Le Alii e, Ua Ou Faatuatua; Ia e Fesoasoani i Lo’u Le Faatuatua
O le faatuatua lea e lagolagoina ai i tatou e mafai ona avea ma faamafanafanaga sili i le olaga. E tatau ia i tatou uma ona mauaina ni a tatou lava molimau.
O lenei taeao ou te fia tuuina atu ai se molimau faamaualalo ia i latou uma o loo i ai ni tauiviga faaletagata ma ni masalosaloga i le paia o le misiona a Le Ekalesia a Iesu Keriso o le Au Paia o Aso e Gata Ai. O le toatele o i tatou e i ai taimi e pei ai o le tama lea na aioi atu i le Faaola ina ia faamaloloina lona atalii sa i ai le “agaga gugu.” Na alaga le tama o le tamaitiiti, “Le Alii e, ua ou faatuatua; ia e fesoasoani i lo’u le faatuatua.”1 O i latou uma o loo i ai ni masalosaloga ma ni tuufesili, o loo i ai ni auala e fesoasoani ai i lou le faatuatua. I le faagasologa o le taliaina ma le teenaina o faamatalaga i le sailia o le malamalama, upumoni, ma le atamai, e toetoe lava o tagata umale taimi nei po o se isi taimi—e i ai ni fesili e patino i le tagata lava ia. O se vaega lena o le faagasologa o le aoaoina.
O le faatuatua lea e lagolagoina ai i tatou e mafai ona avea ma faamafanafanaga sili i le olaga. E tatau ia i tatou uma ona mauaina ni a tatou lava molimau.
O se molimau e amata lea i le taliaina e ala i le faatuatua, o le misiona paia a Iesu Keriso, le faaao o lenei Ekalesia; faapea ma le perofeta o le Toefuataiga, o Iosefa Samita. O le talalelei na toefuatai mai e Iosefa Samita e moni pe le moni. Ina ia maua uma faamanuiaga na folafolaina mai, e tatau ona tatou taliaina le talalelei i le faatuatua ma le atoatoa. Ae peitai, o lenei faatuatua e le oo uma mai i le taimi e tasi. E aoaoina i tatou i le faaleagaga i lea upu ma lea upu o lea fuaiupu ma lea fuaiupu.
Sa talanoa atu ia Joseph Hamstead, o se faiaoga i le Iunivesite a Lonetona, i faiaoga i lena lava iunivesite tele e uiga i le Ekalesia ma ona talavou ma polokalama i aiga. Sa faapea atu se tasi o i latou: “Ou te fiafia i mea uma lava o loo faia mo aiga, ma isi. Afai e mafai ona e aveeseina le vaega lena o loo fai mai e uiga i se agelu na faaali atu ia Iosefa Samita, ona mafai lea ona ou auai i lau lotu.” Sa tali atu le Uso ia Hamstead, “Oi, ae afai e te aveeseina le agelu na faaali atu i le Perofeta o Iosefa, ona le mafai lea ona ou auai i le Ekalesia aua o lona faavae lena.”2
E pei o le polofesa i le Iunivesite a Lonetona, e toatele tagata ua vaaia le moni o le maoae o lenei Ekalesia ma ua faatauanauina faapea o loo i ai sona taua ma se aoga. Latou te talisapaia mea e mafai ona faia e le Ekalesia mo ona tagata faatuatua. Ae peitai, e le o i ai so latou mautinoa faaleagaga faapea na vaaitino lava Iosefa Samita i le Tama ma le Alo ma na tuuina atu e se agelu ia Iosefa Samita ia papatusi lea na faaliliuina mai ai le Tusi a Mamona. O le iloaina o le Atua o se meaalofa faaleagaga sili lea e mafai ona oo mai i soo se alii po o se tamaitai. Na maua e Iosefa Samita lenei malamalama mai le Atua lava ia. I le tele o tausaga na lumanai ai, a o mafaufau loloto pea i le aafiaga o lena mea ma isi mea na tutupu i lona olaga, na saunoa ai Iosefa lava ia: “Ou te le tuuaia se tasi mo le le talitonu i la’u talafaasolopito. Ana fai ou te lei oo i le aafiaga na ou oo i ai, semanu ou te le talitonu foi i ai a’u lava ia.”3
E leai se tasi sa i ai ma le taulealea o Iosefa Samita i le Togavao Paia i Palamaira, Niu Ioka, ina ua faaali atu le Atua le Tama ma Lona Alo, o Iesu Keriso. Ae peitai, e oo lava ia i latou o e le talitonu na tupu lena mea, e faigata lava ona faamalamalamaina i ai. E tele naua mea na tutupu talu mai lena mea e teenaina ai na tupu se mea faapena.
