O Se Molimau Malosi i le Misiona a le Perofeta o Iosefa
O le Perofeta o Iosefa o se faataitaiga ma se faiaoga o le tumau lelei i le faatuatua… . Ou te faafetai ma alofa ia te ia, o le perofeta a le Alii mo le Toefuataiga.
I le afiafi ao lei faamaturoina le Perofeta o Iosefa Samita i Karefasi, na tuuina atu ai e ia lana molimau ia i latou na leoleoina o ia. Na ia molimau atu o le Tusi a Mamona e moni e mai le Atua. Na ia molimau atu i galuega a agelu ma ua toe faavaeina le malo o le Atua i luga o le fogaeleele.
Ou te le iloa pe na i ai se tasi o na leoleo sa tatalo i lena po. Sa sauni le Agaga Paia e tau atu ia i latou e moni le savali ofoofogia. Faatasi ai ma se molimau a le Agaga na semanu latou te iloa ai e tatau ona latou talosaga atu mo se papatisoga. Ona mafai lea ona latou mauaina le meaalofa taugata o le Agaga Paia. O lena meaalofa e mafai ai ona latou iloa le moni o mea uma. Ou te le mautinoa pe na i ai se tasi o i latou na iloaina i lena po lo latou i ai i le faitotoa e savavali atu ai i lena ala e tasi lea e taitai atu ai i latou i le Faaola i le lalolagi a sau, ina ia vaai i Ona fofoga ma le fiafia ma faalogo atu i upu: “Sau ia ia te au, o oe na le ua manuia, ua saunia le mea mo oe i maota o lo’u Tama.”1
E tofu uma lava i tatou ma tagata tatou te alolofa i ai. Mafaufau nei ia i latou. Atonu o a tatou fanau, po o fanau a fanau. Atonu e te mafaufau i lau tane po o lau ava. Atonu o se tasi o loo e aoaoina e oe o lena le faifeautalai. Atonu o se uo. E te manao ma lou loto atoa ina ia i ai se aso ia latou faalogo atu ai i na upu mai le Matai. Ma ina ia oo mai lena faamanuiaga, o le a latou moomia lena molimau na tuuina atu e le perofeta i Karefasi ia olaola i o latou loto i tofotofoga uma o le olaga, e pei ona sa faia ia te ia.
Ina ia amataina, e mafai ona tatou ofoina atu ia i latou le mau a molimau vaaitino. Na saunia e le Alii ia isi tagata e lagolagoina Iosefa ina ia faamaonia le mea na faia e le Alii. Sa latou faatasi ma le perofeta ina ua avanoa le lagi.
Na folafolaina e Oliva Kaotui le uluai lauga faafaifeautalai i le Aso Sa muamua ina ua maea ona faatuina le Ekalesia. Na alu atu o ia i le misiona e talai atu le mea na ia iloa e ala i mea na ia vaai i ai, ma faalogoina, ma lagonaina. Sa ia sainia faatasi ma le isi toalua se mau latou te lei teenaina lava. O le latou molimau o loo lomia i le pito i luma o le Tusi a Mamona.
“Ia iloa e atunuu uma, ma ituaiga, ma gagana eseese, ma nuu e oo atu i ai lenei tusi, ona o le alofa tunoa o le Atua le Tama, ma lo tatou Alii o Iesu Keriso, ua matou vaaia papatusi ua i ai lenei tala; o le tala lea i le nuu o Nifae atoa ma sa Lamana o latou uso, aemaise foi le nuu o Iareto o e na o mai mai le ‘olo e pei ona faamatalaina. Ma ua matou iloa ua faamatalaina i le mea foaifuaina mai le mana o le Atua, aua ua fetalai mai ai lona siufofoga ia te i matou; o le mea lea ua mautinoa ai i matou ua moni lenei tusi. Matou te molimau atu foi ua matou vaaia togitogiga ua i ai i papatusi, ma ua faaalia ia mea ia te i matou i le mana o le Atua, a e le o tagata. Matou te tautino atu ma le upu faamaoni, na afio ifo mai le lagi le agelu a le Atua, ma ua ia aumai ma tuu mai i luma o matou mata, ina ia matou vaavaai i ai ma iloa o papatusi ma togitogiga ua i ai; ma ua matou iloa ona o le alofa o le Atua le Tama ma lo tatou Alii o Iesu Keriso na matou iloa ai ma molimau ai i nei mea ua faamaoni; o le mea ofoofogia foi i la matou vaai, e ui i lea, ua poloai mai le siufofoga o le Atua ia te i matou ia matou molimau atu ai. O le mea lea matou te molimau atu ai i nei mea, ina ia tausia poloaiga a le Atua. Ua matou iloa foi, afai e faamaoni i matou ia Keriso, e mama o matou ofu i le toto o tagata uma lava, a e maua i matou ma le le pona i luma o le nofoa faamasino o Keriso, a e nofo faatasi ma ia e faavavau i le lagi. Ia i ai le mamalu i le Tama, ma le Alo, ma le Agaga Paia, o le Atua e tasi. Amene.
