Ina Tatou Ola Atoatoa Ia i le Talalelei
E maeu le ofoofogia o le galuega o loo outou faia, outou na o le Au Paia [faamaoni] o Aso e Gata Ai i le lalolagi atoa, o loo outou tauaveina i o outou loto se molimau maua’i ma le mausali.
E maeu le matagofie o lenei taimi sa tatou mafuta faatasi ai o ni uso ma ni tuafafine. O se mea matagofie moni lava le faataatia ese o o tatou manatu i mea o le lalolagi, ae faaavanoa se Aso Toonai ma se Aso Sa e mafaufau loloto ai i mea faalelagi.
Tatou te matua pisi uma i a tatou galuega faalelalolagi ia e fetosoaiina i tatou i i ma o. Tatou te taufai manaomia, e manaomia foi e le lalolagi, le avanoa e mafaufau loloto ai ma manatunatu i mea a le Atua ma faalogologo i upu e musuia ma fesoasoani ai ia te i tatou.
Ua faamalolosia a tatou molimau, ma ua lelei lea, aua fai mai Peresitene Harold B. Lee, e manaomia le faafou o a tatou molimau i aso taitasi.1
Ua faamalieina au o loo i ai i loto o le Au Paia o Aso e Gata Ai se faanaunauga e fai le mea sa’o, e ola i auala ua uma ona faataatia mai e le Alii mo i tatou. Ua uma ona faamanatu mai ia te i tatou le tele o nei mea i lenei konafesi.
Ou te faamoemoe a tatou toe taliu i o tatou aiga, ma a e tatou te le i momoe, ia taitasi i tatou ma tootutuli i o tatou tulivae ma faaali atu lo tatou agaga talisapaia, ma ole atu mo le malosi tatou te ola atili ai ma le atoatoa i le talalelei e fai ma taunuuga o lenei konafesi.
Ou te faafetai tele atu mo musika matagofie a le aufaipese; e ese le matagofie o lo latou lagiina o viiga. O se faalapotopotoga maoae lenei ma le loto filiga, ma e matou te faafetai atu ia i latou uma o loo ofoina atu ma le agalelei o latou taimi ma taleni mo lenei taumafaiga maoae. Ou te faafetai tele atu foi mo musika i le aso ananafi a le aufaipese a le au nofofua; sa avea foi i latou ma musumusuga. E faapea foi i viiga maoae na saunia e alii talavou o le Nofoaga Autu mo le Aoaoina o Faifeautalai, sa latou malaga mai ma pepese mai ma se mana maoae, faafetai tele lava mo mea sa outou ofoina mai mo i matou.
I le faaiuga, ou te fia faitauina atu nei nai nai upu mai ia Moronae:
“Ala maia, ina tulai maia nai le efuefu, o oe na Ierusalema e; ia e ofu i ou ofu matagofie, o oe na le tama fafine a Siona, ia malolosi au fao, ma ia faateleina ou tuaoi e faavavau, ina ia le toe maasiasi oe, ina ia faataunuuina feagaiga a le Tama Faavavau na ia osia ma oe, le aiga o Isaraelu e.
“Ioe, o mai ia ia Keriso, ina ia faaatoatoaina outou e ia, ma ia teena e outou le amioletonu uma, ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea o lona alofa tunoa mo outou, ina ia atoatoa ai outou ia Keriso i lona alofa tunoa; afai foi ua atoatoa outou ia Keriso i le alofa tunoa o le Atua, tou te le mafai lava ona faafitia le mana o [Keriso]” (Moronae 10:31–32).
Ina ia avea ma taunuuga o lenei konafesi maoae, e ao ia te i tatou taitoatasi ona avea ma se alii ua sili atu po o se tamaitai ua sili atu, se tama ua sili atu po o se teine foi ua sili atu. Faafetai tele lava, ou uso e ma tuafafine, ona o la outou tautua matavela i le tuleiina o lenei galuega i luma. Oka se maoae o le galuega o loo outou faia, outou na le Au Paia [faamaoni] o Aso e Gata Ai i le lalolagi atoa, o e o loo tauaveina i o outou loto se molimau maumaututu ma le mausali o le moni o loo soifua le Atua ma le Alii o Iesu Keriso, lo tatou Faaola ma lo tatou Togiola, ma lo La’ua faaali mai i lenei tisipenisione e amatalia se augatupulaga maoae o le talafaasolopito o le lalolagi, e sauniuni ai mo lena taimi o le a toe afio mai ai faalua le Atalii o le Atua e nofotupu o le Alii o alii ma Tupu o tupu.
Ia i o outou luga faamanuiaga o le lagi, a’u uo pele. Ou te tatalo o le a avea mea sa outou faafofoga ma silasila i ai, e maua ai se eseesega i o outou olaga. Ou te tatalo ina ia taitasi i tatou ma agalelei teisi atu, ia mafaufau teisi atu i isi, ia faaaloalo teisi atu foi. Ou te tatalo ina ia tatou pulea a tatou upu ma tala ma ia le faatagaina le ita e faasau ai upu o le a tatou toe salamo ai i se taimi mulimuli ane. Ou te tatalo ina ia tatou maua le malosi ma le naunau e liliu atu le isi alafau, ia savavali i maila faaopoopo e sii ae tulivae ua vaivai o i latou o e ua mafatia.
O le talalelei lenei, o se mea e patino lona lata mai. E le o se mataupu e mamao se mea o i ai. E aoga i o tatou olaga. E mafai ona suia ai o tatou lava tagata.
A o tatou toe taliu atu i o tatou aiga, ou te tatalo o le a i ai i o tatou loto se faaiuga e nonofo faatasi ma le lelei atoatoa, e faapei ona tatau ai i le Au Paia o Aso e Gata Ai. Ou te alofa tele ia te outou, ma ou te tuuina atu a’u faamanuiaga mo outou i le suafa paia o le Alii o Iesu Keriso. Ia faatasi atu le Atua ma outou seia tatou toe feiloai. Faafetai atu, ma amene.