E haru anei te taata nei i ta te Atua ?
Ia aufau outou e o vau nei na roto i te parau ti‘a, te tuhaa ahuru parau-ti‘a i te Fatu, e iriti mai te Fatu i te mau haamaramarama o te ra‘i.
Te hinaaro nei au i te paraparau atu no ni‘a i te tura o te tuhaa ahuru. I roto i te Buka a Moromona, ua ui te Fatu :
« Hopoi maina outou i te ahuru atoa o te mau tao‘a i roto i te fare vairaa, ia maahia ta‘u fare nei, e tamataraa te reira ia‘u nei, te parau maira Iehova sabaota ra ; i te oreraa vau i te iritiraa i te mau haamaramarama o te ra‘i ra, a ninii atu ai i te tao‘a rahi roa ei maitai no outou ».1
Ua riro te tuhaa ahuru ei faaueraa faufaa, e i to te Fatu fâraa i ni‘a i te fenua no Amerika, i muri mai i To’na ti‘a-faahou-raa hanahana, ua tapiti Oia i teie ihoa mau parau.2 Ua parau mai te Fatu i to tatou nei mau mahana, « o ratou o tei aufau i te ahururaa mai te reira e faufau ïa ratou i te tuhaa ahuru no ta ratou apî e noaa mai i te mau matahiti atoa ».3
I roto i te Buka a Levitiko, ua parau te Fatu e toru taime taa ê e, te tuhaa ahuru « ua haamo‘ahia na Iehova ».4
Teie ta te Fatu i parau, « e tamataraa te reira ia‘u nei [e aore râ, a tamata mai na ia‘u i teie nei]…, i te oreraa vau i te iritiraa i te mau haamaramarama o te ra‘i ra ».5 Rave rahi o tatou e tamata nei i te Fatu na roto i te e‘a mau ; area râ, aita vetahi e na reira nei.
I teie nei, te taato‘araa o teie na ahuru apara na te Fatu ïa. Ua ani mai Oia ia tatou ia faaho‘i noa Na’na hoê a‘e i te ahuru aore ra hoê apara.
Te pûpû ra anei outou i te mea iti roa ? E 90 ïa i ni‘a i te hanere apara na outou ; te hinaaro anei outou i te pûpû i te tuhaa iti roa ?
Aita anei outou i haama e aore râ, te tamata ra outou i te faaafaro e i te huna i te hoê tuhaa iti no te pûpû i te reira i te Fatu ?
Te hinaaro nei tatou i te pûpû i te taato‘araa e te mâ. Teie ta te Fatu i parau : « Inaha, te titau nei te Fatu i te aau e te mana‘o ana‘anatae ; e te feia haapa‘o maitai i te maa maitai no te fenua no Ziona i teie mau mahana hopea nei ».6
Tau rii matahiti i mairi, ua farii au i te hoê faaueraa ia haere e faanahonaho i te tĭtĭ no Carey i Idaho. Ua tau atu te manureva i Twin Falls e ua farerei mai te peresideni Roy Hubert ia‘u, ua tavini maitai mai hoi oia, e ua tere atu maua i to’na fare. A tere noa’i maua, ui atura vau, « hou teie faanahonahoraa i te peresideniraa no te tĭtĭ, aita anei te hoê ohipa o ta oe e hinaaro ia‘u ia rave no oe e no ta oe feia mo‘a ? »
Pahono maira oia e : « A, ua roohia iho nei matou i te poa‘i rahi i teie mau matahiti i mairi a‘e nei. I teie matahiti, maoti râ, ua puai roa te poa‘i e ua faaru‘e mai rave rahi feia faaapu i te oire no te imi i te ohipa i te tahi atu mau vahi ».
E ua oto roa vau no ta tatou mau melo faaroo o tei here i te Fatu e i te Ekalesia, e ua ‘ere i ta ratou mau faaapu.
Ua piihia te hoê episekopo apî, o R. Spence Ellsworth, no te tavini ei peresideni tĭtĭ apî. I roto i te tuhaa putuputuraa rahi o te sabati, na roto i te mana‘ona‘o rahi i teie nei poa‘i teimaha, ua vai te reira i roto i to‘u nei feruriraa. A a‘o ai au, tae mai nei te hoê aehuehuraa. Ua faauruhia vau ia parau ia ratou i te rave i teie mau mea i muri nei :
-
Ia aufau ma te faaroo i te hoê tuhaa ahuru parau-ti‘a, i te feia apî e i te feia paari.
-
Ia faatupu tamau noa i te mau pureraa no te taata iho e no te utuafare.
-
Ia faatupu i te tai‘oraa i te papa‘iraa mo‘a ma te itoito na te taata iho e na te utuafare.
-
Na roto i te mauruuru, ia faatura i te sabati ei mahana mo‘a.
-
Na roto i te aau mehara e haere pinepine i te hiero, e pûpû i te ô ma te mauruuru e ia haamori i roto i te hiero.
-
Ia paturu ma te aau tae e i te pee i te feia faatere.
-
Faatupu i te haapaeraa maa na te tĭtĭ taato‘a, e a tapiri ato‘a te mau taata tei roohia i teie ati o tei hinaaro i amui mai e ia ani i te mau haamaitairaa o te ra‘i mai.
