Mau parau opaniraa
Te mau mea i faahitihia e te feia orero tata‘itahi, e faaiteraa te reira no ta ratou tautooraa na roto i te pure no te horo‘a i te ite o te faauru.
E au mau taea‘e e au mau tuahine, ua fana‘o a‘e nei tatou i te hoê amuiraa nehenehe roa. Ua haamo‘a faahou tatou i te Fare Menemene no Roto Miti, e ua faaohipa faahou tatou i te reira i muri a‘e i te mau ohipa tata‘iraa. Ua î roa te mau tuhaa pureraa atoa i roto i teie pû amuiraa. Ua reva ta tatou mau parau na te ao atoa nei i roto i te mau melo o te Ekalesia i te mau fenua atea.
I teie nei, e ho‘i atu tatou i roto i to tatou mau utuafare. Te faaitoito atu nei matou ia outou, outou o te faahoro atu i te pereoo, ia haapa‘o maitai i te faahoro. Eiaha te ati purumu ia haamou i te varua o teie taime nehenehe roa.
Te ti‘aturi nei matou e, e faaohipa outou i te ve‘a no ava‘e Me ei parau no ta outou mau pô utuafare, no te hi‘opo‘a faahou i te mau mea i paraparauhia i roto i teie amuiraa. Te mau mea i faahitihia e te feia orero tata‘itahi, e faaiteraa te reira no ta ratou tautooraa na roto i te pure no te horo‘a i te ite o te faauru e o te tura‘i i te feia atoa e faaroo i te reira, ia tamata ia rave rahi atu â e ia maitai roa’tu â.
Ia vai mai te hau e te au maite i roto i to outou mau utuafare. E te mau tane, a here e a faaherehere i ta outou vahine. O ratou ta outou tao‘a faufaa roa a‘e. E te mau vahine, a faaitoito i ta outou tane e a pure no ratou. E hinaaro ratou i te mau tauturu atoa e vai ra. E te mau metua, a faatere i ta outou mau tamarii ma te au maitai. O ratou te u‘i no ananahi o te horo‘a i te hanahana i to outou i‘oa.
Ia haamaitai mai te Atua ia outou, e au mau hoa here, ta‘u ïa pure haehaa, na roto i te i‘oa o Iesu Mesia ra. Amene.