O se Tagavai i Malo, o se Malamalama Foi i le Lalolagi
Afai tatou te mananao e tuu i luga lenei Ekalesia e fai ma tagavai o malo ma malamalama i le lalolagi, e tatau la ona tatou tufi taufaoina ia tele uiga tausaafia o le soifuaga o Keriso mo i tatou taitoatasi.
Ou uso e ma tuafafine pele. Ou te fia faailoa atu lo’u agaga faafetai ona o lo outou faatuatua faifai pea ma [a outou] tatalo. Ua matua tuuina mai e le Alii i luga o le autaitai o lenei Ekalesia se faatuatuaga tele ma le lotonaunau, ma o loo outou lagolagoina i matou i lena tiutetauave. Matou te iloa tou te tatalo mo i matou, ma e matou te mananao ina ia outou silafia o loo matou tatalo foi mo outou.
E leai se aso ou te le faafetai ai i le Alii ona o tagata faamaoni o le Au Paia o Aso e Gata Ai. E leai foi se aso ou te le tatalo ai ina ia faamanuia outou e Ia i soo se mea tou te i ai ma soo se mea foi tou te manaomia.
Ou te fia faamanatu atu ia te outou o loo tatou auai faatasi uma i lenei galuega. E le faapea o galulue le Au Pulega Aoao agai i se isi itu ae o tagata o le Ekalesia i se isi. O loo tatou taufai galulue uma e tasi i tatou i lenei galuega tele. O i tatou uma o tagata o le Ekalesia a Iesu Keriso.
O o outou tiutetauave o ni matafaioi e taua tele ia te outou ma e faapena foi au i o’u tiutetauave. E tatau ona tofu naunau i tatou taitoatasi, e atiina ae le malo o le Atua i le lalolagi ma faateleina le galuega o le amiotonu.
Ou te manatu e mafai ona ou fai atu ma le faamaoni, [o i matou o le Au Pulega Aoao] e leai ni o matou faanaunauga manatu faapito i le galuega, ae na o le naunau ia manuia.
O i matou i le Au Peresitene Sili, e feagai pea lava pea ma le taulimaina o le anoanoai o faafitauli eseese. Matou te faafesagai ma faafitauli i aso uma.
I le faaiuga o se tasi aso sili ona faigata, sa ou tilotilo a’e ai i le ata o Polika Iaga o loo tautau i le puipui o lo’u ofisa. Sa ou fesili atu i ai, “O le a le mea e tatau ona matou faia?” Sa ou manatu na ou vaaia o ia o soisoi, ona pei lea sa foliga o loo fai mai, “I o’u foi taimi, sa lava ma totoe foi a’u faafitauli sa taulimaina. Aua e te fesili mai pe o le a le mea e fai. O le taimi lenei o lau leoleoga. Fesili i le Alii, aua o lana galuega moni lava lenei.” Ma o le mea lea, ou te tautino atu ia te outou, tatou te faia, ma e tatau lava ona faia e le aunoa.
A o ou manatunatu i mea o lena aso faigata na sei mavae atu nei, sa ou susueina la’u Tusi Paia i le mataupu muamua o le Iosua ma faitau ai i upu nei:
“Ou te lei fai atu ea ia te oe? Ia e faamalosi, ma loto tele; aua e te fefe, aua e te mata’u; aua o Ieova lou Atua o loo ia te oe i mea uma e te alu i ai” (Iosua 1:9).
Sa ou faapea ifo ia te au lava, “E leai lava se mea o le a atuatuvale pe faavaivai ai fua. O le galuega lenei a le Atua. E ui lava i taumafaiga a i latou uma o loo tetee i ai, ae o le a agai pea i luma e pei lava ona fuafuaina ai e le Atua o le lagi.”
Sa ou sueina itulau o le Feagaiga Tuai i le mataupu e lua o le Isaia ma faitau ai i upu nei:
“O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai.
“E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e aoao mai foi o ia ia te i tatou ona ala, ona tatou savavali ai lea i ona ala; aua e alu atu le tulafono ai Siona, o le afioga foi a Ieova ai Ierusalema” (Isaia 2:2–3).
Talu lava ona faapaia le Malumalu o Sate Leki, ua tatou faaliliuina lena mau mai le Isaia, lea foi o loo toe ta’u mai i le Mika (tagai Mika 4:1–2), e faatatau i le maota paia o le Alii. Ma o lenei maota, talu mai lava le aso o lona faapaiaga, ua matua faatoateleina tagata mai le lalolagi atoa ua latou faapea mai: “O mai ia, tatou o ae i le mauga o Ieova, o le fale foi o le Atua o Iakopo; e aoao mai ai o ia ia te i tatou i ona ala, ona tatou savavali ai lea i ona ala.”
