Ua Osia le Feagaiga ma Ia
O le tatou usoga e aofia ai soo se ituaiga matutua ma ituaiga siosiomaga uma; ua tatou fesootai e ala i feagaiga ua tatou osia.
Ou uso pele e, ua vave le mou atu o le tausaga, ma e matagofie tele lo tatou toe potopoto faatasi o ni tamaitai o le Aualofa O Le Ekalesia a Iesu Keriso o le Au Paia o Aso e Gata Ai. Po o le a lava o tatou tulaga, ae ua faamanuiaina lava i tatou i le avea ai ma ni tamaitai. Ua tatou osia ni feagaiga ma le Tama Faalelagi ina ia faia Lana galuega—ma o loo tatou faia lena galuega! E pei o Maria ma Mareta, ua tatou saofafai ifo i aao o le Matai ma ua tatou filifilia ai “lea mea lelei.”1 Ua tatou filifilia Keriso ma ua tatou filifilia le Aualofa.
Ae peitai, ou te mafaufau pea pe ua maua uma e i tatou o tamaitai le vaaiga aoao i le uiga moni o le Aualofa. Ina ua faitauina e Iosefa Samita ia uluai tulafono na tusia e Eliza R. Snow, sa ia saunoa ai, o le tusitusiga aupito sili lea ona lelei ua ia vaai i ai, ae sa ia muai vaaia se “mea e sili atu ona lelei.” O le a ia “faatulagaina tamaitai i lalo o le perisitua e faataitai i le faatulagaga o le perisitua.”2 Ina ua “faaaogaina lena ki”3 e le Perofeta o Iosefa Samita ma faatuina ai le “Aualofa a Tamaitai Navu,” na ia saunoa ai, o le Ekalesia lava ia, semanu e le atoatoa ona faatulagaina pe ana le faatuina le Aualofa.4 Uso e, e taua tele ona tatou malamalama i lena saunoaga. O le Aualofa na faatuina e le Atua, e ala i se Perofeta, i le mana o le pule o le perisitua; o lona i ai o se vaega taua lea o le faatulagaina o le Ekalesia. E galulue faatasi alii ma tamaitai i le Perisitua ma le Aualofa, ao tatou taumafai e aumai ia aiga ia Keriso. I le avea ai ma ni tamaitai, e le tatau ona tatou manatu ifo faapea o la tatou matafaioi i totonu o le Ekalesia o se matafaioi e itiiti lona taua nai lo le matafaioi o loo faatinoina e alii. E pei lava foi o i tatou, i le avea ai ma ni tamaitai amiotonu tatou te faamamaluina le Perisitua, e tatau ona tatou uumau ma le paia o tatou valaauga i le avea ai foi ma ni tamaitai.
Ao ou mafaufau loloto i le ata vali lenei o Mareta ma Maria faatasi ma le Faaola, sa oo mai i lo’u mafaufau o nei tamaitai na muamua atu ia te au. Sa ou tau mafaufau foi pe na avea foi i laua ma ni tamaitai “e tumu i galuega lelei ma le fai meaalofa.”5 E manaia le mafaufau atu i ai e faapea, atonu sa latou faapotopoto faatasi ma isi foi tamaitai faamaoni o nisi e mulimuli ia Keriso, e aoaoina a latou matafaioi i le fausiaina o le malo. O i latou o ni tamaitai na osia ni feagaiga e pei o i tatou. Sa latou naunau e tuuina atu i le Faaola o latou loto atoa. E faapena foi le Aualofa ina ua faatulagaina, na tuputupu ae mai lo tatou valaauga paia ma lo tatou naunautai e auauna atu, e alofa atu, ma tausia e le tasi le isi. E faapei foi ona tatau ona i ai sauniga ma le taitaiga a le Perisitua i le galuega a le Alii, e faapena foi le auaunaga o loo tatou faataunuuina.
Ina ia faataunuuina la lenei galuega taua, o lea ua tatou filifili ai e avea ma ni tamaitai osi feagaiga: o ni tamaitai o e ua faia ni folafolaga paia i le Alii. Mo i tatou o e ua maua o tatou faamanuiaga o le malumalu, ua tatou folafola atu o le a tatou faapaiaina o tatou taimi ma taleni mo le fausiaina o le malo o le Alii. O lenei feagaiga e mafai ai ona tatou auauna atu i le Ekalesia i le tele o tiute.
