O Le Mea Lea, Ina Filifili Ia E Outou O Keriso Le Alii
Afai e filifili se tamaitai e tuu Keriso i le totonugalemu o lona loto, ua ia aumaia le Alii i le totonugalemu o lona fale ma le aiga.
Uso e, o se aoaoga faavae mamalu ia te au le faapea e mafai ona tatou filifili e tuuina atu o tatou loto atoa ia Keriso—e mafai ona tatou filifili e tuu i le totonugalemu o o tatou loto ia le Faaola ma le Togiola. E mafai ona tusia i totonu o i tatou taitoatasi le talalelei toefuataiina a Iesu Keriso “ua le tusia i le vaitusi, ao le Agaga o le Atua soifua; ua le tusia i papatusi maa, a o papatusi aano o le loto.”1 Sa tatou filifili e mulimuli ia Keriso i lo tatou uluai tofi. O se tala fiafia tele le mafai ona tatou filifilia o Ia i aso taitasi i la tatou malologa i luga o le fogaeleele.
I le avea ai ma ni tamaitai ua osi feagaiga ua aumau i le tele o atunuu, e taua tele le i ai o Keriso i le totonugalemu o o tatou olaga. O “taimi matautia nei,”2 tatou te matuai manaomia ai lava o Ia! O Ia o le faapogai o le malosi ma le saogalemu. O Ia o le malamalama. O Ia o le ola. O Lona manuia ” o loo silisili lava i mea uma e manatu i ai.”3 Ona o Ia o lo tatou Faaola ma le Togiola, o Ona aao faaloaloa foi ua valaauliaina ai i tatou taitoatasi, ina ia tatou “o mai ia te Ia”4 i ni auala e sili ona patino i le tagata lava ia. Uso e, afai e talia e se tamaitai le valaaulia a le Faaola, o le a faamalosia ai o ia lava, ma faamanuiaina ai isi e ala i ona aafiaga amiotonu.
Ou te talitonu afai e filifili se tamaitai e tuu Keriso i le totonugalemu o lona lava loto, i le ogatotonu o lona lava lalolagi, ua ia aumaia le Alii i le totonugalemu o lona fale ma le aiga, e tusa lava pe o se aiga toatasi po o se aiga toatele. Po o fea lava e nofo ai o ia, ma po o le a lava foi lona tulaga, talu ai ona o ia o le fatu o le fale ma le aiga, ma e atagia mai i le siosiomaga ma le agaga o lona aiga, le mea o loo i loto o tamaitai taitoatasi.
Ao ou i ai i se tofiga i Iapani, na valaaulia i matou e se taitai o le Ekalesia i lona aiga. Sa faamamaluina i matou i le mauaina o lenei avanoa, ae na matou mafaufau pe o le a se manatu o lona faletua i le faafuasei o le tonu a lona toalua o le a o atu ni tagata asiasi mai le Aai o Sate Leki i lona aiga. Ao matou agai atu i lona fale, na telefoni atu le alii i lona faletua, ma na foliga mai pe tusa na o le sefululima minute na tuu atu ia te ia e sauni ai mo lenei asiasiga faafuasei.
O le taimi lava na matou tuvae ai i luma o le faitotoa, ma talai o matou seevae, ma faafeiloaia i matou ma le faaaloalo e se uso talavou o le Aualofa, e tamalii lana talanoa mai, na faapea ona ou lagonaina ai se agaga o le faatulagaina lelei, filemu ma le alofa. Na taufetuli ese atu tamaiti laiti ma ave a latou meataalo i le fogafale i luga. I totonu o lenei aiga e toavalu, e toafitu o loo nonofo pea i le fale, na manino ai lava le mea sa faatauaina e le aiga. Sa siomia totonu o le fale i faamaoniga o loo i ai le Alii—o ata o le Faaola i luga o le puipui, o se ata o le auaiga ma se ata o le malumalu na i ai i se tulaga e iloa gofie atu ai, o kopi o tusitusiga paia ua faaaogaina lelei ma ata vitio o le Ekalesia, na faaputu lelei i se fata lata ane. Na foliga mai na i ai i totonu o lena fale ia “fua o le Agaga, … o le alofa, o le olioli, o le filemu, … o le mataalofa, o le agalelei, o le faamaoni.”5 Na ou vaai faalemafaufau i le tamai potu ua faatumulia i tamaiti o soo se matutua, ao nonofo faatasi ai ma matua e siomia se laulau maualalo e “tautalatala ia Keriso, … olioli ia Keriso, … talai atu Keriso, … vavalo atu foi ia Keriso … ina ia iloa e a [latou] fanau le mea latou te faamoemoe i ai mo le faamagaloina o a latou agasala.”6 Sa ou mateiaina le tali o le a tuuina atu e tamaiti o lenei aiga i le fesili na tuuina mai e Elder Jeffrey R. Holland, “Pe ua iloa e a [tatou] fanau tatou te alolofa i le Atua ma o tatou loto atoa ma ua loa ona tatou fia vaai i fofoga—ma faapauu i aao—o Lona Alo Pele e Toatasi?”7 Ou te talitonu o le tali o lena fesili i totonu o lenei aiga Iapani o se ioe malosi!
Afai e filifili se tamaitai e tuu Keriso i le totonugalemu o lona loto, ua filifili o ia e le gata ia faataitai i amioga faaKeriso i aso taitasi ae faapea foi ona aoao lona aiga e faia foi faapea. Ma e pei ona outou silafia, uso pele, o totonu o lena aga o le faataitai i aso taitasi o amioga faaKeriso, e oo mai ai nisi o luitau sili ona maoae ia i tatou.
