Ua oti te amuiraa ; e nehenehe te naho‘a rahi e faaroo i te reira

Na roto i te iritiraahia te mau tuhaa o te 177raa o te amuiraa rahi matahiti i roto e 90 reo e te haapurororaa na roto i te rave‘a pee‘utari i na 6.000 tua nati e fatuhia nei e te Ekalesia i roto e 85 fenua, ua nehenehe i te mau melo ia farii i roto i to ratou iho reo te mau parau a te feia faatere o te Ekalesia hau atu i to te matamua ra.

Te a‘oraa i te naho‘a rahi i te ao atoa nei i roto i te tuhaa amuiraa o te po‘ipo‘i mahana maa, ua parau te peresideni Gordon B. Hinckley, 96 matahiti i teie nei e, « E mea maitai to‘u ‘ea, taa ê noa’tu i te mau parau tei atutu haere », e ma te parau ha‘uti na ô maira e, « Na te mau taote aravihi e te mau tuati ma‘i i tape‘a ia‘u i ni‘a i te ara ti‘a. E reva’tu paha vetahi o outou na mua’tu ia‘u ».

I roto i te tuhaa amuiraa o te Mahana Maa avatea, ua haamo‘a faahou te peresideni Hinckley i te Fare Menemene i Temple Square, i reira te hoê tuhaa o te amuiraa i faaterehia’i mai te taime â i faaohipahia’i te pû amuiraa i te ava‘e Eperera 2.000. Ua tapirihia te Fare Menemene e piti matahiti te maoro no te faatere i te tahi mau paturaa no te paruru i te mau ati aueueraa fenua e no te mau tata‘iraa (a hi‘o i te irava i muri nei).

Ua paturuhia te feia faatere apî i te Mahana Maa, oia’toa e pae Hui Mana Faatere Rahi, no rapae mai i te Mau Hau Amui no Marite, te peresideniraa rahi o te Sotaiete Tauturu e te mau tauturu o te peresideniraa rahi o te Feia Apî Tamahine (a hi‘o api 4 no te mau tauiraa i roto i te faatereraa o te Ekalesia i te api 124 no te mau haamaramaramaraa ïa o te mau tuatapaparaa o teie mau taata faatere apî).

Ua mata‘ita‘i milioni mau melo o te Ekalesia i te ao atoa nei na roto i te mau Tua Nati e fatuhia e te Ekalesia oia’toa i roto i to ratou iho mau fare na roto atu i te mau haapurororaa o te fenua iho, e na roto i te tahi atu mau rave‘a pee‘utari e te mau Afata Teata e na roto i Itenati.