Mo Tina ma Tamaitai o le Ekalesia
Faafetai atu ona o ituaiga tagata o loo i ai outou ma mea o loo outou faia. Ia i o outou luga faamanuiaga o le lagi.
Sa fai mai se tasi tagata: “Ia agalelei i tamaitai. O le afa o le faitau aofai o tamaitai ae o tina i le isi afa.”
O’u tuafafine pele, o outou o ni tamaitai ofoofogia, ou te matua maofa i mea ua outou faia. Ua ou vaaia lo outou auai i le faatinoina o mea uma.
O le toatele o outou o tina, ma ua lava lava lena e alu uma ai lona taimi.
O outou o ni paaga—o uo aupito sili e mafai e a outou tane ona maua.
O outou o tausi aiga. E le foliga mai o se mea tele lena, a ea? Ae o se galuega tele le tapenaina o le fale ma faamama.
O outou o le au faifaatau. A na ou le matua lava ou te le iloaina le faigata o le tiutetauave o le mautinoa o lava meaai mo le aiga, ia mautinoa o lelei ma mama lavalava, ma faatau mea uma e manaomia mo le aiga.
O outou o tausimai. Soo se ma’i lava o outou tagata muamua e ta’u i ai, ma o outou foi tagata muamua e tali mai ma se fesoasoani. A i ai ma’i tigaina, tou te i ai i tafatafa o le moega i le ao ma le po, e faamafanafana, faamalosiau, fesoasoani, ma tatalo.
O oe o le avetaavale a le aiga. E te alu e ave le taavale e o ai lau fanau e faigaluega i le tufaina o nusipepa, e ave i a latou taaloga afeleti, e ave i gaoioiga a le uarota, fela’uaiga o le fanau i i ma o, ma soo se mea a o faagasolo o latou olaga pisi.
Ma e le uma la’u lisi. Ua matutua uma nei la’u fanau. O nisi ua ta’i 60 tausaga. Ae a telefoni mai ma ou talia, latou te fesili mai, “O a mai oe?” Ae ou te lei tali atu ae toe fesili mai, “O iina Tina?”
Ua avea lava o ia ma o latou malosiaga i o latou olaga atoa. Talu mai lava o pepe i latou, sa latou faalagolago ia te ia ma e tali atu lava o ia e le aunoa ma le alofa, taiala, aoao atu, ma se faamanuiaga i o latou olaga i soo se itu.
O le taimi nei ua i ai tama teine a le ma fanau ua avea ma tina. Latou te asiasi mai ia te i maua, ma ou te maofa i lo latou onosai, i lo latou gafatia ona faafilemu a latou fanau, ma faanana, ma e foliga mai e mafai ona latou faia le faitau afe o isi mea.
Latou te aveina taavale, latou te faaaogaina komepiuta, latou te o i gaoioiga a a latou fanau, latou te kuka ma suisui, e faiaoga i vasega, ma e lauga foi i le lotu.
Ua ou vaai i o latou taitoalua, ma ou te fia fai lava ia i latou: “Se feala ia i luga. Tauave a outou pitolaau. Pe e te talisapaia moni ea lou toalua? Pe e te iloa ea le tele o mea na te faia? Pe e te faamalo atu ea ia te ia? Pe e te faafetai atu ea ia te ia?”
Ia, mo outou tamaitai pele e, ou te faafetai atu ia te outou. Faafetai atu ona o ituaiga tagata o loo i ai outou ma mea o loo outou faia. Ia i o outou luga faamanuiaga o le lagi. Ia talia a outou tatalo ma ia taunuu o outou miti ma faamoemoega.
E matuai lelei la outou tautua i le Ekalesia. Tou te manatu e ese le faigata. E sa’o lava. Peitai, o tiutetauave uma lava e faataunuuina, e i ai foi ma se taui tele e oo mai.
E toatele outou ua manatu ua outou toilalo. Ua outou manatu ua outou le mafaia, tusa lava po o a taumafaiga uma tou te faia ae ua le lava lena.
Tatou te lagona uma lava faapena. E faapena foi o’u lagona a o ou tautala atu ia te outou i lenei po. Ou te naunau i ai, ou te tatalo mo le mana ma le malosi e mafai ai ona ou faamalosiau atu ia te outou, ia musuia outou, ia faafetai atu ia te outou, ia faaviivii atu ia te outou, ma avatu ai sina fuataga o le fiafia i o outou loto.
