O Le Alii Lou Atua O Le A Taofimauina Lou Lima

Elder W. Craig Zwick

O Le Au Fitugafulu

Afai o le a tatou… . savavali faatasi ma Ia i Ona ala, o le a tatou faaauau pea i luma ma le faatuatua ona le lagonaina ai lea o le tuulafoaiina.

Ua i foliga ma loto o le toatele o tagata o le lalolagi i le aso, ia faamaoniga o le le mautonu, popole ma le leai o se faamoemoe. O le tele o le le mautonu o le lalolagi ua faasolosolo malie mai lava i totonu o o tatou aiga ma o tatou lava olaga. E tusa lava pe o le a lo tatou matutua po o tulaga foi e i ai, ae e tatau ona tatou silafia uma, ua ia i tatou le mana i le aso, ma le faamoemoe i le lumanai.

Faafofoga foi i upu a Mamona: “Tou te le iloa ea o loo i ai outou i aao o le Atua? Tou te le iloa ea o loo ia te ia le mana uma?” (Mamona 5:23).

O lima o se tasi lea o vaega o le tino e i ai ona uiga faafaatusa. I Eperu, o le upu yad, o le upu faaaoga soo lea mo “lima” e faaaogaina foi faafaatusa e faauigaina i le mana, malosi, ma le loto (tagai William Wilson, Old Testament Word Studies [1978], 205). O lea la, o lima ua faatusaina i le mana ma le malosi.

O le aao faaloaloa [o le faauo ma le fesoasoani] o lo tatou perofeta soifua, o Peresitene Gordon B. Hinckley, ua faamalolosia, siitia ma musuia ai tagata uma o le lalolagi atoa.

O le i ai i aao o le Atua e tau mai ai e le gata ina tatou i ai i Lana puipuiga mataalia, ae ua faapea foi ona leoleoina ma puipuia i tatou e Lona mana ofoofogia.

O tusitusiga paia uma, o loo ta’ua ai le aao o le Atua. O loo faaalia ai pea lava pea Lana fesoasoani paia. O Ona aao mamana na foafoaina ai lalolagi, ae e malu foi ma o lea na faamanuiaina ai tamaiti laiti.

Mafaufau i upu a Ioane i lona faamatalaina o le Faaola toetu ma le mamalu: “Ua ou iloa atu ia te Ia, a ua faaee mai lona lima taumatau i luga ia te au, ua faapea mai ia te au, Aua e te fefe; … O Au le ola nei lava, sa ou oti; faauta foi, ou te ola e faavavau faavavau lava” (Faaaliga 1:17–18). Pe a Ia faaee mai Lona aao i o tatou luga, e mafai ona tatou ola ia te Ia, e pei foi o Ioane.

O le luasefulu fa o tausaga ua mavae, na tauivi ai lo ma atalii pepe meamea ma tino mosimosi mo lona ola i le potu o ma’i tigaina i se falemai. Sa lei atoatoa ona malolosi ona mama ona na vave fanau mai o ia ae lei oo i le masina faamoemoeina, ma na matuai faigata tele ona ia manavaina se ea. Sa lamo’imoī lava o ia, ae na matuai finafinau lava ia ola. I le avea ai ma ni matua talavou ma le le lava o se poto masani, na ma tatalo ai ma lou toalua lototele ma le faatuatua o Jan, ina ia mafai ona aapa mai le aao o le Alii ma fesoasoani mai i la ma tama, ma ia faaauau pea ona manava. Ao ou tuuina ou lima tetete i le avanoa o le moega tioata, na ou lagona lou le atoatoa ma lou vaivai. Na ou uuina le lima mosimosi ae atoatoa o lo’u atalii, ma na i ai se sootaga mamana faaleagaga o le a le mafai ona ou faagaloina. E tai lua ou tamatamailima mai ou lima na lilofia ai si ona tamai ulu ao ou faamanuiaina o ia.

Na matuai o ma mananao lava ia te ia, ae na ma iloa o lona iuga na i ai lea i aao o le Alii, ae le o i matou po o fomai foi na togafitia o ia. Ma o iina na ou iloa ai ma le lotomaualalo, sa i ai i ou lima tetete le pule ma le mana e sili atu nai lo ou lava lima. O lou tamatamailima i luga o lona ulu na faatusaina i le tuuina mai o aao ma le mana o le Atua i luga o le ma tama. Ina ua mavae lena faamanuiaga, i se taimi o le filemu faalelagona, na ou tilotilo atu ao vaavaai mai lau soa e faavavau ia te au mai le isi itu o le moega tioata, ma lagonaina le agaga o le faamoemoe faafouina ma le mafanafana, lea e oo mai i le faatuatua i le Alii o Iesu Keriso ma le taua i le tagata lava ia o Lana Togiola. O se molimau mamana lea o Lona alofa mo se atalii pepe meamea o le na faatoa tuua lava Lona afioaga. O lea na ma saunia lelei ai e talia Lona finagalo mo le ma tama. Na ma lagonaina moni lava na tuuina atu o ma lima i aao o le Faaola. Na pei ai lava na tuuina mai e aao o le Faaola lava ia le fesoasoani sa sili ona manaomia e manava ai, na mafai ai e le ma tama ona manava ma ai. Sa ma tuuina atu le tatalo faafetai mo ona manavaga taitasi ma le faasolosolo malie mai o lona malosi. O le aso, o le ma tama tino malosi ma ona matua nofo aitalafu, e saga faafetai ona o aao fesoasoani a le Faaola.

