Ua Lagolagoina e le Au Paia ia Suiga; Ua Tulei Saunoa foi Taitai e Tetee Atu i Aafiaga o le Lalolagi

I le sauniga i le afiafi o le Aso Toonai, i le Konafesi Aoao lona 173 Faaleafatausaga, e toatele Fitugafulu Pule Eria sa lagolagoina ai. Sa fofogaina ai foi le suiga i le au peresitene aoao o Alii Talavou.

E toatolu uso o le Korama Muamua o Fitugafulu sa tuuina atu i ai le tulaga aloaia faamamaluina ma faamalolo mai ai i la latou auaunaga o ni Au Pulega Aoao. Ona o tausaga o la latou tautua i le Ekalesia, o lea sa tuuina atu ai ia Elder Angel Abrea, Elder William R. Bradford, ma Elder Cree-L Kofford ia le faamalo ma le faafetai mai tagata o le Ekalesia sa tauaofia ai i le Fale Autu mo Konafesi i le Aai o Sate Leki, faapea foi i falelotu i vaega eseese o le lalolagi.

Sa faamalolo mai foi o ni uso o le Korama Lua a Fitugafulu ma tuuina atu i ai le faafetai ma le faamalo mo la latou foi tautua, ia Elder Duane B. Gerrard, Elder J. Kent Jolley, ma Elder D. Lee Tobler.

E toafa ia Fitugafulu Pule Eria fou sa tofia talu ai nei foi, ma sa lagolagoina i le konafesi lenei: O José A. Castro, Santo Domingo, Dominican Republic; William K. Jackson, New Delhi, India; Paul V. Johnson, Sandy, Utah; ma Jay L. Sitterud, Highland, Iuta.

E sefulufitu Fitugafulu Pule Eria sa faamalolo mai o latou tofiga. (Tagai i le vaega “O Le Lagolagoina o Taitai o le Ekalesia, itulau e 23 o le lomiga lenei, mo le lisi atoa.)

Sa fofogaina mai ai foi suiga i le au peresitene aoao o Alii Talavou. Sa faamalolo mai Elder Glenn L. Pace ma Elder Spencer J. Condie o le Au Fitugafulu, sa avea ma fesoasoani muamua, ma le fesoasoani lua. Sa lagolagoina ai foi Elder Lynn G. Robbins o le Au Fitugafulu e avea ma fesoasoani muamua, ma Elder Donald L. Hallstrom o le Au Fitugafulu e avea ma fesoasoani lua. O loo tumau pea ona avea Elder F. Melvin Hammond o le Au Fitugafulu ma peresitene aoao o Alii Talavou.

I le sauniga o le taeao o le Aso Toonai, sa valaaulia ai e Peresitene Gordon B. Hinckley ia Elder David B. Haight e susu atu la te faatasi i le pulelaa. Sa fofogaina e Peresitene Hinckley le aofia ua 97 tausaga o le soifua o Elder Haight, ma “ua sili atu ona umi tausaga o lona soifua nai lo se isi lava Aposetolo i le talafaasolopito o lenei tisipenisione.” Sa talotalo atu le aao o Elder Haight i le aofia, ona faataga ai lea o ia e tuumuli ese atu mai le konafesi ona sa faataotolia i gasegase i se taimi e le i mamao atu.

I le saunoaga i lena lava taeao, sa toe tulei ai Peresitene Hinckley e uiga i le faatupulaia o le Ekalesia, ma ta’ua ai faapotopotoga o le Au Paia i vaega eseese o le lalolagi: “Ua i ai nei ni a tatou faapotopotoga malolosi i setete taitasi uma o le Iunaite Setete ma itumalo uma o Kanata. Ua faapena foi i setete uma o Mekisiko, o nuu uma i Amerika Tutotonu ma malo uma i Amerika i Saute. Ua i ai a tatou faapotopotoga malolosi i Ausetalia ma Niu Sila ma Motu o le Pasefika. Ua mauaa foi i atunuu i Asia. Ua i ai foi i malo uma i Europa i Sisifo ma le tele o Europa i Sasae, ma ua tatou mauaa foi i Aferika.”