Tatou te taufai popole uma i a tatou faatinoga. Tatou te taufai moomoo uma ia mafai ona lelei atu mea tatou te faia. Ae o le mea e leaga ai tatou te le iloaina, e seasea lava ona tatou vaai i taunuuga e oo mai ona o mea tatou te faia.
Ou te manatua lo’u alu i se konafesi faalesiteki i Sasae i le tele o tausaga ua mavae. Sa ou lagonaina i luga o le vaalele ina ua ou toe foi mai i le fale lo’u matuai toilalopopo. Sa ou lagona e leai se tagata na ou pa’i atu i ai mo lona lelei. Sa ou le fiafia ma sa ou lagona le le agavaa.
I nai tausaga mulimuli ane, sa ou i ai i se isi konafesi i Kalefonia. I le faaiuga o le sauniga, sa sau ai se tagata ia te au ma faapea mai, “Sa e i ai i se konafesi i ni nai tausaga ua mavae i fea-ma-fea.”
“Ioe,” sa ou fai atu ai, “Sa ou i ai, ma ou te manatua lelei.”
Fai mai le alii: “Sa e pa’i mai i lo’u loto. Sa ou alu atu i lena sauniga ona o lo’u fia iloa. O le mea moni ou te lei naunau i ai. Sa ou taulalata atu lava i le tuua o le Ekalesia. Ae ina ua faasilasila mai o le a i ai se tasi o le Au Aposetolo e Toasefululua, o lea sa tonu ai loa ou te alu atu.
“Sa e ta’ua se mea sa amata ai ona ou mafaufau. O lena mea sa tuia ai lo’u loto ma sa tumau ai pea ia te au, ma uunaia ai au. Sa tonu ia te au o le a toe sui lo’u ala. Sa ou toe liliu lo’u olaga. O lea ua ou nofo nei i Kalefonia. Ua lelei la’u galuega, ma o lea ou te faafetai ai. Ou te faamoemoe o au o se tane lelei ma o se tama lelei foi. O lea ou te auauna atu nei o se fesoasoani i le au epikopo o le matou uarota. Ua sili atu lo’u fiafia nai lo se isi lava taimi o lo’u olaga.”
Sa ou faafetai atu ia te ia ma ina ua ou tuua o ia, sa ou faapea ifo ia te au lava ma lulu lo’u ulu, “E te leiloa lava. E te leiloa lava pe o e faia se mea e lelei ai. E te leiloa lava pe o le a le tele o mea lelei e te faia.”
O lenei, o’u tuafafine pele e, e faapena foi outou. O loo outou faia le mea sili tou te mafaia, ma o lena mea sili e taunuu i lou lava lelei faapea foi ma isi. Aua e te faasoesa ia te oe lava ma faapea ua e toilalo. Tootuli i ou tulivae ma ole atu mo faamanuiaga a le Alii; ona e tulai lea ma fai le mea ua poloaiina ai oe. Ona tuu atu lea o le mataupu i aao o le Alii. O le a e iloa ai ua e faataunuuina se mea e sili atu ma lona tau.
O lenei, o loo i ai se isi a tatou faalapotopotoga e ese mai ai o loo ou tautala atu i ai. O loo aofia ai tamaitai talavou o loo aooga pe o faigaluega foi. O lena tou te nonofo fua. O loo e faamoemoe e pu’e mai lena alii lelei atoatoa. Ou te lei vaai lava i se alii e lelei atoatoa. Ia maualuga lou faamoemoega, ae aua foi le soona faamaualugaina nei misi atoa. O le mea moni lava e taua ia alofa ia te oe, ia faaaloalo ia te oe, ia faamamalu ia te oe, ma ia faamaoni a’ia’i ia te oe, ia faataga oe e faaalia ma le saoloto ou manatu ma tuu oe e te lele e atiina ae au taleni. O le a le lelei atoatoa o ia, ae afai e agalelei ma mafaufau ia te oe, afai na te iloa faigaluega ma saili mea e ola ai, afai e faamaoni ma e tumu i le faatuatua, e le taumate o le a e le sese lava, ma o le a e matua fiafia ai.