Oliva Kaotui
Tavita Uitimera
Matini Harisi”2
O i latou e te alofa i ai e mafai ona sili atu ni faamaoniga faaletino latou te maua i mea na vaaia ma faalogoina e na molimau. O na molimau e toatolu sa ia i latou se mea sili atu, o se mea tatou te manaomia uma. Na molimau atu le Agaga Paia i o latou mafaufau ma loto faapea o mea na latou vaai ma faalogo i ai e moni ia. Na tau atu e le Agaga ia i latou o le agelu e mai le Atua ma o le siufofoga, o le siufofoga o le Alii o Iesu Keriso. O lena molimau a le Agaga na tuuina atu ia i latou ma e toatele e lei i ai iinei. O se molimau e mafai ona maua e i tatou, pe afai tatou te agavaa mo le mafutaga a le Agaga Paia, ma tumau ai ia i tatou e faavavau.
E lei teenaina lava e molimau e toatolu la latou mau e uiga i le Tusi a Mamona. Latou te lei mafaia aua sa latou iloa e moni. Sa latou faia ni osigataulaga ma feagai ma faigata e sili atu nai lo mea ua iloa e le toatele o tagata. Na tuuina atu foi e Oliva Kaotui lena lava molimau i le paia o le pogai o le Tusi a Mamona a o taoto o ia ua tali oti. Ae i taimi o faigata, sa maluelue ai lo latou faatuatua e uiga ia Iosefa o le perofeta lava a le Atua ma e na o le pau le ala e o mai ai i le Faaola, o Lana Ekalesia toefuataiina lea. Sa latou faaauau pea ona faamautuina le mea na latou vaai ma faalogo i ai i lena aafiaga ofoofogia, i le gasologa o vaitaimi uumi o le o ese mai le Ekalesia ma Iosefa, sa faateteleina ai le malolosi o le latou molimau.
Na tuuina atu e le Alii i isi le molimau a le Agaga e aunoa ma faamaoniga faaletino i e sa matuai tofotofoina i faigata ma tiga. Sa tumau mausali ia Polika Iaga, Ioane Teila, Heber C. Kimball ma isi i le latou molimau. Sa latou tutu mausali i le faatuatuaga aua sa latou totogia le tau e faatumauina ai le mafutaga a le Agaga Paia ma le molimau faamaoni e na o Ia e aumaia.
Talu ai ona o lena mea, sa sili atu mea na latou maua nai le manatuaina o le taimi na musumusu atu ai le Agaga i o latou mafaufau ma loto o loo soifua le Atua, o Iesu o le Keriso, ma o Iosefa o lo latou perofeta. Ma sa sili atu mea na latou maua nai lo le manatuaina o le lagona o le filemu ma le olioli na aumaia e lena molimau. Talu ai ona sa latou agavaa mo le mafutaga a le Agaga Paia, o lea sa latou mafai ai ona fai atu i soo se tulaga, e ui i le faigata: “Na ou iloaina i lena taimi. Na ou lagonaina i lena taimi e moni. Ua lagonaina nei e moni lava.”