O le luasefulu o tausaga ua mavae, na tofia ai au e avea ma se peresitene o Tamaitai Talavou i lau uarota. Sa enaena lou lauulu, ma o lou tino … sei o’u faapea atu, sa faigofie ona fegauia’i. O le tele o tausaga mulimuli ane, na toe tofia ai au i le tofiga lava lea e tasi, ae o le taimi lenei o se uarota fou. Sa toe gaosi faafou a’u ma toe faaaoga [recycle], ma sa ou fiafia i lena mea. O se avanoa lea e toe faafou ai lau feagaiga i le Atua, o le a faapea ona ou auauna atu i soo se tulaga lava Na te manaomia ai au. Ae peitai, o le taimi nei, ua paepae lo’u laulu [pe toeitiiti foi paepae atoa] i lona tulaga faalenatura, ma ua faafaigata ona ou papai i ou tamatamai vae. Ae ou te le o lagonaina ua ou matua tele mo le toe faamanuiaina o au, e ala i soifuaga o tamaitai talavou lelei o e sa faamaoni, atamamai, ma tumu i mea malie. Ou te fia mafaufau e faapea, e oo mai i lea taimi ua sili atu sina atamai e fetufaai ai ma i latou, ma se molimau mautu o le Talalelei, ae tasi o le mea, e tele mea ua ou aoaoina mai ia i latou e pei foi o i latou mai ia te au. O le tatou usoga e aofia ai ituaiga matutua uma ma ituaiga siosiomaga uma; ua tatou fesootai e ala i feagaiga ua tatou osia.
Ma ia manatua, e le mafai ona tatou le manaomia na feagaiga. E mafai ona auauna atu le tasi i le isi i soo se vaitaimi lava o o tatou olaga. Na ou faalogo talu ai nei i se tina talavou, o lana tane o se tasi o le au epikopo, na alaala i luga o le tulaga, ao tauivi le tina ma lana fanau ulavavale. Na tago atu se tina e matua atu ma sii mai le pepe i luga o ona vae ma fesoasoani e faafilemu o ia. O na gaoioiga faigofie o ni vaega o le fausiaina o le malo o le Atua. O le mea lena o loo tatou faia. O le ituaiga tagata lena ua i ai i tatou i le avea ai ma uso o le Aualofa. E tusa lava pe o tatou auauna atu o se peresitene o le Aualofa, po o se faiaoga i le Peraimeri, po o se faatonu o tolauapiga a Tamaitai Talavou, ae o loo tatou faataunuuina la tatou matafaioi paia i le avea ai ma uso o le Aualofa. Afai e tofia i tatou e asiasi atu i se tagata matua tatou te tuaoi, pe tuuina atu se faamalosiauga ma se fesoasoani i se tina talavou, po o le tatalo foi mo se isi aiga, o lo tatou tausia lena o a tatou feagaiga.
Talu ai nei lava na fono ai le matou au peresitene ma se taitai o le Ekalesia. Sa ia taua e faapea e moomoo lava o ia maimau pe ana faapea o sauniga a le Aualofa ma le Au Perisitua, o ni nofoaga ia e mafai ona faapea atu ai le tasi i le isi, “Tuafafine, po o le uso, o loo ou manaomia lava se fesoasoani i le taimi nei. E mafai ona e fesoasoani mai ia te au?” Sa ou i ai i ni sauniga a le Aualofa faapena. Ou te manatuaina lava le taeao o le Aso Sa ina ua tuuina mai ia molimau, ma na faamatala mai ai e se uso nofo toatasi lona olaga tuua toatasi. Sa faalataina o ia, sa tatala sana faaipoipoga, ma sosoo ai ma ni faafitauli tau tupe, ao taumafai o ia e faigaluega ma tausia lana fanau i se totogi itiiti. O le taimi lenei ua ia iloa le tiga o le tuua toatasi ina ua malaga ese atu lana fanau mai lona aiga aua ua matutua. Sa matuai manaia lena taimi, na malosi le Agaga, ma na ou vaaia le lolofi atu o uso ia te ia, ma faia le mea e sili ona tatou lelei ai: o le alofa lea. Na avea le potu o le Aualofa ma se nofoaga paia i lena aso. O le tulaga lena e tatau ona i ai ia potu uma o le Aualofa mo uso taitasi.
