Perisitua, Ki, ma le Mana e Faamanuia Ai

Elder Merrill J. Bateman

O Le Au Peresitene o le Au Fitugafulu

Ua faamoemoe o le a faaaoga e i latou ua agavaa e umia le Perisitua Mekisateko ia le mana na faasafuaina atu ia i latou ina ia faamanuia ai isi, ae amata i o latou lava aiga.

O se tasi o faamaoniga ofoofogia o le Toefuataiga o le molimau lea a Iosefa Samita ma Oliva Kaotui e tusa ma le tulaga na faafoi mai ai le perisitua ma ona mana i le lalolagi. I ia tulaga taitasi, sa toefuatai mai ai le perisitua ma ki o le perisitua e ni avefeau mai le lagi o e sa umiaina i uluai taimi. Na toe aumaia e Ioane le Papatiso le Perisitua Arona faatasi ma ki o le salamo ma le papatisoga.¹ Sa le gata na toefuatai mai e Peteru, Iakopo, ma Ioane le Perisitua Mekisateko ae faapea foi i “ki [o le] malo.”² Na toe foi mai Mose ma Elia ma ki o le “faapotopotoina” ma le “faamauga.”³ O mea na tutupu o loo faamatalaina ai le toe foi mai o le perisitua e matuai ofoofogia lava ona e ogatasi lelei lava ma le faatulagaga faatusipaia o le toefuataiga o le perisitua i tisipenisione na muamua atu. Mo se faataitaiga, mafaufau i le toefuataiga ma le tuuina atu o mana o le perisitua i le taimi o le Faaola.

I le taufaaiuiuga o Lana galuega, na folafola atu ai e Iesu ia Peteru ia “ki o le malo,”⁴ i le silafiaina lea e le o toe mamao ae malaga ese o Ia ma e moomia e Aposetolo ia ki o le perisitua pe afai latou te taitaia le galuega pe a mavae Lona afio ae. Ina ia mafai ona latou mauaina ia ki, o loo tusia e Mataio e faapea sa ave e Iesu ia “Peteru, Iakopo ma Ioane … i le mauga maualuga” lea sa “liua ai o Ia i o latou luma” ua “faaali mai foi Mose ma Elia ia i latou.”⁵ E lei leva ona uma lenei mea, ae folafola atu e le Faaola e faapea ua i ai i aposetolo ia ki e taitai ai le galuega.⁶ Na saunoa le Perofeta o Iosefa Samita e faapea “na tuuina atu e le Faaola, Mose, ma Elia ia ki ia Peteru, Iakopo, ma Ioane, i luga o le mauga, lea na liua ai i latou i ona luma.”⁷

O le faatulagaga o le toefuataiga o le perisitua o loo faamatalaina e Mataio o le faatulagaga lava lea na mulimulitai i ai lo tatou tisipenisione. O aposetolo ma perofeta na tofiaina e le Alii e umia ki i tisipenisione na muamua atu, na toe foi mai i le lalolagi a o amataina lenei tisipenisione.

I le faatusatusa atu i ai, e lei malamalama ia faifeau o le senituri sefuluiva i le nuu o Palamaira e faapea sa i ai se liliuese tele, sa talitonu i se faiga e matuai ese lava e maua ai le perisitua. Sa latou talitonu o le mana e talai atu ai e oo mai i se valaauga mai le Atua i se tagata ua talitonu ia Keriso. Sa latou le malamalama i le moomia ona mauaina o le perisitua mai se tagata o loo pule ai e ala i le faaee atu o lima.⁸ E le gata i lea, latou te lei malamalama foi i le faamoemoega o le moomiaina o ki o le perisitua.

O le perisitua o le mana ma le pule lea a le Atua ua tuuina mai i le tagata. O ki o le perisitua o le aia tatau lea e faatonutonuina ai le faaaogaina o lena mana. O le Peresitene o le Ekalesia o loo umia ia ki e moomia mo le puleaina o le Ekalesia atoa. O ona fesoasoani i le Au Peresitene Sili ma le Korama a Aposetolo e Toasefululua o loo umiaina foi ki o le malo ma faaaogaina i lalo o le taitaiga a le Peresitene. O peresitene o siteki, epikopo, ma malumalu, misiona, ma korama e tuuina atu foi i ai ki e taitai ai le Ekalesia i eria o loo latou taitai ai. E le umia e o latou fesoasoani ia ni ki ae “maua le pule faasafua e ala i valaauga ma tofiga.”⁹

