Barbara Thompson
Tauturu piti i roto i te peresideniraa rahi o te Sotaiete Tauturu

Ei melo no te tomite no te mau ohipa faaoaoaraa a te paroita, e mea au a‘e na Barbara Thompson ia oomo i te piripou patiti e i te haaputuraa i te mau tauihaa no te ‘atu‘aturaa i te riroraa ei melo no te peresideniraa rahi no te Sotaite Tauturu. Area râ, ua oaoa oia i to’na piiraa apî ei tauturu piti i roto i taua peresideniraa.

Ua tavini atoa na oia ei misionare i roto i te Misioni no Hambourg i Heremani, ei orometua no te Parau Haapiiraa o te Evanelia, ei faatere no te Puhaparaa a te Feia Apî Tamahine, ei tauturu haamaramarama no te Tarona e no te mau Derube, ei peresideni no te Feia Apî Tamahine no te paroita, ei tauturu no te Sotaiete Tauturu paroita, e ei melo no te tomite rahi a te Sotaiete Tauturu, e te ti‘aturi nei te tuahine Thompson e « mai te mea e iteraa papû to te mau tuahine no te parau mau o te evanelia, e tura‘ihia ratou ia rave i te ohipa ».

Ua fanauhia ia W. Peter e ia Fern Rymer Thompson i te 13 no Tiunu 1952, i San Luis Obispo i Kalifonia, ua faanuu te tuahine Thompson e to’na utuafare i Granger, i Utaha. E mea here na’na te ohipa tu‘aro e te puhaparaa area râ, ta’na ohipa au roa‘e o te hahaereraa ïa i to’na mau hoa e i to’na utuafare.

Ua roaa ta’na parau ‘aiihi tuatoru i te Fare Haapiiraa Tuatoru no Utaha no te ohipa totiare, ua rave te tuahine Thompson i te ohipa i roto i te Aupŭpŭ no te Taviniraa i te Taata 30 matahiti te maoro. I to’na faatuhaa-raa-hia, ua tavini oia ei ti‘a faatere rahi no te hoê faanahonahoraa no te ao nei o te tavini nei i te mau tamarii tei maferahia e o tei tau‘a-ore-hia.

Noa’tu e aita oia i faaipoipo e aore râ, aita ana e tamarii, ua parau râ te tuahine Thompson e, « e taparu vau i te mau melo o te utuafare e i te mau hoa, e ua paturu tamau noa mai te mau tuahine o te Ekalesia ia‘u ».

Te hi‘o nei oia i ta’na ohipa apî ei patururaa i te tuahine Beck. « Te hinaaro nei au i te faateitei ia’na i roto i to’na piiraa ».

Te hinaaro nei te tuahine Thompson i te faaroo i te mau iteraa papû o te mau melo o te ao atoa nei a tavini ai oia. Ta’na parau poro‘i i to te Sotaiete Tauturu oia ïa : « A here i te Fatu. A haere mai i te Mesia ma to outou aau atoa. Te faaruru nei te mau vahine i te mau tamataraa maere area râ, ia turu‘i tatou i ni‘a i te evanelia e i te autuahinaraa o te Sotaiete Tauturu, e mămă to tatou mau teimaha ».