Ae paga lea, e i ai nisi o outou o le a le faaipoipo lava i lenei olaga. O le tulaga lena e oo i ai i nisi o taimi. Afai e tulai mai lena mea, aua nei faamaimauina lou ola e te mafaufau mamafa ai fua i ai. E manaomia lava e le lalolagi au taleni. Na te manaomia lou sao. E manaomia e le Ekalesia lou faatuatua. Na te manaomia lau fesoasoani malosi. E le mafai ona toilalo le olaga, sei vagana ua tatou faatoilaloina. E toatele naua i latou e manaomia ou lima fesoasoani, o ou laufofoga fiafia, o lou mafaufau agalelei. Ua ou vaai i le anoanoai o tamaitai agavaa, lalelei, ma le matagofie ua le maua se paaga. Ou te le malamalama i ai, ae ou te iloa o loo i ai i le fuafuaga a le Silisili Ese, le fuafuaga e faavavau lea ua tatou faaigoaina o le fuafuaga sili o le fiafia, o le a i ai se avanoa ma se taui mo i latou uma o loo sailia.
O outou na o tamaitai talavou e i ai fanau laiti, e maoae tele lo outou luitau. E tele taimi e le lava ai tupe. E tatau lava ona faasoasoa ma le faautauta ma teu tupe. E tatau ona outou atamamai ma ia faaeteete i mea e faaalu i ai tupe. E tatau ona outou malolosi ma lototetele ma savavali i luma ma le fiafia i o outou mata ma le alofa i o outou loto. E maeu le faamanuiaina o outou, outou na tina talavou pele e. Ua ia te outou ni fanau o le a avea ma a outou fanau e faavavau. Ou te faamoemoe ua uma ona faamauina outou i le maota o le Alii, ma o le a avea foi o outou aiga ma aiga e faavavau i le malo o lo tatou Tama.
Tau ina ia tuuina atu ia te outou le malosi e tauaveina ai a outou avega mamafa, ia faataunuuina ai matafaioi uma, ia savavali faatasi ma se alii faamaoni ma le loto alofa, ma oulua taufai tausia ma faafaileleina a oulua fanau i le amiotonu ma le upumoni. E leai lava se mea e mafai ona e pule ai, leai se mea faalelalolagi o le a e maua, e tutusa lona taua ma le alofa i lau fanau. Ia faamanuia le Atua ia te outou, o’u tina talavou pele, faapelepele.
Ona sosoo ai lea ma outou tina ua matutua atu, e le talavou e le i loomatutua foi. Ua outou i ai nei i se vaitau aupito matagofie o outou olaga. Ua oo nei a outou fanau i le tulaga ua fai manatu. Masalo pe ua faaipoipo se toatasi pe toalua foi. O nisi o i ai i misiona ma o loo outou ositaulaga nei e tausi a latou misiona. O loo outou faamoemoe ma tatalo ia manuia i latou ma fiafia. O outou tuafafine pele na, ou te fia tuuina atu se fautuaga faapitoa.
Faitau ia ou manuia; ia taitasi ma faaigoa. E te le manaomia se fale tioata tele ae alu ai le olaga atoa o tau totogi le mokesi. E te manaomia se fale manaia ma mafana e i ai le alofa. Fai mai se tasi tagata, e leai se ata e sili atu ona matagofie nai lo le ata o se fafine lelei o loo kukaina se meaai mo i latou e pele ia te ia. Ia filifili ma le faaeteete mea e te faia. E te le tau manaomia nisi o mea faafiafia maoae e ono mafai ona maua pe a e faigaluega. Ia filifili ma le faaeteete le taua o lou i ai i le aiga pe a tuua mai lau fanau mai le aoga.
Tina, ia vaai faalelei a outou fanau teine. Ia outou felata’i ma i latou. Faalogo atu ia te i latou. Talanoa ma i latou. Taitai ese mai i latou mai le faia o mea faavalevalea. Taitai i latou ia faia le mea sa’o. Ia mautinoa o fai faalelei o latou lavalava ma ia le taugata. Ia puipuia i latou mai mea leaga matautia o loo siomia ai i latou.
Ia faafailele a outou fanau tama i le alofa ma fautuaga. Aoao i latou i le taua o le tumama o le tagata lava ia, o le mama ma fai faalelei o latou lavalava. O le le faia faalelei o lavalava e oo atu ai foi i ni olaga e le lelei. Ia toto i o latou loto se lagona e pulea le amio. Ia tausisia i latou ia agavaa e auauna atu i le Ekalesia o ni faifeautalai. Tuu i ai ni mea latou te faia ina ia mafai ona latou aoao e galulue. Aoao i latou ina ia faasoasoa ma le faautauta. O le galue ma le faasoasoa ma le faautauta e oo ai ina fiafia ma tamaoaiga. Aoao i latou e leai se mea lelei e tupu pe a te’a le 11.00 i le po. Ma aua le faia faamatanana i latou. Afai e malaga i latou i misiona, e ono poloaiina i latou e ola i ni tulaga e te le fia manao ai. Aua e te popole ia i latou. Avatu ia i latou se faamalosiauga.