Mo outou na, e pei o le tama o loo i le tala faatusipaia, na faapea atu, “Ua ou faatuatua, ia e fesoasoani i lou le faatuatua,” e mafai ona e maua se faamautinoaga e ala lea i le mulimuli i le faatonuga a le Tusi a Mamona, lea e luitauina ai i tatou ina ia ole atu i le “Atua, le Tama Faavavau, i le suafa o Keriso,” e tusa ma le upumoni lea e na o le faatuatua ia Keriso ma faaaliga e oo mai ai. Ae peitai, e lua lava elemene taua. E tatau i se tasi ona “ole atu ma se loto faamaoni, ma le manatu tonu i ai,” ona faaali mai lea e le Atua “le tonu ia te oe, i le mana o le Agaga Paia. O le mana foi o le Agaga Paia tou te iloa ai le tonu i mea uma lava.”4
O loo i ai molimau malolosi e ese mai le Tusi a Mamona e lagolagoina ai saunoaga a Iosefa Samita. E amata i Molimau e Toatolu ma Molimau e Toavalu, o e na taulimaina ia papatusi ma vaai i togitogiga, na tautino mai o le Tusi a Mamona na faaliliuina i le mana o le Atua. O tagata o le aiga o Iosefa Samita, o e sa sili ona iloa o ia, sa taliaina foi ma talitonu i lana savali. O isi o e na talitonu e aofia ai ona matua, o ona uso ma ona tuafafine, ma le uso o lona tama o Ioane Samita. Na faamaonia e lona uso matua o Ailama lona faamaoni atoatoa i le galuega a Iosefa e ala lea i le tuuina atu o lona ola faatasi ma Iosefa. O nei molimau faatuatuaina e faamautuina uma ai le molimau a le Perofeta.
O ana uo sili ona latou vavalalata sa matuai maumaututu lava o latou talitonuga i le paia o le misiona a Iosefa Samita. O le toalua o i laua, o Willard Richards ma Ioane Teila, sa faatasi ai ma Iosefa ma Ailama ina ua fasiotia i laua. Sa fesili atu Iosefa ia Willard Richards pe naunau e o faatasi ma i latou. Sa tali atu Willard ma le manino: “Le uso e Iosefa e te lei fai mai ia te au ou te sopoia le vaitafe faatasi ma oe—e te lei fai mai ia te au ou te sau i Karefasi—e te lei fai mai ia te au ou te sau i le falepuipui faatasi ma oe—ma e te manatu ea la o le a ou tuulafoaia nei oe? A e o le a ou ta’u atu ia te oe le mea o le a ou faia; afai o le a faasalaina oe ina ia sisiina ona o le faalata, o le a sisiina au e sui ai oe, ma o le a e saoloto.”5
Na molimau mai Ioane Teila, “O Iosefa Samita le Perofeta, ma le Tagata Vaai a le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo soo se isi lava tagata ola na ola ai.”6 Na saunoa ia Polika Iaga le faamaoni, “Ou te lagonaina le fia alaga Aleluia, i taimi uma, pe a ou mafaufau sa ou iloaina Iosefa Samita, le Perofeta na faatuina ma faauuina e le Alii, ma o le na ia tuuina atu i ai ki ma mana e fausia ai le Malo o le Atua i le lalolagi ma lagolagoina.”7 I lou manatu, o nei alii malolosi ma atamamai sa le mafai ona faaseseina.
