O Oe o le Mea Sili Ona Ofoofogia
Ia amata ona tatalaina le iloa po o ai moni lava oe e ala lea i le aoao atili e uiga i ou tuaa.
O’u uso pele o le perisitua a le Atua i le lalolagi atoa, matou te momoli atu o matou alofaaga ma faamanuiaga ia te outou uma i soo se mea o outou i ai.
Sei o tatou vaai faalemafaufau faatasi i se teineitiiti matuaoti e ono tausaga le matua a o savalia ia laufanua o Amerika. O lona igoa o Elsie Ann. Na maliu lona tina i le lua o ona tausaga. Na toe faaipoipo lona tama, o lea sa na o sina taimi ai sa i ai sona tina fai. Ona maliu lea o lona tama i le lima o ona tausaga i Uinita Kuota. Na toe faaipoipo le toalua o lona tama ma alu ese, ae tuua ai si nei alualutoto matuaoti ia Pita ma Selina Robison, o tausoga o le toalua lona lua o lona tama. Na tuua faatasi e Elsie Ann ma le aiga o Robison ia Uinita Kuota ia Iulai o le 1849 mo le malaga mai i sisifo. A o vaavaai atu o ia i le tausiga e Selina o lana pepe teine e 10 masina le matua, sa lei masalomia lona faananau mo le alofa o lona lava tina. O nisi taimi e oo ai lava ina fesili, “O fea o i ai lo’u tina?”
E momomo lo’u loto i lenei teineitiiti pe a ou mafaufau atu ia te ia ma lona feagai ai ma lona lumanai e le mautinoa i le faatasi ai ma ni aiga e le o ni ona toto e faamafanafana ma fesoasoani ia te ia. O Elsie Ann o le tina o le tama o lo’u tama, ma e lei leva atu nei lava ona matou mauaina lona tina moni. Na matou manatu i le tele o tausaga o Elsie Ann o se tama a Jane Robison. Ae o suesuega maeaea na maua ai ona matua moni, ma ina ua mavae nei tausaga e tele ua faamauina nei ia Elsie Ann i lona tama o John Akerley, ma lona tina, o Mary Moore.
Na tele se aafiaga o matua o o’u matua i lou olaga. E ui lava ua tele tausaga talu ona maliliu i latou, ae ou te lagonaina pea lo latou alofa lagolago. O le isi ou tamamatua, o James Akerley Faust, na maliu ae ou te lei fanau mai. E na o tala sa ou faalogo i ai o faamatala e lou tinamatua ma ou matua na mafua ai ona ou iloa o ia. Ae peitai, ou te lagonaina pea se sootaga malosi ma ia aua o au o se vaega o ia. O isi mea sa aafia ai, o le avea lea o ia ma se kaupoe, o se pule i lafumanu, ma se pule o le falemeli i se tamai nuu i le ogatotonu o Iuta. I se tasi taimi sa alu ai se malaga a Tamamatua i le taumalulu i Idaho, lea sa ia feiloai atu ai i se tagata e masani ai, sa pagatia i le mativa. Sa matuai malulu, ma sa leai se ofumafanafana o le uo a Tamamatua. O lea sa tatalaese ai e Tamamatua lona ofumafanafana ae tuu atu ia te ia.
O le afiafi nei ou te fia faamalosiau atu ai ia te outou alii talavou ina ia amata ona tatalaina le iloa po o ai moni lava oe e ala lea i le aoao atili e uiga i ou augatuaa. Na saunoa mai ia Alex Haley, le tusitala o le tusi o le Roots: “E i ai ia i tatou uma lava le naunautai loloto, e fia iloa lo tatou tofi—e fia iloa po o ai i tatou ae o fea na tatou o mai ai. A aunoa ma lenei malamalama sili, e matua leai lava se aoga. E tusa lava po o a mea tatou te maua i le olaga, e tumau pea le i ai o se vaega o loo avanoa, o le tuua toatasi e le iloa.”1 E mafai ona tatou maua ni aafiaga fiafia a o tatou aoao e uiga i o tatou augatuaa malolosi ma le naunautai. O i latou o ni tagata moni, sa soifua ma ni faafitauli, faamoemoega, ma miti e pei lava ona tatou mauaina i aso nei.
I le tele lava o auala ua avea ai i tatou taitoatasi ma se aotelega o mea sa i ai o tatou tuaa. O uiga lelei sa ia i latou atonu o loo ia i tatou, o o latou malosiaga ua avea ma o tatou malosiaga, ma e mafai foi ona avea o latou luitau ma o tatou luitau. O nisi o o latou uiga e mafai ona avea ma o tatou uiga. Sa ou maitauina i se taimi ua mavae ia se tasi o le fanau a le ma fanau, o se pepe, e foliga mai e ese foi lana savali. Sa fai mai lou toalua, “E soo uma lava lana savali ia te oe!” Ua ou taumanatunatu nei po o ai na ou maua mai ai lea tulaga.
