O Le Savali o le Toefuataiga
O le savali o le Toefuataiga o [se] valaaulia ina ia iloa ai pe aisea ua toefuatai mai ai le talalelei a Iesu Keriso ma Lana Ekalesia moni e se perofeta i ona po nei.
O upu o se vaega o le utuvagaga tatou te faaaogaina e fefaasoaai ai lagona, o le malamalama, po o faamatalaga i le va o tagata. O loo i ai i nei upu se upu e faaaoga e sue ai le faapogai po o le mafuaaga o se mea. A faaupu, e faamalie ai lo tatou fiailoa, e iloa ai le mea e le o iloa, pe maua ai foi tali i fesili taua e faatatau i o tatou ola faaletino. Afai e le faaaogaina pe faatuatuana’i foi i ai, ona muta ai foi lea o le faagasologa o le mafaufau ma tulai mai ai le valea. O le a la lea upu taua? Pe ua e mate’iaina? E na o le lima mataitusi e sipela ai; o le upu lea o le aisea.
O le Aisea o se tasi o uluai upu ma upu e fiafia i ai tamaiti e faaleo aemaise lava o le tupulaga. O se tasi o aisea e sili ona fiafia i ai se tasi o le fanau a la’u fanau o le: “Aisea e tatau ai ona tatou aai i fualaau fai sua?” A o tatou tuputupu ae foi, ona amata ai lea e le aisea ona vailiili ia lagona: “Aisea ua oti ai Tinamatua?” Ona sosoo ai lea ma le sailiiliga mo le malamalama po o le faamaoniga o tiutetauave: “Aisea e tatau ai ona ou alu i le lotu pe ave se misiona?” “Aisea ua poloaiina ai i tatou e fetufaai atu i isi le talalelei?”
E faigata tele le fesili lea mulimuli! O le galuega faafaifeautalai o le tiutetauave foi lea a tagata uma o le au paia—ina ia faaleo atu le leo o le lapataiga i lona tuaoi, i le agamalu ma le loto maualalo (tagai MFF 38:41). Aisea? Ina ia maua ai e isi ia sauniga faaola i le Ekalesia a Iesu Keriso i le valaauliaina lea o i latou e o mai ia Keriso (tagai Moronae 10:32). O le savali o le Toefuataiga o le valaaulia lenei ia iloa pe aisea ua toefuatai mai ai le talalelei a Iesu Keriso ma Lana Ekalesia moni e se perofeta i ona po nei.
E mafai faapefea ona e tuuina atu se valaaulia i se tagata?
Muamua, e ala i le tautino atu o loo soifua le Atua lo tatou Tama, e alofa ia i tatou, ma o Ia o se Atua o faaaliga. E iloa faapefea lena mea? E ala i faaaliga ma molimau a perofeta.
O le faasologa o taimi o le talafaasolopito faalelotu e amata i le Tusi Paia. O se tusi o uluai faaaliga a le Atua i Ana perofeta sa feagai ma tagata. O loo amata i se tala ia Atamu ma Eva, o o tatou uluai matua; o le foafoaina o i laua; o lo la pau; faatasi ai ma ona taunuuga—i la le tino ma le vavaeeseina mai le Atua; ma a la’ua uluai laasaga i le lalolagi faitino. Atonu o se tasi o a la fesili muamua i lena taimi o le “Aisea ua ta o mai ai iinei?” Ina ia iloa [le mafuaaga], na pau lava le tali o le valaau atu lea i le suafa o le Alii, na o le pau lea o le la punavai o le malamalama moni (tagai Kenese 4:26). O faaaliga tuusao, sa la faafofogaina ai le siufofoga o le Alii o poloaiina i laua e tatau ona la tapuai atu i le Alii lo la’ua Atua, ma e tatau ona la osi atu taulaga ia te Ia (tagai Kenese 4:4; Mose 5:4–5). O nisi faaaliga ia Atamu ma Eva sa aoaoina ai i laua o le taulaga o le faatusa o le taulaga a le Alo Pele e Toatasi o le Tama, o Iesu Keriso le suafa lava e tasi e oo mai ai le olataga ia te i laua. Ona folafola atu ai lea o le meaalofa o le Agaga Paia ia i laua, ina ia mafai ai ona avatu ia te i laua soo se mea la te ole atu ai (tagai Mose 5:6–7; 6:52).