Ia faaosofia i loto o lau fanau se faanaunauga mo aoga. O le ki lea i le manuia o le olaga. Ia aoao atu foi ia i latou e faapei ona faamanatu mai soo e Peresitene Tavita O. Makei, “E leai a se isi faamanuiaga e maua i le olaga e mafai ona suia ai le toilalo i totonu o le aiga.”1
O le taimi nei o le a ou tautala atu ai ia te outou na tina ua nofofua, ua mamafatu na’ua a outou avega ona ua tuulafoaiina outou, pe ua oti foi a outou tane. E matua matautia la outou avega. Ia amo faalelei. Saili atu i faamanuiga mai le Alii. Ia faafetai mo soo se fesoasoani e ono aumaia e korama a le perisitua e fesoasoani ai ia te oe i lou aiga po o isi foi mea. Ia e tatalo lemu i lou afeafe, ma tuu pea ou loimata e tafe pe afai e tatau ona e tagi. Ae ia e laufofoga fiafia i soo se taimi e vaai ai lau fanau ia te oe po o nisi foi.
O outou na tinamatutua pele, outou na tina matutua ua oti a outou tane, ma tamaitai matutua ua tuua toatasi. E ese lo outou lalelei. Ou te vaavaai atu i si o’u toalua pele, e le o toe mamao ona atoa lea o lona 92 tausaga. Ua sinasina lona lauao; ua faanounou foi lona tino.
Ou te tago atu uu mai sona lima ma vaavaai i ai. Sa matuai matagofie lava muamua, sa momosi lelei ma malosi. A o lenei ua maanuminumi ma ua fai si ponaivia ma ua le malosi tele foi. Ae o loo tautala mai i le alofa ma le maua’i atoa ai ma le faatuatua, o le galue malosi i le tele o tausaga. Ua le o toe tutusa lona manatua e pei ona sa i ai. E mafai ona ia manatua mea |sa tutupu i le afa senituri talu ai, ae atonu na te le manatua le mea sa tupu i le afa itula talu ai. Ua faapena foi au.
Ae ou te matuai faafetai lava ia te ia. Ua 66 tausaga o ma savavali faatasi, ma uulima, faatasi ai ma le alofa ma le faamalosiauga, o le agaga talisapaia foi ma le faaaloalo. E le o toe umi ona laa atu lea o se tasi o i ma’ua i le isi itu o le veli. Ou te faamoemoe o le a faapena foi ona vave mulimuli atu ai ma le isi. Ou te matua le iloaina lava pe faapefea ona ou ola e aunoa ma ia, ma ou te faamoemoe foi o le a na le iloa pe faapefea ona ola o ia e aunoa ma au.
A’u uo pele o le Aualofa, pe o a lava tulaga o outou i ai, pe o fea lava e te nofo ai, ia to atu pupuni o le lagi ia te oe ma ia sasaa atu faamanuiaga i ou luga. Ia e ola ma alofa atu o le tasi i le isi. Ia outou aapa ifo i lalo e sii ae i latou ua i ai avega mamafa. Ia outou aumaia le malamalama ma le matagofie i le lalolagi aemaise lava i o outou aiga ma olaga o a outou fanau.
Ua outou iloa e faapei foi ona ou iloa o loo soifua le Atua lo tatou Tama Faavavau. E alofa o Ia ia te outou. Ua outou iloa e faapei ona ou iloa o Iesu o le Keriso, Lona Alo tino ola pea, o lo tatou Togiola. Ua outou iloa e moni le talalelei ma e latalata mai le lagi pe afai tatou te atiina ae i o tatou olaga.
O outou o le Aualofa O Le Ekalesia a Iesu Keriso o le Au Paia o Aso e Gata Ai. E leai lava se isi faalapotopotoga e tutusa ma ia. Savavali ma le mitamita. Ea i luga o outou ulu. Galulue ma le punouai. Fai soo se mea e fai atu ai le Ekalesia e te faia. Tatalo ma le faatuatua. E te le iloaina lava po o le a le tele o le lelei o le a e faataunuuina. O le a faamanuiaina le olaga o se tasi ona o au taumafaiga. Tau ina ia e iloa le mafutaga mafana ma le faamalieloto a le Agaga Paia, ou te tatalo ai i le suafa o Iesu Keriso, amene.