Te mau peropheta—Matamua e to teie tau apî
No te peresideni Brigham Young e no te peresideni Gordon B. Hinckley na peropheta o tei arata‘i i te Ekalesia na roto i te faaururaa e i te heheuraa.
E au mau taea‘e e au mau tuahine, te ti‘a nei au i te pupiti o teie nei ti‘ahapa tahito area râ apî, ua î roa vau i te haro‘aro‘araa i te aamu o ta‘u e ite nei i teie taime. Ma to‘u ite i te mau mea i tahito ra e ma te hi‘o ti‘a i te anotau a muri, te haamauruuru nei au i te mau pionie e i te mau peropheta e i te mau aposetolo o teie nei anotau apî o tei farii na e o te farii noa nei i te mau orama no te patu e no te faahaere atu â i teie nei tiahapa no te anotau a muri.
Te hinaaro nei au i te a‘o atu no ni‘a e piti na taata no te orama : Brigham Young e to’na mau mono i teie mahana.
O Brigham Young, te piti o te peropheta o Te Ekalesia a Iesu Mesia i te Feia Mo‘a i te Mau Mahana Hopea Nei. Ua arata‘i oia i te Ekalesia e 33 matahiti te maoro. Ua patu oia i teie ti‘ahapa e ua peresideni i to’na haamo‘a-raa-hia i roto i te amuiraa rahi no atopa i te matahiti 1875, hau atu i te 131 matahiti i ma‘iri a‘e nei.
Te vai atura râ te tahi o te mau ohipa o ta’na i faaoti, e e nehenehe noa vau e faahiti atu te tahi rii noa.
Ua riro oia ei pionie, oia ïa te hoê taata tei iriti e aore râ, tei faaineine i te e‘a no vetahi ia pee. Ua papa‘i te hoê taata ma te parau no Brigham Young e : « Ua arata‘i oia i te hoê pŭpŭ paari e te veve, tei ere i te taatoaraa o te mau maitai o te ao nei, e i te hoê fenua ite-ore-hia. Ua papa‘i to’na mau taata aamu e, e taata hoê roa teie i roto i te feia faatere atoa o te aai o teie tau apî, no te mea o oia ana‘e te taata aita ona e ti‘araa politita e i roto i te parau no te faufaa, tei omua mai ma te rave‘a ore e ua faati‘a i te hoê taiete na roto i te mau materia e vaira i roto i te medebara, ma te faanahonaho maite, na roto i te hoê noa mana oia ïa te mana no te autahu‘araa e te itoito pae varua e e mea na reira oia i te horo‘araa i ta’na mau haapiiraa. Na roto i te mau a‘oraa e te mau haapiiraa, ua haaputuputu oia i to’na mau taata e ua faauru ia ratou i te amo i te faatereraa no te patu i te basileia o e Atua i te fenua nei ».1
I to Brigham Young tomo-matamua-raa’tu i roto i te faa no Roto Miti, teie ta’na i parau, « teie te vahi mau ».2 E teie ta’na i parau i muri mai :
« Ua faaite mai te Atua ia‘u e, teie te vahi e noho ai to‘u nei feia, e i ô nei ratou e ruperupe roa’i ; e hi‘opo‘a oia i te mau mea rii tumu no te maitai o te feia mo‘a, e e haavi oia i te to‘eto‘e e i te hotu ore o te fenua, ia riro te fenua i te hotu… e e patu tatou i te hoê oire e i te hoê hiero i ô nei i te Atua teitei ra ».3
I teie mahana, e nehenehe tatou paatoa e faaite i te parau mau no teie nei tohu. Oia mau, e riro teie medebara e teie nei faa no te mau mou‘a ofafa‘i ei fenua hotu e te faufaa no te fafauraa e no te tohu.
Ua patu oia i te mau hiero. Ua haamata oia i te hiero no Roto Miti, e 40 matahiti te maoro o to’na paturaa. Ua haamata atoa oia i na hiero no Manti e no Logan. Ua haamo‘a oia i te hiero no St. George e maha matahiti e te afa hou to’na poheraa.
