Te mana faaamu o te mau himene

Elder Jay E. Jensen

No te Hitu Ahuru

E tuhaa faufaa rahi roa ta te mau himene i roto i te oraraa varua, te heheuraa e te faafariuraa.

Ua horo‘a mai teie nei pŭpŭ himene nehenehe roa i te mau a‘oraa faauru. Oia hoi, « ua porohia te tahi o te mau a‘oraa faahiahia roa‘e na roto i te himeneraa i te mau himene ».¹ Ua tauturu-puai-hia to‘u iteraa papû e to‘u faafariu-raa-hia i te evanelia tei faahoihia mai na roto i te himeneraa i te mau himene a Ziona i to‘u apîraa ra. Ua paari au i roto i te oire iti no Mapleton, Utaha, e ua haere au i te mau pureraa i te vahi tei matauhia i teie mahana « te fare pureraa tahito uouo ». Te ora noa nei â to‘u metua vahine e 95 matahiti te paari i Mapleton. Ia haere au e farerei ia’na, e faahoro vau i te pereoo na mua i te « fare pureraa tahito uouo » e e rave rahi te mau haamana‘oraa maitai o te tae mai i to‘u feruriraa. I roto i te reira te vai nei te mana faafariu o te mau himene ta matou i himene i roto i te pureraa autahu‘araa, te haapiiraa sabati e te mau pureraa oro‘a. Hoê â te mau ohipa tei tupu ia‘u e te mau mea tei tupu i te peresideni Hinckley a haere ai oia, ei diakono, i te hoê pureraa autahu‘araa a te tĭtĭ na muri i to’na metua tane. Ua himene ratou « Auê te taata i parau ia Iehova »² Ua parau oia i muri iho, « ua farii au i te hoê iteraa o tei ore roa i faaru‘e ia‘u e ua riro mau o Iosepha Semita ei peropheta a te Atua ».³ Te ti‘aturi nei au e e rave rahi o to tatou feia mo‘a o te ite tamau nei i teie mau iteraa. E tuhaa faufaa rahi roa ta te mau himene i roto i te oraraa varua, te heheuraa e te faafariuraa.

E faahaere mai te mau himene i te Varua

Ua riro « te mau himene ei tuhaa faufaa rahi roa i roto i ta tatou mau pureraa a te Ekalesia. E faahaere mai te mau himene i te Varua o te Fatu ».⁴ E mea pinepine a‘e ratou i te faahaere oi‘oi mai i te varua i te tahi ê atu mea ta tatou paha e rave nei. Ua parau te peresideni J. Reuben Clark, tamaiti e, « e fatata atu â tatou i te Fatu na roto i te pehe hau atu na roto i te tahi ê atu rave‘a maori râ, te pure ».⁵

Te haapii ra na misionare e piti i te hoê tane e te hoê vahine paari i roto i to raua fare i te fenua Perou a tape‘ahia’i raua na roto i te taeraa mai o ta raua tamaiti, ta’na vahine faaipoipo e ta raua na tamarii e toru. Ua faaite te mau misionare e o vai raua e eaha ta raua e rave ra. Ua mana‘o ino te tamaiti i te mau misionare, e ua tupu te tahi au oreraa. Ua pure ihora te misionare api a‘e, « e te Metua i te Ao ra, eaha ïa te mea e ti‘a ia maua ia rave ? » Ua tae mai te mana‘o e ia himene. Ua himene raua « E tamarii au na te Atua ra »⁶ Ua haaputapû te Varua i te aau o teie utuafare e pae taata. E ere noa e piti taata tei faafariuhia, e hitu atoa ra o ratou tei riro mai ei melo o tei haaputapûhia i te haamataraa ra e te hoê himene.

E ti‘a i te pehe i roto i te mau pureraa e te mau piha haapiiraa a te Ekalesia ia faaohie i te varua haamoriraa, te heheuraa, e te iteraa papû. No te mau pureraa oro‘a, e hopoi‘a na te episekoporaa ia ma‘iti e aore râ, ia faati‘a i te pehe. E haapapû ratou e e mea mo‘a e te tura te pehe, te mau parau e te mau mauhaa faata‘i, e e faatupu ratou i te haamoriraa e te heheuraa. E riro te pehe ei faaiteiteraa noa mai te mea e faahaerehia te mana‘o o te taata i ni‘a i te pehe iho. I te mau matahiti i ma‘iri, ua haapa‘o vau i te pae no te pehe i roto i te hoê rururaa i reira te hoê himene taa ê i riro ai ei faahiahiaraa. Ua riro ïa te reira ei haamarirauraa. Ua faaitihia te varua haamoriraa.

E faatae mai te mau himene i te heheuraa

E « faatupu te mau himene i te mana‘o tura ».⁷ Ua riro na parau tura e heheuraa mai na maehaa o te au te tahi e te tahi. Ia anihia te mau Hitu Ahuru ia haere i te mau rururaa i piha‘i iho i te Peresideniraa Matamua e te Pŭpŭ no te Tino Ahuru ma Piti Aposetolo, ua faahaamana‘ohia matou ia tae oi‘oi atu e ia faaroo ma te tura i te pehe omuaraa. Na te reira e faatae mai te heheuraa e e faaineine ia matou no te rururaa.

