Matou Te Talitonu i Mea Uma Lava Ua Faaalia Mai e le Atua
O loo faaauau pea ona faaali mai e le Atua Lona finagalo i tagata, e pei ona Ia faia i vaitau uma o taimi pe a i ai Ana auauna ua uma ona faamaonia i luga o le fogaeleele.
“Matou te talitonu i mea uma lava ua faaalia mai e le Atua, ma mea uma o loo ia faaalia mai nei, ma matou te talitonu o le a ia faaalia mai le tele o mea silisili ma le taua tau le Malo o le Atua.”1
Tatou te folafola atu i le lalolagi e le o tapunia le lagi. O loo faaauau pea ona faaali mai e le Atua Lona finagalo i tagata, e pei ona Ia faia i vaitau uma o taimi pe a i ai Ana auauna ua uma ona faamaonia i luga o le fogaeleele. Ua tatau ona iloa uma e fanau a lo tatou Tama Faalelagi nei mea moni, aua o loo tuuina mai i tusitusiga paia le tele o faamaoniga o lenei mea.
O nisi taimi tatou te faauiga ai le fesootai mai o le finagalo o le Atua o se faaaliga. O nisi taimi tatou te taua ai na ituaiga o fesootaiga o ni musumusuga. Ae peitai, o faaaliga, o se upu e loloto atu lona uiga. Ona o musumusuga e mafai ona faapea o se faaaliga, ae o faaaliga foi e mafai ona aofia ai faaaliga vaaia, o miti, o afioga tulei, ma isi faailoga faaleagaga. Na faamalamalama mai e Elder Talmage:
“O faaaliga o lona uiga o le faaalia mai o upumoni paia e ala i fesootaiga mai le lagi… .
“O le upu musumusuga o nisi taimi e aumaia ai se uiga [taua] e toeitiiti lava tutusa ma le faaaliga, e ui ona o lona tupuaga ma le faaaogaina i aso anamua o loo i ai se uiga tulaga ese mai ai. Ina ia musuia o le uiga moni o le ulufia i le agaga; e musuia se tagata pe afai o loo i ai o ia i le uunaiga a se mana e ese mai lona lava malosi. O musumusuga paia e mafai ona manatu i ai o se faagaoioiga o aafiaga faaleagaga e fai si maualalo teisi ane ma e le matuai tuusaoina mai i luga o se tagata nai lo … faaaliga. O lea la, e leai se eseesega tele o nei mea e lua.”2
E i ai le faatulagaga i le auala e faaali mai ai e le Alii Lona finagalo i tagata. Ua ia i tatou uma le aia tatau tatou te ole atu ai i le Alii ma maua mai ai musumusuga e ala i Lona Agaga e faatatau i vaega o loo aofia ai i totonu o la tatou tausiga. E mafai ona maua e matua ia faaaliga mo o latou lava aiga, o se epikopo mo lana aulotu ua tofia i ai o ia, ma e faapena foi i le Au Peresitene Sili mo le Ekalesia aoao. Ae peitai, e le mafai ona tatou maua ni faaaliga mo ni matafaioi o loo vaaia e se isi tagata. Ua folafola mai e le Perofeta o Iosefa Samita:
“E matuai feteenai lava ma fuafuaga a le Atua le mauaina e soo se tagata o le Ekalesia, po o soo se isi lava tagata, ia faatonuga mo i latou o loo pule e maualuga atu nai lo i latou.”3
“O faaaliga o le mafaufau ma le finagalo lea o le Atua i le Ekalesia, e ao ona auala mai i le Au Peresitene [Sili]. O le faatulagaga lenei a le lagi, ma le mana ma avanoa lelei o lenei Perisitua. O se avanoa lelei foi mo soo se taitai i totonu o lenei Ekalesia le mauaina o faaaliga, e faatatau tonu i lona valaauga ma le tiute i totonu o le Ekalesia.”4
O le latalata atu ona tatou tausia o tatou olaga ina ia ogatasi ma le taitaiga ua tuuina mai e le Alii ia i tatou e taialaina ai o tatou olaga, o le tele foi lena ona tatou mauaina Lona Agaga. O se tagata e ole atu i le Alii mo se taitaiga e tatau ona agavaa o ia mo le mauaina. E tatau ona ogatasi ma tausia lona olaga ma faatulagaga ua faatulagaina e le Alii mo Lana fanau. E tatau ona tulaga lelei lona olaga i luma o le Atua ma Ona tagata. E tatau ona ogatasi ma aoaoga a tusitusiga paia, o perofeta, ma le faatulagaga a le Ekalesia.