Sa latou faia ni mea faigofie ina ia tausia ai le olaola ma le malosi o lena molimau. E mafai ona tatou aoaoina i latou tatou te alolofa i ai ina ia latou faia na lava mea e tasi. Afai e faia na mea ma le faamaoni, latou te faatagaina le Agaga Paia ina ia avea ma soa tumau. Ma e mafai ona tatou folafola atu i e tatou te alolofa i ai o le a latou lagonaina le olioli ma le filemu a o faamautuina atu e le Agaga le moni, pe afai latou te ole atu mo lena faamanuiaga i le faatuatua.
O lenei, e sili atu ona tatou aoaoina atu mea a le Agaga i faataitaiga ma le molimau. E le tele sou manatuaina o mea na tau mai e ou matua e uiga i le Agaga Paia, ae ou te manatuaina le mea na ou lagonaina ina ua ou vaaia i laua o faia mea na aumaia ai le Agaga Paia i totonu o lo matou fale. O nisi nei o mea e mafai ona e aoao atu ia i latou tou te alolofa i ai faatasi ma faataitaiga ma le molimau, faapea ma le mautinoa o le a auina mai e le Alii le Agaga e faamautuina atu le moni i o latou mafaufau ma o latou loto.
Aoao i latou ia tatalo atu ma le faatuatua i le Tama i le suafa o Iesu Keriso. O loo i ai se folafolaga i totonu o le tusi a Ominae e uiga i lena mea. Sa ou faataitaia, ma e moni lava.
“O lenei foi, o’u uso pele e, ou te loto ina ia o mai outou ia Keriso, o Le Paia o Isaraelu, ina ia tofusia outou i lana faaolataga, ma le mana o lona togiolaina. Ioe, ina o mai ia ia te ia, ma tuu mai o outou agaga atoa e fai ma taulaga ia te ia, ma ia tutumau i le anapogi ma le tatalo, ma ia tutumau e oo i le iuga, o soifua lava le Atua, e faaolaina outou.”3
Na faaali mai e le taulealea o Iosefa Samita ia i tatou le auala e tatalo ai faapena. Na talitonu o ia i le folafolaga o loo i totonu o le tusi a Iakopo.4 Na alu atu o ia i le togavao ma le faatuatua o le a tali mai lana tatalo. Na manao e fia iloa po o le fea ekalesia e auai atu i ai. Na lava lona usiusitai e saunia ai e faia soo se mea e poloaiina ai o ia. O lea sa ia tatalo ai, e tatau foi ona faapena i tatou, ae ua uma ona tautino atu o le a ia usiusitai.
O le mea na poloaiina o ia e fai na moomia ai lona agaga atoa, ma taualuga ai i lona ola. Na tumau o ia i le luasefulu fa tausaga na sosoo mai ai e ala lea i le faaauau pea ona tatalo ma lena faatuatua ma le lotomaualalo e pei o se tamaitiiti. E mafai ona tatou aoaoina e tatou te alolofa i ai ina ia tatalo ma le faamoemoe e usiusitai. E mafai ona tatou folafola atu ia i latou o le a latou maua le mafutaga a le Agaga Paia. O le a molimau atu e le Agaga le moni i o latou loto i taimi uma latou te faitau ai i tusitusiga paia ia na oo mai ia i tatou e ala mai i le Perofeta o Iosefa Samita. Ma o le a toe faamautu atu e le Agaga, na fetalai mai le Atua e ala i Lana perofeta.
Aoao i latou ina ia mafaufau loloto i tusitusiga paia i aso taitasi, faatasi ma le faatuatua o le a aoaoina i latou e le Agaga. Faafofoga mai i nei upu mai le mau na faaliliuina e Iosefa Samita. Faamoemoe ia aoaoina oe i le mea e tatau ona e faia. O le a e lagonaina uunaiga i le auala e tatau ai ona e uia ina ia maua ai se malamalama i tusitusiga paia ma le auala e tatau ai ona e aoaoina atu i tagata e te alofa i ai:
“O le mea lea e tatau ai ona outou fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau.”5
Na aoaoina i tatou e le Perofeta o Iosefa i le uiga o le fiafia i tusitusiga paia. Na ia saunoa mai o le Tusi a Mamona o le a “latalata atu ai se tagata i le Atua e ala i le usitaia o ona mataupu, nai lo se isi lava tusi.”6 O le a e ola latalata atu ai i le Alii ma faateleina lou alofa ia te Ia. O le folafolaga lena o loo i le Iakopo 3:2:
“E! outou uma ua loto mama, ina faaea ia o outou ulu ma talia le afioga malie a le Atua, ma ia fiafia i lona alofa, aua tou te mafaia e faavavau, pe afai ua mausali o outou manatu.
