Ahani e nehenehe i teie mau papa‘i fare tahito e paraparau mai
Hau atu i te hoê tenetera, ua haere te mau parau a te mau peropheta, te mau hi‘o e te mau heheu parau no te mau mahana hopea nei mai teie atu pupiti i to te ao nei.
Ua parau te peresideni Gordon B. Hinckley i roto i te hoê vauvauraa parau i te ava‘e atopa 2004 : « Te faatura nei au i teie fare. Te here nei au i teie fare. Te faahanahana nei au i teie fare. Te hinaaro nei au ia faahereherehia teie fare… Te hinaaro nei au e ia faahereherehia e ia haapaarihia te Fare Menemene tahito, to’na mau tu‘atiraa paruparu… e to’na nehenehe natura e te faahiahia… Eiaha e rave i te tahi mea eita e ti‘a ia outou ia rave, tera râ te mea ta outou e rave, a rave maitai ma te afaro ».1
No taua mau parau faahiahia e te măta‘uhia, ua horo‘ahia te hopoi‘a no te faaherehere, no te haapaari, e no te faahoi mai i te huru matamua o te Fare Menemene tahito no Roto Miti e ia faaapîhia e ia ineine no te tahi atu â tau no te taviniraa maitai.
I teie mahana, e te peresideni e, teie te hoê fare tahito roa, faaunaunahia i roto i te hoê faaunaunaraa apî, o tei ati-maitai-hia i roto i to’na hanahana tahito ra—noa’tu e mea hau atu te fare i te maitai, te faahoi nei te episekoporaa faatere e te mau taata rave ohipa aravihi, o tei hau atu i te 2.000, i te « Fare Menemene tahito » ma te hoê haapapûraa e e vai noa mai â teie fare e 100 matahiti.
Ua riro te titauraa a te peresideni Hinckley ia faahoihia « te Fare Menemene tahito » i to’na huru matamua te reni arata‘iraa i ravehia’i te mau faaotiraa fifi no te faanahoraa e te paturaa i teie fare. Ua faaohipahia taua parau ra no te faaite i te huru e te fâ o teie opuaraa. Ua riro te reira mai te tapa‘o o te ti‘amâ a te tapena Moroni no te mea ua « faati‘ahia i ni‘a iho i te mau pare atoa » e tei faati‘ahia « i te mau vahi atoa »2 i titauhia.
Ahani e nehenehe ta teie mau papa‘i fare tahito e paraparau mai, e amui mai ïa ratou no te haamauruuru maitai i te mau taata nana‘o fare FFKR, te taiete paturaa fare Jacobsen, te pŭpŭ opuaraa ohipa a te Ekalesia, e te mau taata e rave rahi tei faaohipa i to ratou aravihi ia nehenehe teie tutavaraa fifi ia tupu. Ua parau te hoê melo faatere no te pŭpŭ : « A aparau amui ai matou, ua nehenehe i te Fatu ia horo‘a ia matou te rave‘a hau atu i ta matou rave‘a taata ».
Ua faatura te mau melo tei haa i roto i te paturaa, i te nehenehe o teie nei ti‘ahapa, no te feia tei patu mai ia’na i tahito ra, e no te maitai o ta ratou ohipa.Ua maere ratou no te mea i roto i te area hau atu i te hoê tenetera, ua haere te mau parau a te mau peropheta, te mau hi‘o e te mau heheu parau no te mau mahana hopea nei mai teie pupiti i to te ao nei.
Ahani e nehenehe i teie mau papa‘i fare tahito e paraparau mai, e mea papû roa ia‘u e e faaite mai ïa ratou i to ratou mauruuru no to ratou niu apî tei faa‘eta‘etahia. E oaoa ïa teie mau papa‘i fare tahito i roto i to ratou hatua auri apî o te tape‘a nei ia ratou e ia ti‘a teitei noa ratou. E faaite mai ïa teie mau papa‘i fare tahito i to ratou mauruuru no te para‘u-raa-hia e 14 me‘ume‘uraa peni i ni‘a i te aroaro o te tahua e te faaohipa-raa-hia te hoê peni apî nehenehe mau.
E faaite mai ïa teie mau papa‘i fare tahito i to ratou mauruuru no te parururaa e te nehenehe o te hoê tapo‘i fare aluminium apî e te anaana e e amui atu ïa ratou i te mau parahiraa i te oaoaraa i te mau mata ataata i ni‘a i te hoho‘a mata o te mau taata a ite ai ratou i te mau parahiraa tei faahuru- ê-rii-hia e te ateatearaa o te parahiraa.