Ou te talitonu ma molimau atu, o le misiona a lenei Ekalesia o le tu lea e fai ma tagavai i malo ma se malamalama i le lalolagi. Ua uma ona tuuina mai ia i tatou se poloaiga maoae e le mafai ona tatou aloese mai ai, pe teena foi. Ua tatou taliaina lena poloaiga ma ua mautu o tatou loto e faataunuu, ma o le a tatou faia faatasi ai ma le fesoasoani mai o le Atua.
O loo siomia i tatou uma i malosiaga o le a tata’iese ai i tatou mai le faataunuuina o lena taumafaiga. E uunaia pea lava pea i tatou e le lalolagi. Tatou te faalogoina lava le taufai uunai malosi mai o itu uma ina ia faavaivaia lo tatou malosi e tetee atu ai [le agasala], ia tatou faamatuu atu [i le agasala], o sina mea itiiti iinei ma sina mea itiiti iina.
E le tatau lava ona tatou faagaloina le taua o lo tatou faamoemoega. E tatau lava ona tatou manatua e le aunoa le taua o le sini ua uma ona faatuina e le Alii mo i tatou.
Fai mai Paulo:
“Ou uso e, o le toe upu lenei, ia outou lototetele i le Alii, ma le malosi o lona mana.
“Ia oofu outou i le ofutau atoatoa mai le Atua, ina ia outou mafaia ona tetee atu i togafiti a le tiapolo.
“Aua tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi” (Efeso 6:10–12).
E tatau ona tatou tutu ma le mausali. E tatau ona tatou tetee atu i le lalolagi. Afai tatou te faia, o le a avea le Silisili Ese ma o tatou malosiaga ma o tatou talipupuni, o lo tatou taimua ma le e aumaia faaaliga mo i tatou. O le a tatou maua foi le mafanafana i le iloa o loo tatou faia le mea e finagalo o Ia tatou te faia. Atonu e le ioe nisi faatasi ma i tatou, ae ou te talitonu latou te ava lava ia i tatou. O le a le tuulafoaiina lava i tatou. E toatele i latou e le auai i lo tatou faatuatuaga, ae e tutusa o tatou lagona. O le a latou lagolagoina i tatou. O le a latou fesoasoani mai foi i a tatou taumafaiga.
E le tatau ona tatou faasausili. E le tatau ona tatou faafia amiotonu. O tulaga patino lava ua tuu i ai i tatou e le Alii, e manaomia ai lo tatou lotomaualalo aua o i tatou o i lalo o Lana taitaiga.
E ui ina e le mafai ona tatou ioe faatasi ma isi i nisi o mataupu, ae e le tatau lava ona tatou faasiasia ai ma itaitagofie. E tatau lava ona tatou faauo atu i ai, tautala ma le faaaloalo, fai tuaoi lelei, ma ia malamalama.
O lea o le a o faamamafaina se autu ua maea ona saunoa i ai nisi i lenei konafesi. Mo o tatou tupulaga talavou, le autalavou matagofie o lenei augatupulaga, ou te faapea atu, ia outou faamaoni. Ia tumau i le faatuatua. Ia tumau i le mea e te iloa e sa’o.
Tou te feagai ma tofotofoga matautia. E oo atu tofotofoga ia te outou mai fale faafiafia o loo fai ai faafiafiaga moomia, e maua i le Initoneti, o tifaga, o le televise, o tusi taugofie, ma isi auala e maaleale, e faaosofia ai lagona feusuai, ma faigata ai ona teena. Atonu ua tauau lava ina lofituina uunaiga mai tupulaga. Ae peitai, au uo talavou pele, e le tatau lava ona outou faamatuu atu i ai. E tatau ona outou malolosi. E tatau ona outou tulimatai atu i mea e aupito sili ona taua ia te outou i le lumanai, ae aua le faamatuu atu i tofotofoga faatosina o le taimi nei.
E tosina tele atu o tatou tupulaga talavou i le au faafiafia foliga auleaga. Ua mauoa i latou ona o le maualuluga o tau o pepa e ulufale ai. O a latou pese, ua matua tele naua, o pese e alualua o latou uiga.
Ua i ai i soo se vaipanoa ia tusi ma ata mataga faatasi ai ma le valaaulia faatosina. E tatau lava ona e aloese mai ai. E mafai ona avea ai oe ma pologa. E mafai ona faataumaoia ai oe. Ia e iloa lelei lona natura—o mea toilalo ma le mataga ua gaosia ma faasalalauina e i latou ua mauoa ai i tupe a i latou e faatauina ma matamata ai.