Na taumafai malosi se tasi o tina e aoao atu ia laasaga o le salamo i totonu o lona aiga. Ona oo mai ai lea o le aso sa ia fesoasoani atu ai i lana tama tama e lima tausaga e faaaoga ia mataupu faavae o le salamo mo ia lava, ina ua la o atu ma ia i le faleoloa e faailoa i ai le lole sa ia gaoia. O lena aafiaga o se mea o le a le mafai ona galo i le tamaitiiti. Sa ia iloa mo ia lava, ia taunuuga o ana amioga. Faatasi ai ma le popole o lona loto, na ia toe faafoi atu ai le lole, ma tuuina atu se faatoesega i le pule o le faleoloa, ma folafola atu o le a ia le toe gaoi lava. Ou te fiafia lava e lipoti atu e faapea, sa ia tausia lena folafolaga. Ua ou iloa—aua o au o le tina lena, ma o lou atalii o le tamaitiiti lima tausaga lea.
O aafiaga faapena e oo mai i totonu o aiga taitasi, e ui lava i lo tatou galulue malosi e puipui a tatou fanau pele, fanau o fanau, fanau a o tatou uso ma tuagane, i totonu o le talalelei. O le “O Loo O’u Taumafai e Avea e Pei o Iesu”8 e manaomia lava ona faataitai e ola ai, ona avea ai lea ma amioga. O le filifili e avea Keriso ma totonugalemu o o tatou loto, o le a fesoasoani ia i tatou i le tele o auala, ao tatou taumafai e aoao atu i isi ina ia tuu le Alii i totonu o o latou loto. O nisi taimi tatou te lagona ai tatou te le o alualu i luma, ae i na aso o le lotovaivai, ou te manatuaina ai fetalaiga faamafanafana a le Faaola: “O lea, aua nei loto vaivai i le faia o mea lelei, aua o loo oulua faataatiaina le faavae o le galuega tele.”9
Ao tatou filifilia lena vaega lelei ma tuu le Faaola i le totonugalemu o o tatou olaga e ala i le tatalo i aso uma mo Lana taitaiga ma le fesoasoaniga, o le a tuuina mai e le Atua ia i tatou “le mana ma le poto.”10 Ua faamanuiaina i tatou i ni malamalama faaleagaga e mafai ona puipuia ai o tatou aiga. Ina ua faafuasei ona leai se galuega a Doug, o se tama o se fanau laiti e toatolu, o tupe mai le malo faatasi ai ma la latou teugatupe itiiti ma nisi o fesoasoani mai lo latou aiga lautele, o mea ia na tausi ai lo latou aiga. Na taumafai lona toalua o Lori e fesoasoani e ala lea i lo la tau fai faigaluega i ni galuega le tumau e fesoasoani ai i le totogiina o mea na latou manaomia. Sa faaauau pea ona latou faia mea tonu uma—o le tatalo, faitau tusitusiga paia, auai atu i le malumalu, ma totogi sefuluai. Ae peitai, e ui lava i le fia selau o tusi faamaonia, ae na laiti lava ni faatalanoaga mo galuega ma na leai foi se galuega na maua.
O se tasi aso i le toeitiiti atoa le ono masina o tau saili se galuega, na telefoni atu ai Lori i lona tina. Na ia faapea atu ma le tagi faatasi ma sina ita i lona leo, “Ailoga o faafofoga mai le Tama Faalelagi ia i matou. Ailoga a mafai ona ou toe tatalo. E leai lava se aoga.”
I le taimi o lena talanoaga i le telefoni, na oo ifo ai ni upu ma ni mafaufauga musuia i le tina o Lori, ao ia tuuina atu lana molimau ma faamanatu atu i lana tama teine ia mea ua uma ona ia iloa. “Lori, ua e iloa lelei lava. Ua e iloa e alofa le Tama Faalelagi ia te oe, ma o loo Ia silafia ou manaoga. Ae o nisi taimi, e tatau ai ona e faatali. E masalo o lau afi lenei a le tunu auro. Ou te le iloa. Ae o le mea lenei ou te iloa: E tatau ona e alu nei lava i lou potu moe, ma tootuli ai ma tatalo, ma talosaga atu i le Alii ina ia faamafanafana mai ia te oe ma tuuina mai ia te oe le toafilemu. O le a maua se galuega a Doug, ae atonu o le a umi sina taimi e faatali ai. Ia manatua i latou uma o e e alolofa ia te oe ma i latou o loo tatalo mo oe, ma i latou o loo fesoasoani atu ia te oe. O oe o se tagata faamanuiaina tele.”
O le mea na iloa e Lori e faapea, ina ua tootuli o ia ma tatalo—talu ai ona sa taulai atu ona manatu i le Alii—sa ia toe faatonutonuina ona manatu. Sa ia aumaia le alofa o le Faaola i totonu o lona lava olaga ma totonu o lona aiga.
Uso pele e, e masani ona ou lagonaina le alofa o le Alii i lou olaga. I aso lagilelei faapea ma aso na matuai ou lagonaina ai ou te le gafatia ia luitau sa i ou luma, sa ou liliu atu ai i le Atua mo se fesoasoani. Ou te molimau atu e i ai lava o Ia iina i taimi uma, o Ona aao agalelei ma le alofa o loo faaloaloa mai ia te au ma oe. Ou te tautino atu ma lou loto atoa, o Iesu Keriso o lou malosi. O Ia o lou faamoemoe. O Ia o lou Faaola ma le Togiola. Ou te faapea atu faatasi ma outou, “A o au nei ma lou aiga, matou te auauna ia Ieova.”11 I le suafa o Iesu Keriso, amene.