Salamo ma Suia

Elder Dallin H. Oaks

O Le Korama a Aposetolo e Toasefululua

O le salamo o lona uiga o le lafoai ese uma lea o mea tatou te faia—faaletagata, faaleaiga, faaleaganuu, ma faaleatunuu—e feteenai ma poloaiga a le Atua.

Ou te aumaia ia te outou alofaaga mai le Eria o Filipaina, faatasi ai ma ona tagata auai e silia ma le 500,000, faifeautalai e 2,200, siteki e 80, ma misiona e 13, faatasi ai ma le tele o itu. O loo matou alualu pea i luma e ui lava i faigata o loo feagai ma le Ekalesia i vaega e lei atoatoa ona faavaeina ai.

I nei eria tau atiae, matou te faalagolago tele lava i ulugalii faamisiona matutua. Ou te faamamafaina le vaega lenei ona e toatele i latou o loo faafofoga mai nei o e e moomia ona iloa le matuai talisapaia o le latou auaunaga, ma e i ai foi isi matou te tatalo o le a mafaufau mo lenei auaunaga taua.

I.

O lau folasaga o se mea na taua e se tasi o nei faifeautalai totoa a o ou i ai. “A o ou toe tepa i tua i lou olaga,” na ia fai mai ai, “E faigata ona ou mafaufau i se tagata faasee e leai ni seevae mai Hawaii o faamaeaina lana misiona lona tolu. Ae ina ua ou faalogoina le alofa mafanafana o le Faaola, sa ou manao loa e auauna ia te Ia ma ou suia ai.” Ioe sa ia faia! “Sa tau mai e Stanley Y. Q. Ho ia te au faapea e leai se isi mea na ia faia seia oo i le tolusefulu o ona tausaga ae na o le tafao lava i matafaga i le Waikiki.” Ona ia mauaina lea o le talalelei, sa ia faaipoipo atu i se teine o le Au Paia o Aso e Gata Ai, ma suia ai o ia. Talu mai lena taimi sa ia faataunuuina le tele o valaauga, e aofia ai le epikopo ma le peresitene o le siteki. O le taimi nei, o Elder Ho ma lana pele o Momi, o le na gafa ma le tele o suiga i le olaga o lona toalua, ua faatolu ona faamisiona.

Mo se isi faataitaiga, o le a ou liliu atu ai i le Talalelei na tusia e Luka.

“Na oo atu Iesu i Ieriko, ua ui ane ai.

“Faauta foi, o le tagata ua igoa ia Sakaio, o ia o le telona sili, o le mauoa foi.

“Ua fia maimoa o ia ia Iesu pe faapefea o ia; a e le mafaia ona o le motu o tagata, aua o le tagata saasaa o ia.

“Ua momoe ia i luma, ua ae i le laau o le sukamoru, e vaavaai ifo ai ia te ia: aua o le a ui ane ai.

“Ua oo atu Iesu i lea mea, ona tepa ae lea o ia, ua silafia o ia, ona fetalai atu ai lea ia te ia, Sakaio e, ia vave ifoifo ia i lalo, aua e tatau ona ou nofo i lou fale i le aso nei.

“Ona vave alu ifo ai lea o ia, ua tali mai ia te ia ma le fiafia” (Luka 19:1–6).

O loo tusia i le tala e faapea na “muimui” e na mulimuli ia te Ia aua ua alu o Ia i le fale o le tagata agasala. Ae lei afaina lena ia Iesu. O Lana talalelei e mo i latou uma o e o le a lafoai ala tuai ae faia ni suiga latou te moomia ina ia faasaoina ai i le Malo o le Atua.

Sei toe foi lava i le tala o se tagata na tatalaina lona fale ma lona loto i le Alii:

“A ua tu Sakaio, ua faapea mai i le Alii; Faauta, le Alii e, o le a ou vaeluaina atu a’u mea i e matitiva; afai foi ua tiga se tasi i lo’u tuua’i ane, ou te taui atu i ai e taifa.

“Ua fetalai ane Iesu ia te ia, Ua oo mai le faaolataga i le aiga nei i le aso… .

“Aua ua sau le Atalii o le tagata e saili ma faaola i le na le iloa” (Luka 19:8–10).

O Sakaio o Ieriko ma Stanley o Hawaii o faatusa ia o i tatou uma. O i laua o ni faataitaiga o mea tatou te tatalo i ai lea o le a oo ia i tatou uma o e faia lena faaiuga taua o le taliaina o le Alii ma le “fiafia” ma mulimuli i le mea Na te taitai i ai.

