Na Latou Tulei Saunoa Mai ia i Tatou

Manatu mo Tamaiti ma O Latou Aiga

Pe e te manatua o le a le mea sa tupu i le konafesi aoao? O le a se mea sa e aoaoina mai ai? O nisi nei o manatu e fesoasoani ai ia te oe e faaaoga fautuaga a taitai o le Ekalesia i lou lava olaga.

Peresitene Gordon B. Hinckley: “Mo o tatou tupulaga talavou, le autalavou matagofie o lenei augatupulaga, ou te faapea atu, ia outou faamaoni. Ia tumau i le faatuatua. Ia tumau i le mea e te iloa e sa’o… .

“… Ia outou ola i o outou tulaga faatonuina. Ia tatalo mo se taitaiga ma se puipuiga mai le Alii. Na te le tuulafoaiina lava outou. Na te faamafanafana ia te outou. Na te lagolagoina outou.”

Talanoaina lenei fautuaga mai le saunoaga o loo amata i le itulau e 82. Ona toe iloilo lea o le vaega, O Ou Tulaga Faatalalelei, o loo maua i tua o lau tamaitusi o le Faatuatua i le Atua. Ia talanoaina ma ou matua ia auala o loo e ola ai i ou tulaga faatonuina.

Peresitene Thomas S. Monson, Fesoasoani Muamua i le Au Peresitene Sili: “Ina ua latalata ona aulia e le ma uii, le tama o Clark, ia lona aso fanau e 12 i ai ona tausaga, ma ao ma tuua le Fale o le Autaitai o le Ekalesia, ae taunuu mai loa Peresitene Harold B. Lee ma faafeiloai i maua. Sa ou taua ai e le o toe mamao ae atoa le 12 o Clark, o lea na faliu atu ai Peresitene Lee ia te ia ma fesili i ai, ‘O le a le mea e tupu ia te oe pe a atoa lou 12?’

“… Sa le faatali, ae faapea atu Clark ia Peresitene Lee, ‘O le a faauuina ai au o se tiakono!’”

“O le tali lea na manao i ai Peresitene Lee. Ona ia fautuaina ai lea o le ma tama, ‘Ia manatua, o se faamanuiaga tele le umiaina o le perisitua.’”

Sue i le saunoaga o loo amata i le itulau e 56. Faitau e uiga i le auaunaga sa tuuina atu e Peresitene Monson i se tagata o le uarota a o avea o ia o se tiakono. Ia talanoaina ni auala e mafai ona e avatu ai se auaunaga i se tuaoi po o se tagata o le uarota po o le paranesi.

Peresitene James E. Faust, Fesoasoani Lua i le Au Peresitene Sili: “I se tasi taimi sa alu ai se malaga a Tamamatua i le taumalulu i Idaho, lea sa ia feiloai atu ai i se tagata e masani ai, sa pagatia i le mativa. Sa matuai malulu, ma sa leai se ofu mafanafana o le uo a Tamamatua. O lea sa tatala ese ai e Tamamatua lona ofu mafanafana ae tuu atu ia te ia.

“… Ia amata ona tatalaina le iloa po o ai moni lava oe e ala lea i le aoao atili e uiga i ou augatuaa.”

Ia toe iloilo ma faamanatu nisi o tala o loo i ai i le saunoaga o loo amata i le itulau e 53. Fesili i ou matua e faamatala atu se tala e fiafia i ai e uiga i o la’ua augatuaa. Tusi le tala i se api.

Peresitene Boyd K. Packer, Sui Peresitene o le Korama a Aposetolo e Toasefululua: “Manatua le Uluai Faaaliga a o tootuli le taulealea o Iosefa i le Togavao. Sa oo ina siomia o ia e le pogisa tele. Sa taofia o ia e le mana o le fili, o se tasi mai le lalolagi le vaaia. Sa ia faia le mea e mafai e outou uma ona fai. Sa ia ole atu i le Atua, ma sa aluese ai le mana o le tiapolo mai ia te ia.

“O loo i ai se mana sili i le tatalo. I le avea ai ma se atalii po o se afafine o le Atua, e te mafaia, e pei ona faia e Iosefa, ona tatalo atu i le Atua i le suafa o Iesu Keriso mo le malosiaga.”

Ia talanoaina lenei tala mai le saunoaga o loo amata mai le itulau e 24. Ona faamatala ai lea o le vaega o totoe o le mea na oo i ai Iosefa Samita i le Togalaau Paia. Tagai Talafaasolopito—Iosefa Samita 2:15–20.

Elder Russell M. Nelson o le Korama a Aposetolo e Toasefululua: “Mafaufau i le faatuatua o se tamaitiiti, pe valu tausaga le matua, sa feagai ma se taotoga faatopetope o lona pitogaau. A o taoto o ia i luga o le laulau tipitipi, sa tilotilo ae i le fomai tipitipi ma faapea mai, ‘Fomai, a o lei amataina le taotoga, pe mafai lava ona e tatalo mo au?’

“Sa tilotilo ifo le fomai i le tamaitiiti ma le ofo tele ma faapea atu, ‘E, e le mafai ona ou tatalo mo oe.’”

Sue po o le a le isi mea na fai e le tamaitiiti i lou faitauina lea o le tala lea mai le saunoaga o loo amata i le itulau e 44. Ona mafaufau lea i se taimi na tali mai ai au tatalo. Afai e te manao ai, ona faamatala lea i lou aiga lou aafiaga i lena mea.

Elder Sheldon F. Child o le Au Fitugafulu: “Afai ua lava le alofa o le Atua ua mafua ai ona auina mai perofeta ia i tatou, ona tatau lea ona lava foi lo tatou alolofa ia te Ia e mulimuli ai ia te i latou. O le mulimuli i perofeta o le a fesoasoani e puipuia ai i tatou mai afa o le olaga ma taitai atu ai i tatou ia Keriso.”

Tagai i le saunoaga o loo amata i le itulau e 8. Fai se lisi o auala o le a e mulimuli ai i le fautuaga a Peresitene Hinckley na tuuina mai i lenei konafesi.

Sydney S. Reynolds, Fesoasoani Muamua i le Au Peresitene Aoao o le Peraimeri: “Sa foai mai e le Faaola Lona soifua mo i tatou taitoatasi. Na te silafia lo tatou olioli ma o tatou faanoanoaga foi. Na te silafia lo’u igoa ma lou igoa.”

Tagai i le saunoaga o loo amata i le itulau e 76. E faapefea ona e iloa e silafia e Iesu Keriso lou igoa, o mea e te olioli ai, ma ou faanoanoaga? Ia talanoaina pe mafai faapefea ona faaali atu lou alofa mo Ia.