Mulimuli ane ona maua lea e Atamu e ala i le mana o le Agaga Paia o se molimau mautinoa ma le atoatoa o Iesu o le Keriso, o le Faaola ma le Togiola o le lalolagi. Sa i ai se toefuataiiga moni lava o se malamalama o le tulaga faaletino o Atamu ma Eva ina ua pauu, e ala lea i le tuuina atu ia te i la’ua o le malamalama e uiga i lo latou sootaga ma le Tama, o le Alo, ma le Agaga Paia; o le malamalama e uiga i le Togiola ma le Toetu; ma le malamalama atili e uiga i mataupu faavae muamua ma sauniga o le talalelei o le faaolataga.
Ona o mea sa faalogo i ai Atamu ma mea sa ia vaai i ai, o lea ua agavaa ai o ia e faaigoa o le uluai perofeta i le fogaeleele, o se molimau patino o le faaaliga na tuu ifo i le tagata. O lana matafaioi autu i le taimi lea, o le tausisia lea o le moni o le talalelei ma ia ona aoaoina atu e faapei ona sa tuuina atu ia te ia. O Satani, i se isi itu, lea e tu mo le itu tetee, sa tuu na te faia ma aoao atu soo se mea ina ia faafitia, teena, pe faatuatuanai le talalelei lea na maua mai e ala i faaaliga ma faatosina ai tagata sa latou taliaina ina ia liliuese, i se tulaga o le fememea’i, fevaevaeai ma lafoai pe teena lo latou faatuatua sa i ai! Ona avea ai lea o le vaega o totoe o le Feagaiga Tuai ma talafaasolopito faalelotu o faaaliga faifai pea e ala mai i perofeta eseese e pei o Noa, Aperaamo, ma Mose, i taimi eseese—ua ta’ua o tisipenisione—e toefuatai mai ai mea ua leiloloa ona o le liliuese i lea taimi ma lea taimi. O nei perofeta sa tofia e le aunoa e le Atua. Sa tuuina atu ia te i latou le pule paia; sa ia te i latou ki o le perisitua; sa ia te i latou foi le pule paia e tautala ai i le suafa o le Alii ma aoao atu ma valoia o le afio mai ma le Togiola a Iesu Keriso, o le Faaola ma le Togiola o le lalolagi (tagai Amosa 3:7).
O loo faamaonia e le Feagaiga Fou ia aoaoga, o molimau, ma valoaga a perofeta o le Feagaiga Tuai. O se tala o le soifua mai, soifuaga, ma le galuega a Iesu Keriso, le Alo o le Atua soifua; o Lana Togiola; ma Lona Toetu. O loo faamatala ai le faatuina o Lana Ekalesia, o Lana pule paia, o Lana talalelei, ma Lana poloaiga i Ona soo e fetufaai atu, ma “o atu … i le lalolagi uma, ma tala’i atu ai [Lana] tala lelei i tagata uma lava” (Mareko 16:15).
Sa manino le savali o le Feagaiga Fou: sa tasi le lafu, tasi le faatuatuaga, tasi le talalelei, tasi le perisitua, tasi le ekalesia ina ia “tasi, o fanau a Keriso” (4 Nifae 1:17).
Ae peitai, na toe tulai mai foi sauaga, o le faafitia o le faasinomaga paia, ma le teena o le talalelei a Keriso ma Ana auauna perisitua sa i ai le pule, i le vaitaimi ua mavae le Toetu o le Faaola. Ma o loo faaalia mai ia i tatou i le talafaasolopito faalelotu se faamaoniga i le vave tele ona suia le pule o le perisitua e le pule faalelalolagi; o le faafesuiai o aoaoga faavae paia ma filosofia fesuisuiai, ma le nenefu o tagata; o sauniga o le faaolataga ua fesuiai pe faatau foi i tupe; o le suia o faaaliga i se veli o le pouliuli ma oo atu ai i le vaitau o le pogisa faaleagaga.