O se fiafiaga le faamasani ma o tatou tuaa ua leva ona maliliu. E tofu uma lava i tatou ma se talafaasolopito faaleaiga matagofie. O le mauaina o ou tuaa e mafai ona avea ma se tasi o paso sili ona manaia e mafai e outou alii talavou ona galulue i ai.
E ao ia i tatou uma taitoatasi ona amataina lenei galuega i soo se mea ma e mafai ona amataina i le talavou po o le matua. O le taumafanafana lenei sa galulue ai tamaiti e 170 o le Siteki a Accra Ghana Lartebiokorshie i a latou laau o gafa mo augatupulaga e fa i le faagasologa o se polokalama e lua itula, faatasi ai ma le silia i le 74 o i latou na faamaeaina ma faaalia a latou laau o gafa.
E pei ona saunoa mai ia Peresitene Boyd K. Packer, “Afai e te le iloa le mea e amata ai, amata ia te oe. Afai e te le iloa po o a faamaumauga e aumai, ma le auala e maua ai, ia amata i mea o loo ia te oe.”2 O le a e aoao ai i se mea ofoofogia, o oe lea. E mafai ona manaia nai lo soo se ata tifaga atonu ua e vaai i ai po o soo se taaloga komepiuta atonu ua e taalo ai. O le a e moomia ona sailia po o ai matua o ou matua faapea ma o latou matua, ae po o a galuega faalemalumalu ua faia mo i latou. Afai e te le iloa pe faapefea ona maua nei faamatalaga, ia fesili atu i tagata o lau uarota e iloa le auala e maua mai ai.
Ia fesili atu i tagata o loo soifua o lou aiga po o a ni mea latou te iloa e uiga i lou aiga potopoto. Ia vaai i faamaumauga o loo latalata atu ia te oe, e pei o Tusi Paia a le aiga, ina ia saili ai i nisi faamatalaga e uiga i ou tuaa. Ona mafai lea ona e saili ma faaaoga isi faamaumauga, e pei o faamaumauga taua, faamaumauga a le lotu, faamaumauga o tusigaigoa, ma faamaumauga a le militeli. Afai e te faaaogaina se komepiuta, e mafai ona e faaaogaina ou tomai faakomepiuta ma e saili i le tuatusi faavaomalo a le Ekalesia o le FamilySearch.org. O le talafaasolopito o aiga ua avea ma se gaoioiga faigata lea ua saunia ai e komepiuta ni punaoa se tele e te suesue ai. Ua matua faigofie lava ona e maua le anoanoai o faamaumauga o talafaasolopito faaleaiga e faaaoga ai le Initoneti i lau komepiuta i lou fale po o se ofisa autu o talafaasolopito o aiga e sili ona lata ane.
O loo maua nei ia Ofisa Autu o Talafaasolopito o Aiga i atunuu e 88. O nei ofisa autu o se vaega o se polokalama e le faatusalia mo le teuina o faamaumauga lea e fesoasoani e faasaoina ai ia talatuu o aiga i le lalolagi atoa. I le Faletusi o Talafaasolopito o Aiga i le Aai o Sate Leki, o loo tusi atu pea ma auina atu e tagata o loo faaaogaina ia faamatalaga e uiga i talafaasolopito o o latou aiga. Na tusia e se tasi tagata, “O loo matou auina atu ia te outou ni tamaiti se toalima i totonu o se isi teutusi.”
O le galuega sili o le sauniaina o sauniga faaola mo o tatou tuaa ua maliliu o se vaega taua lea o le misiona tafatolu a le Ekalesia. Ua tatou faia lenei mea mo se faamoemoega, o le togiolaina lea o o tatou tuaa ua maliliu. O galuega faalemalumalu e taua mo i tatou ma o tatou tuaa ua maliliu o e o loo faatalitali mai mo nei sauniga faaola ina ia faia mo i latou. E taua aua “e le mafai ona faaatoatoaina i tatou e aunoa ma i latou; e le mafai ona faaatoatoaina i latou e aunoa ma i tatou.”3 Latou te moomia ia sauniga faaola, ma e moomia ona faamauina i tatou ia i latou. O le mafuaaga lea e taua ai lo tatou sailia o gafa o o tatou aiga ina ia aua ne’i tuulafoaiina se tasi.
