulaga i le aiga, o le aoga ma le lotu—i le faatulagaga lena—ua avea ma masini e pulea ia fegalegaleaiga ma le faasalalauina o mea e faatauaina… . O le faaloloto, amioga leaga, faatupu vevesi, tuinanau e le faatapulaaina, o le amio le pulea … o loo auina uma atu o ni mea faafiafia i aso uma i a tatou fanau.”³

E tatau ona tatou popole i le matautia ma le taufaaoso i feusuaiga o upu o le tele o pese lauiloa o aso nei ma le mea fou lea e faafoliga o ni galuega o mafaufauga ua ta’ua o musika vitio. E tusa ai ma le faamatalaga a i latou o loo vaavaaia le gaosiga o musika i aso nei, o le 40 pasene o i latou e maimoaina ia musika vitio e i lalo o le 18 tausaga.⁴ O se isi suesuega na lipotia mai ai faapea e toetoe lava toluvaefa o musika vitio uma e faamatalaina ai se tala o se vaaiga faalefeusuaiga, ae toetoe lava o le afa e aafia i le faatupu vevesi.⁵ Ma o lavalava o loo faaalia ai i ata o musika nei e matuai mamao ese lava mai le “mama, matagofie, logoleleia po o le tauleleia” e te mafai ona mauaina. O lo tatou taimi e mautinoa lava o se taimi ua fai mai ai tagata “ua lelei le mea leaga, a e leaga le mea lelei” (Isaia 5:20).

Ou te toe fia fai atu faapea o le aiga o le autu lea o osofaiga a le tiapolo ma o lea e tatau ai ona avea ma autu o la tatou puipuiga ma le saogalemu. E pei ona sa ou fai atu muamua, afai e te faatali ma mafaufau i ai mai se vaaiga faaletiapolo, o le faasagatau i le aiga o se mea lelei ia Satani. Afai e manao e faaleaga le galuega a le Alii, na te le faaoonaina ia le sapalai pata pinati a le lalolagi, pe faavaivaia le galuega faamisiona a le Ekalesia. Na te le tuuina mai foi se faamai o le faai ina ia aafia ai le Aufaipese a le Tapeneko Mamona. Na te le tetee atu foi i le Jell-O ma isi meaai e fiafia i ai tagata. Afai e manao le tiapolo e faaleaga ma faalavelaveina le ute o le galuega a le Atua, na te osofaia lava le aiga. Na te osofaia i le taumafai lea ia le amanaiaina le tulafono o le legavia, ia faafenumiai kenera, ia tuumaualaloina le matautia o le faatupu vevesi, ia avea le gagana masoa ma le upu vale ma mea e masani ai, ma ia avea amioga le mama ma le leaga ma mea sili ona taua nai lo le teenaina.

E moomia ona tatou manatuaina le saunoaga a Edmund Burke: “E na o le pau le mea e moomia e le tiapolo ina ia manumalo ai o le leai lea o se mea e faia e tagata lelei.”⁶ E moomia ona sii i luga o tatou leo faatasi ma isi tagatanuu popole i le lalolagi atoa i le tetee atu i nei faiga ua fotu mai. E moomia ona tatou tau atu ia i latou o e o loo lagolagoina nei ala o faasalalauga mataga ua lava nei mea ua i ai. E moomia ona tatou lagolagoina ia polokalama ma oloa e lelei ma musuia. O le auai faatasi ma tuaoi ma uo o e tutusa o tatou atugaluga, e mafai ai ona tatou auina atu se savali manino ia i latou o loo gafa ai. E maua o latou tuatusi i le Initoneti faapea a latou paaga o loo latou faifaimea faatasi. O tusi ma i-meli e sili atu lona aafiaga nai lo le silafia e le toatele o tagata, aemaise lava i se tusi e pei o lea na auina atu e se tuafafine o le Aualofa lea na faapea atu ai, “E fai au ma sui o se vaega e silia ma le selau o tamaitai lea e fono i vaiaso taitasi ma talanoa soo e uiga i le matautia o le mea o loo fai e la outou polokalama i a matou fanau.”