II.

Ua luitauina i tatou e le talalelei a Iesu Keriso ina ia suia. O le “salamo” o lana savali faifai pea lea, ma o le salamo o lona uiga o le lafoai ese uma lea o mea tatou te faia—faaletagata, faaleaiga, faaleaganuu, ma faaleatunuu—e feteenai ma poloaiga a le Atua. O le faamoemoega o le talalelei o le liuaina lea o tagata faaletino e avea ma tagatanuu faaselesitila, ma e moomia ai le suia.

Na talai e Ioane le Papatiso le salamo. O e na faalogologo ia te ia e eseese uma mea e o mai ai, ma sa ia folafola atu ia suiga e ao i tagata taitoatasi ona faia ina ia “fua mai ai … ni fua e tatau ma le salamo” (Luka 3:8). O telona, o fitafita, ma tagata lautele—e tofu lava ma ana tu ma ana aga e ao ona lafoai ina ia faagasolo ai ona salamo.

Na luitauina foi e aoaoga a Iesu ia uputuu a vaega eseese o tagata. Ina ua faitio le au tusiupu ma le Au Faresaio e faapea ua “soli e [Ona soo] le uputuu a e anamua” e ala lea i le le fafanoina o o latou lima, sa tali atu i ai Iesu e faapea o tusiupu ma Faresaio ua “solia foi le poloaiga a le Atua i a [latou] uputuu” (Mataio 15:2–3). Sa Ia faamatalaina le auala ua latou “faaleaogaina ai le poloaiga a le Atua i a [latou] uputuu” (Mataio 15:6). O “tagata pepelo” na Ia ta’ua ai i latou o e usiusitai i a latou uputuu ma taofia ai i latou mai le tausia o poloaiga a le Atua (f. 7).

Na toe faailoa mai foi i faaaliga i ona po nei e le Alii faapea “o le amioleaga” e aveesea fanau ta’umamaina a le Atua mai le malamalama ma le upu moni e ala “i le le usiusitai … ma uputuu a o latou tama” (MFF 93:39).

O uputuu po o aganuu po o le auala e ola ai se tagata, e mautinoa lava le aofia ai ma nisi o faiga e tatau ona suia e i latou o e mananao ina ia agavaa mo faamanuiaga silisili a le Atua.

O le ola mama o se faataitaiga. “Aua e te mulilua,” na poloai mai ai le Alii mai Sinai (Esoto 20:14) ma o loo toe ta’u mai foi i faaaliga i ona po nei (MFF 42:24; 59:6). “Ina sosola ese ia ma le faitaaga” ua poloai mai ai le Feagaiga Fou (1 Korinito 6:18; tagai foi i le Kalatia 5:19; 1 Tesalonia 4:3). E tausalaina pea lava pea e perofeta a le Atua le “faitaaga.” Ae peitai, o nei poloaiga e faavavau ua masani ona le amanaiaina, teenaina pe ulagia e ni aganuu malolosi a le tele o atunuu. E patino lava ona vaaia lenei mea i aso nei, pe a faasoa atu e se tasi atunuu ana tifaga, mekasini, ma fesootaiga i le initoneti i le tele o isi malo. O loo taliaina foi ma lagolagoina ia sootaga faalefeusuai e le toatele a o le i faaipoipo. Ua faapea foi le saoasaoa o le faasalalauina o le taliaina o ata ma tusi mataga. O i latou uma o e o loo auai i nei tu ma aga o le agasala, ua tatau nei ona salamo ma suia pe afai e fia avea i latou ma tagata o le Atua, aua ua Ia lapatai mai “e le sao atu i lona malo se mea ua le mama” (3 Nifae 27:19).

O le auai i vaiaso taitasi i le Lotu o se isi lea faataitaiga o se poloaiga e feteenai ma tu ma aganuu lauiloa. Ua uma ona poloai mai le Alii ia i tatou ina ia auai i le Lotu ma “avatu a [tatou] faamanatuga” i Lona aso Sapati (tagai MFF 59:9). E moomia ai se isi tulaga sili atu nai lo le na o le auai. Ua poloaiina i tatou ina ia tatou auai i tapuaiga ma sauniga, ma e moomia ai se suiga faigata mo le tele o tagata e le o ni Kerisiano, ma e oo lava foi ia i latou o Kerisiano o e ua na ona o i le Lotu e pei o ni tagata maimoa e auai i isi aso ae le auai i isi aso.

