“Ua Faatuina le Tagavai o le Upumoni”
Ae peitai e tusa lava po o le a lo tatou foliga mai tatou te le o ogatasi ma faatulagaga a le lautele, e tusa po o le a le tauemuina o o tatou faatulagaga, e tusa po o le a le gauai atu o isi i faaosoosoga, o le a tatou le gauai atu lava, e le mafai ona tatou gauai atu i ai.
O lo’u faamoemoe ina ia faamalamalama atu i le autalavou ma le autalavou matutua, ma o latou matua, le mafuaaga tatou te matuai piimau ai i tulaga maualuluga o amioga mama; o le mafuaaga tatou te aloese ai mai fualaau e ono avea ma mausa, faapea le lauti, kofe, ava malosi, ma le tapaa; o le mafuaaga tatou te aoao atu ai tulaga o laei ma foliga vaaia talafeagai faapea ma le gagana.1 E moomia ona outou silafia le mea e sau ai o tatou faatulagaga ma le mafuaaga e le mafai ai ona tatou tuueseina ae mulimuli atu i mea o loo faia e le lalolagi.
Ua i ai lau filifiliga saoloto—“saoloto i amioga.”2 Ua e saoloto e filifili ou lava faatulagaga.
O le a sili atu lou malamalama pe afai ou te tautala i mau ma mataupu autu nai lo amioga.
O le Ekalesia o loo e auai, O Le Ekalesia a Iesu Keriso o le Au Paia o Aso e Gata Ai, o le Ekalesia na toefuataia.3 Afai e te iloa le uiga o le toefuataia, o le a e malamalama foi la i mafuaaga ua i ai faatulagaga o le amio e pei ona i ai.
Ina ua mavae le Faasatauroga o Keriso sa faapea ona tupu ai se liliuese. Na amata ona aoao atu ai e taitai ia “poloaiga a tagata e fai ma mataupu autu.”4 Sa latou le toe mauaina ia ki o le pule ma tapunia ai i latou mai auala e maua mai ai faaaliga. O lena leiloa o le pule na semanu e le mafai ona toe aumaia. Ae tatau ona toefuatai mai e i latou o e na umiaina anamua na ki o le pule.5
O Le Ekalesia a Iesu Keriso o le Au Paia o Aso e Gata Ai e le o se toe faatulagaina o se isi lotu. E le o se toe fetuunaiga po o se faasaoga po o se tetee faasaga i se isi lotu. E i ai le latou “faatulagaga o le amioatua”6 ma lo latou lelei ma le taua.
Na toe foi mai Ioane le Papatiso e ui mai i le veli e faaee mai le Perisitua Arona lea o loo “i ai ki o asiasiga ma galuega a agelu, ma le talalelei o le salamo, ma le papatisoga i le faatofuina mo le faamagaloina o agasala.”7 O se isi sauniga e o faatasi ai, o le faamauina ma le tuuina atu lea o le meaalofa o le Agaga Paia, e moomia ai le pule maualuga atu.8
E lei leva lena, ae toefuatai mai e Peteru, Iakopo, ma Ioane, o soa Aposetolo o le Alii, le perisitua maualuga po o le Perisitua Mekisateko9—“o le Perisitua Paia, e tusa ma le faatulagaga a le Alo o le Atua.”10
E lei oo uma mai le Toefuataiga i le taimi e tasi. I se faasologa o asiasiga, na oo mai ai foi isi perofeta e toefuatai mai ki o le perisitua.11
Faatasi ai ma le pule ua toefuataia, sa faaali mai ai loa le toefaatuina o le Ekalesia. Na faauuina Aposetolo ma sa faavaeina le Korama a Aposetolo e Toasefululua ma le Au Peresitene Sili e pei ona sa i ai anamua.12 Sa faaalia mai sauniga ma le pule na tuuina mai e faataunuuina ai.
O Le Tusi a Mamona: O Se Tasi Molimau ia Iesu Keriso sa faaliliuina ma lomiaina. O loo i ai i totonu le “atoatoaga o le talalelei faavavau.”13
Na lomiaina isi faaaliga—o le Mataupu Faavae ma Feagaiga ma le Penina Tautele. Mai na tusi o tusitusiga paia, tatou te aoao ai i le mafuaaga na foafoaina ai le lalolagi ae po o ai na foafoaina.14 Na faailoa atu i uluai taitai o le Ekalesia le atoatoaga o le talalelei a Iesu Keriso ma faatulagaga o loo Ia moomia mai Ona soo.
