Tiutetauave o le Tagata i le Perisitua
Pe a faauu oe i se tofi i le perisitua, ona tuuina atu lea ia te oe o le pule. Peitai, e maua le mana mai le faaaogaina o lena pule i le amiotonu.
O’u uso pele o le perisitua, e ui lava ina tele atunuu tatou te o mai ai, ae o i tatou, e faapei ona fai mai Paulo, e tasi le Alii, tasi le faatuatuaga, e tasi foi le papatisoga.”1 Peitai, o le malosi o le faatuatua i totonu o i tatou taitoatasi, e atiina ae taitoatasi, ae e le faitelea.
Mo se faataitaiga, mafaufau i le faatuatua o se tamaitiiti, pe valu tausaga le matua, sa feagai ma se taotoga faatopetope o lona pitogaau. A o taoto o ia i luga o le laulau tipitipi, sa tilotilo ae i le fomai tipitipi ma faapea mai, “Fomai, a o lei amataina le taotoga, pe mafai lava ona e tatalo mo au?”
Sa tilotilo ifo le fomai i le tamaitiiti ma le ofo tele ma faapea atu, “E, e le mafai ona ou tatalo mo oe.”
Ona fai atu lea o le tamaitiiti, “Afai e te le tatalo mo au, faamolemole la faatali ae sei ou tatalo mo au lava ia.” Na tootuli ifo le tamaitiiti i luga o le laulau tipitipi, ua piilima ona lima, ma amata ona tatalo. Fai mai a ia, “Le Tama Faalelagi e, ua na o au o se tamaitiiti matuaoti. Ua ou ma’i tele, ma o lea o le a fai le taotoga e nei fomai. Pe mafai lava faamolemole ona e fesoasoani ia te i latou ina ia sa’o ona latou faia? Le Tama Faalelagi e, afai e te faamalolo ia te au, o le a ou tama lelei. Faafetai mo le faamaloloina o au.” Ona toe taoto ifo lea o ia i lalo, ma tilotilo atu i mata o alii fomai ma tamaitai tausimai ua loimata, ma faapea atu, “Ia o lea ua ou sauni.”2
Sa toe malosi atoatoa, ma sa faatupulaia foi lona malosi faaleagaga. O outou na uso e ua matutua, ma ua uma foi ona faaee atu le perisitua ia te outou. E maua ia outou korama o le perisitua ia avanoa e faauo atu ai, auauna atu, ma aoao mai ai foi. Ae o le tiutetauave e atiina ae ai le mana i le perisitua, e patino i le tagata lava ia. E na o lou lava tagata patino e mafai ai ona e atiina ae se faatuatua mausali i le Atua ma se faanaunauga mo au lava tatalo patino. E na o lou lava tagata patino e mafai ona tausia poloaiga a le Atua. E na o lou lava tagata patino e mafai ai ona e salamo. E na o lou lava tagata patino e mafai ai ona e agavaa mo sauniga o le faaolataga ma le faaeaga. Ma pe afai e faamauina lou toalua ia te oe, o lona malosi ma lona tulaga gafatia, o le a faateleina ai foi lou malosi ma lou tulaga gafatia.
O au o se tasi o se korama matagofie o le perisitua. Matou te olioli i se usoga matagofie. Matou te tatalo faatasi; matou te galulue faatasi. Matou te feaoaoa’i, fealofani, ma taufai lagolago e le tasi le isi. E eseese uma lava tulaga tau galuega ma tomai e o mai ai le Toasefululua—o pisinisi, aoga, tulafono, ma faasaienisi. Ae e leai ma se tasi na tofia e auauna ona o na tulaga. O le mea moni, o tagata uma e valaau i tofiga o tiutetauave o le perisitua, e filifilia ona o ituaiga o tagata e i ai i latou, ma ituaiga tagata foi e mafai ona avea ai i latou.3
O le a ia te oe se anoano o tiute eseese ma matafaioi i lou olaga atoa. O le tele lava o nei tiute ma matafaioi e le tumau, ma o le a muta foi pe a faamalolo oe. (Atonu e te le tetee pe a faamalolo oe mai se valaauga e velevao i le faatoaga o le uelefea.) Ae o le a le faamalolo maia lava oe mai tiutetauave e faatatau i lou lava atinaega ma le atinaega o le aiga.