Ua riro oia hoê o te mau taata rahi tei faati‘a i te aihu‘a raau no Amerika. I to’na poheraa, fatata e 400 fenua aihu‘a raau tei faati‘ahia.
Ua faanahonaho oia i te tuhaa no te tauturu tamau i te taata puruti‘a no te tauturu i te feia riirii, te tautururaa i te feia aita e rava‘i i te moni o tei puruti‘a mai na te mau fenua o Europa.
Ua faati‘a oia i te mau fare haapiiraa tuatoru. Te fare haapiiraa tuatoru no Deseret o tei matarohia i teie mahana te fare haapiiraa tuatoru no Utaha. Te fare haapiiraa tuarua na te feia mo‘a tei matarohia i teie mahana te LDS Business College. E ua faati‘a’toa i te fare haapiiraa tuatoru no Brigham Young.
Ua here oia i te Ekalesia e i te mau melo. E peu taa‘e ta Brigham Young ia faahiti ana‘e no te Ekalesia :
« E au Ziona mai te hoê pahi, e ua riro te Atua ei tapena e Na’na e faatere i te reira. E faaea outou i roto i te pahi e a faanahanaha i te reira e a haapapû e te ti‘a maite ra outou i roto i te Ekalesia eita ïa outou e haape‘ape‘a faahou…
« … Na’na e arata‘i i te pahi, e Na’na e faahoi ia tatou ma te fifi ore i te tipaeraa mau. Ta tatou noa e haapa‘o o ta tatou ïa utuuturaa ia tatou iho e ia ite e te rave nei tatou i te maitai. Ia rave faaoti tatou i ta tatou mau ohipa na roto i te itoito, ma te tape‘a faaroo noa e te paari i ta’na pii ei reira ïa Ziona e manuïa’i i roto i te mau vero ei arata‘i ia tatou i te tipaeraa no te oaoa rahi ».4
Ua here oia i te feia apî o te Ekalesia, no ni‘a i te iteraa no ni‘a ia Heber J. Grant. Iva mahana i muri mai i te fanauraa o Heber, ua pohe to’na metua tane o Jedediah M. Grant tauturu piti no te peresideni Brigham Young. No na matahiti e 21, ua utuutu Brigham Young i te tamaiti ra ia Heber J. Grant.
Teie ta Heber J. Grant i papa‘i :
« Ua farii manavahia vau i roto i te fare o te peresideni Brigham Young mai te mea ra tei roto vau i te fare iho o to‘u mama. I roto i teie fare… mai te mea ua po‘ia vau, e nehenehe noa vau e ani i te maa o ta‘u e hinaaro i te amu mai te mea ra e tei roto vau i to‘u iho fare… E tuturi au mai tera taime e tera taime i roto i te fare o te Lion House i roto i te pureraa utuafare, mai te hoê tamarii e mai te hoê taure‘are‘a ».5
Ua here oia i te peropheta Iosepha Semita. No te reira, teie ta’na i parau :
« Te mea o ta‘u i farii mai te Fatu mai, ua farii ïa vau i te reira na roto ia Iosepha Semita ».6
« Ua here au i ta’na parau haapiiraa… E hinaaro vau i te pii ma te puai, halleluia i te mau taime atoa, ia feruri au e, ua matau vau ia Iosepha Semita ».7
Ua here au ia Brigham Young. To’na mono i teie nei mahana o te peresideni Gordon B. Hinckley ïa, peropheta tei herehia e tei faaturahia.
Te vai nei te hoê hoho‘a peni e, e itehia te peresideni Hinckley i te hi‘o ti‘araa i roto i te tau i muri nei, te hoê ïa mau hoho‘a papa‘i no te hiero i mua ia’na. E i muri o te hoho‘a ïa o Brigham Young, mai te mea ra e te hi‘o ti‘a maira te peresideni Young na ni‘a i te tapono o te peresideni Hinckley.
