Na Te Silafia i Tatou; E Alofa Foi o Ia ia Te I Tatou
O le Alii … na te silafia i matou ma le mea matou te i ai, ma Na te silafia foi tagata o loo manaomia la matou fesoasoani.
O Iosefa Samita i le 14 o ona tausaga, sa tatau ona avea ma se tasi e aupito le amanaia o tagata soifua i le fogaeleele, ae peitai sa silafia o ia e le Atua o le lagi ma sa Ia valaau atu ia te ia ma ta’u lona igoa i le Togalaau Paia. Ou te talitonu e silafia foi e le Alii lo’u igoa ma lou igoa.
O le Peraimeri tatou te aoaoina ai le fanau o i latou taitoatasi o se atalii po o se afafine o le Atua ma e silafia i latou e lo latou Tama Faalelagi ma e alofa foi ia i latou. E faaalia e taitai o le Peraimeri ma le perisitua mea e finagalo le Faaola e fai pe a latou valaauina se tamaitiiti po o se teineitiiti i lona igoa. Na fetalai mai Iesu, “O a’u nei o le leoleo mamoe lelei, ua ou iloa a’u mamoe, ua iloa foi a’u e a’u mamoe.”1 O loo molimau mai tusitusiga paia, “E valaau e Ia i ana lava mamoe i o latou igoa, na te taitai atu foi ia te i latou.”2
E le gata ina silafia e le Alii i tatou, ae Na te silafia foi le mea tatou te i ai, ma Na te taitai foi i tatou e fai mea lelei. I se tasi aso, sa uunaia ai se tina ou te iloa, e telefoni i lana tama teine. (E tupu nei ituaiga o mea i tina i taimi uma.) O le vaeluaga o le aso, ma o la sa faigaluega le Tina, ma o le mea foi lea e tulaga ese ai lea telefoni aua e le masani ona vili i ai i le ao. Sa ofo tele o ia, aua sa tali mai e le toalua o lana tama le telefoni—aua e le masani ona i ai o ia i le fale i se aso faigaluega. A o tuu atu e le toalua o lana tama i ai le telefoni sa ia faapea atu, “O lou tina ma ana musumusuga masani.”
Faatoa foi ane i la’ua mai le fomai. Sa sau o ia i le telefoni, a o taumafai e aua le tagi, ma faapea mai, “Na faailoa mai i le faaata na fai o lo’u manava o loo sautualua ona ta’ai’ai le uso i le ua o le pepe. Fai mai le fomai e leai se isi mea e fai ae na o le vave ona ou taoto e aumai ai le pepe.” Ona sosoo ai lea ma le [faamatala mai] o le mafuaaga moni o le le fiafia: “Fai mai foi le fomai, e le mafai ona ou toe siiina se mea mamafa nai lo le pepe fou mo le fa vaiaso!” Sa manaomia e ia se faamautinoaga a o le i alu mo le taotoga, e silafia e le Alii le mea o loo ia manaomia ma e alofa foi ia te ia—ma o le a maua se fesoasoani mo le vaaiga o le fanau laiti e toatolu i le fale, aua e pei foi o ni pepe i latou. A tatalo atu ia tina—ma tama—i le Alii e faamanuia ma faamalolosi o latou aiga, e masani lava ona faaali atu e Ia le auala ia te i latou.
O Tuafafine Gayle Clegg, o le au peresitene aoao o le Peraimeri na nonofo ma lona toalua i le tele o tausaga i Pasila. Talu ai nei sa malaga ai Sister Gayle Clegg i Iapani ona o se tofiga o le Peraimeri. Ina ua malaga atu o ia i le falelotu i le Aso Sa, sa ia maitauina se aiga Pasila sa lotolotoi ai i le Au Paia o tagata Iapani. “E foliga Pasila uma,” o lana tala lea. Sa na o sina minute sa ia faafeiloai atu ai ia te i latou ma ia iloa ai le sagisagi fiafia o le tina ma tamaiti, ae e fai lava si filemu o le tama. “O le a maua so’u avanoa matou te talanoa ai pe a uma le sauniga,” o lona mafaufau lea a o faafeao atu o ia i luga o le tulaga. Sa tuuina atu lana savali i le faa-Peretania, lea sa faaliliuina i le faa-Iapani, ona uunaia ai lea o ia e tuuina atu lana molimau i le faa-Potukale. Sa faatuatuai o ia aua e leai ni faamatalaupu faa-Potukale ma o le 98 pasene o tagata o le a le malamalama i ana tala.
