O Le Alaga Leotele ma le Manino a le Au Perofeta
O le au perofeta ma le au aposetolo o taiulu ia o lenei galuega i nei ona po, ao agai atu i luma i le lalolagi atoa.
A ou vaavaai atu i lenei potopotoga toatele, ona mafai ai lea ona ou iloa atu faalemafaufau e le gata o i latou o loo i totonu o le Fale Autu mo Konafesi, ae faapea foi ma outou o loo auai mai i lenei konafesi i falelotu ma aiga i le lalolagi atoa. E ui lava atonu pe o outou latalata mai pe mamao foi, ae matuai taua tele outou i le galuega a le Alii ma le faatuina o le Ekalesia i nofoaga ua outou aumau ai.
Ua fusia faatasi i tatou i lo tatou alolofa i le Atua, lo tatou Tama Faavavau. Tatou te faamamaluina Lona suafa faapea ma Lona Alo Pele e Toatasi, le Faaola o le lalolagi, o Iesu Keriso lea. O lenei konafesi, o le a fesootai mai ai ia i tatou—e ala i le mana o le Agaga Paia—ia lagona o le a faapea ona faateleina ai lo tatou faatuatua i le Tama ma le Alo ma lo tatou fiafia i mataupu faavae o le talalelei toefuataiina. Ma o na lagona o le a tatou latalata atu ai ia te i Laua, ao tatou lagonaina lo Laua faatasi mai i o tatou olaga ma tatou mananao ai ma o tatou loto atoa e iloa o Laua finagalo ma ia avea e faapei o i Laua.
O lau savali ma lau molimau ia te outou e faapea, o le au perofeta ma le au aposetolo o taiulu ia o lenei galuega i nei ona po, ao agai atu i luma i le lalolagi atoa. Na valaauina i latou e le Atua e ala i faaaliga. O i latou moni o ni perofeta, tagata vaai, ma tali faaaliga. E alofa le Alii ia i latou, ma i le avea ai ma ni tagata o le Ekalesia, tatou te faamamaluina i latou ma vaai atu ia i latou o ni auauna a le Atua soifua. O le alaga leotele ma le manino a le au perofeta, o loo matua manino lava i aso nei e pei foi ona sa i ai anamua, ma o le a faaauau pea ia molimau a le au perofeta seia oo atu i lena lava aso o le a faapea ona afio mai ai Iesu Keriso e nofo tupu ma le mamalu.
O loo tatou ola i taimi sili ona matagofie ae ua sili foi ona matautia. E foliga mai ua fai ifo le tulaga lelei o atunuu taitasi ma le lalolagi i lona tulaga lautele i vaega uma o le lalolagi. Ua tatou vaaia feteenaiga ma le feitagai i va o taitai ma malo, feteenaiga i le va o alalafaga, ma finauga i totonu o aiga. O le vaifofo i mea leaga o le lalolagi e maua lea i le iloa o aoaoga faavae ma aoaoga a le Alii o Iesu Keriso ma le faaaogaina o na mataupu faavae i olaga o tagata soifua uma. O mataupu faavae paia ma aoaoga sa aoaoina mai ma le manino e le au perofeta, e le gata i aso anamua ae faapea foi ona po nei, e pei ona musuia ai i latou e le Agaga Paia. Ao tatou faalogo atu i na upu moni, e fesootai mai i o tatou loto ma mafaufau e lena lava Agaga e tasi.
Pe a tatou mafaufau i le tiute o le au perofeta, e taua tele ona malamalama muamua, o perofeta ua valaauina e le Atua ma e molimau mai o Ia i le lalolagi i o latou valaauga. O le tusi o Aperaamo i aso anamua, o loo faamatalaina ai se mea na tupu i le muai olaga ina ua silasila atu le Atua i agaga sa Ia foafoaina: “Ma sa silasila atu le Atua i ia agaga ua lelei, ma sa ia tu i lo latou lotolotoi, ma faapea atu: O le a ou faia ia avea i latou nei ma au faipule; aua sa ia tu i le lotolotoi o i latou o e o ni agaga, ma sa ia silasila atu ua lelei i latou; ona ia fetalai mai lea ia te au: Aperaamo e, o oe lava o se tasi o i latou ia; na filifilia lava oe ae e te lei fanau mai” (Aperaamo 3:23).