“Ma ua na o le amataga lenei,” sa toe faaopoopo mai ai le saunoaga a Peresitene Hinckley. “E anoanoai mea e le i faia… . E leai se tuaoi o la tatou galuega. O le a faaauau pea i lalo o le taitaiga a le Alii.”

Sa fofogaina mai foi e Peresitene ia faamatalaga lata mai e uiga i le tele o nisi itu o le galuega, e aofia ai le galuega faafaifeautalai, o taumafaiga e fesoasoani ai i tagata (tagai i le tala e faatatau i ai o loo i le itulau lenei), ma le Tupe Faaagaga mo Aoga.

“E oo mai i le taimi nei, tusa ua 10,000 nonogatupe ua faamatuu atu e le Ekalesia i alii ma tamaitai talavou i Latina Amerika, Asia, Aferika, ma isi vaega o le Ekalesia,” o lana lipoti mai lea.“ E oo mai i le aso, e tusa ma le 600 alii ma tamaitai talavou ua maea a latou aoga… . Matou te fiafia e lipoti atu o loo solosolo lelei lava le polokalama, ma e iu lava ina faateleina pe a tatou maua le poto masani.”

Sa tulei saunoa foi Peresitene Hinckley ma le toatele o isi taitai i le fai ifo o tulaga ua i ai le lalolagi, ma faamanatu mai ai i e sa auai i le konafesi o le a le suia lava tulaga faatonuina o le Ekalesia.

“Ou te talitonu ma molimau atu, o le misiona a lenei Ekalesia o le tu lea e fai ma tagavai i malo ma se malamalama i le lalolagi,” o le saunoaga lea Peresitene Hinckley i lana tuleiga i le taeao o le Aso Sa. “O loo siomia i tatou uma i malosiaga o le a tata’iese ai i tatou mai le faataunuuina o lena taumafaiga. E uunaia pea lava pea i tatou e le lalolagi. Tatou te faalogoina lava le taufai uunai malosi mai o itu uma ina ia faavaivaia lo tatou malosi e tetee atu ai [le agasala], ia tatou faamatuu atu [i le agasala], o sina mea itiiti iinei ma sina mea itiiti iina… . E tatau ona tatou tutu ma le mausali. E tatau ona tatou tetee atu i le lalolagi. Afai tatou te faia, o le a avea le Silisili Ese ma o tatou malosiaga ma o tatou talipupuni, o lo tatou taimua ma le e aumaia faaaliga mo i tatou.”

Sa faamausali mai foi e Peresitene Boyd K. Packer, Sui Peresitene o le Korama a Aposetolo e Toasefululua, le leai o se naunau o le Ekalesia e fesuiai ona tulaga faatonuina. Ae peitai, e tusa lava po o le a lo tatou foliga mai tatou te le o ogatasi ma faatulagaga a le lautele, e tusa po o le a le tauemuina o o tatou faatulagaga, e tusa po o le a le gauai atu o isi i faaosoosoga, o le a tatou le gauai atu lava, e le mafai ona tatou gauai atu i ai,” o lana saunoaga lea i le sauniga i le afiafi o le Aso Toonai.

Sa taloina foi e Elder M. Russell Ballard o le Korama a Aposetolo e Toasefululua ia le Au Paia ina ia faatino loa, i lana saunoaga i le taeao o le Aso Toonai, ma uunaia ai i latou ina ia tutu ma tetee atu i aga faatupulaia o le lalolagi. “E moomia ona sii i luga o tatou leo faatasi ma isi tagatanuu popole i le lalolagi atoa i le tetee atu i nei faiga ua fotu mai. E moomia ona tatou tau atu ia i latou o e o loo lagolagoina nei ala o faasalalauga mataga ua lava nei mea ua i ai. E moomia ona tatou lagolagoina ia polokalama ma oloa e lelei ma musuia,” o le saunoaga lea a Elder Ballard. “Uso e ma tuafafine, aua tou te faatagaina ala o faasalalauga e pulea outou. Ia mumusu e pulea outou e isi. Ia mumusu e lagolagoina na polokalama e solia ai tu ma aga o uiga taua faaleaiga.”