O le sailia o o tatou aiga ua maliliu e le na o se mea e fiafia i ai. O se tiutetauave faavae lea mo tagata uma o le Ekalesia. Ua tatou talitonu e faaauauina le olaga pe a mavae le oti ma o le a toetutu tagata uma.4 Ua tatou talitonu e mafai ona faaauauina ia aiga i le isi olaga pe afai sa latou tausia ia feagaiga faapitoa na osia i totonu o se tasi o malumalu paia i le pule a le Atua. Ua tatou talitonu o o tatou tuaa ua maliliu e mafai ona tuufaatasia e faavavau ma o latou aiga pe a tatou osia feagaiga mo i latou i totonu o malumalu. O o tatou tuaa ua maliliu e mafai ona taliaina nei feagaiga i le lalolagi o agaga, pe afai latou te filifilia.5
O galuega silisili e sui ai mo o tatou aiga ua maliliu i totonu o o tatou malumalu e faaalia ai le tonu ma le faamaoni o le talalelei a Iesu Keriso. Na faamalamalama mai e le Perofeta o Iosefa Samita le faafitauli matautia o le a feagai ma fanau a le Atua pe a leai ni galuega faalemalumalu mo o tatou tagata ua maliliu. Na ia saunoa: “Na maliu se tasi tagata ma falelauasi, e aunoa ma se faalogo i le Talalelei o le toe faaleleia; o le isi tagata na auina atu i ai le savali o le toefuataiga, na faalogo i ai ma talia, ma avea ma suli i le ola faavavau. Pe tatau ea ona avea le tasi ma suli o le mamalu ae o le isi e alu atu i le malaia? Pe leai ea se avanoa e solaese mai ai o ia?”6 O le mea e lelei ai o le a maua e o tatou tuaa le avanoa e maua ma talia ai sauniga faaola a o tatou sailia i latou ma faamaeaina nei sauniga faaola mo i latou e ala lea i le sui ai mo i latou. Tatou te faia mo i latou mea latou te le mafai ona faia mo i latou lava. O se aafiaga e matuai faafiafiaina ai.
I le faaaliga vaaia maoae i totonu o le Malumalu o Katelani, na faaali atu ai Elia le perofeta i le Perofeta o Iosefa Samita ma Oliva Kaotui ma tuuina atu i ai ki o galuega faalemalumalu ma le mana o faamauga i aao o Iosefa Samita.7 O lenei mea na faataunuuina ai le valoaga a Malaki e faapea o le a auina mai Elia ina ia “faaliliuina loto o tama i fanau, ma fanau i tama, ina ne’i taia le lalolagi atoa i le fetuu.”8
O le a le uiga o lenei mea? O le liliu atu o o tatou loto i o tatou tama o le sailia lea o igoa o o tatou tuaa ua maliliu ma faia sauniga faaola mo i latou i totonu o le malumalu. O le a faamalosia ai se sootaga malosi faifaipea i le va o i tatou ma o tatou tuaa e oo atu lava i le Tama ia Atamu ma le Tina ia Eva.
O le loto o se tamaitiiti e 11 tausaga le matua na liliu atu i ona tuaa i le taimi o se afiafi faaleaiga ina ua tuufaatasia e tamaiti ni tusi o mea e manatuaina a le tagata lava ia. Sa manao ia Jeff ina ia o faatasi ma lona tina i le National Archives. Sa fefe lona tina ina nei faalavelave o ia i tagata suesue iina. Ae sa ia faatauanau atu pea, ma sa malie loa lona tina ma la o loa. E fa itula talu ona faia le la sailiiliga, ae tuualaga mai loa o ia, “Mama, ua ou mauaina Tamamatua!” O le mea moni lava na ia mauaina se tasi o tama o le aiga o lona tina.9 Ae peitai, e le o le auala lena e masani ai ona tupu. I se tusi na auina atu i le Matagaluega o Talafaasolopito o Aiga, na tusi atu ai se tasi: “Ua leiloa faamaumauga i lo matou tinamatua. Pe mafai faamolemole ona outou auina mai se kopi?”