E mafai ona faapea mai se tagata ua ia maua se faaaliga ina ia le faamaoni ina ia mafai ai ona faaleleia lona tulaga i mea tautupe. Pe atonu foi e faapea mai se tagata ua faatonuina o ia e tatau ona agai le Ekalesia i le isi itu nai lo le mea o loo taitaiina i ai e le perofeta. O le a vave lava ona tatou iloa o na ituaiga faamatalaga e lē mai le Atua.
O loo i ai se malosiaga ma se mana tele i le mea moni e faapea e faitau miliona tagata o loo i le lalolagi atoa ua tofusia ma lena molimau o le Atua, o le Faaola, ma le valaauga o le Perofeta o Iosefa Samita. E lei faapea lava ua uunaia i tatou ina ia tatou usiusitai tauaso; o le usiusitai ma le iloa ua iloagofie ai tagata o le Ekalesia.
Na lipotia mai na saunoa Polika Iaga faapea o lona popolega tele na i ai ona o le a usiusitai tagata o le Ekalesia i mea na ia tauina atu o le mafaufau ma le finagalo lea o le Atua e aunoa ma le tatalo muamua ma maua mai se molimau o ia mea mo i latou lava.5
I le faatuina o Lona malo i luga o le fogaeleele, na tuuina mai ai e le Alii ia mataupu faavae taua ma tulafono e taitaiina ai Lana fanau iinei. O le usiusitai i na tulafono ma matupu faavae e aumaia ai faamanuiaga na faapea ona Ia osifeagaiga ai e tuuina mai ia i tatou. O le solia o ia tulafono ma mataupu faavae o le a oo mai ai Ana faamasinoga.
O le iloiloina o le talafaasolopito o le tagata ua faaalia mai ai faataitaiga o le oo mai o faamanuiaga i le usiusitai faapea ma le faanoanoa ma le faatafunaga e maua mai le le usiusitai. O le ala e tatau ona tatou ui ai ua faaalia mai e ala i Ana perofeta paia, o e e taitaiina i tatou ina ia tatou usiusitai i faatonuga a le Alii.
O se tasi faataitaiga o faatonuga ia a le Alii i le fanauga a Isaraelu a o latou malaga i le vao. Ina ia mafai ona i ai se mea e tulimatai atu i ai mo a latou tapuaiga ma gaoioiga, o lea na faatonuina ai e le Alii ia Mose ina ia fausia se fale fetafai. O le fale fetafai o se faatusa o le malumalu, e mafai ona fesiitai ina ia faigofie ona latou feaveaiina.
“Aua na [fetalai] mai Ieova ia Mose, …
“A ia tofia sa Levi e pule i le malumalu ua i ai le tulafono, ma ona ipu uma, ma ana mea uma: latou te tauave le malumalu, ma ona ipu uma; ma latou auauna i ai, latou te tolauapi foi faataaliolio i le malumalu.
“Pe a ave le malumalu, e talaina lava e sa Levi: pe a to foi le malumalu, e faatuina lava e sa Levi… .
“E tolauapi le fanauga a Isaraelu, o le tagata ma le togalauapi o lona ituaiga, o le tagata foi i le mea e i ai lo latou tagavai, i a latou au.
“A o sa Levi, latou te tolauapi faataaliolio i le malumalu ua i ai le tulafono, ina nei oo le toasa i le faapotopotoga o le fanauga a Isaraelu: e tausi foi e sa Levi sauniga o le malumalu ua i ai le tulafono.”6
Ma na avea le malumalu ma totonugalemu o la latou tolauapiga ao latou malaga atu i le nuu o le folafolaga. O iinei e mafai ona faia ai sauniga paia. O le aso na faamaeaina ai le malumalu, na ufitia ai le malumalu i se ao faaniutu. Na aveesea le ao faaniutu pe a faaauau la latou malaga. Afai e ufitia e le ao faaniutu le malumalu, ona latou le malaga lea.