O le perisitua ma ki o le perisitua e tatala ai le faitotoa i faamanuiaga o le Togisala. O le mana o le perisitua, e papatisoina ai tagata mo le faamagaloina o agasala ma ua mafaia ona o le galuega sili o le alofa tunoa na faia e le Faaola. E mafai e se tasi e umia le Perisitua Mekisateko ona tuuina atu le Agaga Paia. O le faaeeina atu o le Agaga Paia e faamamaina ai tagata o le Ekalesia i le afi, e taitaiina atu ai i le upumoni, faamafanafanaina ai, faapaiaina ai, ma faamanuiaina ai i le tele o auala i le avea ai ma tagata ua tofo i faamanuiaga o le Togisala. O le pule e faamau ai e mafai ona fusia faatasi ai se alii, o se tamaitai ma le la fanau e faavavau, ma mafai ona faaeaina ai i le lalolagi a sau—o se faamanuiaga foi mai le Faaola.

Ua faamoemoe o le a faaaoga e i latou ua agavaa e umia le Perisitua Mekisateko ia le mana na faasafuaina atu ia i latou ina ia faamanuia ai isi, ae amata i o latou lava aiga. O se tasi o talatuu silisili o le Toefuataiga o le maua lea e se tama ua faauuina i le Perisitua Mekisateko le aia tatau e faamanuia ai lona toalua ma lana fanau pe a musuia ma pe a moomia e i latou se faamanuiaga.

I le tele o tausaga ua mavae, sa i ai se mea na tupu i lo matou aiga lea na tuua ai se lagona e le mafaagaloina i le taua ma le aoga o se faamanuiaga faaletama. O lesona na aoaoina atonu e aoga foi ia te outou.

Ina ua sauni le ma fanau matutua e amataina a latou aoga i le aoga tulagalua, sa faapea ona ma fuafua ai ma Sister Bateman o le a tuuina atu se faamanuiaga faaletama i tamaiti taitoatasi i le amataga o le tausaga faaleaoga. O le afiafi faaleaiga e sosoo ma le a’e o le aoga o le taimi lea e faia ai. O le tausaga na ulufale atu ai le ma atalii matua o Michael i le vasega tolu, e i ai ni lagona faapitoa ia i matou. I le gasologa o le taumafanafana na tuanai sa auai atu ai o ia i le Liki Laiti o le peisipolo. E fiafia tele o ia i le taaloga. Ina ua matou faapotopoto mo le afiafi faaleaiga a o lei a’e le aoga, sa faasilasila mai ai e Michael faapea na te le manaomia se faamanuiaga. Ua uma lona uluai tausaga i le Liki Laiti, ma o faamanuiaga e mo na o tamaiti laiti.

Sa ma tetei ma Sister Bateman. Sa ma faamalosiau atu ia te ia, ma fautua atu i ai faapea o le a fesoasoani se faamanuiaga ia te ia i ana meaaoga. O le a avea ma se puipuiga ia te ia. O le a fesoasoani ai ia te ia i ana sootaga ma ona uso, tuafafine ma uo. O le ma faamalosiau atu i ai faatasi ai ma sina faatauanau, sa le aoga lea. Ua matua tele o ia. I le talitonu ai i le mataupu faavae o le saoloto e filifili ai, sa ma le faamalosia ai se faamanuiaga i luga o se tamaitiiti ua valu tausaga le matua. Na maua uma lava e tamaiti se faamanuiaga i lena tausaga sei vagana ai lava ia Michael.

Sa amataina le tausaga aoga e pei ona masani ai. Sa lelei lava ia Michael ma isi tamaiti i le aoga, ma sa fiafia le aiga i a latou fegalegaleaiga. Ona oo mai lea o le masina o Me na sosoo ai, ma ua oo foi i le taimi e amata ai le Liki Laiti a le peisipolo. O le aso na sosoo ma le aso mulimuli lava o le aoga, na talo ai e le faiaoga o le ‘au a Michael se koleniga a le ‘au. Sa le mafai ona tatali le naunau tele o Michael. Sa toe o se aga ona tino lea o lana miti. O le a avea o ia ma mulumu muamua. O le malae peisipolo e le mamao ese lava mai lo matou fale. Sa savavali atu tamaiti ma le faiaoga i le malae peisipolo e sopoia ai se aualatele e matuai pisi lava. Ina ua uma koleniga, sa amata ona toe foi atu ia tamaiti ma le faiaoga i le fale. Sa tamomoe atu muamua ia Michael ma sana uo i luma atu o le faiaoga ma isi tamaiti. Ina ua tau lalata atu tamaiti i le auala pisi, sa galo ia Michael ona autilo solo ma faapea loa ona tamoe saosaoa i luma ane o se taavale o loo aveina e se alii talavou e 16 tausaga le matua o le taimi muamua lea ua ia aveina ai se taavale. Pe mafai ona outou manatu i le popole na oo i le loto o le alii talavou lea? Sa tu malosi o ia i taofi ma ta i autafa i se taumafaiga ina ia misi le tamaitiiti. Ae paga lea, o le apaapa pito i luma na taia ai Michael ma lelea atu i luga o le aualatele.