O le poloaiga a le Alii ina ia taofia lo tatou faaaogaina o le ava malosi, tapaa, lauti ma le kofe (MFF 89) o loo feteenai foi ma uputuu a le toatele. O mausa po o amioga ua leva ona i ai, e le faigofie ona momotu, ae ua matuai manino le poloaiga a le Atua, ma o faamanuiaga ua folafolaina e silisili atu nai lo luitau o le suia.

O le isi faataitaiga o le faamaoni. O nisi aganuu latou te faatagaina le pepelo, gaoi, ma isi faiga le faamaoni. Ae o le le faamaoni i soo se tulaga—e tusa pe faamalieina ai, pe aloese ai mai le faalumaina po o le maua mai ai foi o se mea—o se matuai feteenai lava lea ma poloaiga ma faamoemoega o le talalelei. O le Atua o se Atua o le upu moni, ma e le suia lava le Atua. O i tatou e tatau ona suia. Ma o se suiga tele lena o le a i ai mo i latou uma o e ua masani ai i a latou uputuu, lea e manatu faapea e mafai ona latou pepelo laitiiti, sina taufaasese laitiiti, ma aafia i le taufaaoleole i soo se taimi e maua ai se mea ma ono le mafai ona maua.

O se tu masani faalelalolagi e le matautia tele lea e feteenai ma faamoemoega o le talalalelei, o le manatu lea i fesuiaiga pe sii i luga pe sui mai foi i lalo. I le lalolagi, tatou te manatu i le sii o le tulaga i luga po o le tuu i lalo. Ae peitai, e leai se alu i luga po o le alu i lalo i tofiga o le Ekalesia. E na o lo tatou fesiitai solo ai lava. O se epikopo e faamaloloina i le pule sao ma valaauina e faiaoga i le Peraimeri, e le o alu i lalo. E alualu i luma pe a ia taliaina lona faamalologa ma le lotofaafetai ma taliaina ma faataunuuina ona tiute i se valaauga fou—e tusa lava po o lena valaauga e tau le iloa.

Na ou vaai i se faataitaiga e le faagaloina o lenei mea i nai masina ua tuanai i Filipaina. Sa ou asiasi atu i se uarota i le Siteki a Pasig, e latalata i Manila. O iina na ma feiloai ai ma Augusto Lim, o le na ou iloaina i tausaga ua mavae, o se peresitene o le siteki, o se peresitene o le misiona, o se Pulega Aoao, ma le peresitene o le Malumalu o Manila. O lenei ua ou vaai ia te ia o galue ma le lotomaualalo ma le lotofaafetai i le au epikopo o lana uarota, o se fesoasoani lua i se alii e laitiiti ifo ia te ia ma e le tele foi sona malamalama. Mai le peresitene o le malumalu i le fesoasoani lua i le au epikopo o se uarota o se faataitaiga matagofie tele lea o le faamoemoega o le talalelei i lona faagaoioiga.

I nei faataitaiga ou te le o faatusatusaina ai ia aganuu po o uputuu a se tasi vaega o le lalolagi i se isi. O lea ou te faatusatusaina ia auala a le lalolagi i le ala a le Alii—le aganuu o le talalelei a Iesu Keriso faatasi ma le aganuu po o uputuu a malo po o tagata uma. E leai se vaega e i ai sana pule i le lelei po o se puipuiga mai le poloaiga ina ia suia. O lea, e lei taumafai ai Iesu ma ana aposetolo e suia ia Nuu Ese ia Iutaia (tagai Roma 2:11; Kalatia 2:11–16, 3:1–29, 5:1–6, 6:15). Sa latou aoaoina ia Nuu Ese ma Iutaia, ma taumafai ina ia avea i latou uma taitoatasi ma nisi e mulimuli ia Keriso.

