Au Paia I Hyderabad, Initia
O le aai ua 400 tausaga le matua o Hyderabad, Initia, o se aai pisi tele, ma e tusa ma le 4.2 miliona lona faitau aofai. I totonu o lenei aai, e fefiloi ai fale tuai ma le faatupulaia o galuega atiae, ma o i latou foi e i ai i le aai, latou te faalogoina le tele o gagana a Initia.
O le gagana aloaia lava o le Hindi, e faaaogaina e le 30 pasene o tagata. O le Igilisi o le gagana aloaia lea e vaavaalua [ma le Hindi], ma e faaaoga tele mo aoga maualuluga atu, o le malo, ma pisinisi. Ua maea ona faaliliuina le Tusi a Mamona i le gagana Hindi, ma le Telugu, ma ua maea foi ona faaliliuina nisi o vaega filifilia o le tusi i le gagana Bengali, ma le Tamil. E le gata i lea, e le itiiti ifo i le 300 gagana o loo iloa i totonu o Initia, ae tasi lava le gagana e laugatasia ai tagata uma—o le gagana lea a le Agaga.
Mai lava i ni amataga faatauvaa o le Ekalesia i Initia i le 1850, ae ua tuputupu ae nei le Ekalesia ma ua tolu ai itu faatasi ma paranesi e 22, i lenei atunuu e mafuli i le Hindu. O le uluai falelotu o le a fausia i le aai o Hyderabad, o se totonugalemu o le faasaienisi ma tekinolosi i saute tutotonu o Initia, o le a faamaeaina i le masina o Tesema 2003.
“O se miti ua taunuu,” o le tala lea a Gundey Solomon Israel, o se alii ua 18 ona tausaga, ma e valaau o ia i lona faaiu. “O le mamanu lava ia o le falelotu ou te lagona ai le Agaga. Ou te faafetai lava i lo’u Tama i le Lagi ona ua tali mai i a’u tatalo.”
O le maea ai o le falelotu, o le a maua ai e tagata o le Ekalesia ma tagata sailiili [i le Ekalesia] i totonu o Hyderabad se fale matagofie e feiloai ai ma lagonaina ai le gagana a le Agaga a o pa’i atu i o latou loto, e faapei foi ona oo ia Israel i le tolu tausaga talu ai.
“Ina ua ou faatoa sau i le lotu, sa ou ofo ina ua ou vaaia le alofa o le Au Paia. E ese lo latou fiafia. Sa mafai ona ou vaaia le susulu o le talalelei i o latou foliga,” sa toe manatua ai e Israel.
E faapei foi o Israel, sa manatua foi e Madhu Bunga ua 17 tausaga le matua, le uluai taimi sa auai atu ai o ia i le sauniga a le Ekalesia ma ia lagonaina ai le Agaga.
“Sa ou fiafia lava ina ua ou vaaia le tele naua o tagata fou o o mai ma nonofo i o’u tafatafa ma talanoa mai ia te au e uiga i lo’u olaga,” o le tala lea a Madhu, sa faatoa auai i se sauniga a le Ekalesia i le masina o Tesema 2002. “Sa ou maofa i le auala sa aoao mai ai e tagata ma taumafai e malamalama e ala i le Agaga. Sa ou fiafia lava i ai, ma sa ou tamoe i le matou fale, ma ou mafaufau ua i o’u lima le lalolagi atoa.”
E tausia e Madhu ma isi au paia talavou o le Ekalesia ia le Agaga i o latou olaga e ala i lo latou auai atu i le lotu ma le seminare, ma le auai i galuega faatino e auauna atu ai i le nuu.
“E na o au le tagata o le Ekalesia i lo’u aiga,” o le tala lea a Madhu. “Ina ia ou malosi i le talalelei, o lea ou te toaga ai lava i le seminare. E tele a matou galuega faatino e auauna atu ai, e pei o le matou o i se nofoaga mo tagata e manaomia le fesoasoani, e faiaoga ai i tamaiti i le Igilisi, o tala malie, ma taaloga. Sa matou o ma alii ma tamaitai talavou i se falemai o le malo e vali ia puipui, ma sa matou fesoasoani foi i tagata o le Ekalesia ina ua siitia i isi nofoaga.”
Sa matauina foi e Joseph Cornelius, le peresitene o le Paranesi Muamua a Hyderabad, le taua o le auauna atu ma le auai i sauniga a le Ekalesia ina ia maua ai le Agaga.
“E taitasi i le tausaga ona faia e le au paia ni galuega faatino fesoasoani e ao mai ai lavalava mo tamaiti ua matuaoti,” o le tala lea a Peresitene Cornelius. “Matou te auai i sauniga uma ma gaoioiga a le Ekalesia. E fai a matou tatalo faaleaiga ma afiafi faaleaiga.”
Talu ai nei, sa aoina ai e le au paia mai Paranesi Muamua ma le Lua a Hyderabad ia ni lavalava tuai ma sa latou faatauina ni araisa ma sirio e avatu i se fale e nonofo ai tamaiti e leai ni aiga. O tagata latou te faafoeina lea fale, e o i se nofoaga e faatali ai nofoaafi i lena vaega o le atunuu, ma sue mai ai tamaiti e nonofo ai iina, ma aumai ina ia maua se nofoaga e momoe ai. E saunia ai foi aoga ma fesoasoaniga faufautua mo i latou i lena fale.
Ina ua taunuu atu tagata o le Ekalesia i le fale lea, sa faafeiloaia lelei i latou. Ina ua maea se taimi umi sa talatalanoa ai ma taaalo ma talie, sa sanipepa atoa loa e le au paia ia puipui o le fale, aua ua matua moomia lava ona lipea. Sa ofo mai e nisi ia vali ma faaaoga loa ma ua mama ai ma matagofie le fale.
Pe o ni galuega faatino fesoasoani po o ni talatalanoaga faauo i le talalelei, e tumau pea lava ona musuia le toatele i le talalelei i Hyderabad. E ui lava ina lemu, ae e manino lava le gagana a le Agaga, ma ua soofaatasi ai le Au Paia i se tasi o atunuu e aupito feoma’i i le lalolagi.