Pe a faauu oe i se tofi i le perisitua, ona tuuina atu lea ia te oe le pule. Peitai, e maua le mana mai le faaaogaina o lena pule i le amiotonu.
Tiutetauave i le Alii
Mai le Peresitene o le Ekalesia i le tiakono faatoa faauu, tatou te tali uma atu i le Alii. E ao ina tatou faamaoni ma faatuatua ma ola i mataupu faavae uma ma aoaoga faavae ua Ia tuuina mai ia te i tatou. E le mafai ona tatou gauai ma usitai na o se vaega o se faaaliga po o se poloaiga ua tuuina mai tatou te faataunuuina. Ua faatuatuaina i tatou e Ia e “galueaiina le malo o le Atua, ma atiinae lana amiotonu.”4
E i ai se aso tatou te tofu lipoti atu ai i le Alii.5 Sa iloagofie lea tulaga i se ma talanoaga anoa i ni tausaga ua leva ma se tasi o a’u uo pele ua pulapula lagoto lona soifua. Sa ou fesili atu ia te ia, pe ua sauni e oti. E le mafai ona galo ia te au lana tali. Sa ia faapea mai ma le loto tele ma lona talitonuga maumaututu, “Ua saunia lo’u olaga mo le asiasiga [a le Atua].”
Ina ua silafia e le Perofeta o Iosefa Samita o le a oo mai le oti, sa fai mai o ia, “Ou te alu atu e pei o le tamai mamoe a fasia; a e ou te filemu e pei o le taeao i le tau vevela; o ia te au le loto fuatiaifo e mama i le Atua, ma tagata uma.”6
O le taimi lenei e sauniuni ai mo lau faatalanoaga faaiu [ma le Atua]. E mafai ona e fesili ifo ia te oe lava: “Pe o ou totogiina ea ma le loto naunau se sefuluai? Pe ou te usitai ea i le Upu o le Poto? Pe mama ea la’u gagana mai upu masoa ma le palauvale? Pe o ou amiotonu ea? Pe o ou faafetai moni ea i le Togiola lea e mafai ai ona maua le toetu moni ma le ola e faavavau? Pe ou te faamamaluina ea feagaiga o le malumalu e faamauina ai ia te au lo’u toalua ma la’u fanau e faavavau?” Afai e mafai ona e tali mai ma le faamaoni ioe, o loo e atiina ae le mana o le perisitua.
E mafai ona faaopoopo atu le meaalofa o le Agaga Paia i lena mana. O loo faamatala mai e tusitusiga paia ia tagata sa mauaina le Agaga Paia ae latou te le i iloaina.7 Aua nei e faatagaina lena mea e tupu ia te oe. Ia faaleleia atili lena meaalofa ma ia agavaa mo lenei folafolaga mai le Atua: “Ia tautala atu i mafaufauga o le a ou tuu i totonu o o oulua loto, ona le faafememea’iina ai lea o oulua i luma o tagata; Aua o le a tuuina atu ia te oulua i le ituaso lava, ioe, i le minute lava, le mea lua te fai atu ai.”8
Tiutetauave O Le Tagata Lava Ia ma le Mana o le Perisitua
E tele tisipenisione sa i ai le perisitua, e pei o le tisipenisione o Atamu, Noa, Enoka, Aperaamo, Mose, o le taulotoaiga o taimi, o Sa Iareto, o Sa Nifae, ma isi. O tisipenisione uma lava ua mavae sa le i umi ni taimi, aua sa tofu faaiuina i se liliuese. Sa laitiiti foi vaega o le Lalolagi sa gata ai. I se faatusatusaga la, o lo tatou tisipenisione—le tisipenisione o le atoaga o taimi—o le a le patino i se taimi po o se nofoaga. O le lalolagi atoa, o le tisipenisione o le atoaga o taimi o le a aofia ai le tuufaatasiga a’ia’i, atoa, e fusia faatasia ai tisipenisione, o ki, o mana, ma mamalu mai le taimi o Atamu seia oo mai i le taimi nei.9