Tatou te aoao e uiga i le fuafuaga o le togiola—“le ala sili o le fiafia.”15 Na tatou o mai i le lalolagi ina ia tofotofoina ma maua le malamalama, faatasi ai ma se folafolaga faapea “e faaolaina tagata uma lava i le Togisala a Keriso, pe a tausia poloaiga ma sauniga o le Talalelei.”16
Ae tatou te lei o mai i le olaga faaletino, sa tatou nonofo o ni fanau agaga a lo tatou Tama o i le Lagi.17 “O tagata soifua uma—tane ma le fafine—ua foafoaina i le faatusa o le Atua. O [outou] uma taitoatasi o se atalii po o se afafine faaleagaga faapelepele a ni matua faalelagi ma, o lea ua tofu ai [outou] taitoatasi ma se natura ma se taunuuga paia. O le tulaga [tane ma le fafine] o le tagata, o se vaega taua lea o le mua’i olaga, olaga faitino, ma lona faamoemoe e faavavau.”18
O le ala sili o le fiafia ua mafai ai e sootaga faaleaiga ona faaauau i tala atu o le tuugamau. O sauniga ma feagaiga paia, lea e na o totonu o le malumalu e maua ai, e mafai ai e tagata taitoatasi ona toe foi atu i le afioaga o le Atua ma mafai ai e aiga ona toe faatasia e faavavau. O le faaipoipoga, o le aiga, ma le fale o le faavae lea o le Ekalesia.19 E leai se mea e sili atu ona taua i le Ekalesia ma le lalolagi lava ia nai lo le aiga!
Mo nisi, e le atoatoa mea uma i le olaga faitino aua latou te lei maua le avanoa e faaipoipo ai ma faia ni o latou lava aiga. Ae o le fuafuaga sili o le fiafia ma tulafono o loo pulea ai e faaauau pe a mavae le oti. I le vaavaaia ai e se Tama Faalelagi agalelei ma agaalofa, o i latou e lei maua lea avanoa, i le faatulagaga e faavavau o mea uma, o le a le teenaina mai ai ia faamanuiaga talafeagai mo lo latou faaeaga, e aofia ai le faaipoipoga ma le aiga. Ma o le a avea pea lena ma se faamanuiaga sili atu ona o le faatalitali ma le faananau i ai.
Ua tatou aoao mai faaaliga faapea matou te le tauina atu ia te outou le autalavou po o le a le mea e sao ma le mea e sese e tusa ai ma le ola mama ma le faaipoipo. Na aoaoina e le Perofeta o Liae lana fanau talavou faapea “ua lava le aoaoina o tagata, ua latou iloa ai le lelei ma le leaga.”20
Talu ai ona o le mana e foafoa ai se tino faaletino e taua i lo tatou fiafia ma lo tatou faaeaga, o lea ua faatuina ai e le Alii ni faasalaga ogaoga e faasaga i le faaaogaina ma le le mama o lenei mana e maua ai le ola.21
Ua iloa e Satani afai e mafai ona ia faaeleeleaina le auala e gaosia ai le ola ma faaosoina ia alii ma tamaitai ina ia faalumaina e ala i a latou amioga le mama, o le a ia faaleagaina le fuafuaga o le fiafia.
Na aoao mai Paulo: “O le Atua … na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lava oono.”22
Ou te le manao e faatiga i lagona mama o outou le autalavou lelei e, ae ua tumu lo outou lalolagi i le agasala, ma ua tatau ona saunia outou.
E i ai upu sa sili ona matou le tautatala atu ai. O loo faamatalaina ai mea sa sili ona aua ne’i o matou manatu i ai. Ae ua le mafai ona outou sosolaese mai faaosoosoga ua oo atu e faatatau i le faitaaga, mulilua, ponokalafi, talitane, faapi’opi’o, tuinanau, sauaina, tetee i tulafono a le Atua, ma mea uma e pogai mai i na ituaiga agasala.
E na o faigata e mafai ona e solaese ai mai le mataga o upu masoa ma tausuaga leaga ma le malie e o mai faatasi ai. Ua tuuina uma atu i o outou luma e ala i faafiafiaga eleelea—musika, tusi, tala faatino, tifaga, televise, ae le gata i lea, o le Initoneti.