Ua matua faataumaoia lava le paia o le uiga faiaiga i lona faataotoga faatuinanau e le au faasalalau. O lona lava natura loloto e matagofie, a ua faaleagaina ona o lona tulaga faalauiloa ua i ai nei. Sa ou fiafia lava ina ua ou iloa, e mumusu le alaleo o le televise e pulea e le Ekalesia iinei i le Aai o Sate Leki e talia se polokalama o fetaulaiga o fesootaiga [network] e alualua ona uiga. E ese foi le manaia i le faalogo atu na o le pau lava le isi alaleo e i ai i totonu o lenei polokalama o fetaulaiga o fesootaiga, ua latou faaleaogaina ia foi faasalalauga i South Bend, i Initiana, o le mea e i ai le Iunivesite a Notre Dame. E lagona ai le fiafia ona ua tatou iloaina, e i ai foi isi o loo malolosi foi o latou lagona e pei o i tatou ma o loo naunau e fai se taumafaiga e uiga i lea itu.
E sili atu le manaia o le olaga nai lo le tulaga o loo masani ona faaalia ai. E sili atu foi le manaia o le natura nai lo lena. E sili atu ona manaia le alofa nai lo lena. O nei ituaiga o faafiafiaga ua na o se ata taufaasese o le lelei ma le matagofie.
O outou na alii ma tamaitai talavou, o e o loo faalogologo mai i lo’u leo i le aso, o outou na tamaiti o aooga i iunivesite o loo i ai i le tele o lotoa, ua outou iloa o se tasi o faafitauli tele i nei lotoa o inuga ava malolosi. E faaitiitia ou tulaga gafatia. E faatamaia ai olaga. E maimau ai tupe ma le taimi ma taumafaiga aoga. O se matua vaaiga faanoanoa pe a vaai atu i tupulaga talavou ua faatamaia e i latou lava o latou olaga, ma faataumaoi o latou avanoa ona o inuga soona fai.
O se matua faamalo lava i tamaiti aoga o le Iunivesite o Polika Iaga ina ua maua e le mekasini faavaitaimi o le the Princeton Review, o se aoga “e matua leai se tasi e inu” i Amerika. O le toatele lava o outou, e le mafai ona outou ulufale atu i le BYU, ae pe o fea lava e te i ai, e mafai lava ona e ola i tulaga faatonuina e tasi ia e manaomia i le lotoa o le BYU.
Sa ou faitau talu ai nei i le tatou mekasini o le New Era, i se tala e uiga i le autalavou o le Au Paia o Aso e Gata Ai i Memphis, Tennessee. O nisi taimi, e na o latou ai lava tagata o le Au Paia o Aso e Gata Ai i totonu o le lotoa a le aoga. Sa ta’ua e se tasi o i latou na faapea mai, “Atonu e na o au le tagata o le au paia i le matou aoga, ae … tusa lava foi pe na o au le tagata e i ai, e le taitai lava ona tuulafoaiina au faaleagaga.” (in Arianne B. Cope, “Smiling in Memphis,” New Era, Oct 2003, pp 23–24).
O loo ta’ua mai e le isi: “Ou te iloa e toatele le tupulaga o loo tau mafaufau pea pe ua latou iloa moni e moni le talalelei. Peitai … o iinei e tatau lava ona e iloa pe moni le talalelei pe leai, aua e tuufesili lava tagata ia te oe i aso uma. O taimi uma lava e te taliina ai se fesili, ua e faasoa atu foi lau molimau” (New Era, Oct. 2003, 25).
O nei tupulaga talavou, o loo salalau i lena aai tele, ua latou aoao ina ia tutu faatasi e lagolago ma fefaamalosiai e le tasi le isi.
Ia faamanuia le Atua ia te outou, au uo talavou pele. O outou o le augatupulaga silisili ua tatou maua. Ua sili atu lo outou silafia o le talalelei. Ua sili atu lo outou faamaoni i o outou tiute. Ua outou malolosi atu e fetaiai ma tofotofoga o loo aga atu i lo outou ala. Ia outou ola i o outou tulaga faatonuina. Ia tatalo mo se taitaiga ma se puipuiga mai le Alii. Na te le tuulafoaiina lava outou. Na te faamafanafana ia te outou. Na te lagolagoina outou. Na te faamanuia outou ma faatamaoaigaina ma faia ia matagofie ma suamalie o outou taui. Ma o le a e iloaina o au faataitaiga o le a tosina mai ai isi ma o le a latou maua foi le lototetele mai lou malosiaga.
O le tulaga o i ai le autalavou, e faapena foi le au matutua. Afai tatou te mananao e tuu i luga lenei Ekalesia e fai ma tagavai o malo ma malamalama i le lalolagi, e tatau la ona tatou tufi taufaoina ia tele uiga tausaafia o le soifuaga o Keriso mo i tatou taitoatasi, ma o tatou lava tulaga faaletagata lava ia. Pe a tatou tutu atu mo le mea tonu, e le tatau ona tatou atuatuvale i taunuuga. E le tatau ona tatou fefefe. Fai mai Paulo ia Timoteo:
“Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai.