O loo tusia foi e faatatau ia Samuelu, le perofeta o le Feagaiga Tuai, e faapea “Ua tupu Samuelu, sa ia te ia Ieova, ma ua le mafai ia te ia ona iu vale sina ana upu. Ua iloa e Isaraelu uma e pau mai ia Tanu e pau mai i Peresepa, ua faamaoni Samuelu e fai ma perofeta a Ieova” (1 Samuelu 3:19–20).
O loo tau mai i le Tusi a Mamona le fetalaiga a le Faaola i Amerika anamua, ina ua Ia faamamafaina le taua o valoaga a Isaia i le Feagaiga Tuai:
“O lenei, faauta, ou te fai atu ia te outou, e tatau ona outou sailiili i nei mea. Ioe, ou te tuuina atu le poloaiga ia te outou, ia outou sailiili ma le filiga i nei mea; aua ua matua sili upu a Isaia.
“Aua e moni na ia tautala mai e uiga i mea uma i lou nuu, o e o i le aiga o Isaraelu; …
“Ua taunuu mea uma na ia fai mai ai, a leai, e taunuu lava e tusa ma upu na ia fai mai ai… .
“… Ina sailia ia i le au perofeta, aua e toatele o i latou na molimau mai i nei mea“ (3 Nifae 23:1–3, 5).
Lona lua, o le tiute o le au perofeta o le aoao atu e uiga ia Keriso ma molimau atu i Lona paia ma Lana misiona. O Atamu, o le uluai perofeta, faatasi ma lana ava o Eva, na la faalogo i le siufofoga o le Alii ma amatalia ai le ālāfua mo tisipenisione o le a mulimuli mai. O loo tusia e faatatau i lena faamoemoega taua “Sa viia e Atamu le Atua i lena aso ma sa faatumuina o ia i le Agaga Paia, ma sa amata ona ia perofeta ane e uiga i aiga uma o le lalolagi, ua faapea atu: Ia viia le suafa o le Atua, aua ua pupula ou mata ona o lou solitulafono, ma o le a ou maua le olioli i le olaga nei, ma o le a ou toe vaai i le Atua i le tino.
“Ma sa faalogo Eva, le ava a Atamu, i ia mea uma ma sa ia fiafia, ma faapea atu: Ana le seanoa la ta solitulafono semanu ta te le maua ni fanau, ma le iloa foi le lelei mai le leaga, ma le olioli o le togiolaina o i taua, ma le ola faavavau e tuuina mai e le Atua ia i latou uma o e usiusitai.
“Ona viia lea e Atamu ma Eva o le suafa o le Atua, ma sa la faailoa atu ia mea uma i o la atalii ma afafine” (Mose 5:10–12).
O Helamana, o se perofeta o Amerika anamua, sa ia aoaoina ona atalii o Nifae ma Liae: “O lenei, ou atalii e, ia manatua, ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua; pe a faaoo mai e le tiapolo ana matagi tetele, ioe, o ana u fanafana i le asiosio, ioe, pe a pesi mai ia te oulua lana uatoa uma lava ma ana afa, e le malo ai ia te oulua e toso ifo ai oulua i le vanu o le puapuaga ma le auega e le gata, ona o le Papa ua atiina ae ai oulua, o le faavae mau lea, o le faavae foi lea afai e ati ae tagata i ona luga, e le mafai lava ona pauu i latou” (Helamana 5:12).