E moni lava o le auala masani sili ona lelei e tetee atu ai i aafiaga o ala o faasalalauga leaga o le aua lea nei matamata i ai, pe vaai i ai, po o le taalo ai. E tatau ona tatou aoaoina tagata o o tatou aiga ina ia mulimuli i le fautuaga a le Au Peresitene Sili i le autalavou. Mai le tamaitusi Mo le Malosi o le Autalavou, o loo matuai manino mai ai le latou faatonuga i faafiafiaga ma ala o faasalalauga:

“Aua e te alu, pe matamata, pe auai foi i le faatinoina o faafiafiaga e faatufanua, e le mama, e faatupu vevesi, pe faatiapolo i soo se itu. Aua e te auai i ni faafiafiaga e faaalia ai i soo se tulaga faapea e talia ai amioga legavia po o amioga faatupu vevesi… .

“Ia maua le lototele e te savali ese ai mai se tifaga po o se pati o faia ai se vitio, tape se komepiuta po o se televise, sui se alaleo faasalalau o se leitio, pe tuuese se mekasini pe afai o faaali mai ai pe tusia ai ni mea e le ogatasi ma tulaga faatonuina a le Tama Faalelagi. Ia faia nei mea tusa lava pe le o faia e isi.”⁷

Uso e ma tuafafine, aua tou te faatagaina ala o faasalalauga e pulea outou. Ia mumusu e pulea outou e isi. Ia mumusu e lagolagoina na polokalama e solia ai tu ma aga o uiga taua faaleaiga. Atonu o i tatou ua na o sina leo itiiti e amata ai; ae ui i lea ia tatou tautatala atu ma uunaia ni ala o faasalalauga sili ona faagaeetia, musuia, ma taliaina.

E ese mai le lagonaina o o tatou leo, ou te fia faaiuina i ni mea se fitu lea e mafai e soo se matua ona faia ina ia tuuitiitia ai aafiaga leaga e mafai e ala o faasalalauga ona faia i o tatou aiga:

E moomia ona tatou faia a tatou fonotaga faaleaiga ma fuafua ai po o a tatou faatulagaga o ala o faasalalauga o le a i ai.
E moomia ia lava o tatou taimi aoga e faaalu i a tatou fanau ma o loo avea pea i tatou ma ni aafiaga autu faifaipea i o latou olaga, ae le o ala o faasalalauga po o soo vaega o uo.
E moomia ona tatou faia ni filifiliga lelei po o a ala o faasalalauga tatou te matamata ma faalogo i ai i tatou lava ma faia se faataitaiga lelei mo a tatou fanau.
E moomia ona tatou faatapulaaina le aofaiga o le taimi o a tatou fanau e matamata TV ai pe taaalo ai i taaloga vitio pe faaaoga ai foi le Initoneti i aso taitasi. O mea faafoliga mai e moni e le tatau ona avea ma mea moni ia i latou.
E moomia ona tatou faaaogaina ia polokalama e faamamaina ai vaega e le talafeagai mai le Initoneti ma polokalama e lokaina ai polokalama e le tatau ai o le TV ina ia puipuia ai a tatou fanau mai le “faafuaseia ona vaai i ai” i mea e le tatau ona latou vaai i ai.
E moomia ona tatou tuuina ia TV ma komepiuta i totonu o se potu e faaaoga tele e le aiga, ae le o totonu o se potumoe po o se isi nofoaga e le soona faaaogaina.
E moomia ona tatou faaalu se taimi e matamata faatasi ai ma a tatou fanau i ala o faasalalauga talafeagai ma talanoaina faatasi ma i latou le auala e faia ai ni filifiliga o le a uunaia ai ma atinaeina ai nai lo le tuumaualaloina ai ma faaumatia ai.

Ia faamanuia i tatou e le Atua i le lototele ma le atamai i le faia o le mea e mafai e i tatou taitoatasi ona fai ina ia fesoasoani atu ai e liliuina le tai fana’e o ala o faasalalauga mai le pouliuli agai i le upumoni ma le malamalama. Ia malolosi o tatou aiga ma faamaoni i mataupu faavae o le talalelei o lau tatalo lea, i le suafa o Iesu Keriso, amene.