Manatua le Uluai Faaaliga a o tootuli le taulealea o Iosefa i le Togavao. Sa oo ina siomia o ia e le pogisa tele. Sa taofia o ia e le mana o le fili, o se tasi mai le lalolagi le vaaia. Sa ia faia le mea e mafai e outou uma ona fai. Sa ia ole atu i le Atua, ma sa aluese ai le mana o le tiapolo mai ia te ia.23
O loo i ai se mana sili i le tatalo. I le avea ai ma se atalii po o se afafine o le Atua, e te mafaia, e pei ona faia e Iosefa, ona tatalo atu i le Atua i le suafa o Iesu Keriso mo le malosiaga.24
O le a taumafai faatasi Satani ma ana agelu e pue ou mafaufauga ma pulea mea e te faia. Afai na te mafaia, o le a ia faaeleeleaina soo se mea e lelei.25 O lona manatu, o le Initoneti e na o le pau lena o lona aoga—o se upega e maileia atu ai oe i se mausa leaga o ponokalafi. O le a mulimuli mai ai le le fiafia.26
O nisi tagata ua faaaogaina auala o faiga faaupufai, faiga faalauaitele, ma le tulafono ina ia suia ai le ola mama ma le faaipoipoina e avea ma se mea e le taupulea, e le masani ai, ma faasaina e le Atua. Ae le mafai ona latou suia le fuafuaga na puleaina ai le olaga o le tagata ma le fiafia talu mai le amataga. E osofaia e le taufaasese ia nisi o lagona po o mea e naunau i ai po o vaivaiga. Na te faatalitonuina i latou faapea e le mafai ona suia lena tulaga ma faatalitonu ai i latou ina ia auai i gaoioiga latou te lei filifilia e fai.
E le pine po o se taimi foi mulimuli ane o le a mumu ai lena malamalama faalelagi o loo i totonu o i latou taitoatasi. E mafai ona latou faaaogaina lo latou saolotoga e filifili ai i le avea ai ma ni atalii ma ni afafine na foafoaina i le faatusa o le Atua27 ma teenaina le na te faaumatia. O lena lagona po o lena vaivaiga ua taitaiina atu ai i latou ina ia talitonu faapea e le mafai ona suia, o le a suia lava, ma o le a latou lagonaina le mana o le togiola a Keriso.28 O le a aveesea le latou avega ma o le a faamaloloina le tiga.29 O le uiga atoa lava lena o le Togisala a Keriso.
E mafai ona latou mauaina lo latou tofi o ni fanau a ni matua faalelagi, ma e ui i sauaga matuitui ma faigata o le olaga faaletino, ae ua iloa e le o leiloloa i latou.
I totonu o le Ekalesia, e le faasalaina se tasi mo mea e faamoemoe i ai po o faaosoosoga. E faamasinoina se tasi mo soligatulafono.30 Afai e te le gauai atu i ni faatosinaga le mama, o le a le faasalaina oe pe e te tulai foi i se fono aoai a le Ekalesia.
Tatou te le faatutuina ia faatulagaga, ae ua poloaiina i tatou ina ia aoao atu ma faatumauina. O loo tumau pea le faatulagaga o le nofo mama a o lei faaipoipo ma le faamaoni i le faaipoipoga. Ae peitai, e tusa lava po o le a lo tatou foliga mai tatou te le o ogatasi ma faatulagaga a le lautele, e tusa po o le a le tauemuina o o tatou faatulagaga, e tusa po o le a le gauai atu o isi i faaosoosoga, o le a tatou le gauai atu lava, e le mafai ona tatou gauai atu i ai. O le usiusitai i faatulagaga o le ola mama ma le tausia o le Upu o le Poto o le a tumau pea o ni tulaga manaomia mo le faauuina i le perisitua, mo se misiona, faapea se pepa faataga o le malumalu.
Ua uma ona faaeeina atu i ou luga le meaalofa o le Agaga Paia. O le a i ai ni musumusuga o le faamaoniaina po o lapataiga i faaiuga e te faia.31 E mafai e le Agaga Paia ona taitaieseina oe mai le tiapolo ma toe aumai oe i le Alii pe afai ua e se ese ma ua e leiloa lou ala. Aua nei galo o outou o atalii ma afafine o le Atua. E le mafai e Satani ona faafalepuipuiina oe e faavavau. O loo e umiaina pea le ki o le salamo e tatala ai le faitotoa o le falepuipui.
Afai ua lagona e outou, la tatou autalavou le tuua na o outou, ia manatua ua fia miliona nei outou ua i ai i le Ekalesia. E fiasefulu afe outou o loo auauna faamisiona i le taimi nei. O outou o se faataitaiga vaaia, o se molimau o le Toefuataiga, e oo lava ia i latou o e o le a le faalogo i la outou savali. Po o fea lava o outou i ai—i le aoga, i le galuega po o taaloga, i le militeli—e le o tuua ai na o outou.