I se taimi puupuu mulimuli ane, na ma maua ai ma Sister Bateman se telefoni mai leoleo. O Michael, o loo i se tulaga faigata, ma o loo i totonu o le taavale a le falemai o loo avatu i le falemai. Sa taua ona ma faavave atu. Ae ma te lei o ese atu, sa ou vili atu i sau uo ma talosaga atu i ai ina ia matou feiloai i le falemai ma fesoasoani mai i le tuuina atu o se faamanuiaga. O le 20 minute na tietie atu ai o le tietiega pito i umi lea o o ma olaga. Na ma tatalo faatauanau mo le ola o le ma atalii ma ia iloa le finagalo o le Alii.

A o paka le ma taavale i autafa o le faitotoa o le potu mo faalavelave faafuasei, sa ma vaaia ai se leoleo o savavali mai i fafo ma se alii talavou o loo tagi. Na iloa mai i maua e le leoleo ma faailoa mai le alii talavou faapea o le avetaavale lea o le taavale. O le lava o lo ma iloa i le tala atoa o le mea na tupu na faapea ona ma opoina mai ai o ia ma tau atu i ai ua ma iloa e le o sona sese. Ona ma ulufale atu lea i le falemai e sue ia Michael. A o ma ulufale atu i lona potu, sa faapea ona galulue faanatinati ia fomai ma tamaitai tausimai, e togafiti ona manuaga. Sa taunuu atu lau uo ma sa ma talosaga atu loa pe mafai sina lua po o le tolu minute mo na o ma’ua ma ia. Sa faauu e lou uso a perisitua, ae o au sa faamauina. A o ou tuuina ou lima i luga o le ulu o Michael, na oo mai se lagona o le mafanafana ma le filemu ia te au, na oo mai upu, ma sa tuuina atu folafolaga. Ona faanatinati atu lea o ia i le potu o taotoga.

O le isi fa vaiaso na sosoo ai, sa taoto ai Michael i se moega o le falemai ma lona ulu sa fusi ma lona vae sa toso e ni uamea e faasa’o ai. O Aso Lulu uma lava, e asiasi atu ai ana uo o le Liki Laiti ia te ia pe a mavae se taaloga ma avatu se lipoti ia te ia. O Aso Lulu taitasi foi, e loimata ai mata o Michael ma tafetafe ifo i ona alafau a o faamatala atu i ai e tamaiti le taaloga. Ina ua mavae vaiaso e fa, sa toe faasima ai le tino o Michael mai lona fatafata e oo i ona tamaivae. E faalua pe faatolu ona matou aveina o ia i se taaloga e matamata ai i ana uo a o taaalo. Ua mavae atu le isi fa vaiaso, ma sa toe suia le sima mai ona suilapalapa e oo i ona tamaivae. E toe lua aso a’e le aoga, ae aveese le sima mulimuli. A o faapotopoto le aiga i le po na sosoo ai mo faamanuiaga faaleaoaoga, e i ai se isi e manatu o ai na manao muamua i le faamanuiaga? O se alii e iva tausaga le matua, ua fai si matua ma ua fai si atamai, sa muamua i le laina.

I le gasologa o tausaga sa malamalama ai le ma fanau e faapea o faalavelave faafuasei e le faapea e taofia uma lava e faamanuiaga faaleperisitua, ae na latou iloa foi e sili atu ma le tasi le ituaiga o puipuiga e maua mai i le perisitua. O le taimi nei, o le fanau a le ma fanau o i latou ia ua mauaina ia faamanuiaga faaleperisitua. Ua oo atu nei i le augatupulaga lona lua ma le tolu lenei faiga. Matou te talitonu o lenei faiga, e pei o le aiga, o le a manumalo e oo i le faavavau.

Ou te faafetai tele ona o se taulealea e 14 tausaga le matua, o Iosefa Samita, na alu atu i se togavao ma ole atu ina ia iloa po o fea le Ekalesia e moni. O le a faavavau ona ou faafetai mo le tali na ia mauaina ma le toefuataiga na sosoo mai ai o le perisitua ma ona ki e ala mai ia Ioane le Papatiso; Peteru, Iakopo ma Ioane; ma isi avefeau paia. Ia tatou faaaogaina lenei mana sili e faamanuia ai fanau uma a le Atua e amata atu i totonu o o tatou lava aiga, o lau tatalo lea i le suafa o Iesu Keriso, amene.