Atonu o le molimau aupito sili ona mamana e uiga i le Faaola i lenei tisipenisione na tuuina mai i le 1832 e le Perofeta o Iosefa Samita ma Sini Rikitone:
“O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!
“Aua na ma vaaia o ia, i le itu taumatau lava o le Atua; na ma faalogoina foi le siufofoga o molimau mai o ia lava lea o le Toatasi na Fanaua e le Tama—
“E mai ia te ia, ma ui mai ia te ia, ma o ia, na foafoaina ai lalolagi uma” (MFF 76:22–24).
O le uiga lona tolu o le au perofeta e faapea, o a latou aoaoga o loo tusitusia ma o loo aoao mai e perofeta ma faiaoga e sosoo mai ia i latou i tagata uma o le lalolagi. Na fetalai atu le Alii i le perofeta o Mose i le Feagaiga Tuai, “Ina sau ia oe i luga nei ia te au i le mauga, ma e nofo ai: ou te avatu ai ia te oe papamaa, ma le tulafono, ma poloaiga na ou tusia; e aoao ai ia te i latou” (Esoto 24:12).
Ua tuuina mai foi e perofeta soifua a le Alii i aso nei se molimau e tutusa lelei le malolosi ina ua latou molimau mai i le lalolagi i le 1995 i le paia o le tulaga o le faaipoipoga ma le aiga:
“O i matou, o le Au Peresitene Sili ma le Aufono a le Au Aposetolo e Toasefululua O Le Ekalesia a Iesu Keriso o le Au Paia o Aso e Gata Ai, matou te tautino atu ma le faamaoni, o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o fuafuaga a Le Foafoa, mo le taunuuga e faavavau o Lana fanau… .
“Matou te tautino atu o le ala ua foafoaina ai le ola faitino, ua faatuina i le finagalo paia. Matou te faamaonia le paia o le ola ma lona taua i le fuafuaga e faavavau a le Atua… .
“Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia le aiga o se iunite faavae o malo” (“O Le Aiga: O Se Folafolaga i le Lalolagi,” Liahona, Oke. 1998, 24).
I se taimi mulimuli ane, sa latou tuuina mai ai foi la latou molimau patino o ni Aposetolo a le Alii, i le misiona a Iesu Keriso:
“Matou te tautino atu i upu ma le faamaoni aiai, o Lona soifua, lea e totonugalemu i le talafaasolopito o tagata uma, e lei amataina i Peteleema pe faaiuina foi i luga o Kalevario. O Ia o le Ulumatua a le Tama, o le Alo Pele e Toatasi i la le tino, o le Faaola ia o le lalolagi… .
“Matou te tautino atu o le a i ai se aso e toe afio mai ai o Ia i le lalolagi… . O le a pule o Ia o le Tupu o Tupu ma nofotupu foi o le Alii o Alii, ma o le a tootutuli tulivae uma ma tapuai laulaufaiva uma ia te Ia. O le a tatou tutu atu taitoatasi ina ia faamasinoina e Ia e tusa ma a tatou galuega ma manaoga o o tatou loto” (“O Le Keriso Soifua: O Le Molimau a le Au Aposetolo,“ Liahona, Ape. 2000, 2–3).
O aoaoga faavae O le Ekalesia a Iesu Keriso o le Au Paia o Aso e Gata Ai, o lo latou aano moni lava, ua fuafuaina ina ia faailoa atu ai i loto o tagata faamaoni uma lava o lē e fesili atu i le Atua i le faatuatua mo se molimau patino e uiga i lo tatou Alii ma le Faaola ma le tiute o le au perofeta mai lava i le amataga o taimi e oo mai i lenei itula. Ou te molimau atu o le faasologa mai o le au perofeta na faaauau mai ia Iosefa Samita, o le uluai perofeta o lenei tisipenisione, e oo mai ia Gordon B. Hinckley, o le perofeta a le Alii i aso nei. Ou te molimau atu ai i lena mea. I le suafa o Iesu Keriso, amene.