Sa toefuatai mai le Perisitua Arona i le aso 15 o Me, 1829, e Ioane le Papatiso; e lei leva ona mavae lena ae toefuatai mai le Perisitua Mekisateko e Peteru, Iakopo, ma Ioane.10 Sa tuuina mai e isi avefeau mai le lagi ia ki patino o le perisitua. Sa umia e Moronae ia ki o le Tusi a Mamona.11 Sa aumai e Mose ia ki o le faapotopotoina o Isaraelu ma le taitaiga o ituaiga e sefulu.12 O Elaia sa tauaaoina mai ki o le toefuataiga o mea uma,13 e aofia ai feagaiga faa-Aperaamo.14 Ma o Elia sa faaee maia ki o le pule e fai ai faamauga.15
Ua e silafia se mea e uiga i ki. Atonu o loo i ai i lau taga se ki i lou fale po o lau taavale. I se isi foi itu, o ki o le perisitua, e leai se tino ma e le mafai ona vaaia. E mafai ona “tatala” [pe faaola] ai le pule o le perisitua. O nisi ki e mafai ona aumai ai le mana e fusifusia ai mea i le lagi faapea foi i le lalolagi.16
Sa faaee mai e Iosefa Samita ia ki o le perisitua i luga o le Toasefululua.17 O ki foi na sa faasolo atu i taitai e sosoo mai ai. O le taimi nei, o loo umia ai e Peresitene Gordon B. Hinckley le pule mo ki uma lava sa toefuatai mai, ia sa umia e “latou uma na maua le augatupulaga i soo se aso mai le amataga o le foafoaga.”18
O le i ai o lea talafaasolopito faaleaoaoga i le mafaufau, ua manino ai lava e le mafai e se tagata ona faatau mai le perisitua. O loo tautino mai i le mau “ele fai fua foi e se tasi lenei faiva mamalu, tau o le ua filifilia e le Atua, e faapei o Arona foi.”19
O le tauaveina o le perisitua o lona uiga, ua ia te oe le tiutetauave patino e faalautele ai lou valaauga. Ia avea avanoa taitasi uma e te galue ai, e fesoasoani ai e atiina ae lou mana i le perisitua. Ia e mulimuli i faataitaiga a perofeta soifua, i ou laei ma ou foliga. O lou faia o lena mea, e ta’u filemu atu ai e te matua malamalama lelei i le taua o le “Perisitua Paia, e tusa ma le Faatulagaga a le Alo o le Atua.”20
A maua e outou uso se avanoa e faaaoga ai le Perisitua Mekisateko, ia manatunatu loloto i le mea e tatau ona outou faia. Pe a tuu ou lima i luga o le ulu o se tagata, e te le o faia se tatalo, aua e le manaomia ai se pule e fai ai se tatalo. Ua faatagaina oe e te faamanuiaina i se tofiga, e faauu, e faamanuia, ma e tautala i le suafa o le Alii.21 Ia manatua Ana folafolaga: “Ai se e te faamanuiaina, ou te faamanuiaina,”22 ma “Ou te tuuina atu ia te oe se vaega o lo’u Agaga, … ma o le a e iloa ai … mea uma … e uiga i le amiotonu, i le faatuatua ma le talitonu ia te au o le a e maua.”23
Ina ia faalautele o outou valaauga i le Perisitua Arona, e tatau ia te outou alii talavou ona tulimatai a outou taumafaiga faaletagata lava ia i faamoemoega patino e lima ina ia:
-
Maua se malamalama i le talalelei a Iesu Keriso,
-
Agavaa mo le galuega a faifeautalai,
-
Tausi lou ola mama ma ia agavaa e ulufale atu i le malumalu paia,
-
Tulitulimatai lau aoga,
-
Tausisia tulaga faatonuina o le Ekalesia ma ia agavaa mo lau soa o le lumanai… .