Ina ua maea le sauniga, sa savali atu i luga le tama Pasila lea ma faapea atu ia te ia, “Tuafafine, e ese lava tu ma agaifanua iinei, ma e ese lo’u le fiafia. E faigata ona ou sau i le lotu ae le malamalama i se mea. E i ai nisi taimi ou te mafaufau ai pei e sili ai ona ou nofo i le fale ma faitau ai a’u tusitusiga paia. Sa ou fai i lo’u toalua, ‘Toe tasi lava le avanoa lenei ou te alu ai i le lotu,’ ma na ou sau lava i le aso ma lo’u mafaufau o le aso mulimuli lenei ou te toe sau ai i le lotu. Ina ua fai lau molimau i le gagana Potukale, sa pa’i mai le Agaga i lo’u loto, ma sa ou iloa ai, o i e tatau ona ou i ai. Ua silafia e le Atua o loo ou i ai iinei, ma o le a Ia fesoasoani mai ia te au.” Ona alu ai lea o ia ma fesoasoani i isi i le teuina o nofoa.
Pe ua na o se mea faafuasei ea na auina atu ai le uso e toatasi o le au peresitene o le Peraimeri e iloa tautala faa-Potukale i Iapani ae le o Potukale? Pe sa silafia e le Alii o loo i ai se tagata iina na te manaomia le mea lea e na o [Tuafafine Clegg] e mafai ona tuuina atu—ma sa ia te ia le lototele e mulimuli ai i se uunaiga a le Agaga? O se tasi o faamanuiaga sili o le i ai o se valaauga i le Ekalesia, o le musuiaina lea o i tatou e le Alii, e ala i Lona Agaga, e fesoasoani ia i latou ua tofia i tatou e auauna i ai.
O i tatou uma taitoatasi e totogi atoa le sefuluai, e mafai ona molimau mai e oo mai faamanuiaga a le Alii ia i tatou ma fetaui lelei ma o tatou lava manaoga taitoatasi. Ua folafola mai e le Alii afai tatou te totogi a tatou sefuluai, o le a Ia to mai pupuni o le lagi ma sasaa mai mo i tatou faamanuiaga e silisili ona tele ma o le a le lava mea e teu ai.3
I le tele o tausaga ua mavae, sa faigaluega ai John Orth i se fale e molo ai u’amea i Ausetalia, ma sa tupu ai se faalavelave matautia, ma pisipisi ai le molo u’amea vevela i ona mata ma lona tino. Sa faia lona faauuga ma na mafai ona toe maua se vaega o lana vaaiga i lona mata taumatau, ae sa matua po atoa lona mata tauagavale. Talu ai e le mafai ona manino lana vaai, o lea sa vaea ai o ia mai lana galuega. Sa taumafai o ia e sue sana galuega i le aiga o lona toalua, ae sa gau le latou kamupani ona o le pau o le tamaoaiga. Sa faamalosia o ia e alu atu mai lea fale i lea fale e sue ai ni nai galuega ma sina tupe e faatau ai meaai ma totogi ai le fale.
O le isi tausaga atoa e le i totogia ai sana sefuluai ma sa alu ai e talanoa i le peresitene o le paranesi. Sa malamalama le peresitene o le paranesi i le tulaga, ae sa ia faatonuina John ina ia avea ma mataupu o ana tatalo ma anapogi ina ia mafai ona maua se auala e totogi ai ana sefuluai. Sa tatalo ma anapogi Ioane ma lona toalua o Alice, ma ua tonu ai ia te i la’ua e na o le pau lava le mea taua o loo ia te i la’ua, o le mama faamau a [Alice]—o se mama matagofie sa faatau i le taimi sa sologa lelei ai. Ina ua mavae se taimi umi o fefulisa’i faalaau mamafa, sa tonu loa ia te i la’ua e ave le mama i se kamupani e faatau faamokesi, ma sa la iloa ai e lava lona tau e totogi ai a la’ua sefuluai ma isi pili ua tatau ona totogi. O le Aso Sa na sosoo ai sa alu ai o ia i le peresitene o le paranesi ma totogi lana sefuluai. Ina ua alu ese mai le ofisa, sa la fetaui ma le peresitene o le misiona ma sa iloa ai e le peresitene e leaga ona mata.
