O Le Togiola, Salamo ma le Ie Palapala

Elder Lynn A. Mickelsen

O Le Au Fitugafulu

Ua folafola mai le Alii o le a Ia faasinasinaina o tatou ofu i Lona toto… . E mafai ona Ia togiolaina i tatou mai lo tatou lava pau.

A o tietie atu se alii i lana taavale i se taulaga itiiti i Mekisiko, sa lavea se taifau sa oso faafuasei ane i luma o lana taavale ma mate ai. Na amata mai i lena aso, ona faaigoa e le latou nuu o le mata perros. E leai lava se mafaufau pe na mafua i se a le igoa; pau lava le mea o ia o le “faataumaoi taifau.” O tagata fou faatoa o atu i le nuu, latou te le i iloa le tulaga, ae sa latou faatupuina i o latou mafaufau se ata mataga o le mea sa ia faia.

O le tauleleia po o le tauleaga e faavae i luga o ni talasalatua, se mea moni, po o le faavae foi i se igoa valaau, e toetoe lava ina a le mafai ona faagalo. O le faaupuga “Aua le tataina au ie palapala i nofoaga faitele” [aua le taulimaina mataupu patino e maasiasi ai i nofoaga faitele] o se fautuaga atamai. E le tatau, pe talafeagai, pe logolelei foi le folasia atu o a tatou mea sese patino pe faaleaiga foi ma agasala e vaili e le lautele. O le toatele o tagata e iloaina se agasala, o le tele foi lena o le faigata ona salamo pe suia.

E le faapea o fai atu e tatau ona faaufiufi se agasala, e ui ina o le manao lena e tupu ae i se tagata e faia se agasala. Tatou te mananao e nana se mea sese po o ni agasala sa tatou faia, nai lo le salamo. Ae peitai, na iloa e Kaino ina ua maea ona ia fasiotia ia Apelu, e le mafai ona ia nanaina ana agasala mai le Alii,¹ aua e silafia e Ia mea uma.² Na te silafia a tatou amioga le usitai uma, ae—e ese ai mai le iloa e tagata lautele—o Ia, ma Lona silafia o a tatou agasala, ua tuuina mai ai folafolaga patino, o le a Ia le toe manatua lava na agasala pe afai tatou te salamo.³

O le tataina o ie palapala ma le salamo e tutusa lelei lava. O le agasala e aumaia ai le le mama i luma o le Alii ma e tatau ona faaleleia. Peitai, e i ai le taimi ma se nofoaga e tautau atu ai ma talosagaina se faamagaloga. O le taimi ma le nofoaga e tautau atu ai e lena tagata, e faalagolago i le natura ma le tele o le agasala. Afai o se solitulafono i tulaga lautele po o se solitulafono i nofoaga faitele, o le tiute o le tagata o le taulimaina lea o lena sese i le tulaga lautele ma talosagaina ai se faamagaloga. O lo tatou tiutetauave i le salamo e faaali i le Alii, o Ana auauna, ma i latou sa tatou sese pe agasala ai.

E i ai se tulaga e ogatusa ai le faasinasina o o tatou ofu i le toto o le Tamai Mamoe, ma le tataina o a tatou lava ie palapala. O Lana taulaga togiola e faasinasina ai o tatou ofu. O le mau faasino i ofu e faatusa i o tatou tagata atoatoa. E afua ona manaomia ona faamama pe a tatou eleelea ona o agasala. O le faamasinoga ma le faamagaloga o le pule faitalia lea a le Faaola, aua e na o Ia e mafai ona faamagaloina ma fufulueseina a tatou agasala.⁴

Ina ua tuuina atu e le Tupu o Peniamina lana lauga maoae i le nuu o Saraemila,⁵ sa suia loto o le Au Paia,⁶ ona i ai lea o le filemu ma le manuia i le nuu uma. Sa mavae atu tausaga, ona tofia lea o Alema e pulefaamalumalu i le Ekalesia. Sa pauu atu nisi o le au paia a le Ekalesia i le agasala ona ua mafuli o latou loto i a latou oa. Sa faaletonu Alema ina ua aumai i latou i ona luma. Ona o lona le iloa pe faapefea ona taulima le faafitauli, o lea sa ia auina atu ai i latou i le Tupu o Mosaea, peitai sa toe auina atu i latou e le tupu ina ia faamasinoina e Alema.