Ua haapii te peresideni Packer e te hoê melo o te faata‘i mărû noa « i te pehe omuaraa mai roto mai i te buka himene e tamărû ïa oia i to tatou mau mana‘o e e tura‘i oia ia tatou ia mana‘ona‘o i roto i to tatou mau feruriraa i te mau parau o te himene o te haapii i te mau mea hau no te basileia. Mai te mea e faaroo tatou i te reira, te haapii mai nei teie mau parau o te himene i te evanelia, no te mea ua riro mau te mau himene no te faahoiraa mai ei haapiiraa ! »⁸

E faatae mai te mau himene i te faafariuraa

Te vai nei i roto i te mau himene o te Faahoiraa mai, te varua no te faafariuraa. Ua tae mai ratou mai te hotu no te faatusiaraa. Te haapuai nei te mau himene mai « Auê te Taata i Parau ia Iehova »⁹, « Haere mai, e te feia mo‘a »¹⁰, « E te mau tavini o te Atua »¹¹, « Mauruuru matou, e te Atua »¹², « E te Faaora o Iseraela »¹³ e e rave rahi atu â i te mau parau mau faahiahia no te Faahoiraa mai—mai te huru hanahana o te Metua e te Tamaiti, te rave‘a ora, te heheuraa, te mau papa‘iraa mo‘a no te mau mahana hopea nei, te haaputuputuraa o Iseraela, te autahu‘araa mo‘a, e te mau oro‘a e te mau fafauraa. Te faatupu nei teie mau himene faufaa rahi i te hoê varua o te faatae mai i te Varua o te arata‘i ia tatou i te faafariuraa.

Auê ïa te oti ore e te faufaa ore te mau pureraa oro‘a mai te mea aita e mau himene no te haamoriraa.¹⁴ Te mau himene mo‘a i roto i te mau himene atoa o te mau himene ïa o te faahoho‘a i te tusia e te haamaniiraa o te toto o Iesu Mesia e Ta’na taraehara mure ore.

Ta‘u mau haamana‘oraa matamua roa no te mana faaora o te Faaora no ni‘a ïa i te mau himene oro‘a. E mea mau roa teie irava parau no‘u : « Te maere nei au i to Iesu nei aroha, ahoahohia i To’na ra parau-ti‘a ».¹⁵

Ua tu‘atihia to‘u nei iteraa i te mau haapiiraa no ni‘a i te taraehara i ni‘a i te mau himene. E mea maramarama maitai teie nei irava.

 Auê te rahi e te hanahana
O te mau opuaraa
A te Atua e To’na here
E te aroha mau !16

E haamata te haapiiraa i te mau tamarii i te mau himene i te utuafare

E haamata te himeneraa i te mau himene e te faarooraa i te pehe e au i te utuafare. Ua faahaamana‘o mai te Peresideniraa Matamua ia tatou:

« Ia faaî te feia mo‘a i te mau mahana hopea nei i to ratou utuafare i te ta‘i o te pehe maitai roa.

« … Te ti‘aturi nei matou e riro te buka himene mai te mau papa‘iraa mo‘a e te tahi atu mau buka pae faaroo i roto i to tatou mau utuafare. E nehenehe i teie mau himene ia faatae mai i te varua nehenehe e te hau i roto i te utuafare, e ia faatupu i te here e te tahoêraa i rotopu i te mau melo no te utuafare.

« A haapii i ta outou mau tamarii ia au i teie mau himene. A himene i teie mau himene i te Sabati, i roto i te mau pô utuafare, i te taime haapiiraa evanelia, e i te taime pure. A himene i teie mau himene a rave ai outou i te ohipa, a hauti ai outou, e a ratere amui ai outou. A himene i teie mau himene no te faatupu rahi i te faaroo e te iteraa papû i roto i ta outou mau tamarii rii a faataoto ai outou ia ratou »¹⁷

A haafaufaa rahi atu i te haamoriraa na roto i te mau himene

Teie te mau haapiiraa faufaa rahi ta‘u i haapii mai e ta‘u i tutava i te faaohipa :

A tutava ia tae mai i te hora ti‘a i te mau pureraa, ia parau hau noa e ia faaroo i te pehe omuaraa, e ia ite i te tura e te heheuraa.
A haere atu i rapae au i te mau pureraa ma te tura, ma te faati‘a i te pehe faahoperaa ia faaroa atu â i te varua o te pureraa.
A himene i te mau himene. Te ite nei au i te tahi mau taata e buka himene ta ratou aita râ ratou e himene nei.
A ma‘iti i te mau himene e tano i te pureraa e te mau parau poro‘i.
A faaohipa i te mau himene no te omuaraa aore râ no te haapapûraa i te mau papa‘iraa mo‘a e te mau parau mau no te evanelia i roto i te mau haapiiraa e te mau piha haapiiraa.
A faaroo pinepine atu â i te mau himene i roto i to tatou utuafare, ma te ani i te Varua ia parahi maoro mai.

Te pure nei au e ia nehenehe ta tatou e faaore i te pehe tano ore i roto atu i to tatou mau oraraa e ia pee i te a‘oraa a te Peresideniraa Matamua : « E te mau taea‘e e te mau tuahine, a himene tatou i teie mau himene no te ani i te Varua o te Fatu ia tae mai i roto i ta tatou mau haaputuputuraa, i roto i to tatou mau utuafare, e i roto i to tatou oraraa tataitahi. A tamau aau e a feruri i teie mau himene, a faahiti e a himene i te reira, e rave mai i te maa pae varua i roto i te reira. E mea ti‘a ia tatou ia ite e ua riro te himene a te feia parau-ti‘a ei pure i mua i to tatou Metua i te Ao ra, « e e pahonohia te reira na roto i te haamaitairaa i niiho i to [outou] ra mau upoo ».¹⁸ Te faaite papû nei au i teie mau parau mau i te i‘oa o Iesu Mesia. Amene.