O le a maua e oe ma i latou e te alofa i ai le afioga a le Atua e ala i le usiusitai i ai. O le a mafai ai e i latou ona lagonaina Lona alofa. O se tasi lena o faamanuiaga silisili o le meaalofa o le Agaga Paia. Afai tatou te lagonaina lena alofa ua mafai loa ona tatou iloa o lo tatou faamoemoega i le olaga ua faamaonia lea e le Atua. O le taumafa lena i le fua sili ona manaia o loo faamatalaina mai i le Tusi a Mamona.”7
Aoao i latou ia ositaulaga ina ia fausia ai le malo o le Atua. O lena osigataulaga e aumaia ai le molimau a le Agaga. Na faaliliuina e le Perofeta o Iosefa se folafolaga matagofie na tusia e se perofeta anamua lava mo o tatou aso:
“Amuia lava i latou o e saili e aumai la’u Siona i lea aso, aua e ia te i latou le mea foaifuaina ma le mana o le Agaga Paia, a e afai latou te tumau e oo i le iuga, e faaeaina i latou i le aso gataaga, e faaolaina foi i latou i le malo faavavau o le Tamai Mamoe; ai se talai atu foi le filemu, ioe, o le tala e olioli tele ai, e matagofie naua i latou i luga o mauga.”8
E mafai e tagata uma ona maua lena folafolaga. E mafai e le tagata aupito i laitiiti ma le tagata foi e aupito fou mai o le au paia, ona saili ina ia fausia le Malo o le Atua. O Siona e aofia ai tagata taitoatasi ma aiga. Afai e faateleina lo latou faatuatua, ua faamausaliina le faavaeina o le malo. E mafai ona tatou taumafai ina ia fesoasoani i ai i aso uma. E oo lava i sina gaoioiga faatauvaa e fausia ai le faatuatua o le isi tagata po o se aiga, ua agavaa ai i tatou mo le meaalofa ma le mana o le Agaga Paia. E molimau le Agaga Paia i le upumoni. O lea, o la tatou auaunaga e faateleina ai lo tatou faatuatua o Iesu o le Keriso, o loo soifua lo tatou Tama Faalelagi ma e alofa ia i tatou, ma o Iosefa o lo latou perofeta. E mafai ona e manatu e tupu lena mea, i taimi uma e te alu ai i se aiga e atiina ae le faatuatua, a o avea ai oe ma se faiaoga o aiga po o se faiaoga asiasi po o se uo foi.
Atonu e le lagonaina e nisi lena faamanuiaga i le latou auaunaga i le Ekalesia. Ae mafua mai ona o le taulai atu tele o i latou i le auiliiliga o le faataunuuina o se mea ae le o le avanoa matagofie e “talai atu ai le filemu, o le tala e olioli tele ai” i fanau a le Atua i Lona malo. Afai o le auala lena tatou te vaai atu ai i la tatou auaunaga, o le a le gata e faaeaina i tatou i le aso gataaga ae faafouina ma faamalosiauina i luga o le ala. Ma o le a molimau mai le Agaga o le malo lenei o le Alii ua toefuatai mai i aso e gata ai.
Aoao i latou ina ia alolofa atu i isi e ala i lo latou auauna atu i isi tagata. O lena mea e aumaia ai le Agaga. Na aoao mai e le Perofeta o Iosefa lena mea ma sa ia soifua ai. Mai le tele o faataitaiga na tusia e uiga i lona uiga alofa, o le faataitaiga sili ona ootia ai au lea na tupu i le falepuipui i Karefasi, i le po a o lumanai lona maliu. O se tasi o alii na o atu faatasi ma ia iina, o ia lea o Dan Jones. Na lagonaina lava e le perofeta le matautia o tagata leaga. E i ai se mafuaaga e tatau ai ona ia mafaufau mo lona lava tulaga pagatia. Ae peitai, sa liliu atu lona loto e faamafanafana i se isi.