E faapena foi, i auauna i aso nei a le Alii, latou te le o taumafai ia avea tagata Filipaina po o tagata Asia po o tagata Aferika ma ni tagata Amerika. Ua valaaulia e le Faaola i latou uma ina ia o mai ia te Ia (tagai 2 Nifae 26:33; MFF 43:20), ma o loo taumafai Ana auauna ina ia faatauanau i latou uma—e aofia ai ma tagata Amerika—ina ia avea ma Au Paia o Aso e Gata Ai. Matou te fai atu i tagata uma, ia lafoai ese a outou uputuu ma tu ma aganuu na e feteenai ma poloaiga a le Atua ma faamoemoega o Lana talalelei ma ia auai faatasi ma Lona nuu i le fausiaina o le Malo o le Atua. Afai tatou te tuu le savavali i le pouliuli, ua aoao mai le Aposetolo o Ioane, “tatou te savavali i le malamalama, … ona tatou mafuta faatasi ai lea o le tasi ma le tasi, o le toto foi o Iesu Keriso lona Alo e faamamaina ai i tatou i agasala uma lava” (1 Ioane 1:7).

III.

E i ai se aganuu tulaga ese o le talalelei, e i ai se vaega o mea e faatauaina ma o faamoemoega ma faiga foi e masani ai tagata uma O Le Ekalesia a Iesu Keriso o le Au Paia o Aso e Gata Ai. O lenei auala o le olaga o le talalelei, e sau mai le ata o le faaolataga, o poloaiga a le Atua, ma aoaoga a perofeta soifua. O loo faaalia i le auala tatou te tausia ai o tatou aiga ma ola ai i o tatou olaga taitoatasi. O mataupu faavae o loo ta’u mai i le Folafolaga o le Aiga o ni foliga vaaia ia a le aganuu o la tatou talalelei.

O i latou o e ua papatisoina i le Ekalesia a Iesu Keriso ua osia ni feagaiga. I faaaliga o ona po nei na faailoa mai ai e le Alii, “Pe a valaauina tagata i lau talalelei faavavau, ma osi feagaiga i le feagaiga faavavau, ua ta’ua i latou o le masima o le lalolagi ma le faaola o tagata” (MFF 101:39). Ina ia faatinoina lo tatou tiute ua osi feagaiga ai e avea ma masima o le lalolagi, e tatau ona ese i tatou mai ia i latou o loo siomia i tatou.

E pei ona aoao mai Iesu: “Ou te tuuina atu ia te outou e fai ma masima o le lalolagi, a e afai e magalo le masima, pe se a se mea e faamai a’i le lalolagi? E leai se mea e toe aoga ai le masima, na ona lafoaiina i fafo ma solia e tagata” (3 Nifae 12:13; tagai foi Mataio 5:13; MFF 101:40).

O lenei faiga e moomia ai ona tatou faia ni suiga mai a tatou tu ma aga faaleaiga, o tu ma aga faaleaganuu, o tu ma aga faaleatunuu. E tatau ona tatou suia uma vaega o a tatou amio na o loo feteenai ma poloaiga, feagaiga, ma faamoemoega o le talalelei.

O le fuafuaga o le talalelei e faavae lea i tiutetauave a tagata taitoatasi. O loo tau mai e le tatou Mataupu Faavae o le Faatuatua le upumoni e faavavau “e faasalaina tagata ona o a latou lava agasala, a e le o le agasala a Atamu” (Mataupu Faavae o le Faatuatua 1:2). O lenei tulaga moomia o le tiutetauave o le tagata lava ia, lea e faaalia i le tele o auala eseese i la tatou mataupu, e matuai feteenai lava ma le fuafuaga a Satani ina ia “togiolaina le fanauga uma a tagata ina ia le se ese se agaga e toatasi” (Mose 4:1). O le fuafuaga a le Tama ma le Faaola e faavae lea i le filifiliga a le tagata lava ia ma taumafaiga a le tagata lava ia.

O le aoaoga faavae ma le faiga o le tiutetauave a le tagata lava ia, ma ana lava foi taumafaiga, e feteenai ma uputuu faaletagata ma tu ma aga i le tele o atunuu. O loo tatou ola i se lalolagi e matuai tetele ai lava ni eseesega i le va o tupe maua ma meatotino, ma o loo tele ai foi ni taumafaiga faalauaitele ma taitoatasi ina ia faaitiitia ai nei eseesega. O e mulimuli i le Faaola ua poloaiina ina ia foai atu i e matitiva ma e toatele lava e faia. Ae o nisi foai ua siitia ai i luga se amioga o le faalagolago, ua tuuitiitia ai le manaomia e i latou o loo mauaina le manao mo meaai faalelalolagi po o ni malutaga, ae ua faamativaina ai i latou i lo latou manaoga e faavavau mo le alualu i luma o le tagata lava ia. O le alualu i luma o loo moomia e le fuafuaga o le talalelei e faatoa tupu i se aganuu o taumafaiga ma tiute a le tagata lava ia. E le mafai ona tupu i se aganuu o le faalagolago i le isi. Po o le a lava le mafuaaga o lo tatou faalagolago atu i isi mo ni faaiuga po o ni punaoa lea e mafai ona tatou saunia mo i tatou lava, o le a faavaivaiina ai i tatou i le faaleagaga ma telegese ai lo tatou alualu i luma i le mea o loo faamoemoe le fuafuaga o le talalelei mo i tatou ina ia oo i ai.

