I Talafou

Ua Faatulagaina le Uluai Itu i le Itumalo o Kasai i Sisifo

O le uluai itu i le itumalo o Kasai i Sisifo i le Ripapelika Temokalasi o Congo, sa faatulagaina i le aso 21 o Aperila, 2003.

Sa faatulagaina le Itu o Kananga e Brent Phil Petersen, ona avea ai lea ma peresitene o le Misiona a le Ripapelika Temokalasi o Congo Kinshasa, ma e aofia ai ma paranesi a Kananga Muamua, Kananga Lua, Katoka, ma Ndesha.

O le uluai sauniga aloaia i Kananga sa faia i le masina o Me 1988, ina ua maua e Gregory Kalala Bakadiabanya le faatagana mai le peresitene o le misiona, e potopoto ma tuaoi ma aiga ina ua asiasi atu o ia i lea vaega o le atunuu ina ua uma lona papatisoga i Kinshasa. Toeitiiti atoa le lima tausaga talu mai le asiasiga a Uso Bakadiabanya, ae faavae le uluai paranesi i le aso 12 o Ianuari, 1993.

Sa aloaia lelei e le Ripapelika Temokarasi o Congo le Ekalesia i le masina o Fepuari, 1986. Pe tusa ma le 11,000 tagata o le au paia i le atunuu o Aferika i Sisifo.

“A faaauau pea a [matou] tatalo, [matou] te talitonu o le a [matou] maua le avanoa e faafeiloai atu ai i faifeautalai faamisiona i lenei vaega o le tovine o le Alii ma [molimauina] ai le faavaeina o se siteki i Siona,” o le saunoaga lea a Eric Belangenyi Kapanga, peresitene o le Itu a Kananga.

Ua Manumalo le Malumalu o Cardston i le Taui o le Matagofie

Sa aloaia talu ai nei e le taulaga i Kanata o Cardston, ia le Malumalu o Cardston Alberta i se tasi o taui faaletausaga o le faamatagofieina—o le taimi muamua lenei ua faamamaluina ai lenei malumalu i se tulaga faapea.

Sa ta’ua e Stan Johnson, o le pulenuu muamua o Cardston ma o se fesoasoani foi i le au peresitene o le malumalu, o lea taui o se tasi o faailoga o le “sao maoae o le malumlau i le tulaga matagofie atoatoa o lo tatou nuu ua i ai nei.”

Sa faapaiaina le Malumalu o Cardston Alberta i le 1923 e Peresitene Heber J. Grant, o le Peresitene lona fitu o le Ekalesia, ma sa toe faapaiaina e Peresitene Gordon B. Hinckley a o Fesoasoani Muamua i le Au Peresitene Sili i le taimi lea, ina ua mavae se toe faafouga tele i le 1991.

Sii mai le Church News, 20 Setema 2003.

Ua Maua Foi e le Fale Autu mo Konafesi se Taui

Ua faalauiloa aloaia nei e le The American Society of Landscape Architects (Sosaiete a Tusiata o Fale ma le Faataotoga o Laufanua a Amerika) le Fale Autu mo Konafesi i le Aai o Sate Leki, se Taui Maualuga o Mamanu ona o le maoae o le matagofie o le faataotoga o le fausaga ma laufanua. O se tasi lea o galuega faatino e 33 na maua faailoga, sa filifilia mai fausaga e 436 sa faaulu. Sa tuuina atu nei taui e fuafua i le maualuga o le matagofie o le mamanuina, faaaogaina, aano ma lona faamoemoega, tiutetauave faalesiosiomaga, ma le talafeagai mo le faamoemoe, o tagata lautele, ma le siosiomaga.

Sa mamanuina e Olin Partnership o Filetalefia, i Penisilivania ia le faataotoga o laufanua o le Fale Autu mo Konafesi, o laau, o le mutia, ma fugalaau taatele o Iuta.

Sii mai le Church News, 13 Setema 2003.

O Tagata o le Ekalesia sa Faamamaluina i le Taui Faaleatunuu mo Tagata Galulue Fua

Faafetai i le faiga faapaaga ua fitu nei tausaga a le Tucson Community Food Bank (Faalapotopotoga e Aoina Meaai ma Foai atu i Tagata o le Nuu o Tucson) ma tagata o le Ekalesia i Arizona, o se faalapotopotoga soofaatasi i le Iunaite Setete mo meaai e ta’ua o le America’s Second Harvest ua latou faamamaluina le Ekalesia i lana taui faaleatunuu mo Vaega o Tagata e Galulue Fua o le Tausaga. O lenei faaaloaloga ua faalauiloa aloaia ai le faitau fia afe itula o le tautua sa tuuina atu e tagata o le Ekalesia i Tucson.

Sa saunia e lenei faalapotopotoga o meaai ia le 100 pauna (37 kilokalama) o taga alaisa ma pi, ma e taitolu po i le vaiaso, e oo atu lava i le 100 tagata o le Ekalesia e ofo mai e galulue fua, latou te faapotopoto i le nofoaga e tuuapa ai meaai a le Ekalesia i Tucson, ina ia latou utuina ai meaai i ni pepa e lava ai se taumafataga faaleaiga. O masina taitasi, pe tusa ma le 50,000 pauna (19,000 kilokalama) o meaai e utuina ma toe faafoi atu i le faalapotopotoga e aoina meaai mo le faasoasoaina.

Sii mai le Church News, 20 Setema 2003.