Sa tusia mulimuli ane e le atalii o [Uso Orth], lea ua galue nei o se epikopo i Adelaide e faapea: “Matou te talitonu o le [peresitene o le misiona] o se fomai mata aua sa masani ona valaau o Peresitene Fomai Rees. Sa talanoa o ia ma Papa, ma sa mafai ona ia suesueina o ia ma ofo atu ai ni fautuaga e fesoasoani ai i lana vaaiga. Sa faia e Papa e tusa ma lana fautuaga … ma sa oo mai le taimi na toe pupula ai—e 15 pasene le malamalama o lona mata tauagavale ae 95 pasene le malamalama o lona mata taumatau—ma faatasi ai ma le fesoasoani a matatioata o lea na mafai ai ona toe pupula o ia.”4 Ina ua toe pupula mata o John, e le i toe faaletonu lona faigaluega; ma sa alu toe totogi le mama ma toe maua mai ai, ma ua avea nei ma measina a le aiga, ma sa totogi foi se sefuluai atoa i aso uma na totoe o lona ola. Sa silafia lelei e le Alii ia John Orth, ma sa Ia silafia foi le tagata e mafai ona fesoasoani ia te ia.
O “Peresitene Fomai Rees” o le tama o lo’u tina, ma atonu foi na te lei iloaina le vavega sa tupu i lena aso. Sa faamanuiaina tupulaga ona sa tonu i se aiga o le a latou totogia la latou sefuluai tusa lava pe o le a le faigata sa i ai—ma “te’i ai ua feiloai” ma se tagata “ae te’i foi’ ua iloa ane o se fomai mata sa mafai ona faia se eseesega tele i o latou olaga. E ui foi atonu e tofotofoina nisi ia talitonu o ni mea tutupu faafuasei nei mea, ae ou te talitonu e oo lava i se manuiti e pau i le eleele Na te silafia uma lava.5
E le i iloa e le matou aiga lenei tala e uiga i lo matou tamamatua ae faatoa iloa i le lua tausaga talu ai, ae o le mea lenei ua matou iloa e uiga i lo matou tamamatua: e alofa o ia i le Alii ma sa taumafai e auauna ia te Ia i lona olaga atoa. Ma o le mea lenei ua matou iloa e uiga i le Alii: Na te silafia i matou ma le mea matou te i ai, ma Na te silafia foi tagata o loo manaomia la matou fesoasoani.
Ua ou vaai i tagata o le au paia, o e ua iloa le Alii ma alolofa ma le faamaoni ia te Ia, o latou ta’u atu i se talavou o loo tauivi i le sailiga o le ala: “E alofa le Atua ia te oe. E finagalo o Ia ina ia e manuia. O Lona faanaunauga aupito sili o le faamanuia atu ia te oe.” Ua ou faalogo foi o outou molimau atu i se uo faavauvau: “Ou te iloa e i ai le ola pe a mavae lenei olaga. Ou te iloa o loo soifua pea lau tama ma e i ai se auala e te toe vaai ai ia te ia ma toe mau faatasi ma ia.” Ua ou maitauina le toatele o outou a o fai atu i se tina ua lotovaivai: “Sei ou fesoasoani atu ia te oe—o le mea lena e te faia o le galuega aupito taua i le lalolagi.” Ua ou vaai ia i latou sa outou pa’i atu i ai, e le gata ina latou iloaina lo outou alolofa, ae ua lagonaina foi le alofa ma le mana o le Alii a o molimau atu i ai Lona Agaga e moni mea sa outou fai atu ai.
O ai ea na te faateaeseina i tatou mai le alofa o Keriso? Ua uunaia au, e pei o la Paulo, e le mafai e puapuaga, po o le ola, po o le oti, po o se isi lava mea ona faateaeseina i tatou mai Lona alofa.6
Sa foai mai e le Faaola Lona soifua mo i tatou taitoatasi. Na te silafia lo tatou olioli ma o tatou faanoanoaga foi. Na te silafia lo’u igoa ma lou igoa. Ina ua tatou osi feagaiga ma Ia i le papatisoga, sa tatou folafola atu e tausi Ana poloaiga, ma manatua pea o Ia, ma tauave Lona suafa i o tatou luga. O le mea e aupito sili ona taua, o Lona suafa lea ua tatou mananao e faaigoa ai, aua “e leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso, le Alii e Pule Aoao.”7 Ou te molimau atu o loo soifua o Ia ma e alofa ia te i tatou, ma na te valaau mai foi ia te i tatou i o tatou igoa e o atu ia te Ia. I le suafa o Iesu Keriso, amene.