“O lenei, aua tou te ma i le molimau i lo tatou Alii” (2 Timoteo 1:7–8).
O lenei Ekalesia e le o se faalapotopotoga faalevafealoai e na ona tatou potopoto ai faatasi e mafuta ai ma fesagisagiai. Ua le na o ni sauniga o le Aoga Sa ma le Aualofa ma le Perisitua. Ua le na o ni Sauniga Faamanatuga, e sili atu foi nai lo na o galuega faalemalumalu. O le malo lea o le Atua i le fogaeleele.
O outou alii o e o loo umia le perisitua ua i ai se tiutetauave tele naua. E tatau ona outou aloese mai faaosoosoga a le lalolagi. E tatau ona outou tutu maualuga a’e ai. E tatau ona outou mama ma agavaa e tusa ai ma le perisitua a le Atua. E tatau ona outou teenaina mea leaga uma i soo se ituaiga ae talia le tulaga lelei ma le faamoemoe lelei, ia tuu atu foi i le malamalama, le malamalama faalelagi, ia susulu atu e ala i a outou mea e fai.
E leai se avanoa e mafai ona avea ai se fale ma se nofoaga o le sulufaiga ma le filemu pe afai o le tama o loo pulefaamalumalu ai iina e le o se tane ma se tama e malamalama ma loto fesoasoani. O le malosi e maua mai o tatou fale o le a mafai ai e i tatou ona faafetaiaia le lalolagi, sili atu ona taliaina ai i faalapotopotoga o loo tatou galulue ai, sili atu ona taua ia i latou o loo faafaigaluegaina i tatou, o le a avea ai i tatou ma ni tagata e sili atu.
Ou te iloa le toatele o ni alii faapena. E matuai iloga mai lava lo latou alolofa i a latou ava ma a latou fanau. E mitamita ai i latou. Ae o le mea ofoofogia, e matautia le faamanuiaina o i latou i a latou galuega na filifilia. E faalauteleina lo latou malamalama ma faamamaluina ma e faaaloalogia foi i latou.
O lenei, o outou tamaitai. Na umi se taimi na ou talanoa atu ai i tamaitai o le Aualofa i le vaiaso ua tuanai. O lena tautalaga na faailoa atu ai lagona mai lo’u loto e faatatau ia te outou. E mafai foi e outou ona tauaveina ia uiga o Keriso. E mafai foi e outou ona avea ma se faamalosiau ma le fesoasoaniga malosi ma le lelei.
Ou te faamanatu atu ia te outou uma lava, o i tatou o le Au Paia o Aso e Gata Ai. Ua tatou osi feagaiga ma lo tatou Tama Faalelagi, e paia ma noatia. O na feagaiga, afai tatou te tausia, o le a avea ai i tatou ma ni tama ma tina sili ona lelei, o ni atalii ma ni afafine foi e sili ona lelei.
Ou te talitonu o le a lagolagoina i tatou e isi pe afai o le a faapea ona tatou fai. E mafai ona tatou tutu mo le upumoni ma le lelei, ma ou te mautinoa o le a tatou le tutu na o i tatou. E le gata i lea, o le a tatou maua ia malosiaga e le ma vaaia o le lagi e lagolagoina i tatou.
Sei ou te toe faafoi outou i tua i le Feagaiga Tuai:
“Ua tulai le auauna a le tagata o le Atua i le taeao lava, ua alu i fafo, faauta, o ‘au ua si’o le aai ma a latou solofanua ma kariota. Ona fai mai ai lea o lana auauna ia te ia, Aue! Le alii e, pe faapefea se mea tatou te fai a’i?
“Ona tali atu ai lea o ia, Aua e te fefe, aua e toatele ua ia te i tatou i e ua ia te i latou.
“Ona tatalo ai lea o Elisaia, ua faapea atu, Ieova e, ia e faapupula i ona mata ina ia iloa. Ona faapupulaina lea e Ieova o mata o le taulealea, ona iloa ai lea e ia: faauta foi, ua tumu le mauga i solofanua ma kariota afi, ua latou vagavagai ia Elisaia”(2 Tupu 6:15–17).
Ua fetalai mai le Alii ia i tatou:
“O le mea lea, aua le matatau, le lafu mamoe itiiti e; ia faia mea lelei; ia tuu i le lalolagi ma seoli e ‘autasia oulua, aua afai ua faavaeina oulua i luga o la’u papa, latou te le mafai ona manumalo… .
“Ia faalagolago ia te a’u i manatunatuga; aua le masalosalo, aua le fefe” (MFF 6:34, 36). I le suafa o Iesu Keriso, amene.