Faatasi ai ma folafolaga paia o le toetu mai i le taeao o le Uluai Toetu ma mautofi ai i “nofoalii, malo, ma itumalo sili ma pulega” o folafolaga faaopoopo ia o le “loloto ma le maualuga uma” (MFF 132:19). O le ala sili o le fiafia e aofia ai se olaga e pei o se tietiega fepiopioai o taimi faigata faatasi ai ma taimi sili ona fiafia. Ioe, e tofu uma lava i tatou ma taimi faigata ma faanoanoaga. E i ai taimi e matuai faigata tele ai [faafitauli] mo i tatou ma na o le pau le mea tatou te manao i ai o le faamaamulu ese. E i ai taimi e tautevateva ai la tatou savali, pe a tatou lagonaina le lotovaivai ma manaomia tele ai le fesoasoani.

Na faamanatu mai e Elder Holland ia i tatou e faapea o le “faatusa o le ipu oona lea e le mafai ona aloese mai ai, o se tofotofoga e oo mai i o tatou olaga faapea foi ma le soifuaga [o le Faaola]. E oo mai le tofotofoga i se mea itiiti, i se tulaga faatauvaa, ae e oo mai i le tele o taimi ina ia aoaoina ai i tatou, e tatau ona tatou usiusitai” (Trusting Jesus, [2003], 42).

O i tatou uma e tatau ona tatou iloa e mafai ona tatou tumau pea i le malosi o le Alii. E mafai ona tuu o tatou lima i Lona aao ma o le a tatou lagonaina Lona mana fesoasoani e mafai ai ona tatou ausia mea e le mafai ona tatou ausia na o i tatou.

Ina ua aumaia e se tama mafatia lona atalii ma’i tigaina ia Iesu, na tusia e Mareko e faapea, “Ao Iesu ua tago ifo ia i lona lima, ma faatu ia te ia; ona tulai lea o ia” (Mareko 9:27).

E tatau ona tatou faatuatua ia Ieova. Afai tatou te ofoina atu i tatou lava ia te Ia, o le a faamamaina a tatou avega, ma o le a faamafanafanaina o tatou loto.

Talu ai nei lava na fautua mai ai Elder Scott: “Ia faalagolago i le Atua … e tusa lava pe o le a le faigata o se tulaga e i ai. O le toafilemu o lou mafaufau, o lou mautinoa lea o tali i faafitauli faigata, o lou fiafia sili e faamoemoe i lou faalagolago atu i le Tama Faalelagi ma Lona Alo, o Iesu Keriso” (“O le Mana Fesoasoani o le Faatuatua i Taimi o le Le Mautonu ma Tofotofoga,” Liahona, Me 2003, 76,78).

E faapefea ona tatou iloa ona faatuatuaina? E faapefea ona tatou iloa ona aapa atu o tatou lima ma fesootai atu i le filemu e maua mai i le Alii?

Na tuuina mai e le Alii le faatonuga manino ia Iosefa Samita e faapea: “Ia iloa au, ma faalogo i au upu; savali i le agamalu o lou Agaga ma o le a e maua le filemu ia te au… . Ia tatalo pea, o le a ou liligi atu lou Agaga i ou luga” (MFF 19:23, 38).

O ki nei e fa:

• Aoao

• Faalogo

• Saili mo le Agaga

• Tatalo e le aunoa

O le a tuuina mai e le Alii le tausiga ma le lagolago pe afai tatou te naunau e talia ma maua Lona aao fesoasoani faavavau.

Na faamanatu mai ia i tatou e Peresitene Thomas S. Monson le aao laveai o le Faaola: “Tatou te viia le aao faaola—o le aao lea o Iesu Keriso, le Alo o le Atua… . O le aao lea sa tuitui mai i le faitotoa o lo tatou malamalama” (“O Lima,” Liahona, Mati 1991, 6).

Talu ai nei lava na sauni ai le ma tama teine ma lona toalua e tafafao na o i la’ua. Sa pisi solo i le taumafaiga e saunia mea uma ma tuuina atu ni faatonuga mulimuli i le tausi tama. La te lei iloaina ia foliga faanoanoa o se tasi o le fanau, ma loimata na i mata o se tasi, seia oo i le taimi na la tutu ai i le faitotoa, ua sauni e o ese atu. Sa la iloaina, sa popole le fanau i le o ese mai o lo latou tina ma tama mai ia i latou. Ona la faapotopotoina mai lea o le la fanau pele e toafa. Na faapea atu lo latou tama e tuu mai uma i luma o latou lima. Na faalala mai uma ia lima laiti e valu. Ona sogi atu lea o Tina ma Tama i ia lima taitasi ma faapea atu, a latou misia i laua, pe fefefe foi, pe mananao foi e lagona lo laua alofa, e mafai ona tuu o latou lima i luga o o latou alafau ma o le a mafai ai ona latou lagonaina le i ai o Tina ma Tama i soo se taimi lava. Sa matuai fiafia lava i latou, ma ina ua o ese atu lou afafine ma lona toalua, sa la vaaia ni tamaiti laiti se toafa, o tutu mai i le faamalama faatasi ma ni foliga fiafia ma lima i o latou alafau.