Ou te matuai talitonu lava foi e leai se isi talitonuga faalelotu e faapea mai o i ai ia ki e fusia ai sootaga faaleaiga e faavavau. Na saunoa Peresitene Hinckley, “O malumalu uma lava, pe tele pe laitiiti, tuai pe fou, o se faailoga lea o la tatou molimau o le olaga i tua atu o le tuugamau e moni ma mautinoa e pei lava o le olaga faaletino.”8 O i latou o e faapelepele i o latou aiga e i ai se mafuaaga malosi e tausili ai ia maua faamanuiaga e le mafai ona manatu i ai o le faamauina lea mo le faavavau i totonu o malumalu o le Atua. Mo matua matutua uma, matua, tane, ava, fanau, ma fanau a fanau, o lenei mana ma le pule o faamauga o se mataupu faavae laualuga lea, o le faatumutumuga lea i le toefuataiga “o mea uma”9 e auala mai i le Perofeta o Iosefa Samita. O faamauga e fusia ai e faavavau. O lenei faamanuiaga e mafai ona faalauteleina atu ia i latou o loo ola ma e mafai foi ona fai ai nisi ma sui mo e ua maliliu, ina ia fusia ai aiga mo le faavavau.10
O se isi faamaoniga mamana o le faaleagaga o lenei galuega paia o le ofoofogia lea o le tuputupu ae ma le malosi o lenei Ekalesia i le lalolagi atoa. O se faalapotopotoga tulagaese. E leai se mea e mafai ona faatusalia i ai. A o manatunatu ia Kamalielu a o molimau atu ia Peteru ma uluai Aposetolo i le paia o Iesu Keriso:
“Afai ua tupu … mai tagata lena galuega, e faaumatia ia. A e afai ua tupu mai le Atua, tou te le mafai ona faaumatia.”11
Ae peitai, o nei mea uma e moni, o lea e tatau ai i soo se tagata ona maua se faamautinoaga faaleagaga e ala i le mana o le Agaga Paia, lea e sili atu ona mamana nai lo lagona uma pe a tuufaatasia. O i latou uma o e faapea atu, “Le Alii e, ua ou faatuatua; ia e fesoasoani i lou le faatuatua,” ou te fia fautua atu ina ia “outou vaai atu i luma ma le mata o le faatuatua.”12 Ia i latou o e faia lenei mea, ua folafola mai le Alii, “O le a ou faaali atu ia te oe i lou mafaufau ma lou loto i le Agaga Paia, e oo atu ia te oe ma o le a tumau i lou loto.”13
O nisi o mafuaaga e tuuina mai e tagata pe a leai so latou faatuatua e aofia ai vaivaiga faaletagata ma le le atoatoa o isi; o se mea i le talafaasolopito o le Ekalesia latou te le malamalama i ai; o suiga i aiaiga e mafua mai le faatupulaia ma faaaliga faifai pea; o feeseeseaiga; po o soligatulafono.
Sa i ai se taimi na fetalai mai ai le Alii faapea ua Ia “fiafia lava” ia Joseph Wakefield.14 Sa toa o ia ma faamaoni ma sa aoao atu i le fiaselau o tagata e uiga i le galuega faaperofeta a Iosefa Samita. Ae mai le 1833 i le 1834 sa aafia ai o ia i manatu o nisi tagata na le fiafia i aoaoga a le Ekalesia i Katelani. Sa i ai o ia i le fale o Iosefa Samita i se tasi taimi. Na sau i fafo Iosefa mai le potu sa ia faaliliuina ai le afioga a le Atua ma amata ona taaalo ma nisi o tamaiti. “O le mea lenei na talitonu ai le [Uso ia Wakefield] faapea o [Iosefa] e le o se tagata o le Atua, ma [o lea la] e sese le galuega.”15 E lei leva ae liliuese ia Joseph Wakefield, na tapeina lona igoa, ma avea ma se tagata faasaua i le Ekalesia ma le Au Paia.