E mafai ona faaaoga upu e avea o ni auupega e faasagatau ai ia te outou. Afai e tauai mai e le lalolagi ia te outou le upu fiaese, ia faaaoga mo lou lelei ma fai atu i ai, “Ua uma ona faaesea au ma ua ou faamoemoe ou te tumau ai pea i le faaesea.” Afai o le upu e faasagatau mai ia te outou o le faapalepale, ia faaaoga foi, ma fai atu i ai, “Ou te faamoemoe ina ia e faapalepale i lo’u ituaiga olaga—usiusitai, faamaoni, loto pulea, salamo.” Afai o le upu e tuu mai o le filifiliga, tau atu ia i latou ua e filifilia le ola mama lelei o aso la ua leva. Ua e filifili e avea ma se tane po o se ava agavaa, o se matua tauaogaina.
E mafai e le Ekalesia atoa ona tutu na o latou e puipuia nei faatulagaga. Ae le na o tatou tagata na muamua. O Moronae, le toe tagata o lona nuu, na saunoa mai, “Ua toe na o a’u lava… . Ou te faataunuuina le poloaiga a lo’u tama.”32 Aua e te fefe.33
A o ou talavou ma fou i lou valaauga, sa auina atu ai au i le itu i sasae o le atunuu e feiloai atu i ni taitai malolosi, ma iloga o e sa taofia la tatou galuega. A o o’u malaga atu mo le malae o vaalele, sa ou afe e vaai ia Peresitene Harold B. Lee ma fesili atu i ai, “Pe i ai sau fautuaga mulimuli?”
“Ioe,” sa ia tali mai ai, “ia na ona manatua e le o le 1830 lenei, ma e le na o le toaono tagata o le Ekalesia.”
O lena na aveesea ai le popole. Sa ou tu e puipui o tatou faatulagaga. Sa fofoina le faafitauli.
O loo i ai le lalolagi i se auala lea ua mafua ai le faatafunaina o le mafaufau lelei o tagata ma ua matuai faatumulia i le agasala. O le mafaufau lelei o le tagata ua faatafunaina. O outou, o matou talavou lelei e, o se faataitaiga i le fia miliona o tagata lelei i le lalolagi atoa.
Ou te mafaufau i le olioli ma le fiafia lea o loo faatalitali mo outou i lenei olaga ma le galuega tele e ao ona outou faia, ma e le mafai ona faalotovaivaiina au.
Na saunoa ia Peteru, le Aposetolo o le sa tu latalata i le Alii, e uiga ia te outou, “A o outou o le tupulaga filifilia outou, o tupu ma ositaulaga, o le nuu paia, ma le nuu na faatauina mai, ina ia outou tautau atu ona lelei na ia valaau ia te outou nai le pouliuli e oo i lona lava malamalama e matua ofo ai.”34
Ia manatua lenei valoaga ofoofogia:
“O le Tagavai o le Upumoni ua faatuina; e leai se lima eleelea e mafai ona taofia le galuega mai le alualu i luma; … o le upumoni a le Atua o le a agai i luma ma le manino, mamalu, ma le tutoatasi, seia ulufale atu i konitineta uma, asiasi atu i vaitau uma, faasopolia ai atunuu uma, ma lagonaina e taliga uma, seia faataunuuina faamoemoega o le Atua, ma faapea mai le Ieova Silisiliese ua maea le galuega.”35
A o matou laiti sa masani ona matou usuina upu nei:
Vaivai ea fanau a Siona
E puipui mea tonu nei?
A malosi mai le fili,
Tou te sola ese ea? Leai!
Ia tutumau i faatuatuaga,
Na pele i matua ma e na fasia,
I poloa’i a le Alii,
Tumau pea ma faamaoni.
Fili taumafai e lepeti,
Galuega a le Atua.
Fanau o feagaiga pe tou te,
Tuu le ai uamea? Leai! …
Galue o tatou olataga,
Mea moni tumau ai.
Mataala galulue malosi
Tele e mafai. Ioe! …
Ia tatou agavaa,
Mo le malo o le Alii
Ma latou na faamaoni,
I ana upu fetalai. Ioe!
Ia tutumau i faatuatuaga
Na pele i matua ma e na fasia
I poloa’i a le Alii,
Tumau pea ma faamaoni.36
Ia faamanuia e le Atua le fia miliona o outou le autalavou i totonu o la tatou Ekalesia o e o loo mulimuli ma le agavaa i faatulagaga o le talalelei ma i ai i totonu ia te outou se molimau loloto—le molimau o loo tauave ma fetufaai e i tatou uma. I le suafa o Iesu Keriso, amene.