Te hoho‘a o Brigham Young i roto i teie nei hoho‘a peni, te tautau ra ïa i roto i te piha ohipa a te peresideni Hinckley, e ua faahiti pinepine noa na oia no te reira. I roto i te hoê amuiraa rahi i tupu iho nei, teie ta’na i parau :
« I te hopea no te hoê mahana fifi mau, hi‘o atura vau i te hoho‘a o Brigham Young o te tautau ra i ni‘a i te papa‘i. Ui atuara vau, ‘e te taea‘e Brigham, eaha te ti‘a ia tatou ia rave ?’ E au ra e, ma te mata ataata, parau maira : ‘I to‘u ra mau mahana, e mea rahi to‘u iho nei mau fifi. Eiaha e ui mai ia‘u i te mea e ti‘a ia rave. No oe teie taime taviniraa. A ui i te Fatu, Na’na hoi teie ohipa’ ».8
Ua natihia teie na peropheta rahi, oia te peresideni Brigham Young e te peresideni Gordon B. Hinckley i roto i ta raua orama tohu no te iteraa i te tau i muri nei e te roaaraa te faaroo no te hopoi mai i taua orama ra i roto i te huru mau o teie nei anotau.
Te peresideni Hinckley, mai ia Brigham Young, e pionie e e taata patu oia. Ua tere oia na te ao nei, ua farerei i te mau arii, te mau arii vahine e te mau peresideni. Ua uiuihia oia e te mau ve‘a o te ao nei. E te tamau noa nei i te iriti i te Ekalesia « i rapae i te mo‘emo‘e ».9 Ua hau i te 75 hiero tei patuhia i roto i na matahiti 12. E ua horo‘ahia ia’na te faaururaa ia patu i teie pû amuiraa faahiahia rahi.
Mai te peresideni Brigham Young, ua haaparare te peresideni Hinckley i te evanelia e i te mau faufaa rahi no te haapiiraa. Ua piri atu te meloraa no te Ekalesia i te 13 milioni i roto 176 mau nunaa, mau mataeinaa e mau fenua. Hau atu i te 53.000 misionare e tere nei na roto i te ao. Ua iritihia teie nei amuiraa na roto 90 reo. Te tamau noa nei â oia i te paturu i te mau fare haapiiraa tuatoru o te Ekalesia e i te haapiiraa a te Ekalesia. Ua hau i te 26.000 melo o te fana‘o nei i te mau tauturu no te tuhaa haapiiraa tamau.
Mai te peresideni Brigham Young, ua here te peresideni Hinckley i te feia apî e i te mau melo atoa o te Ekalesia. Te hi‘o ti‘a nei te feia apî o te Ekalesia i te peresideni Hinckely no te mau a‘o tohu.
Ua here atoa te peresideni Hinckley i te peropheta Iosepha Semita. Rave rahi mau matahiti i ma‘iri a‘e nei, teie ta’na i parau :
« Te haamori nei au i te Atua o te ra‘i o oia hoi to‘u Metua mure ore. Te haamori nei au i te Fatu ra ia Iesu Mesia o oia to‘u Faaora e to‘u Ora. Aita râ vau e haamori nei i te peropheta Iosepha Semita area râ, te faatura nei au ia’na e te here nei au i teie nei hi‘o rahi e na roto hoi ia’na i tupu ai te semeio o teie nei evanelia o tei faahoi-faahou-hia mai. I teie nei te tupu nei au i te paari, e ua ite au e, na roto i te mau rave‘a o te natura o te mau ohipa e tupu nei e na roto i te mau matahiti e rave rahi e tere nei, e pohe au e e haere atu vau i te ao mure ore e ia ti‘a’tu i mua i to‘u te Fatu tei hamani ia‘u oia to‘u Fatu e ia vauvau atu i te huru no te tereraa o to‘u oraraa. E te ti‘aturi nei au e nehenehe au e aroha’tu i te peropheta Iosepha Semita ma te haamauruuru ia ‘na e i te faaite atu ia’na i to‘u here ».10
Te faaite papû nei au i to‘u iteraa no te peresideni Brigham Young e no te peresideni Gordon B. Hinckley na peropheta o tei arata‘i i te Ekalesia na roto i te faaururaa e i te heheuraa. Na roto i te i‘oa o Iesu Mesia. Amene.