Ona o le popole ina nei sese lana faaiuga i le silafaga a le Atua, o lea sa faaali atu ai e Alema lona loto atoa i le Atua ma aioi atu ia te Ia mo ni tali, pe faapefea ona taulimaina nei tagata solitulafono. Ona o le alofa tele o Alema i ona uso a tagata ma lona naunautai faamaoni i le finagalo o le Atua, o lea sa matua faamanuiaina ai o ia e le Alii, i se folafolaga o le ola e faavavau. Ona faamatala atu lea e le Alii ia te ia le mafuaaga o le matua taua tele o lona ole atu mo se malamalamaaga, ma fetalai atu: “O la’u Ekalesia lenei. O lo’u igoa foi e mafai ai ona faasaoina. O la’u taulaga e mafai ai. O Au le o le a faamasinoina.”⁷

E faafia ona galo ia i tatou le tagata e i ai le aia tatau e faamasino ai? E faalagolago le faamagaloga o agasala ia te Ia, ae le o i tatou. O le isi la taimi e tofotofoina ai i tatou e folasia ie palapala i nofoaga faitele, [taulima a tatou mataupu patino i tulaga faitele] ia tatou manatua:

Muamua, alu i le Alii.

Lona lua, alu i le tagata ua e sese pe agasala ai.

Lona tolu, afai e tatau ai, alu i lo tatou faamasino o Isaraelu

Ma lona fa, ona lafoai ai lea.

O le isi itu o le faaaliali o ie palapala o faanaunauga ‘alu’alua e i ai i nisi ina ia folasia ia sese o isi. Sa avatu e le Alii ia Iopu se luitau, a o mafatia o ia i lana avega; “E te faasala ea ia te au, ina ia ta’uamiotonuina oe?”⁸ E mafai ona tupu lenei mea e oo lava i le aiga, pe a faapea e puipuia e se tasi lona lava igoa lelei, ma folasia auiliili ai ia faaletonu ma sese o ona uso ma tuafafine, o lana fanau, po o ona matua i se faiga ua manatu lava ia ua tonu, ae ua fuafua e faaitiitia ai lona lava mafatia.

I le faataoto i le atalii faamaumau oa, na toe taliaina le faamaumau oa e se tama faamaoni o lē sa saunoa e uiga i le taua o lona atalii, ae le o ona sese.

Soo se taimi lava tatou te ta’uina ai agasala po o mea sese a isi, ua tatou faamasinoina lava i latou. Sa ou faalogo o fai le isi tamaloa i lona atalii, e le toe faigaluega se tasi tagata mo ia aua ua ia manatu ua maualuga tele le pili o le galuega a le tagata lea. Sa tali atu le tamaitiiti, “Ua ou ofo i lo’u faalogo atu o e faia lena tala, Tama, aua e ese mea sa aoaoina ai i matou.”

Sa faia le faamasinoga a le tama ae le faavaea. Mata o le a le mea sa tatau ona fai e le tama lea? Afai sa i ai ni ana fesili e uiga i le pili mo le galuega, sa tatau ona la talanoa ma le tagata [sa faia le galuega], ia faalelei o la’ua eseesega, ona taatia ai lea e aunoa ma le tomumu atu i isi tagata. Sa aoao mai e le Faaola: “Aua tou te faamasino atu, ina ne’i faamasinoina outou. Aua o le faamasinoga tou te faamasinoina atu ai, e faamasinoina ai outou: o le fua foi tou te fuaina atu ai, e toe fuaina mai ai ia te outou.”⁹

Ina ua aumaia e le au tusiupu ma Faresaio ia Iesu le fafine na molia i le mulilua, sa punou ifo o Ia i lalo ma tusi i Lona tamatamailima i le eleele ina ia aua nei vaai i ai isi pe faalogo foi i ai. Ona Ia fetalai atu lea, “O so outou e leai sana agasala, ina lua’i togi se maa ia te ia.” Ina ua o ese uma i latou sa molia o ia ua maasiasi i a latou agasala, sa fetalai atu o Ia i le fafine, “Alu ia oe, aua e te toe agasala.”¹⁰

O le a le mea e tatau ona tatou fai pe a tatou iloa faafitauli a isi tagata?

