Silvia H. Allred
Tauturu matamua i roto i te peresideniraa rahi o te Sotaiete Tauturu

I te rae‘a-raa-hia to’na 16 matahiti, ua roaa ia Silvia Henriquez Allred, o tei pii-noa-hia mai nei ei tauturu matamua i roto i te peresideniraa rahi o te Sotaiete Tauturu, te hoê here no te Sotaiete Tauturu.

« I muri noa mai i to’na bapetizo-raa-hia, ua piihia to‘u mama ei peresideni no te Sotaiete Tauturu i roto i ta matou amaa i El Salvador », o te tatararaa ïa a te tuahine Allred. « Ua teiaha roa oia area râ, ua parau atu vau e to‘u tuahine [no faafariu-noa-hia maira] e, ‘aita e fifi. E tauturu mai te Fatu ia oe.’ E ua na reira mau Oia ».

A tavini ai te tuahine Allred ei papa‘i parau no te Sotaiete Tauturu i piha‘i iho i to’na mama, ua maere roa oia i te mau mea o ta te Sotaiete Tauturu e pûpû i roto i te faatereraa, i te haapiiraa, i te mau aravihi no te atuaturaa i te utuafare, e i te taviniraa—te mau rave‘a o ta te tuahine Allred i parau e, te vai nei no « te mau vahine tata‘itahi o tei tauahi puai i te evanelia a Iesu Mesia ».

Ua fanauhia te tuahine Allred ia Carlos Florentino henriquez e ia Hilda Alvarenga i te 11 no Atopa 1944, i San Salvador, i El Salvador e o oia ïa te maharaa o na tamarii e va‘u. Ua haere oia i te Fare Haapiiraa Tuatoru no Arizona, e Brigham Young, e i te Fare Haapiiraa no General Francisco Morarzan Institute i El Salvador, haapii i te numera e i te mau reo.

Ua faaipoipo oia ia Jeffry A. Allred i te 7 no Setepa 1966 i te Hiero no Roto Miti. E metua raua no na tamarii e va‘u.

Ua tavini na te tuahine Allred ei misionare rave tamau i roto i te Misioni no Marite Ropu, ei peresideni no te Sotaiete Tauturu e no te Paraimere i te faito paroita e titi, e ei melo no te tomite rahi no te Feia Apî Tamahine. Ua tavini atoa oia e ta’na tane i to’na peresideniraa i te Misioni no Paraguay Asuncion e aita i maoro a‘e nei i te Pû Haapiipiiraa Misionare no te Repubilita Dominicaine. Ua riro atoa na Allred ma ei orometua no te mau Ohipa Haaparareraa Parau i Madrid, fenua Paniola.

Ua parau te tuahine Allred e, i roto i to’na oraraa, ua turu‘i oia i ni‘a i te mea o ta’na i haapii mai i roto i to’na pii matamua-raa-hia i roto i te Sotaiete Tauturu e : « Ua ite to tatou Metua i te Ao ra i to tatou mau hinaaro. Ua ite au e e horo‘a mai Oia i te puai ia tatou ».