Sa latou faatuatuaina o latou matua. Sa latou iloa e alofaina i latou.

E pei lava foi ona i ai le faatuatuaga o fanau laiti, e tatau foi ia i tatou taitoatasi ona i ai lena lava faatuatuaga atoa pei o se tamaitiiti. E tatau ia i tatou uma ona manatua, o i tatou o atalii ma afafine o le Atua ma e alofa tele o Ia ia i tatou. Afai tatou te malamalama lelei po o ai i tatou, o le a tatou maua se faapogai mautinoa o le faamoemoe ma le toafilemu.

E le mafai ona tatou faamaeaina “le ala tanu o i o tatou luma” (Eperu 12:1) pe a le tuuina o tatou lima i aao o le Alii.

O ni nai tausaga ua mavae, na tonu ai i le ma tama teine e toatasi e tauva i se malafoni. Sa koleni ma galue malosi o ia faatasi ma nisi o ana uo. Sa faigata le tuuga ma na i ai taimi na manao ai e faamaamulu ese. Ae sa taumafai pea o ia ina ia taulai atu i se laasaga se tasi i le taimi. Ao latalata atu o ia i le ogatotonu o le ala, sa ia faalogo atu o alaga mai se tagata mai ona tua, “Vaai le tamaloa tauaso o loo i lou itu agavale.”

E liliu atu lona ulu, ae iloa atu se tamaloa tauaso ua muamua atu ia te ia, ma o loo uuina le lima o se isi tamaloa. Sa taufetuli uma i laua i le tuuga. Ao la pasi atu, sa mafai ona ia iloa atu le mau o le uuina e le tauaso o le lima o lana uo.

I le lofituina i ona lava tiga faaletino, na faamalosia ai o ia ao ia vaaia nei alii e toalua o taufetuli faatasi atu. Na faamalosia le alii na pupula e lana uo tauaso, ae na faalagolago le alii tauaso i lana fesootaiga ma le lima o lana uo. Na iloa e le ma tama teine, e le mafai e le tamaloa tauaso ona faamaeaina le tuuga na o ia. Sa uunaia o ia i le faatuatua o le tamaloa tauaso ma le alofa faamaoni o lana uo.

E faapena foi le ala, o loo faaloaloa mai ai e le Faaola Lona aao ia i tatou taitoatasi, ina ia aua nei o tatou taufetuli na o i tatou. “Mo i [tatou] o e fai ma tautevateva pe lavea [mai lea taimi i lea taimi], o loo i ai o Ia iina e taofiofi ma faamalosi mai ia [i tatou]” (Trusting Jesus, 43). Ao tatou latalata atu i le iuga, o le a i ai o Ia iina e laveai i tatou; ma o nei mea uma, ua Ia tuuina mai ai Lona soifua.

Mafaufau i manua o Ona aao. O Ona aao atamamai, ioe, o Ona lava aao na faamanualia ma le taulaga i la le tino, ua maua ai e o tatou lava lima le mana ma le taitaiga e sili atu.

O le Keriso na faamanualia o [Ia] na te taitaiina i tatou i o tatou taimi o faigata. O Ia lea o le na te siiina ae i tatou pe a tatou manaomia le tele o se ea e manavaina po o ni faatonuga e mulimuli ai, pe o ni lototoa se tele e faaauau ai.

Afai o le a tatou tausia poloaiga a le Atua ma savavali faatasi ma Ia i Ona ala, o le a tatou faaauau pea i luma ma le faatuatua ma lē lagonaina ai le tuulafoaiina.

Ia faatuatua i Lana folafolaga o le ola faavavau ma ia faatagaina le filemu ma le faamoemoe ia tumau i ou luga.

Pe a tatou fesootai atu i le Faapogai o le Filemu ma Lona alofa atoatoa ma togiolaina, ona mafai lea ona tatou iloa le moni o le folafolaga a le Alii: “O Au o Ieova lou Atua, o le ua taofi lou lima taumatau, o le ua fai atu … , Aua e te fefe; o au ou te fesoasoani ia te oe” (Isaia 41:13).

Ou te molimau atu ia Iesu Keriso, o lo tatou Togiola ma le Faaola soifua.

Ou te molimau atu o loo soifua o Ia ma o loo faaloaloa mai Lona aao alofa ia i tatou taitoatasi. I le suafa o Iesu Keriso, amene.