E farii-poupou-hia e e mauruuruhia e teie mau papa‘i fare tahito te mau faanahoraa apî no te fariiraa e te faanahoraa i te mau ta‘i o te mau pehe o te faaûru i te aau.
E nehenehe ta te hoê taata e mana‘ona‘o i te mau mea ta teie mau papa‘i fare tahito e nehenehe e haamana‘o no ni‘a i te mau a‘oraa e rave rahi ta ratou i faaroo maite e rave rahi mau matahiti.
Ahani e nehenehe ta teie mau papa‘i fare tahito e paraparau mai, e tuo ïa ratou « tei ô nei na matou ! » i to te peresideni Joseph F. Smith ti‘araa i ni‘a i muri mai i te hoê ma‘i maoro, no te haere atu i te hoê rururaa no te amuiraa rahi i te ava‘e atopa 1918. I roto i te rururaa matamua, ua ti‘a mai oia i ni‘a e ma te reo horuhoru ua parau oia : « Eita vau, eita vau e tamata, i te tuatapapa i te mau mea e rave rahi e vai nei i roto i to‘u nei feruriraa i teie po‘ipo‘i, e e vaiho ïa vau e tae noa’tu i te tahi taime i mua, ia au i te Fatu, i ta‘u tamataraa i te parau atu ia outou i te tahi o te mau mea e vai nei i roto i to‘u feruriraa, e o te vai nei i roto i to‘u nei aau ». Ua parau faahou â oia : « Aita vau i ora o vau ana‘e iho i teie na ava‘e e pae. Ua parahi au i roto i te varua no te pure, no te taparuraa, no te faaroo e no te faaotiraa ; e ua tamau noa vau i te paraparau e te Varua o te Fatu ».3 Ua ite tatou i muri iho e i te mahana na mua‘e i te amuiraa, ua faarii te peresideni Smith i te hoê orama tei papa‘ihia mai te orama no te faaoraraa i te feia pohe, tei riro mai i muri iho te tuhaa 138 no te Parau Haapiiraa e te Parau Fafau.
Ahani e nehenehe i teie mau papa‘i fare tahito e paraparau mai e faahaamana‘o ïa ratou ia tatou i te mau mahana pe‘ape‘a no te Topatariraa Rahi. E faahaamana‘o ïa ratou e i te amuiraa rahi no te ava‘e eperera 1936, ua faaite te peresideni Heber J. Grant e e avari te Ekalesia i te hoê opuaraa parururaa a te Ekalesia. Ua itehia teie opuaraa i muri iho mai te faanahoraa totauturu a te Ekalesia. E ono ava‘e i muri iho ua parau oia e : « Ta tatou opuaraa matamua o te haamau ïa… i te hoê faanahoraa o te faaore i te ino no te ohipa ore e te mau ino no te faariiraa i te moni ma te rave ore i te ohipa, o te haamau faahou i rotopu i to tatou mau taata te ti‘amâ, te itoito i te ohipa, te oraraa tarani e te faaturaraa ia’na iho. Te fâ a te Ekalesia o te tauturu ïa i te mau taata ia tauturu ia ratou iho. E ti‘a i te ohipa ia haamau-faahou-hia mai te ture faatere o te oraraa o to tatou mau melo no te Ekalesia ».4
I te ava‘e atopa 1964, na roto i te aniraa a te peresideni David O. McKay, ua a‘o mai o Elder Harold B. Lee no ni‘a i te mau hopoi‘a a te mau metua. Te haamana‘o maitai nei teie mau papa‘i fare tahito e ua faaite o Elder Lee e e tai‘o oia i te hoê rata i to te Ekalesia tei papa‘ihia e te Peresideniraa Matamua. Hou oia a haamata ai ua parau oia, « te mana‘o nei au mai te tahi mea ta Mark Twain i parau no ni‘a i te huru o te reva : ‘Te paraparau rahi nei tatou no ni‘a i te huru o te reva, e au râ aita tatou e rave nei i te tahi mea no ni‘a i te reira’ ». Ua tai‘o o Elder Lee i teie rata tei papa‘ihia e 50 matahiti na mua’tu :
« Te faaite nei e te faaitoito u‘ana nei matou i te haamataraa o te ‘hoê pô utuafare’ i roto i te Ekalesia taatoa, i reira te metua tane e te metua vahine e haaputuputu ai i ta ratou mau tamaroa e ta ratou mau tamahine i piha‘i iho ia ratou i roto i te utuafare, e e haapii ai ia ratou te parau a te Fatu…
E i teie fafauraa :