O se tasi tagata le toaga sa faafuasei ona iloaina ma le ofo tele e faapea e lei liliu mai o ia i le Ekalesia ina ua alu lana tama i se misiona. I le faatusatusa atu o ia i isi o e sa ofoofogia foi tala i lo latou liliu mai sa ia faalogo i ai, o lea na ia faapea ifo ai ia te ia lava, “Aisea ua mamana ai le liliu mai o nei tagata, ae o au, o se paionia lou tupuaga, ae ou te lei liliu lava?” Sa amata ona ia faitauina le Tusi a Mamona e ui lava sa ia masalosalo i lona taua ma iloaina ai e leai se manaia. Ona luitauina lea o ia e sana uo. Sa ia faapea atu, “Na e fai mai e te talitonu i le tatalo. Ia, aisea la e te le tatalo e uiga i ai?”
Sa ia faia lenei mea, ma ina ua uma ona tatalo, sa amata ona ia toe faitauina le Tusi a Mamona. E lei toe faapea na leai se manaia. O le tele lava ona ia faitau, o le tele foi lena o lona maofa i ai ma manatu, “E le mafai e Iosefa Samita ona tusia lena tusi—o nei upu e mai le Atua!” Sa maea ona ia faitau, ma mafaufau po o le a faapefea ona tau atu e le Atua ia te ia e moni. Sa ia faapea mai, “O se faalogona malosi, matagofie, ma le olioli na lilofia ai lou tino atoa… . Na ou iloaina na toetu Iesu Keriso, … ma o Iosefa Samita o se perofeta na vaai i le Atua ma Iesu Keriso. Na ou iloa na ia faaliliuina ia faamaumauga anamua i le taitaiga a le Atua. Na ou iloaina na maua e Iosefa Samita ia faaaliga mai le Atua.” Na suia ai lona olaga aua ua avea foi nei o ia ma se tagata liliu mai!16
Mo i latou o e ua tau mou atu le faatuatua, atonu lava e moni a latou mafuaaga, ae o nei mafuaaga e le suia ai lava le moni o le mea na toefuatai mai e Iosefa Samita. Na saunoa mai le Perofeta o Iosefa Samita, “Ou te lei tauina atu lava ia te outou ou te atoatoa; ae e leai ma se sese i faaaliga na ou aoaoina atu.”17 E le mafai ona osofaia e se tasi ia mataupu faavae po o mataupu autu moni ma faamanuiaina ai, aua e faavavau. O faaaliga na oo mai e ala mai i le Perofeta o Iosefa Samita o loo sao pea! O se mea sese le faatagaina o mea e faalavelave ai, o faamatalaga faatauemu, po o mea faatiga e lepetia ai lo tatou faatuatua.
E mafai ona tatou maua se molimau mautinoa faapea o Iesu o le Keriso, o le Alo o le Atua, ma le Togiola o tagata, ma o Iosefa Samita o se perofeta na poloaiina e toefuatai le Ekalesia i o tatou aso ma vaitaimi e aunoa ma le mauaina o se malamalama atoatoa i mataupu faavae uma o le talalelei. Ae afai e te pikiina i luga se fasi laau e te pikiina uma lava i luga le laau. E faapena foi i le talalelei. I le avea ai ma tagata o le Ekalesia e moomia ai ona tatou taliaina uma lava le talalelei. E oo lava i nai faamautinoaga faaleagaga o nisi o vaega o le talalelei o se faamanuiaga, ma o le a i ai le taimi e mafai ai ona oo mai isi elemene o loo e le mautonu ai e ala i le faatuatua ma le usiusitai.