Tau rii mahana i muri noa mai i te amuiraa tĭtĭ, ua tanu rave rahi mau melo i ta ratou mau huero, na roto i te faaroo, noa’tu e aita te faaiteraa meteo i faahiti noa‘e i te ua.
I te mahana toru, i raro a‘e i te arata‘iraa a te peresideni Ellsworth, ua haapae te tĭtĭ taato‘a. I taua ihoa ra hepetoma, ua haere te mau melo e rave rahi, to ratou feia faatere e ta ratou mau vahine i te hiero no Boise i Idaho e ua pûpû i te mau pure haamauruuru. E tei roto noa â te feia mo‘a faaroo i te hiero, haamata ihora te ua i te topa i taua mau oire ra. E noa’tu e aita te faaiteraa meteo i tohu i te hiona no te mau hepetoma i muri mai, i te mahana maa râ, ua topa rahi mai te ua no tau rii mahana te maoro. Ua tupu teie nei ohipa i te mau mahana hopea no eperera. Ua topa te hiona i te mau mou‘a e ua faahaumihia te fenua. I roto i te mau oire no Dietrich e no Richfield, ta ratou pape i roto i te vairaa tei raro atu i te 30 i ni‘a i te hanere. I muri mai i te haapaeraa, ua fatata roa te vairaa pape i te î. Ua pauma te faito pape o Carey mai te 44 mai i ni‘a i te hanere hau atu i te 100. I te toe‘a o te tau faatupuraa ra‘au, a faatupu ai te mau melo no te Tĭtĭ no Carey i to ratou faaroo na roto i te haapaeraa maa, no te tahi atu â taime, te aufauraa i te hoê tuhaa ahuru parau-ti‘a e i te haere-tamau-raa i te hiero—ua faaroo te Fatu e ua pahono i ta ratou mau pure. Ua topa mai te hiona to‘eto‘e i te pae hopea roa o te matahiti, no reira, ua nehenehe atura i te feia faaapu ia ooti i te mau huero, te mau tô uteute [betteraves], te mau matie na te mau animala, te umara putete, e te tahi atu mau huero. Mai te reira mahana mai, e matahiti i muri mai, ua pûpû ratou i ta ratou mau pure haamauruuru « no… To’na aroha »,7 e ua haamaitai tamau mai te Fatu ia ratou.
I roto i te Buka a Paraleipomeno, teie ta te Fatu i parau, « ia faahaehaa mai to‘u ra taata… tei ma‘irihia i to‘u ra i‘oa, e ia pure, e ia imi mai i to‘u nei mata, e ua fariu mai i ta ratou parau ino ra, ei reira vau e faaroo ai i ni‘a i te ra‘i, e faaore au i ta ratou hara, e e faaora vau i to ratou fenua ».8
Na te aufauraa i te hoê tuhaa ahuru parau-ti‘a e arata‘i ia tatou i te hiero. Te tuhaa ahuru, i to‘u mana‘oraa, o te hoê ia o te mau tohuraa faufaa roa a‘e a te peresideni Hinkley.
I teie hepetoma i ma‘iri a‘enei i te putuputuraa rahi a te feia apî tamahine, ua parau te peresideni Hinckley e, « noa’tu e, te aufauhia nei te tuhaa ahuru i te moni, e mea faufaa roa’tu ia aufauhia te reira na roto i te faaroo ».9
Ua parau atoa oia : « E ere teie i te ohipa no te moni e ohipa râ no te faaroo… Te ani u‘ana nei au ia outou… ia outou tata‘itahi na, ia ‘apo i Ta’na parau oia te Fatu i roto i teie nei ohipa faufaa roa ».10
E ohipa râ no te fafauraa. Na te Fatu teie nei fenua, oia’toa to tatou iho nei ora. Ua faati‘a Oia ia tatou ia faaohipa i te mau mea’toa o te fenua nei. Ua ani atoa Oia ia tatou ia faaho‘i hoê a‘e i ni‘a i te ahuru. Ua riro te tuhaa ahuru ei tapa‘o no te aau mehara, no te haapa‘o, no te haamauruuru— e te hoê tapa‘o no to tatou hinaaroraa e no to tatou pûpûraa. Te aufauraa i te tuhaa ahuru ma te hinaaro mau, e faarahi te reira i te hoê parau-ti‘araa e te aau mâ. E haamae‘a te aufauraa i te tuhaa ahuru i to tatou here no te Fatu.
Ua parau te Fatu e : « Ei mahana no te tusia, e ei mahana aufauraa i te tuhaa ahuru no ta‘u mau taata ».11
Te mau taea‘e e te mau tuahine, e faaite tatou i to tatou faaroo. E faaite tatou i to tatou hinaaro mau i te haapa‘o. Te fafau atu nei au ia outou na roto i te i‘oa o te Fatu ra, o Iesu Mesia, ia aufau outou e o vau nei na roto i te parau ti‘a, te tuhaa ahuru parau-ti‘a i te Fatu, e iriti mai te Fatu i te mau mau haamaramarama o te ra‘i.
Ua ite au e, te ora nei te Metua i te Ao ra. E no reira, e haamaitai Oia ia outou. O Iesu Mesia te Faaora. Ua ite Iosepha i te Metua i te Ao ra e i Ta’na Tamaiti o Iesu Mesia. Teie ta’na Ekalesia. E peropheta ora mau o te Peresideni Gordon B. Hinckley na te Atua. Na roto i te i‘oa o Iesu Mesia. Amene.