E mafai faapefea ona e manatuaina na faamoemoega e lima? E faigofie. Tilotilo i lou lima. Tusi lou limatusi i tusitusiga paia. O iina e te maua ai se malamalama atili i le talalelei a Iesu Keriso, ona e ola ai lea e tusa ma Ana aoaoga. Ia faamanatu atu ia te oe e lou loaloavale ina ia e agavaa mo le galuega a faifeautalai. Ia faamanatu atu ia te oe e lou lima tuumama le faaipoipoga, faaeega paia, faamauga, ma faamanuiaga o le malumalu. Ia faamanatu atu e lou lima tamatama o le tulitulimatai o se aoga o se tiutetauave faalelotu lea.24 Ia faau i luga lou limamatua, e faamanatu atu ai ia te oe le tausisia o tulaga faatonuina o le Ekalesia, ma ia agavaa mo lau soa e faavavau. O le faataunuuina o nei faamoemoega e lima o le a faamanuiaina ai o outou olaga.
O outou na o loo tauaveina le Perisitua Mekisateko, e tatau ona outou agavaa mo le tikeri aupito maualuga o le mamalu selesitila. Ina ia mafai la ona maua [lena tikeri], e ao i se tagata ina ulu i lenei faatulagaga o le perisitua [o lona uiga o le feagaiga fou faavavau o le faaipoipoga]; Ae afai foi na te le fai faapea na te le mafai ona maua.”25
E faamamaluina le feagaiga pe a e faamamaluina lau ava. O le faamuamua aupito sili a se tane, o le tausiga lea o lana ava. Ia e faamaoni ia te ia. Ia aua lava nei faatagaina ou mata e te tilotilo ai i ata ma tusi mataga pe tautala foi i se gagana masoa ma le mataga. O filifiliga lava e faia e faaaoga ai le saolotoga e filifili ai, e faaitiitia ai foi le saolotoga o se tagata i le lumanai. E le mafai ona e faaaogaina lou saolotoga e filifili ai, ae faapea e te le tauaveina le tiutetauave o filifiliga taitasi ma e le tu foi e tali atu e tusa ai ma na filifiliga.
Ia aua lava nei galo “o aia tatau o le perisitua e faafesootaiina e le mavavaeeseina ma mana o le lagi… . [O nei mana] e le mafaia ona faatonuina pe faaaogaina [sei vagana] o mataupu faavae o le amiotonu.”26 Afai tatou te faaaoga sese lena mana e ufiufi ai a tatou agasala, pe faamalie ai lo tatou loto faamaualuga, po o lo tatou fia sili le aoga, pe pulea pe faamalosia le fanauga a tagata i soo se faiga lava o le amioletonu, ona aveesea lea ia i tatou o le pule ma le mana o le perisitua.27
Uso e, ia galulue ma le agamalu, faapalepale, agalelei, lotomaualalo, alofa e le faatuaoia, malamalama mama, ma le alofa moni i tagata uma.28 Ona “toto ifo lea i [lou] agaga le mataupu faavae o le perisitua e pei o le sau mai le lagi.”29
Faamolemole ia outou iloa lo matou alolofa ma le agaga faafetai mo outou taitoatasi. Matou te faafetai atu i lo outou faatuatua, o a outou galuega, ma le malosiaga matou te maua mai ia te outou. Ia faamanuiaina outou, o e foi e pele ia te outou, ma a outou fanau i lo outou tulitulimatai atu ma le tonu i le mana o le perisitua.
O loo soifua le Atua. O Iesu o le Keriso. Na te taitai Lana Ekalesia e ala i Ana perofeta ma aposetolo. Ou te molimau atu ai, i le suafa o Iesu Keriso, amene.