Ua aoaoina i tatou e le talalelei a Iesu Keriso e faapea o le faatulagaina o le aiga faaselesitila o le a avea ma se “aiga e atoa,” o lona uiga, “o se faalapotopotoga e fesootai mai le tama ma le tina ma fanau o le isi augatupulaga, i le tama ma le tina ma le fanau o le isi augatupulaga, ma faapena ona faalautele ma faasalalauina atu ai e oo atu lava i le mutaaga o le olaga.”10
I le sailia o igoa o o tatou aiga, e mafai ona tatou mauaina ai le eseese o le sipelaga, e faalagolago lava i le faapogai na maua mai ai. O le tulaga lea na oo i se tamaitiiti aoga i se iunivesite i Provo, Iuta, o le sa matuai naunau lava i lenei sosooina o augatupulaga. Sa ia savalivali atu i le faletusi i se tasi afiafi ma manatua ai lona faalogo i se tasi i le aiga o Searing o faamatala e uiga i se nuu i le Setete o Niu Ioka sa faaigoaina i se tasi o tuaa. O lea sa ia fuafua ai loa e sue le nuu lea. Sa ia tau atu i se kopi tuai lava o le tusi o faafanua o Niu Ioka ma faitau ai i se tagata e igoa ia Simon Searing o le sa fesoasoani e faato’aina ia Long Island i le ogatotonu o le vaitau o le 1600. Pe o Simon lea o lona tuaa? E tatau ona ia iloa. Sa amata lana suesuega i le toe sailia ma le faamaoni o lona gafa i tua atu o nisi augatupulaga. Ae sa ia moomia pea ona sosooina le va lea o le 1800 ma le 1600. Ona tupu ai lea o se vavega. Na tei lava ua ia tau atu i se talafaasolopito o se aiga o Syring. O aiga o loo i totonu o le tusi o Syring e muta i le augatupulaga lava lea e tasi na gata ai lana sailiga. E le gata sa mafai ona ia sosooina ia le tele o augatuaa ae ua ia sosooina atu foi o ia i le uluai tagata na faatoaina se nuu e igoa i a Simon Searing.11
O se tasi e naunau lava i talafaasolopito faaleaiga e taumafai e faalautele lo latou iloa e ala lea i le fesootai atu i tagata lauiloa. I lou lava iloa i ai e matuai ese mai ai lava. Na ou maofa i le aoaoina lea o nisi o tagata e tau leiloa, o ni tagata masani, o o latou faamaumauga o loo faamatalaina ai ni olaga totoa. Na taua e Arthur L. Bassett i se tasi taimi e faapea: “O ai se tasi o ia i tatou e manao e saili sese i o latou augatuaa? O au lava ia, na ou maofa i taua na latou feagai—o o latou manumalo e faapea foi i o latou toilalo… . Ua ou ofo i mea na foliga mai e masani ai o tatou olaga aua ua ou iloaina le fiafia o loo ufiufia ai i mea e masani ai.”12
E le faapea o le a e mauaina ai ni tagata gaoi solofanua i lou gafa. Ae afai e te mauaina ai, e taua le faia o o latou galuega faalemalumalu, aua tatou te talitonu foi i le salamo o e ua oti:
“O e oti ua salamo o le a togiolaina, e ala i le usiusitai i sauniga o le maota o le Atua,
“Ma pe a mavae foi ona totogi e i latou le faasalaga mo a latou solitulafono, ma faamamaina e maua e i latou se taui e tusa ma a latou galuega, aua o i latou o suli o le faaolataga.”13
O le faiga e saili taitoatasi ai o tatou augatuaa e mafai ona luitauina ai ae faafiafiaina ma tauia ai foi. E masani ona tatou lagonaina le taitaiga faaleagaga a o tatou saili atu i punaoa e maua mai ai i latou. Talu ai ona o lenei galuega e faaleagaga tele, o lea e mafai ai ona tatou faamoemoeina le fesoasoani mai le isi itu o le veli. Tatou te faalogoina se uunaiga mai o tatou aiga o e o loo faatalitali mai mo i tatou ina ia sailia i latou ina ia mafai ona faia galuega o o latou sauniga. O se auaunaga faaKeriso lea aua o loo tatou faia se mea mo i latou lea e le mafai ona latou faia mo i latou lava.
O le toatele o outou alii talavou ua uma ona i ai se malamalama i galuega faalemalumalu a o outou auai i papatisoga mo e ua maliliu. Afai tatou te vave o atu i le malumalu, e masani ona tatou vaai i le autalavou o laei papae, ua saunia e auai i lenei aafiaga faamalieloto a o lei o atu i le aoga. E ao ona faamalo atu ia te outou mo lo outou gauai atu i lenei galuega taua. O le faia o lea mea ua uma ai ona outou lagonaina le filemu ma le toamalie lea e maua i totonu o puipui o o tatou malumalu.
Ou te molimau atu o le Atua o se Atua e tonu, ma e Na te le tuuina mai avanoa ia i tatou ae taofia mai o tatou tuaa. Ae o le a moomia ona tatou faia ia papatisoga, o faaeega paia, ma faamauga mo i latou e ala i le avea o i tatou ma o latou sui i iinei i le lalolagi e mafai ai ona tatou sosoo i tatou ma i latou mo le faavavau “ma avea ma se vaega o le uluai toetu.”14
Ou te toe molimau atu o loo taitaia ma musuia e le Alii ia Peresitene Hinckley a o ia taitaia i tatou i lenei galuega taua. Ia mafuta ma i tatou e le aunoa le filemu lea e maua mai le faataunuuina ma le faamaoni o o tatou tiute faaleperisitua, i le suafa o Iesu Keriso, amene.