Na faatonuina i latou e le Alii i la latou malaga ina ia tolauapi i lalo o le Mauga o Sinai. O iina na faatonuina ai Mose ina ia alu atu i luga o le mauga e talanoa ai ma le Alii. O iina na ia maua mai ai faatonuga i le ala e taitaiina ai le fanauga a Isaraelu i le vaomatua. Na tuuina atu foi ia Mose “papa e lua o le tulafono, o papamaa lava na tusia i le aao o le Atua.”7
Na umi lava se taimi na tuua ai e Mose le nuu. “Ua iloa e le nuu ua faatuatuai ona alu ifo o Mose nai le mauga, ona potopoto mai lea o le nuu ia Arona, ma latou fai atu ia te ia, Tu ia oe i luga, ia e faia se atua mo i tatou, na te muamua atu ia i tatou; aua o lena Mose, o le tagata na aveina ae i tatou nai le nuu o Aikupito, tatou te le iloa pe se a se mea ua oo ia te ia.”8
Na gauai atu Arona i le manao o tagata ma fai atu ia i latou ina ia ao uma mai a latou auro ma siliva ma mea taua ma faaliu suavaia ma fai ai se tamai povi auro, o se tupua e mafai ona latou tapuai i ai ma feaveaia ao latou faimalaga. O le taimi lena, na maua ai e Mose ia papamaa e lua o le tulafono o loo i ai poloaiga a le Atua i Ona tagata. Ona alu ifo ai lea o Mose mai le mauga, faatasi ma papamaa i ona lima.
“Ua faalatalata atu o ia i le togalauapi ona iloa ai lea e ia o le tamai povi, ma le siva: ona tupu tele ai lea o le ita o Mose, ua lafo ifo papamaa nai ona lima, ua nuti ai i lalo o le mauga.”9
Talu ai ona o le le usiusitai o le fanauga a Isaraelu, “A o Mose, ua ave e ia le faleie, [aveese mai lo latou totonugalemu] ua faatu ai e ia i tala atu o le togalauapi.”10
O lea, ua aveesea mai ia i latou le mea sa taulai i ai, o le malumalu lea. Ua le mafai nei ona toe taitaia ma puipuia i le i ai o se malumalu. O lea, sa na o e lava na faamaoni na faatagaina e ulu atu i le malumalu. O le mea e tasi e le mafai ona taliaina e le Alii o le tapuai lea i isi atua. Talu ai ona o le tele o tausaga na faapologaina ai i latou i Aikupito, na avea le ifo i tupua ma se luitau i le fanauga a Isaraelu.
Ina ua mavae se vaitaimi o olega mo se faamagaloga mai le Alii, sa poloaiina loa Mose ina ia, “ta … ni papamaa se lua, pei o papamaa muamua”11 ma alu ae ma ia i luga o le mauga. E 40 ao ma le 40 po sa i ai Mose i luga o le Mauga o Sinai, e aunoa ma se areto po o se vai, ma na faatonuina o ia e le Alii:
“Ia e tusi nei upu: aua ua ou osia le feagaiga ma oe atoa ma Isaraelu e tusa ma ia lava upu.
“… Na tusi foi e ia i luga o papamaa o upu o le feagaiga, e sefulu upu.”12
O le mea lea, na aumaia ai Tulafono e Sefulu i tagata ina ia mulimuli i ai ma faaaoga i aso uma o o latou olaga. Na iu lava ina ua aumaia e le usiusitai ia le tulafono a le Alii i le fanauga a Isaraelu. Ae o le le usiusitai e na o le faatuai ai o le alualu i luma o le fanauga a Isaraelu e agai atu i lo latou nuu o le folafolaga. Na tatau lava ona latou agavaa ina ia mafai ona latou maua le tulafono a le Alii.
Ia maitau mai na tuuina atu e le Alii Lana afioga ia Mose, o Lana perofeta. E silafia e le Alii le mea e faamanuiaina ai Lana fanau, ma o le mafuaaga lena Na te tuuina mai ai tulafono i tagata e auala mai i Ana perofeta. Afai e usitaia, o le a taitaiina atu e nei tulafono i tatou i le Atua. Tatou te le filifilia e i tatou lava po o a na tulafono. E tuuina mai le Atua i le tagata.
Na faataunuuina e le Faaola le tulafono a Mose,13 ma o faatonuga paia foi faapena na faaalia mai i o tatou aso e ala mai i le Perofeta o Iosefa Samita, e pei ona i ai i le vaega e 59 o le Mataupu Faavae ma Feagaiga. Ua poloai mai le Alii:
“O le mea lea, ou te tuuina atu ai ia te i latou le poloaiga e faapea: Ia e alofa atu i le Alii lou Atua ma lou loto atoa, ma lou manatu, mafaufau, ma lou malosi atoa; a o le igoa o Iesu Keriso ia e auauna atu ai ia te ia.