Peitai, na oo mai se taimi i lenei liliuese tele, lea na valoia muamua mai, ina ua toe alia’e mai foi le tuufesilisili o tagata—pe “Aisea ua faapea ai?” Sa tulai mai tagata e maoae le faatuatua ma taumafai e toe fatua’i mai aoaoga faavae sese ma le pule faaleagaga sese. O a latou taumafaiga faamaoni ma le naunautai sa na ona tulai mai ai o le toe amataina o nisi mau lotu e faaigoa i o latou igoa ma o a latou tetee ma saga faaopoopo ai le fenumiai ma le tele o fevaevaeaiga. Ae o le mea moni, e lua elemene autu sa misi i lea toefatua’iga: o faaaliga ma le pule, o le auala e tasi a le Alii e fesootai mai ai upumoni paia i le tagata.
A o tatou vaavaai faavavevave atu i lenei faasologa o le talafaasolopito faalelotu, tatou te maua ai se aso ma se igoa. O le aso o le 1820; o le igoa o Iosefa Samita. O le manatunatu loloto e uiga i lenei fenumiaiga faalelotu ma le eseese o lotu i lona taimi, o lea sa fesili ifo ai lenei taulealea ia te ia lava, “Afai e sa’o se tasi o [nei lotu], o le fea, ma pe faapefea foi ona ou iloa?” (IS–T 2:10). Aisea ua tulai mai ai lenei fenumiaiga? O le fautuaga faaperofeta, ia fesili i le Atua. Sa faafuasei ona toe tulai mai foi le talafaasolopito faalelotu e tusa ai ma le metotia a le Atua i le auala e tali ai le fesili a le tagata pe aisea. Sa toe oo mai se faaaliga e fai ma tali, ma o le taimi lea, o le faaali mai o le Tama ma le Alo. Ua toe aumai ai foi se molimau paia mai le Tama: “O Lo’u Atalii Pele lenei. Faalogo ia te Ia!” (IS–T 2:17). Ua toe tali mai foi i se faaaliga tuusao le fesili a Iosefa Samita: “O le fea o [lotu] uma ua sao … e ao ina ou auai. O le tali na ou maua, ia aua lava ou te auai i se tasi o ia lotu, aua ua sese uma lava i latou” (IS–T 2:18–19). Ua toe tautino mai foi lena liliuese mai le punavai moni—e Iesu Keriso lava Ia. Ua tatau foi la ona toe mulimuli mai ai se toefuataiga, ma na sa’o lava.
Ina ua mavae ni tausaga, ona maua ai lea e Iosefa Samita e ala i faaaliga, o le malamalama paia atoatoa i aoaoga faavae ma le pule ma ki o le perisitua. Ma iu ai, i le 1830, na toefuatai ai le Ekalesia a Iesu Keriso ma ona aoaoga faavae uma ma sauniga o le faaolataga. Sa agavaa Iosefa Samita e tofia e avea ma perofeta o le Toefuataiga i ona po nei.
E pei ona avea le Tusi Paia ma faamaoniga vaaia o faaaliga paia i perofeta anamua, e faapena foi le Tusi a Mamona: O Se Tasi Molimau ia Iesu Keriso o le faamaoniga maua’i foi i ona po nei, o Iosefa Samita o se perofeta na taliaina le faaaliga ma le pule e pei foi ona sa latou faia. O se molimau i le moni o le Tusi a Mamona, e fesoasoani lea i tagata e maua ai se tali i le pe aisea na toefuatai mai ai le talalelei a Iesu Keriso e se perofeta ma pe aisea foi ua i ai se perofeta soifua i aso nei, o Gordon B. Hinckley. O loo tali ai foi le fesili e sili ona taua o le pe aisea: ua saunia ai e sauniga uma o le talalelei ia faamanuiaga aupito silisili mo le sauniaina o i tatou mo lo tatou faaolataga ma faataunuu lo tatou faamoemoega i le olaga nei, o le foafoaina o aiga e faavavau. E moni lenei savali o le Toefuataiga aua e paia.
Ou te molimau atu ai i le suafa paia o Iesu Keriso, amene.