E taua tele lo tatou faaaofiaina ai o uso uma lava. Aua nei o tatou faagaloina ia tamaitai o loo galulue i le Peraimeri po o Tamaitai Talavou. Latou te manaomia le tausiga a ni faiaoga asiasi faamaoni ma latou te manaomia ni fonotaga o le Faatamaoaigaina o Aiga, Auaiga ma le Tagata Lava Ia, ua fuafuaina lelei ma ia faigofie ona auai atu i ai. E toatele foi i latou o loo i la tatou lio o e ua loa o latou soifua—e pei o au! O outou uso tatou te tupulaga pe matutua atu foi, faamolemole ia “toe gaosi faafou ma toe faaaoga” outou uma. O loo manaomia e le Alii la outou auaunaga, ma e matou te manaomia foi outou.
Ou te iloa se uso talavou o loo matua faigata ia te ia le siitaga mai i Tamaitai Talavou agai i le Aualofa. O ia o se tamaitai faamaoni ma malosi, ae peitai o le taimi nei o loo ia lagonaina le tuua na o ia. E faapefea ona tupu lenei mea? Afai o i tatou moni o se usoga, e tatau ona iloa e le tasi le mea e manaomia e le isi. O lenei vaitau o le avea ma se tagata talavou matua e le tatau ona avea o se suiga ae o se laasaga faalenatura i se mafutaga lautele faaleuso. E toatele nei ituaiga o tamaitai talavou i totonu o a tatou uarota. Faamolemole ia saili i latou, alolofa ia i latou, ma aumai i latou i totonu o le lio o le usoga. Ae mo outou uso talavou, ou te faapea atu, aua nei outou manatu ua outou iloa pe faapei le Aualofa, sei vagana lava ua outou auai faatasi ma ia uso, ma ua faia lau vaega o le faamasani lelei ia i latou. O le sau mai le Tamaitai Talavou i le Aualofa e le o se suiga mai le tasi vaega i le isi; o lou avanoa lea e tauave ai se matafaioi sili atu i le auauna atu i le Alii ma le faia o Lana galuega.
Uso e, e le o i tatou o se kalapu faafiafia, e ui lava ina e fausia se faauoga loloto mai la tatou usoga. E le o i tatou o ni, “olomatutua o e e feiloai i le Aso Sa,” e pei ona ou faalogo ai i se tamaitai talavou. O loo ia i tatou le mana pe a tatou faaaogaina: o le mana na tuuina mai ia i tatou e ala mai i le Atua e faataunuuina ai Ona faamoemoega. O i tatou o le faalapotopotoga aupito sili ona toatele i le lalolagi. A o tatou aapa atu i totonu o o tatou alalafaga faatasi ma le malamalama ma musumusuga ua tuuina mai e le Alii ia i tatou, e mafai ona tatou fesoasoani e taitaia se lalolagi o loo faapea ona manaomia la tatou taitaiga. O le mea lena o loo faamoemoeina mai e le Perofeta o Iosefa mai ia i tatou; o le mea foi lena o loo faamoemoe Peresitene Hinckley tatou te faia i le aso.
O le tele o la tatou galuega e foliga mai e lofituina, ae peitai e mafai ona vave ta’u atu ia te oe e le tama a la’u tama lea e lei leva ona papatisoina, o le feagaiga o se folafolaga e vala lua. Ua tatou iloa uma le aoaoga a le mau e faapea o le “ua foaiina atu i ai mea e tele, e sueina mai ia te ia mea e tele.”6 Ae ia manatua foi, o le ua sueina mai ia te ia mea e tele, e tele foi mea e foaiina atu ia te ia. Pe a tatou osi feagaiga ma le Atua, ma tausia na feagaiga, e faigofie ona faataunuuina mea uma lava. Na te foaiina mai ia i tatou mea tatou te manaomia e faataunuu ai Lana galuega.
O lenei afiafi, ou uso pele e, ou te valaau atu ia te outou ina ia outou toe ofoina atu outou atoatoa o ni tamaitai ua osi feagaiga ia Keriso ma Lana faatulagaga mo i tatou, o Ona afafine. Ia filifilia lena mea lelei. Ia filifili e mulimuli ia Keriso. Ia filifili le Aualofa. I le suafa o Iesu Keriso, amene.