“Ina ua foliga mai ua momoe gapepe tagata uma, sa musumusu atu loa Iosefa ia Dan Jones, ‘O e fefe e te oti?’ [Sa tali] Dan, ‘Pe ete manatu ua oo mai lena taimi? Talu ai ona o loo ta faatasi i ai i lea tulaga, o lea ou te le manatu ai o le a fefe se isi i le oti.’ Sa tali atu Iosefa: ‘O le a e malaga i Uelese ma faataunuuina le misiona na tofia ai oe ae e te lei oti.’”9
Na faasaoina ia Dan Jones ina ia auauna atu i ni misiona i Uelese. E fiaafe tagata o Uelese na liliu mai ma o mai i Siona. O nisi o ni tagata pepese talenia. O i latou o nisi na avea ma uluai sui o le Aufaipese a le Tapeneko. Afai tatou te faalogo atu i le aufaipese o pepese, ou te faamoemoe tatou te manatuaina ia Dan Jones, le uo faamaoni a le Perofeta o Iosefa. Aoao i latou e te alofa i ai ina ia manatua le faamafanafanaga na tuuina atu e Iosefa ina ua ia moomia se faamafanafanaga. Afai tatou te faamafanafana atu i isi ona o lo tatou faatuatua i le Alii, Na te auina mai le Fesoasoani ia i tatou. Ma o le Fesoasoani, o le Agaga Paia lea, na tuuina atu ia Iosefa le mana e tuuina atu ai se faamalosiauga matagofie faavaloaga.
Na faaali atu e Iosefa i lona agaalofa le moni o upu mai le Tusi a Mamona: “O le mea lea, ia outou uumau ai le alofa, ua silisili i mea uma, aua e faaleaogaina mea uma—
“A o le alofa moni o le alofa mama lea o Keriso, e tumau ia e faavavau; o i latou uma foi ua maua o i ai lea alofa i le aso gataaga e lelei ia te i latou.”10
O le Perofeta o Iosefa o se faataitaiga ma se faiaoga o le tumau lelei i le faatuatua. Ou te le tapuai ia te ia, ae ou te faafetai ma alofa ia te ia, o le perofeta a le Alii mo le Toefuataiga. Na fesoasoani o ia ia te au ia ou tatalo ma faamoemoe ou te usiusitai. Ua sili atu ona ou mafaia ona fiafia i le afioga ma le alofa o le Atua. Talu ai ona o ia, o lea ua sili ai ona ou lagonaina le Agaga Paia i taimi ou te taumafai ai e atiina ae le faatuatua o se isi tagata i le malo o le Atua. Ma e talu ai ona o mea ua ou iloa i le Perofeta o Iosefa ma tusitusiga paia na faaalia mai e ala mai ia te ia, o lea ua sili ai ona ou lagonaina soo le alofa o le Atua mo Lana fanau ma Lona alofa mo au pe a ou taumafai e punou ifo i lalo ma sii ae se tasi i luga.
Ou te tatalo ina ia mafai ona tutumau i tatou ma i latou o e tatou te alolofa i ai i le Talalelei toefuataiina a Iesu Keriso ma totonu o Lona malo. Ou te tatalo ina ia tatou tausia pea le folafolaga pe a tatou aai ma feinu i le faamanatuga ina ia manatua pea o Ia ina ia mafai ona faatasi pea Lona Agaga ma i tatou. Ou te tatalo ina ia tatou valaauliaina pea le Agaga Paia i afiafi faaleaiga ma lesona a faifeautalai ma taimi uma pe a tatou tapuai faatasi, e ala i mea tatou te faia, ma mea tatou te tautatala ai, ma ituaiga tagata e i ai i tatou.
Ou te molimau atu o loo soifua le Atua. Ou te iloa o loo soifua Iesu Keriso ma o Ia o lo tatou Faaola. O Lana Ekalesia lenei. O Iosefa o Lana perofeta. O Peresitene Gordon B. Hinckley o Lana perofeta i aso nei. Ou te iloa lenei mea e ala i le Agaga o loo tauina mai ia te au e moni lena mea. Ou te molimau atu ai, i le suafa paia o Iesu Keriso, amene.