Mary N. Cook
Tauturu piti i roto i te peresideniraa rahi o te Feia Apî Tamahine

E ti‘aturi ia Iehova ma to aau atoa ra » (Maseli 3:5), o te parau arata‘i ïa ia Mary Neilsen Cook, tauturu piti i roto i te peresideniraa rahi o te Feia Apî Tamahine.

Fanauhia i Midvale, i Utaha i te 8 no Tiunu 1951, ua haapii te tuahine Cook i te ti‘aturi i te Fatu na roto mai i te mau hi‘oraa maitai o to’na na metua, Kenneth N, e o Fem S. Neilsen. Ua roohia to’na papa i te ma‘i mafatu na roto mai i te hoê ati iti tei fariihia e te tuahine Cook i to’na aiuraa. No te hoê tau, na to’na mama e rave i te ohipa no ratou. Ua riro ïa te reira ei taime tamataraa.

I to’na apîraa, e moemoeahia oia ia faaipoipo e ia riro ei metua vahine area râ, ua vai otahi noa oia no na matahiti e rave rahi. « I te tahi taime, e feruri au, e tupu anei teie mau moemoea », o te parau ïa a te tuahine Cook. « Area râ, ua tape‘a noa vau i to‘u faaroo e ua faatumu vau i ni‘a i te mau haamaitairaa o ta‘u i farii ».

I roto i taua mau taime ra, ua roaa ta’na parau tuite e ta’na parau ‘aiihi tuatoru [maîtrise] no ni‘a i te paraparauraa e te faarooraa e ua riro atoa oia ei (Vahine Aravihi i te pae no te Haapiiraa) i te Fare Haapiiraa Tuatoru no Brigham Young. Ua rave oia i te ohipa ei vahine aravihi i te pae no te haapiiraa ei orometua e i muri mai ei ti‘a faatere no te fare haapiiraa.

I te 16 no Tiurai 1988, ua faaipoipo oia ia Richard E. Cook, o tei tavini na ei melo i roto i te Pŭpŭ Piti no te Hitu Ahuru, i roto i te Hiero no Roto Miti. I te reira taime, ua parau te tuahine Cook e, « ua farii oia e maha mau tamarii maitai roa e ua riro atoa oia ei mama ruau no na mootua e va‘u », no te mea ua pohe te vahine matamua a Elder Cook i te matahiti 1984. 17 a raua mau mootua i teie nei.

A tavini ai Elder e te tuahine Cook ei misionare rave tamau i Mongolie i te fenua Tinito, ua piihia ta’na tane ia peresideni i ni‘a i te hoê misioni apî roa no Mongolie. I muri mai ua reva’tu raua i Hong Kong, i reira to ta’na tane taviniraa i roto i te peresideniraa Area no Asia. Ua tavini atoa na oia ei peresideni no te Sotaiete Tauturu no te paroita e i roto i te tomiteraa rahi o te Feia Apî Tamahine.

Ua oaoa te tuahine Cook i to’na mau iteraa rau e te faaite papû nei oia e « noa’tu te huru o te mau ati e tae i ni‘a ia tatou, mai te mea e ti‘aturi tatou i te Fatu, e arata‘i Oia i to tatou mau taahiraa avae ».