Ua Ofoina atu e le Ekalesia le 3 Miliona Tala ma Isi Punaoa e Foia ai le Misela i Aferika
Ina ia tetee atu i se faamai ua toetoe ina a le toe alia’e i nisi vaega o le lalolagi, ae o loo maliliu ai pea lava nisi fanau i nisi foi vaega, o lea ua auai le Ekalesia i se taumafaiga mo le faia o tui puipui o le misela mo le faitau miliona o tamaiti i Aferika. Sa fofogaina mai e taitai o le Ekalesia la latou lagolago i se sauniga sa faia i Uosigitone, D.C., i le aso 17 o Setema 2003.
O le ofoina atu o fesoasoani tau tupe ma isi mea talafeagai e lagolagoina ai, sa folafola atu ai e le Ekalesia le 3 miliona Tala Amerika, o le a foai atu i le isi tolu tausaga o lumanai nei, ma o le a saunia foi tagata e galulue fua mai le lotoifale atoa ai ma fale mo le Au Galulue i le Polokalama e Tetee ai le Misela, e fesoasoani ai i le tau faaitiitia o tagata e aafia i le misela i Aferika.
O le tau o le tui puipui e i lalo ifo o le $1 Amerika i le tamaitiiti e toatasi, o lona uiga “O la tatou lava foai, o le a saunia ai tui mo tamaiti e tolu miliona. E maeu lava le ofoofogia ma le matagofie o lenei mea,” o le saunoaga lea Peresitene Gordon B. Hinckley i le sauniga i le taeao o le Aso Toonai o le konafesi aoao i le masina o Oketopa 2003.
O le Polokalama Tetee i le Misela, o se taumafaiga e lima tausaga e fai ai tui puipui o le 200 miliona tamaiti i Aferika. Ua avea le misela ma mafuaaga autu o le tauaso, ma le maliliu o tagata i Aferika. O lea taumafaiga o le a puipuia ai le tusa ma le 1.2 miliona tagata e maliliu i le misela.
O i latou o loo aofia ai i lea polokalama o le, American Red Cross, United Nations Foundation, Centers for Disease Control and Prevention, ma le Teugatupe a Malo Aufaatasi mo Tamaiti, Faalapotopotoga o le Soifua Maloloina i le Lalolagi, ma le Faalapotopotoga a le Pan American Health, faapea foi le Koluse Mumu ma ofisa Lagolago o le Red Crescent faapea foi malo o atunuu ua aafia ai.
“O loo toe faatino ai foi i i le tautinoga maoae a le Ekalesia mo le faamutaina o mafatiaga i se tulaga faavaomalo,” o le saunoaga lea a Marsha J. Evans, le peresitene ma o le Taitai Autu Faapitoa o le Koluse Mumu a Amerika, a o ia taliaina le vaega tupe muamua o le foai. “Ua le mafai ona matou faamatalatalaina le tele naua o lo matou faafetai.”
Sa ta’ua e le Susuga a Evans le galulue le faatuaoia o le Ekalesia faatasi ma le Koluse Mumu i isi taumafaiga, e aofia ai le isi 2 miliona Tala Amerika lea sa foai atu foi i tausaga talu ai nei, mo isi foi taumafaiga a le Koluse Mumu e fesoasoani ai i tui puipui sa faia i Zambia i le masina o Iuni.
“Matou te fiafia lava e galulue soosoo tauau ma le Koluse Mumu,” o le tala lea a le Epikopo Pulefaamalumalu o H. David Burton i le Deseret News. “Ua tele tausaga o tatou faia lea mea i ni galuega se tele, ma e matou te naunau lava e faaauau pea lena fegalegaleaiga [ma le Koluse Mumu].”
I lana saunoaga i le taeao o le Aso Toonai i le konafesi aoao, sa ta’ua ai e Peresitene Hinckley, o le tupe mo le foai i le puipuiga mai le misela, e le’i aumaia i tupe o le sefuluai. Na aumai i foai alofa a tagata faatuatua o le Ekalesia mo le galuega fesoasoani a le Ekalesia,” o lana saunoaga lea.
Sa folafola atu foi e le Ekalesia nisi fesoasoani talafeagai i le au galulue i lea polokalama. O le a galulue fua foi tagata o le Ekalesia i le lotoifale, ma o le a faaavanoaina foi falelotu e faia ai le galuega.
“O le mafai ona puipuia mai se tamaitiiti mai le oti, o le mafai ona faigofie ona fesoasoani i ni tagata se toatele—o le a la se isi mea e sili atu nai lo lena?” o le saunoaga lea a Harold C. Brown, o le pule faatonu sili o le Uelefea a le Ekalesia ma le Matagaluega o Fesoasoaniga a le Ekalesia, o ia lea sa tauaaoina atu le foai e fai ma sui o le Ekalesia.