Aua le faamasino atu. Tuu ai pea le faamasinoga i le Alii, o le faamasino e tonu atoatoa. Aua tatou te suesue pe vailiilia fua agasala a isi, ae ia mafaufau i le paia foi o isi tagata. E le o se tatou matafaioi le isuisu i faafitauli o isi ae vaai i le tele o i ai lo latou lelei.
E tatau ona tatou faamagalo atu. E ui lava atonu ua tatou tiga ai, ae ua fetalai mai le Alii, “O Au le Alii e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.”¹¹
Ia faagalo. E mafai e se manatua [memory] vaivai ona faatamaia le agaga e sili ona malosi. Tuu ai pea; faataatia ai; tuu ese.

Afai e oo atu ia te oe se lagona malosi o tofotofoga e te tago e faaali ni agasala a isi, aua lava nei e faamatalaina i lou tuaoi po o lau uo e sili ia te oe. Alu i lou epikopo. Tuu ai la’ia o le avega ia te ia. Afai e manaomia, ona e tago lea e lipoti i le ofisa o leoleo po o taitai e gafa ma solitulafono, ona tuu ai la’ia. Ou te talitonu, ina ia maua le folafolaga taua lea sa maua e Alema, e manaomia foi lena lava agaga ma le mea sa ia faia e tusa ai ma ie palapala o isi, faapea foi ma ia.

Ae faapefea pe afai o tatou e sa’o ae sese i latou? Pe le tatau ea ona tatou faalauaiteleina ina ia aua ai nei faamasinoina i tatou e isi faapea o tatou ua sese? Sa matua faamanino mai e le Alii i Lana aoaoga e faatatau i lenei faafitauli. E le o se tatou matafaioi le faamasino. E le o se tatou matafaioi le fuaina o le fasilaau, aua e faalavelave tele le utupoto o loo i o tatou mata ma le mafai ai ona tatou iloa atu se mea. E le faapea a manifinifi le panikeke ona tasi ai lea o sona itu. E manaomia lava le manatu alofa i le vaega lea, o le meaalofa e lagona ai faalogona o isi ma malamalama ai i mea e oo i ai isi. O le manatu alofa o le taunuuga moni lava o le alofa mama. Na te faaosofiaina ma faalautele lo tatou gafatia e auauna atu ai. O le manatu alofa e le o le faanoanoa, ae o le malamalama ma le ano atu i ai. O le faavae lea o le faigauo moni. O le manatu alofa e tau atu i le faaaloalo ma tatala ai le faitotoa e aoao atu ai ma aoao mai ai foi. E malamalama lelei le Ituaiga o Initia i vaega tutotonu o Amerika [Sioux Indians], i lenei mataupu faavae maoae pe a latou tatalo. “Le Agaga Sili e, fesoasoani mai ina ia aua lava nei ou faamasino atu i se tasi seia atoa le lua vaiaso o o’u savali i ona seevae [pe seia ou malamalama lelei i ai].”