« Mai te mea e haapa‘o te feia mo‘a i teie a‘oraa, te fafau atu nei matou e e mau haamaitairaa rahi o te tupu mai. E rahi atu â te here i roto i te utuafare e te faarooraa i te mau metua. E faatupuhia ïa te faaroo i roto i te aau o te feia apî no Iseraela, e e noaa ia ratou te puai no te ‘aro i te mau mea ino e te mau tamataraa e haafifi nei ia ratou ».5
Te haamana‘o maitai nei teie mau papa‘i fare tahito i te faaea-mamu-noa-raa te Fare Menemene a faaitehia’i i roto i te amuiraa no te ava‘e eperera 1985, e e a‘o mai o Elder Bruce R. McConkie. Ua ite teie mau papa‘i fare tahito i te hoê varua tura a faaoti ai o Elder McConkie i ta’na a‘oraa na roto i teie mau parau faahiahia :
« E teie nei, no ni‘a i teie taraehara maitai roa, tei faatupuhia na roto i te hamaniraa o te toto o te Atua—te faaite papû nei au e ua tupu te reira i Gesetemane e i Golagota, e no ni‘a ia Iesu Mesia, te faaite papû nei au e o Oia te Tamaiti a te Atua Ora e ua faasataurohia Oia no te mau hara a to te ao nei. O Oia to tatou Fatu, to tatou Atua, e to tatou Arii. Ua ite au o vau iho nei i te reira taaê noa’tu i te iteraa o te tahi atu mau taata.
« Ua riro vau te hoê o to’na mau ite, e i te hoê mahana e ite ai au i te mau tapa‘o naero i roto i to’na mau rima e i ni‘a i to’na na avae e e faarari au i to’na nau avae i to‘u mau roimata.
« Eita râ vau e ite maitai atu mai ta‘u i ite i teie nei e e Oia te Tamaiti a te Atua Mana Hope, e o Oia to tatou Faaora e Taraehara, e e tae mai te faaoraraa na roto i to’na toto taraeharaa eiaha râ na roto i te tahi ê atu rave‘a ».6
I te matahiti 1995, ua parau te peresideni Hinckley i te mau vahine o te Ekalesia : « No te rahi o te mana‘o hape tei faarirohia ei parau mau, no te rahi o te haavareraa no ni‘a i te mau ture e te mau parau faufaa, no te rahi o te faahemaraa e te faati aniraa ia viiviihia tatou, ua hinaaro matou ia faaara atu » i muri iho ua tai‘o oia :
« Te faaite papû atu nei matou, oia te Peresideniraa Matamua e te Pŭpŭ no te Tino Ahuru Ma Piti Aposetolo o te Ekalesia a Iesu Mesia i te Feia Mo‘a i te Mau Mahana Hopea Nei e, ua haapa‘ohia e te Atua te faaipoiporaa i rotopu i te tane e te vahine e ua riro te utuafare ei pû no te opuaraa a Tei Hamani no te hopea mure ore o Ta’na ra mau tamarii.
« E hopoi‘a mo‘a ta te tane faaipoipo e te vahine faaipoipo no te here e no te haapa‘o ia raua iho e i ta raua atoa ra mau tamarii. « Te tamarii ra, e tuhaa ïa no ô mai ia Iehova ra » (Salamo 127:3). Tei te mau metua te hopoi‘a mo‘a no te aupuru i ta ratou mau tamarii i roto i te here e te parau-ti‘a, no te haapa‘o i to ratou mau hinaaro pae tino e pae varua, no te haapii ia ratou i te here e i te tavini te tahi i te tahi, no te haapa‘o i te mau faaueraa a te Atua e no te riro ei feia faatura i te mau ture o te fenua e faaeahia e ratou. Te mau tane faaipoipo e te mau vahine faaipoipo–te mau metua vahine e te mau metua tane–e ti‘a ratou i mua i te aro o te Atua ia haavahia mai te au i to ratou haapa‘oraa i taua mau hopoi‘a ra ».7
Te mauruuru nei au no teie fare. Te ti‘a nei te reira mai te hoê haamana‘oraa mo‘a no to tatou aamu tahito e mai te hoê reva nehenehe roa no te ti‘aturiraa i te mau mea i mua. Te faaite papû nei au i te hanahana o to tatou Metua here i te Ao ra, e te here faaito ore o to tatou Faaora no tatou tata‘itahi. E haamaitairaa rahi roa ia arata‘ihia tatou e te hoê peropheta a te Atua. I te i‘oa o Iesu Mesia. Amene.