“Ia e alofa atu i le lua te tuaoi e pei o oe lava ia te oe. Aua e te gaoi; pe mulilua, pe fasioti tagata, pe faia foi soo se mea faapena.
“Ia e faafetai i le Alii lou Atua i mea uma.
“Ia e osia le taulaga i le Alii lou Atua i le amiotonu, o le loto momomo ma le agaga maualalo lava lea.
“Ina ia e tausi atili ai ia te oe lava ia mama nai le lalolagi, ia e ulu atu i le fale tatalo ma avatu ai au faamanatuga i lou aso paia;
“Aua e moni o le aso lenei ua atofaina e te malolo ai i au galuega, ma avatu au viiga i Le Silisili;
“A e ui i lea ia avatu au tautoga i le amiotonu i aso ma ituaso uma;
“A ia manatua i lenei aso, o le aso o le Alii, ia e avatu au taulaga ma au faamanatuga i Le Silisili, ma tautau au agasala i ou uso, ma luma foi o le Alii.
“Aua foi e te faia se isi mea i lenei aso, a e tau o le saunia o au mea ai i le loto e tasi ina ia atoatoa ona lelei lau anapogi, o lona uiga, ina ia atoatoa ona lelei lou olioli.”14
Ia maitauina le auala o fesootaiga e sau mai le Alii ia i tatou. O le tele o taimi i lo tatou talafaasolopito, pe a tatou taumafai e fai se ‘alofaga, ua tatou taumafai e liliu atoa lena auala o fesootaiga ma suia ai tulafono a le Atua. E leai se faamaumauga ua tatou maua o loo faapea mai ai na manuia lena mea.
Ae peitai, o le mea ua tatou maua e faapea, e soo se taimi lava e faia ai e le fanau a le Atua ni mea e le tusa ai ma Ana tulafono, e motusia lena sootaga ma le faatulagaga paia ona o le le usiusitai ma le faatafunaga. E lelei le auala a le Alii. O le usiusitai i Ana tulafono ma poloaiga o le a aumaia ai lava Ana faamanuiaga folafolaina.
Na poloaiina ia Nifae e le Alii ina ia maua mai papatusi apamemea ina ia latou aveina ao latou malaga i le vao. Na teena e Lapana ia taumafaiga uma sa latou faia ina ia maua mai ai faamaumauga. Ona tuuina atu ai lea e le Alii ia Lapana i lima o Nifae. O le popole i le fasiotia o Lapana, na aoaoina ai ia Nifae: “E lelei ona ia fano le tagata e toatasi ae leaga ona tauau ina toaitiiti ma fano le nuu i le le faatuatua.”15
O lenei faaaliga na fesoasoani ia Nifae e manatua ai se mea na muai folafola atu e le Alii ia te ia i le vaomatua: “Afai e tausi e au fanau au poloaiga, latou te manuia i le nuu ua folafolaina.”16
Ona tonu ai lea ia Nifae:
“Ioe, sa ou manatu foi latou te le mafai ona tausi i poloaiga a le Atua e tusa ma le tulafono a Mose, sei iloga ua ia te i latou le tulafono.
“Na ou iloa foi ua tusia le tulafono i papatusi apamemea.”17
Ua atu fia ona faailoa mai e tusitusiga paia e faapea e tuuina mai e le Alii Ana poloaiga i le fanau a tagata e auala mai i perofeta soifua. E leai se komiti, faapotopotoga, po o se isi lava pule ua i ai le aia tatau e faatonu atu ai ia te Ia ia aoaoga e feteenai i Lana tulafono. O faamanuiaga e faavavau a le Atua e faalagolago i luga o lo tatou usiusitai ma faalogo atu i le afioga a le Alii o loo faapea ona faaali mai e auala mai i Ana perofeta paia.
Ia alofa mai le Atua ina ia mafai ona tatou maua le naunau ma le lototele e usitai ai ia te Ia o lo tatou Tama Faavavau ma Lona Alo filifilia, o lo tatou Alii ma le Faaola, ina ia mafai ona tatou fiafia i a Laua faamanuiaga iinei ma le faavavau e oo mai. I le suafa o lo tatou Alii ma le Faaola, o Iesu Keriso, amene.