O le a la le mea e tatau ona tatou faia i ie palapala? O le faagasologa e amata lava i le salamo. E tu le Faaola i le faitotoa ma tuitui; ua saunia o Ia e talia i tatou i le taimi nei lava.¹² O la tatou matafaioi o le faia lea o le galuega o le salamo. E tatau ona tatou lafoai a tatou agasala ina ia mafai ona amata ona faamama. Ua folafola mai le Alii o le a Ia faasinasinaina o tatou ofu i Lona toto.¹³ Na Ia ofoina atu Lona soifua ma sa puapuagatia ona o a tatou agasala uma. E mafai ona Ia togiolaina i tatou mai lo tatou lava pau. O le Togiola a le Faaola, na foaiina atu ai Ia lava e fai ma togiola o a tatou agasala, ua Ia faatagaina ai le Agaga Paia e faamama i tatou i se papatisoga i le afi. Pe a afio le Agaga Paia ia i tatou, o le i ai o Lona mana faamama e tafi ese ai le eleelea o agasala. O le taimi lava e faia ai le tautinoga, ona amata ai loa lea o le faamamaaga.

E amata la tatou tautinoga i le Alii i lo tatou tulimatai atu lea ia te Ia. Sa matou i ai talu ai nei i se konafesi faalesiteki i Navu, i Ilinoi. Sa maoae musika a le aufaipese. O le taitai o le aufaipese, o se polofesa o mea tau musika ma e faiaoga i se iunivesite i lea aai, sa matua maoae lona faatosina maia o le aufaipese faapea le faapotopotoga. Soo se gaoioiga lava o lona tino sa matua fetaui lelei ma le musika. Sa matou mananao e tutusa lelei le matou pepese ma lana fuataimi. Sa vaai uma atu tagata ia te ia. Sa ou mafaufau i le Faaola. Sa Ia poloaiina i tatou ina ia faapei foi o Ia. Afai tatou te gauai atu atoatoa ia te ia e faapei ona matou gauai atu ia Uso Nelson [lea sa taimia le pese], o le a vave ona tatou liua i foliga o le Faaola.

O le tulaga liua sa matou i ai a o pepese, e na o sina taimi. Sa matou i ai i le mea sa tatau ona matou i ai ma sa taufai naunau tagata uma e mulimuli ai. Afai tatou te i ai i le mea e tatau ona tatou i ai, ma le faanaunauga faamaoni e mulimuli i le Alii, o le a Ia pa’i mai i o tatou olaga ma faamama i tatou ina ia mafai ai ona tatou nonofo tumau ai i Lona afioaga. Sa leai se tau faamalosi mai o le taitai pese ia matou pepese, na otometi lava ona pipii atu i ai. O le salamo moni e oo mai faatasi ma lena pipii atu i le Faaola. Ia tatou manatu i a tatou tatalo faaletagata ma mafaufauga i aso taitasi. E tatau ona tatou taufai galulue ina ia faia lena fesootaiga o loo finagalo ai le Alii.

Sa ou fesili ia Uso Nelson pe na mafai faapefea ona ia faatosinaina matou. Sa tali mai o ia ma le lotomaualalo, “Aua e mama o latou loto.”

“O le a ma se isi mea?” sa ou fesili ai.

Sa ia tali mai, “O le agaga, na pau lava lena o le ala e mafai ai ona tatou fesootai i le tulaga lena.”

O fea la e tatau ona tatou tulimata’ia? “Afai foi tou te manatu tasi i lo’u mamalu, o le a faatumuina o outou tino atoatoa i le malamalama, o le a leai foi se pouliuli ia te outou; o le tino foi ua faatumuina i le malamalama e malamalama i mea uma.”¹⁴ E mafai ona tupu lena mea pe afai tatou te tauaveina le matafaioi mo a tatou ie palapala e ala i le salamo ma ia mautinoa ua mama.

Ia tatou olioli i le folafolaga a le Faaola e ala mai ia Moronae ina ia “tulai … ma ofu i ou ofu matagofie … O mai ia Keriso … ma alolofa atu i le Atua ma lo outou loto atoa, ma o outou manatu, ma lo outou malosi uma … ina ia faaatoatoaina outou ia Keriso … ona o le faamaligiina o le toto, o Keriso, o lo le feagaiga lea o le Tama, e iu i le faamagaloina o a outou agasala, ina ia liua outou ina ia paia ma le le pona.”¹⁵ I le suafa o Iesu Keriso, amene.