O le eseesega i le va o le mea e lauiloa ma le mea e amiotonu ua faateteleina le vatele. E pei ona valoia mai e Isaia, e toatele i latou i aso nei “fai mai ua lelei le mea leaga ae leaga le mea lelei.”18 O faaaliga mai perofeta a le Atua e le pei o ni meaai e tuuina mai i se faleaiga, o nisi meaai e filifilia ae o nisi e le amanaia. O loo tatou matuai nofo aitalafu lava i le Perofeta o Iosefa Samita mo le tele o faaaliga maoae na auala mai i a te ia. E leai se isi e sili atu ia te ia i le toefuataiina mai o le malamalama faaleagaga.19 Ua i ai se faataunuuina o le faaaliga na tuuina atu ia Iosefa Samita ia Mati o le 1839:
“O le a fesili tuluiga o le lalolagi i lou igoa, o le a faia foi oe ma tauemuga e tagata valelea, ma faasaga seoli ma le matua lotoa ia te oe;
“A o e loto mama ma e faautauta ma e maualuluga, ma e amiomama, o le a sailiili pea fautuaga, ma le pule ma faamanuiaga mai ia te oe.”20
Ia i latou o e ua faatuatua ae o loo moomoo i lo latou faatuatua ina ia faamalosia, ou te uunaiina outou ina ia savavali i le faatuatua ma le faalagolago i le Atua. O le malamalama faaleagaga e moomia ai lava se faatinoga o le faatuatua. Tatou te mauaina se molimau o mataupu faavae o le talalelei e ala lea i le taumafai ma le usiusitai e ola ai. Na fetalai le Faaola, “Ai se tasi e fia fai lona finagalo, e iloa ai e ia le mataupu.”21 O se molimau o le aoga o le tatalo e maua mai i le tatalo faamaoni. O se molimau o le sefuluai e maua mai le totogi o le sefuluai. Aua ne’i e tuu atu i ou lava masalosaloga e vavaeeseina mai oe mai le pogai faalelagi o le malamalama. Ia agai pea i luma ma le agaga tatalo, ma saili ma le faamaualalo le malamalama e faavavau, ma o le a faapea ona aveesea ai lou le faatuatua. Ou te molimau atu afai e te faaauau pea i le faiga o le saili ma le faamoemoe i ai mo le mauaina ma le taliaina o le malamalama faaleagaga, upumoni, ma le iloa, e mautinoa lava o le a oo mai. O le agai i luma i le faatuatua o le a e iloaina ai o le a faatupulaia lou faatuatua. E pei o se fatu lelei afai e le tia’ia ona o lou le faatuatua, o le a ola talaulau i lou loto.22
Ou te talitonu o molimau a tagata taitoatasi ia Iesu o le Keriso e oo mai o se meaalofa faaleagaga. E leai se tasi e mafai ona faamanuiaina i le luitauina po o le feteenai i ai aua e matuai patino lava i le tagata o se meaalofa i le ua tuuina atu i ai. O le a avea ma se faamalosiaga faaleagaga ina ia fafagaina ai pea lo tatou malamalama faaleagaga ina ia faaali mai ia i tatou le ala e tau atu i le fiafia faavavau. Ae ou te molimau atu e mafai ona sili atu—silisili atu. O le osi feagaiga ma le “Atua ina ia faia lona finagalo, ma usiusitai i ana poloaiga i mea uma na te poloaiina ai i tatou, i o tatou aso uma o totoe,” tatou “te liua ai ona o le faatuatua i le suafa o [Keriso].” O lea e “fanau ai i tatou ia te ia ma … avea ma ona atalii ma ona afafine.”23 E i ai sou malamalama mautinoa i lenei mea, lea ou te folafola atu ai i le suafa paia o Iesu Keriso, amene.