E aveeseina mai e le talalelei ia tagata mai le mativa ma le faalagolago i isi, ae na o le aganuu lava o le talalelei, lea e aofia ai le totogi faamaoni o le sefuluai e oo lava i e matuai matitiva e manumalo ai i uputuu ma aganuu o le ola faalagolago. O le lesona lena e ao ona aoaoina mai le fanauga a Isaraelu, o e na o ese mai i le fia selau tausaga mai le nofo pologa i Aikupito ma mulimuli atu i se perofeta i lo latou lava laueleele ma avea ai ma ni tagata maoae. E mafai foi ona aoaoina mai lena lesona mai paionia Mamona, o e latou te lei faaaogaina lava o latou sauaga po o le mativa e avea ma se ’alofaga, ae na agai i luma i le faatuatua i le iloaina lea o le a faamanuiaina i latou e le Atua pe a latou tausia Ana poloaiga, lea lava na Ia faia.

O suiga e tatau ona tatou faia ina ia avea ai ma se vaega o le aganuu o le talalelei e moomia ai ni taumafaiga uumi ma o nisi foi taimi e tiga ai, ma e tatau foi ona iloga mai o tatou eseesega. I le avea ai ma “masima o le lalolagi,” o i tatou foi o le “malamalama o le lalolagi” ma e le tatau ona nanaina lo tatou malamalama (tagai Mataio 5:13–16). Na lapatai mai le Aposetolo o Ioane e faapea o le pogai lea o le a ita ai le lalolagi ia i tatou (tagai 1 Ioane 3:13). O le mafuaaga lena ua i ai se tiute paia ia i latou o e na osia le feagaiga ia suia, ina ia alofa ma fesoasoani atu le tasi i le tasi. O lena faamalosiauga e tatau ona faalauteleina atu i soo se agaga o e o loo tauivi ina ia o ese mai aganuu o le lalolagi ae o atu i le aganuu o le talalelei a Iesu Keriso. Na faaiuina e le Aposetolo o Ioane, “Aua nei o tatou alolofa tau o le upu ma le gutu; a o le amio ma le faamaoni” (1 Ioane 3:18).

E leai se tasi e sili atu ona ‘anoa le faaali atu o le alofa mo o latou uso a tagata nai lo alii ma tamaitai mamalu o lenei Ekalesia, e tuua o latou fale mananaia ma siosiomaga ina ia auauna atu o ni ulugalii faamisiona. Latou te tuuina atu le fesoasoaniga sili ona moni ma taua ia i latou o loo tauivi ina ia suia. Ia faamanuia e le Atua o tatou ulugalii faamisiona!

IV.

Na poloai mai Iesu ia i tatou ina ia fealofani, ma e tatou te faaali atu lena alofa i le ala tatou te feauaunaa’i ai. Ua poloaiina foi i tatou ina ia alolofa atu i le Atua, ma e tatou te faaali atu lena e ala i le faaauau pea ona salamo ma tausia o Ana poloaiga (tagai Ioane 14:15). Ma o le salamo e sili atu i le na ona lafoaiese o a tatou agasala. I lona uiga lautele e moomia ai ia suia, ia tuu ese uma a tatou uputuu ia e feteenai ma poloaiga a le Atua. A o avea i tatou ma tagata auai atoatoa i le aganuu o le Talalelei a Iesu Keriso, ua avea i tatou ma “nuu faatasi ma le au paia, o le aiga foi o le Atua” (Efeso 2:19).

Ou te molimau atu o le mea lenei e finagalo lo tatou Alii ma le Faaola tatou te faia, ina ia avea i tatou ma tagata o loo faamoemoe Lana Talalelei ia oo i ai, i le suafa o Iesu Keriso, amene.